1 အာနီ န့ မုး ဒါရာ ဒွန် မျုဝ် ဘော ပီ ဒမ် အုန် ဇဝ်ဖြာ ပီ ကြိုပ် ဘေ ဒီ ဘေ၊ တဲး အုဝ် ဝီ မာနုဝ် ဘေ၊ တဲး ဘေ ဘူင် ဒူပ် ဒေါ ကွယ် ဘေ ခဲင် မိူင် ဒူင် ဒီ ဟာဝ် ကွယ် ဘေ ဝါယ် ကာလုဝ်း ဘေ ဘ့လဲင် ယောဒါန်။ 2 ဘော စုဝ် ဘေ၊ ဘော စုဝ် လှုက်လှာန် ဘေ၊ တဲး ဘေ ရုဝ်ဆေ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ တဲး ဘေ ဒူပ် ဒါရာ အန် ဇဝ်၊ တဲး န့ ပီ ပီ ကာလာင် အုဝ် ဒီ ဘေ နီ။ ပါယ် တီ န့ ဒီ တဲး အာဆာက် ဘေ တူင့်၊ တဲး ဘေ ပွိုန် ဒီ ကွယ် လှေန့် ခဲင် မိူင် တီ။

3 ဘေ ဒူအီ အီဆာရေလ၊ တဲး ဘေ ထူမ် ဘော ဘူင် ဒူပ် ဒါရာ တီ ဒွန် မျုဝ်၊ တဲး ဘေ ပွိုန် ဒီ ကွယ် ဒါခိုယ် ဘဲန် ဒူအီ အာမျုဝ် တာင် ခဲင် မိူင် ဘွတ် မိူင် မွှိုမ် တီ။ တဲး န့ ဘော ဒူပ် ပဲ့ ဟဲ့ ဒွိုမ် ကာဆဲန့် ဇဝ်ဖြာ ဒီ ဂုန့် ဒင် ဘေ။

4 ဘေ ဒူအီ အီဆာရေလ၊ တဲး ဘေ ထူမ်။ ဇဝ်ဖြာ ပီ ကြိုပ် အေ၊ အန် မုး ဇဝ်ဖြာ အူ ကာဒင်။ 5 ဘေ လုဝ် ရွက့် အန် ဇဝ် တီ၊ တဲး ဘော နဝ်း ဘော တူတ့် ရွက့် အန်။ ခဲ့ ပွိုန် ဘေ ရွက့် ခဲင် နဝ်း၊ ခဲ့ မိုဝ်း ဘေ အာငျာန်၊ ခဲ့ မိုဝ်း ဘေ ပ့လူမ်၊ ဇိုဝ် တီ ဘေ လုဝ် ဒိုဝ်း တူတ့် ဒွန် မျုဝ်၊ ဝီ ရွက့် အန် ဇဝ်။ 6 ဒါရာ ပီ မာနုဝ် အုဝ် ဒီ ဘေ အာတိုဝ် နီ ဘေ လုဝ် အုန် ခဲင် နဝ်း၊ ကွဲ့ တဲး ဘေ ပိဝ် ဒေါ မှဝ်။ 7 တဲး ဘေ ဒိုဝ်း ဒါရာ တီ၊ ဝီ မာနုဝ် ဂွန် ဘေ။ ဘေ ဘော ကွယ် ခဲင် ကာင် ဘော ဟာဝ် ဒူပ် န့တေန့်၊ ဘေ ဘော ဒီလှဝ်၊ ဘေ ဘော ယိတ့်၊ တဲး ဘေ လာယ် ကာမွုန် လာယ် ခဲ လွင် ဒါရာ တီ။ 8 တဲး ဘေ ဒဲမ် ဂြုဝ်း အန်၊ ပက် ဒိုက် ဒီ ဒဲ ဘေ ဘော ပက် ဒိုက် ဒီ ကာတဝ်း ဘေ၊ တဲး န့ ဘဲန် အီ ဒွါ ဆာဒိက် ဒီ ဘေ ဆေဆေ။ 9 တဲး ဘေ ဒဲမ် ဒါရာ တီ၊ ဒိုက် ဒီ ရွင့် ဘာင် မာလုဝ်း ကာင် ဘေ၊ ဘော ဒီ ရွင့် ဘာင် မာလုဝ်း ဝဲင် ဘေ။

