1 အာမုဝ်ဆဲ ဝီ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ယဲတ့် ဟာဝ် ဘေ၊ တဲး ဘေ ဇမ် ခဲင် မိူင် ဒူင် ဒီ ဟာဝ် ကွယ် ဘေ တီ။ အန် ဇဝ် ဒီ ဟုဝ် တဝ် အာမျုဝ် ဂေ ဒူအီ အီ တာင် လွှိုမ် ဘေ ဘော မိုဝ်း ပ့လူမ် လွှိုမ် ဘေ။ န့ ဘော မုး ဒူအီ အာမျုဝ် ဟေထိတ်၊ ဒူအီ ဂီဂါဆိတ်၊ ဒူအီ အာမုဝ်ရိတ်၊ ဒူအီ ကာနန့်၊ ဒူအီ ဖေရေဆိတ်၊ ဒူအီ ဟီဝိတ် ဘော ဒူအီ ယေဘူဆိတ်။

2 ဒူအီ ဂေ တီ ဇဝ်ဖြာ ဟဲ့ အာပ် ဒီ ဘေ။ ဆေ ဘေ ဟဲ့ ပဲ ဂေ၊ ဘေ လုဝ် ငဝ်း ဝဲန် တူတ့် ဂေ ဘောကာဂ့လျီတ်။ အာဝ် ပွိုန် လာယ် ဘဲန် ဂိုက် ဒီ ဂေ ဒေါ မှဝ်။ အာဝ် ပွိုန် မိုဝ်း နဝ်း ကာဝေ ဂေ။

3 အာဝ် ပွိုန် ခတ် လာယ် ဒိုဝ်း ဒီ ဂေ။ ကွဲ့ တဲး ဂွန် အီဘိုန့် ဘေ ခတ် ဒိုဝ်း ဂွန် အီမာယ် ဂေ။ ဘော ဂွန် အီဘိုန့် ဂေ ကွဲ့ ဝီ ဒိုဝ်း ဘဲန် အဝ် ဘေ။

4 ယုဝ် ဂေ ကာဆုး ဂွန် အီမာယ် ဘေ ဝဲန် ဇဝ်ဖြာ၊ ဝီ ဟာဝ် ကြိုပ် ဇဝ် ပီ ကြိုပ် ဂေ။ ဆေ ဘေ ဘူင် ပါယ် တီ ဇဝ်ဖြာ ဒီ ရူ ကာဆဝ် ဒီ ဘေ ဘော ဘူင် တဲး ဘေ လိုဝ် စှိုမ် တူတ့် အူ ဇေန့်။

5 ခုဝ် အန် တီ၊ ဘေ လုဝ် ပျာတ့် ဝဲန် ကာစှူင့် လှူ ဂေ ဒီ ဇဝ် ဘဲန် မျုဝ် ဘဲန် မျုဝ်၊ ဒုး မာဝ် ဘွတ် ပီ ကြိုပ် ဂေ၊ တဲး န့ ကာလာတ့်။ ဘေ လုဝ် ဂ်ု ဝဲန် ဘော ရွင့် နာင် ကာနမ် အီ စိူဝ် နာင် အေဆူရာ တွိုန်၊ ဒုဝ့် ဝဲန် ဘော အာရိုပ် ပီ ကြိုပ် ဂေ။

6 ဘေ လုဝ် ဘူင် ပါယ် တီ ကူပ် မုး ဘေ ဒူအီ ဘွတ်၊ ဒူအီ ပီ အိုပ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ခဲ့ ကွယ် ဒူအီ ဘောကာဂ့လျီတ်၊ ဇဝ်ဖြာ ဟဲ့ ရဝ်း ဘေ၊ တဲး ဘေ ဘဲန် ဒူအီ အာမျုဝ် အန်၊ တဲး ဘေ ဘိုင် မီ အန်။