10 ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဟဲ့ ဒွိုမ် ကာဆဲန့် ဒီ ဂုန့် ဒင် ဘေ အီ မုး အာဘြာဟမ် ဘော အာဆဲက် ဘော အာကူပ် တဝ်း၊ အန် ဒီ တဲး ဘေ ကွယ် ခဲင် မိူင် အီ မိုဝ်း ရဲင်၊ အီ တာင်၊ အီ စာ။ အန် ဒီ တဲး ဘေ ကွယ် ဘော ခဲင် မိူင် ပီ တူ ကာဒုး ဘေ ဒီ ဒဲ ဒီ ဘူင်။ 11 အန် ဒီ ဘော တဲး ဘေ ကွယ် ခဲင် ကာင် အီ ဟဲ့ မိုဝ်း ကြုဝ် ဘွတ် ဘော ကြုဝ် မွှိုမ် အီ ဟဲ့ နုဝ့် နာ ခဲင်၊ အီ မုး ကြုဝ် ပီ တူ ကာဒုး ဘေ ဒီ ကာဇု အုန်။ အန် ဒီ ဘော တဲး ဘေ မိုဝ်း အိုမ် ခိုမ် ပီ တူ ကာဒုး ဘေ ဒီ ဂိုဝ်း။ ဘော မာန် မာငုန် ဂေ ဟေ နာမန် ပီ တူ ကာဒုး ဘေ ဒီ ဆမ်။ ဒေါ တဲး ဇဝ်ဖြာ ဘေ ကွယ် ခဲင် မိူင် တီ၊ ဘေ ဒီ ဘော ပွိုန် ဒီ ဟူမ် ဖဲ ဟူမ် ကိူန်။ 12 ခုဝ်၊ အုဝ် တဝ်း၊ တဲး ဘေ ဆာဒိက်၊ ကွဲ့ တဲး ဘေ ပိဝ် ဇဝ်ဖြာ အီ ဟဲ့ ချွတ် လေး ဘေ ခဲင် မိူင် အဲဂိုပ် အီ မုး ဒူင် ပဲ့ ဟဲ့ ဒွိုမ် ဘဲန် ဘေ မှာယ် အီ ဟဝ်။

13 တဲး ဘေ ရုဝ်ဆေ ဇဝ်ဖြာ ပီ ကြိုပ် ဘေ။ တဲး ဘေ ကြိုပ် မီ အန် ဇဝ် အူ ကာဒင် တီ။ ခဲ့ ပီ ဒိူင် ပီ ကာဆဲန့် ဘေ၊ တဲး ဘေ တဲး ဇဝ်ဖြာ ထူမ်။ 14 ကွဲ့ တဲး ဘေ ကြိုပ် ဇဝ်ဖြာ ပေါ အူ ကာဒင် အီ မုး ပီ ကြိုပ် ဂေ ဒူအီ အီ ကွယ် ခူပ် ဘေ။ 15 ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ အီ ဟဲ့ ကွယ် ရိုမ် ဒူပ် ဘေ၊ အန် တူ ခမ် ဘေ ကြိုပ် ဇဝ် ပေါ ကာဒင်။ ဆေ ဘေ ယီ ဘူင် ပါယ် တီ အန် ဒီ ရူ ကာဆဝ် ဒီ ဘေ။ နဝ်း ရူ အန် ဒီ ပီ ငဝ် အီ ကာဆိုမ် ဘေ၊ ဘူင် တဲး ဘေ လိုဝ် စှိုမ် တူတ့်၊ တူ တဲး ဘေ ပွိုန် ဒီ ကွယ် ခဲင် မိူင် ဘေ။ 16 ကွဲ့ တဲး ဘေ ထေဝ် နဝ်း အန် ဇဝ် အီ မုး ဇဝ်ဖြာ ပီ ကြိုပ် ဘေ။ ကွဲ့ ဘူင် ပီ ဒွိုမ် ဘူင် ဘေ ဒေါ ကွယ် ဘေ ဒီ ဒူင် စိူဝ် မာဆာ တွိုန်။^a 17 ဘေ လုဝ် ဘူင် ဒူပ် ဆီချာ ဒါရာ တီ၊ တဲး န့ ကော ဇေ့ တူတ့် ဒွန် မျုဝ် ခဲ့ ပီ ဒမ် အုန် ဇဝ်ဖြာ ဒီ ဘေ။ 18 တဲး ဘေ ဘူင် နာ ဆိူဝ် နာ မှာန်၊ ဘူင် နာ ဘွတ် နာ မွှိုမ် အီ လဝ့် နဝ်း ဇဝ်ဖြာ၊ တဲး ဘေ ဘော ဘျုဝ် ဒါခိုယ်၊ ပွိုန် ဒီ ဘိုင် မိူင် ဘွတ် မိူင် မွှိုမ် ပဲ့ ဟဲ့ ကာဆဲန့် ဇဝ်ဖြာ ဒီ ဒွါ ဒီ ဂုန့် ဒင် ဘေ။ 19 ဘေ ဒီ ဘော ပွိုန် ဒီ ဟုဝ် တဝ် ရန်ဆူ ဘေ ဘောကာဂ့လျီတ်၊ တဲး န့ ပီ ပဲ့ ဟဲ့ ဒွိုမ် ကာလာင် ဇဝ်ဖြာ ဒီ ဘေ။

20 နာ အာတ့် နီ ဟာဝ် ဂွန် ဘေ ဒီ ဘော ဒီမွှတ် ဘေ တဝ်း၊ ‘ဇဝ်ဖြာ ဟဲ့ ဒမ် အုန် ဒါရာ ဘဲန် မျုဝ် ဘဲန် မျုဝ်၊ တဲး အေ ဒူပ်။ မာဆေ န့ မုး လွင် ဒါင် အန်။း’ 21 ဘေ ဒီ ဘော ဝီ ဝျီ့ ဂြုဝ်း ဂေ တီ တဝ်း၊ ‘ယေ ဟဲ့ ဒွိုမ် ဘဲန် မှာယ် ခုန်ဒီခမ် ခဲင် မိူင် အဲဂိုပ်။ မာလဲ ဇဝ်ဖြာ အီ မိုဝ်း ပွုန် တာင် ဟဲ့ ချွတ် လေး ယေ။ 22 ဇဝ်ဖြာ ဟဲ့ ဘူင် အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် အီ ဘျ ပွုန် တာင် အန်။ အန် ဟဲ့ ဘူင် ဘော အီ မွှိုမ် ယုဝ် ကာဆဝ် ဒီ ဂေ ဒူအီ ခဲင် မိူင် အဲဂိုပ် ဘော ဒီ ခုန်ဒီခမ်၊ ဒီ အာမူ အာမာတ် အန် ဘော ဒီ ဒွန် အီ အီ ကွယ် ခဲင် ဟုဝ် ခုန်ဒီခမ်။ 23 အန် ဇဝ် ဟဲ့ တဲး ယေ လွတ် လေး ခဲင် မိူင် အဲဂိုပ် တီ၊ ဝီ ယဲတ့် ယေ တး ဇမ် ဒီ နီ။ အန် ဇဝ် ဟဲ့ အာပ် ကာဒါယ် နီ ဒီ ယေ၊ တဲး န့ ဒူပ် ပီ ဒွိုမ် ကာဆဲန့် အန် ဒီ ဂုန့် ဒင် အေ။ 24 ကူပ် န့ ပါယ် တီ ဇဝ်ဖြာ အီ မုး ဇဝ်ဖြာ ပီ ကြိုပ် အေ ဟဲ့ ဘ့လေး အုန် ဒါရာ၊ တဲး အေ ဘူင် ဒူပ်၊ တဲး န့ ကော ဇေ့ တူတ့် ဒွန် မျုဝ်၊ တဲး အေ ရုဝ်ဆေ အန် ဇဝ်။ ပါယ် တီ န့ ဒီ ဘဲန် အာဂျိုဝ် ဒီ အေ၊ တဲး အေ မိုဝ်း အာဆာက် အီ ဒါခိုယ် ဆေဆေ ပီ အာတိုဝ် နီ။ 25 ဆေ အေ ဂျုဝ်ဂျာ ဒီ ဘူင် ဒူပ် ဒါရာ ပီ ဒမ် အုန် အန် ဇဝ် ဒီ အေ တီ၊ ဇဝ်ဖြာ မိူဝ် ဒီ ဒွါ နဝ်း ဆိူဝ် နဝ်း မှာန် ဒီ အေ။’