7 အာဝ် မုး၊ ဇဝ်ဖြာ ရဝ်း ဘေ ကူပ် ဟဲ့ ဘြဲ ကိူန် ဘေ လွှိုမ် ဒူအီ အာမျုဝ် ဟဝ်။ ခုဝ်၊ ဘေ ဟဲ့ ပြေတ့် လွှိုမ် ဒူအီ ဒွန် မျုဝ်။

8 ဇဝ်ဖြာ ဟဲ့ ရဝ်း ဘေ ကူပ် ရွက့် အန် ဒီ ဘေ ဘော ကူပ် ဘူင် အန်၊ တဲး န့ ဒူပ် ပီ ဒွိုမ် ကာဆဲန့် အန် ဒီ ဂေ ဂုန့် ဒင် ဘေ။ ခုဝ် အန် တီ၊ ပွုန် အန် ဟဲ့ ချွတ် ဘေ၊ တဲး ဘေ လွတ် ဘဲန် မှာယ် ခုန်ဒီခမ် ခဲင် မိူင် အဲဂိုပ် တွိုန်။

9 ပါယ် တီ တဲး ဘေ နပ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် အူ ကာဒင် တီ မုး ဇဝ်ဖြာ အီ ဘူင် ဆိူဝ် ဆိူဝ် မှာန် မှာန် ဆေဆေ။ အန် ဘော ဘူင် ဒူပ် ဆေဆေ ကာဒိက် ဆတ်ဇာ ပဲ့ ဟဲ့ ဒွါ အန်။ အန် ဇဝ် ဘော ဘျ ပွုန် အန် ဒီ ဂေ အီ ရွက့် အန် ဘော ဂေ အီ ဘူင် ဒူပ် ဒါရာ အန် ဒွန် စုဝ် ဒွန် ဘာန်၊ တဲး န့ ကော နုဝ့် အူ ဟြဲန့် စုဝ်။

10 မာလဲ၊ အန် ဇဝ် မိူဝ် တူ ကြဲ တူ ထိူင် ဒီ ဒမ် မှာပ် ဒီ ဂေ အီ ဇွင့် အန်။

11 ခုဝ်၊ တဲး ဘေ ထူမ် ဂြုဝ်း ပီ မာနုဝ် အုဝ် ဒီ ဘေ ဒေါ တီ နီ။ တဲး ဘေ ဘူင် ဒူပ် ဒါရာ ပီ ဒမ် ဇဝ်ဖြာ ဒီ ဘေ အာတိုဝ် နီ။

12 ဆေ ဘေ ဘော ထူမ် ဘော ဘူင် ဒူပ် ဒါရာ နီ၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဒီ ကာဝေ ဘေ ဘော ဘူင် ဆေဆေ ပဲ့ ဟဲ့ ဒွိုမ် ဒိူင်၊ ဒွိုမ် ကာဆဲန့် အန် ဒီ ဂုန့် ဒင် ဘေ။

13 အန် ဇဝ် ဒီ ဘော ရွက့် ဘေ ဘော မွင့်ကာရာ ဒွါ ဒီ ဘေ ဘော တဲး ဘေ ဘြဲ ကိူန်။ အန် ဇဝ် ဒီ မွင့်ကာရာ ဒွါ ဘော ဒီ လှုက်လှာန် ဘေ ဘော မာန် ဘေ ဂေ ဒူင် နာ ဘေ ဘော မာန် မာငုန် ဘေ ဂေ ဟေ နာမန် ဘေ ဘော ဖိုင် မာဘူ မာမက် ဘေ ဘောကာဂ့လျီတ်။ အန် ဇဝ် ဒီ မွင့်ကာရာ ဒွါ ဒီ ဘေ ပါယ် တီ ခဲင် မိူင် ပဲ့ ဟဲ့ ဒွိုမ် ကာဆဲန့် အန် ဒီ ဒွါ ဒီ ဂုန့် ဒင် ဘေ။

14 ခဲ့ ကွယ် ဒူအီ ဒဲင် ကာဒါယ် နီ ဘောကာဂ့လျီတ် အာဝ် မိုဝ်း ဒူအီ ခေါ အူ မျုဝ် အီ ပွိုန် မွင့်ကာရာ ဘွတ် ပီ ဘေ။ ဒူအီ ကာတဲ ဘေ တူ မိုဝ်း အီ ဟဲ့ မှန်။ ဘော ဒုဝ် ဆတ်ဒါဝါ ဘေ ဒွန် ဒုဝ် ဒီ မိုဝ်း ဂွန်။

15 ဇဝ်ဖြာ ဒီ ဂွင့် ဒီ ရဲ အာဖေ အာရေ ဘော ဆဝ် ရောဂါ ဒွန် မျုဝ် ဒီ ဘေ။ အန် ဇဝ် မိူဝ် တူ တဲး ဘေ ခမ် ဆဝ် ရောဂါ အီ ကာဆဝ် အီ ပီ ပဲ့ ဟဲ့ ဒွိုမ် ယိုဝ် ဘေ ခဲင် မိူင် အဲဂိုပ် တွိုန်။ အန် ဇဝ် ဒီ တဲး ဂေ အီ မုး ရန်ဆူ ဘေ ခမ် ဆဝ် ရောဂါ ဇိုဝ် တီ။

16 ဘေ လုဝ် ပျာတ့် ဝဲန် ဒူအီ ပဲ့ ဟဲ့ အာပ် ဇဝ်ဖြာ ဒီ ဘေ ဘောကာဂ့လျီတ်။ ဘေ တူ ပွိုန် ကာဝေ ဂေ။ ဘေ မိူဝ် တူ ပွိုန် ကြိုပ် ဇဝ် ပီ ကြိုပ် ဂေ။ ခုဝ်၊ လွင် အန် တီ န့ ဒီ ဘဲန် ပီ ဂေ ဒိန့် ယွတ့် ဂေ ခိူမ် ဒီ ဘေ။

17 ကွဲ့ တဲး ဘေ ထာင် ခဲင် နဝ်း ဘေ၊ ဒူအီ ဂေ တီ ဟဲ့ ကိူန် လွှိုမ် ဘေ။ ခုဝ်၊ ဘေ တူ ပွိုန် ဒီ ဟုဝ် တဝ် ဂေ။

18 ဘေ ကွဲ့ ယုဝ် ဂေ၊ တဲး ဘေ လှုဝ်း ပဲ့ ဟဲ့ ဘူင် ဇဝ်ဖြာ ပီ ကြိုပ် ဘေ ဒီ ခုန်ဒီခမ် ခဲင် မိူင် အဲဂိုပ် ဘော ဒီ ဂေ ဒူအီ ပီ အိုပ် အန်။

19 တဲး ဘေ လှုဝ်း ဒုက် တာင် ပဲ့ ဟဲ့ ယိုဝ် ဘေ ဘော အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ပဲ့ ဟဲ့ ဘူင် ဇဝ်ဖြာ အီ ဟဲ့ တဲး န့ လိုဝ်း ခဲ့ တာင် ပွုန် အန်။ အန် ဟဲ့ တဲး ဘေ ပွိုန် ဒီ လေး ဟာဝ် ဒါခိုယ်။ အန် ဇဝ် ဒီ ဘူင် ဒီ ဂေ ဒူအီ ပီ ယုဝ် ဘေ၊ တဲး န့ ပီ ပဲ့ ဟဲ့ ဘူင် အန် ဒီ ဂေ ဒူအီ အဲဂိုပ် တီ။

20 ဒဲင် တီ၊ ဇဝ်ဖြာ ပီ ကြိုပ် ဘေ ဒီ စ်ု မာအဲင် ဂေ မာကာအာန့် တး ဒွက် တး ပျာတ့် ဂေ၊ တဲး ဘော ဂေ အီ ဆီ ဂိတ် အီ ဟဲ့ ပြာ ဒီ တဝ်၊ ပြာ ဒီ ချြီင် ကော ယမ် တူတ့်။

21 ကူပ် န့ ပါယ် တီ ဘေ ကွဲ့ ယုဝ် ဒူအီ ဂေ တီ။ ဇဝ်ဖြာ ပီ ကြိုပ် ဘေ ဒီ ကွယ် ရိုမ် ဒူပ် ဘေ။ အန် ဇဝ် မုး ဇဝ်ဖြာ အီ မိုဝ်း အာဖုင် ဒင်ခုဝ် တာင် အီ မွှိုမ် အာမ် ဘော မွှိုမ် ယုဝ်။

22 အန် ဇဝ် ဒီ ဟုဝ် တဝ် ဒူအီ ခဲင် မိူင် ဒူင် ဒီ လိုပ် ဟာဝ် ဘေ တီ အူ ဇေန့် အီ စဲက် အီ စဲက်။ ဘေ တူ ပွိုန် ဟုဝ် တဝ် ဂေ လေး တူတ့် အူ ဇေန့်၊ ယုဝ် မာဒုဝ် ပြဲ ဟာယ် ဝီ ဘြဲ ကိူန်၊ ဝီ ဘဲန် ဒုက် ဒီ ဘေ။

23 ဇဝ်ဖြာ ဒီ အာပ် ဒူအီ ဂေ တီ ဒီ ဘေ။ အန် ဒီ တဲး န့ ဘဲန် နဝ်း ယုဝ် ကာဆဝ် ဒီ ဂေ၊ တဲး န့ ကာဝှ်ု ကာဝျှီန် ခဲင် နဝ်း ဂေ၊ တဲး ဂေ ကော လိုဝ် စှိုမ် တူတ့်။

24 အန် ဇဝ် ဒီ ဒိုဝ်း ခုန်ဒီခမ် ဂေ အာပ် ဒီ ဘေ။ ဘေ လုဝ် ငဝ်း ယမ် ဂေ၊ တဲး အီ ဟဝ် ကော ပိဝ် တူတ့် ဂေ။ န့ မိူဝ် တူ မိုဝ်း အာဆေ အီ ပွိုန် ခြဲ ဘေ ဒေါ မှဝ်။ ဘေ ဒီ ဘော ပျာတ့် ဝဲန် တူတ့် ဂေ ဒွန် အီ။

25 ဘေ လုဝ် ဒုဝ့် ဝဲန် တူတ့် အာရိုပ် ရာင် ဂေ ခဲင် ငဝ်။ ဘေ မိူဝ် တူ ပွိုန် လှယ့် ရွိုန် ဂေ ခြိဝ် ပီ ပိတ် ဂေ ဒီ အာရိုပ် ရာင် တီ။ ဘေ တူ ပွိုန် ဒိုဝ်း ဒီ ဘေ။ ဆေ ဘေ ဟီ ဘူင် ဟီ ဒိုဝ်း၊ ယုဝ် န့ ပီ ဘေ ဒီ ခြေ ယွတ့် ဂေ ခိူမ် ပီ ဒိန့် ဂေ။ ဇိုဝ် တီ န့ ဘော မုး ပီ ကာအိး ကာဆဝ် ဇဝ်ဖြာ။

26 ဘေ တူ ပွိုန် ဒိုဝ်း အာရိုပ် ရာင် ခေါ အူ မျုဝ်၊ တး လိုပ် ခဲင် ကာင် ဘေ။ ဆေ ဘေ ယီ ဒိုဝ်း တး၊ ဘေ ဒီ ဘော ခမ် အီ ပျာတ့် ဝဲန် ဘေ ပီ အာရိုပ် တီ။ ဘေ လုဝ် ကာအိး၊ လုဝ် ဇွင့် ကြုဝ် ဇိုဝ် တီ ဒွန် မျုဝ်။ ခုဝ်၊ န့ မုး ပဲ့ ဟဲ့ ဟွတ့် ဝဲန် ဇဝ်ဖြာ။”