အာမုဝ်ဆဲ ဘော ဝီ ဒဲ့ ကာဇု ဂေ ဒူအီ အီဆာရေလ ဘော ကာလာင် ဒီ ဂေ တဝ်း၊ “အိုယ် ဘေ ဘီနွင် အုဝ် အီ မုး ဒူအီ အီဆာရေလ၊ အာတိုဝ် နီ တဲး ဘေ ထူမ် ပီ ဒမ် ဇဝ်ဖြာ ဒီ ဘေ ဘော ဒါရာ ပီ ကာလာင် အုဝ် ဒီ ဘေ။ တဲး ဘေ ဟေန် ဘော ဘူင် ဒူပ် အာခါခ်ု။ 2 ဇဝ်ဖြာ ပီ ကြိုပ် အေ၊ အန် ဟဲ့ ကာဆဲန့် ဒီ အေ ဒေါ ကွယ် အေ ဒီ နွန် ဆီနာယ် တွိုန်။^a 3 အာဝ် မုး၊ အန် ကာဆဲန့် လွင် အန် တီ ဒီ ဂေ ဂုန့် ဒင် အေ အီ ကွယ် ဒေါ မွိုန်။ အန် ဟဲ့ ကာဆဲန့် ဒီ အေ အီ ကွယ် ဒေါ တီ နီ။ 4 ဒေါ ကွယ် ဘေ ဒီ ဒင် နွန် တွိုန်၊ ဇဝ်ဖြာ ဘော ဘေ ဟဲ့ လာယ် ဒုဝ် နာ။ ဇဝ်ဖြာ ဘော ကာလာင် ဂြုဝ်း အီ လေး ခဲင် ငဝ် ဒီ ဘေ။ 5 ဒေါ အန် တီ အုဝ် ဟဲ့ ကွယ် ဒီ ကာတဲ ဇဝ်ဖြာ ဂါယ် ဘေ။ အုဝ် ဘော ထူမ် ဂြုဝ်း ဇဝ်ဖြာ၊ ဝီ ကာလာင် ဒီ ဘေ။ ခုဝ်၊ ဘေ ဟဲ့ ယုဝ် ကာဆဝ် ငဝ် တွိုန်။ ဘေ မိူဝ် တူ ယ ဟုဝ့် ဒဲင် နွန်။”

6 ဇဝ်ဖြာ ဟဲ့ တဝ်း၊ “အုဝ် မုး ဇဝ်ဖြာ ပီ ကြိုပ် ဘေ။ အုဝ် ဟဲ့ ယဲတ့် လေး ဘေ ခဲင် မိူင် အဲဂိုပ်၊ အီ မုး ဒူင် ဘဲန် ဘေ မှာယ် အီ ဟဝ်။

7 ဒဲင် အုဝ် ကွဲ့ တဲး ဘေ ကြိုပ် ဇဝ်ဖြာ ပေါ ကာဒင်။

8 ကွဲ့ တဲး ဘေ ဘူင် အာရိုပ် မာဆေ ခေါ အူ မျုဝ်။ န့ ဘော မုး မျုဝ် အီ ကွယ် ခဲင် ဂါင်ဟြာဝ်၊ အီ ကွယ် ဒဲင် ကာဒါယ်၊ အီ ကွယ် ခဲင် အိုမ် ခြိုမ် ကာဒါယ်၊ ဘေ ကွဲ့ ကြိုပ် မာဆေ။ 9 ကွဲ့ မုတ် ဂိုပ် ကြိုပ် အာရိုပ် ရာင်။ ကွဲ့ လိုမ်လာ ဂေ။ ခုဝ်၊ န့ မုး အုဝ် ဇဝ်ဖြာ ပီ ကြိုပ် ဘေ၊ အီ တူ ခမ် ဘေ ကြိုပ် ပေါ မျုဝ်။ အုဝ် ဒီ ဒမ် မှာပ် ဒီ ဂေ အီ ဇွင့် အုဝ် ဆေဆေ၊ တဲး န့ ကော ဇမ် အူယ် စုဝ်၊ ဖွုန် စုဝ်။ 10 အုဝ် ပီ ဒီ ဝီ ရွက့် ဂေ အီ ရွက့် အုဝ် ဘော ဂေ အီ ဒူပ် ဒါရာ အုဝ် ဆေဆေ၊ တဲး န့ ကော နုဝ့် အူ ဟြဲန့် စုဝ်။

11 ကွဲ့ ဒဲ့ ပီယေန့် စိူဝ် အုဝ် အီ မုး ဇဝ်ဖြာ ပီ ကြိုပ် ဘေ။ ခုဝ်၊ အုဝ် ဒီ ဒမ် မှာပ် ဒီ ဒွန် အီ အီ ကာလာင် ပီယေန့် စိူဝ် အုဝ်။ 12 တဲး ဘေ ကမ် ဆီငဲ ဒီလှဝ်၊ တဲး န့ ဘဲန် ဆီငဲ ဘွတ်။ တဲး န့ ဘော ဒူပ် ပီ ကာလာင် ဇဝ်ဖြာ ပီ ကြိုပ် ဘေ ဒီ ဘေ။ 13 အာဒါ ဒဝ် ဆီငဲ၊ တဲး ဘေ ဂျုဝ်ဂျာ ဒီ ဘူင် ဂါန် ဘေ ဒွန် မျုဝ်။ 14 ဟီ ဇမ် ဆီငဲ မ့ဘူ၊ တဲး ဘေ ဒီလှဝ် ဘော ကြိုပ် ဇဝ်ဖြာ။ ဆီငဲ တီ ဘော ဘေ ဘော ဂွန် ဘေ၊ မှာယ် ဘေ၊ ဒုဝ် ဆတ်ဒါဝါ ဘေ ဘော ခဲတ့် အီ တး တမ် ခဲင် ကာင် ဘေ၊ ဂေ ဘောကာဂ့လျီတ် အာဝ် ပွိုန် ဘူင် ဂါန် မာဆေ။ ဂေ လုဝ် ဒီလှဝ် ပီ ဘေ ဒီလှဝ်။ 15 တဲး ဘေ လှုဝ်း ဒေါ ဟဲ့ ဘဲန် ဘေ မှာယ် ခဲင် မိူင် အဲဂိုပ် တွိုန်။ တဲး ဘေ လှုဝ်း ဘော ဇဝ်ဖြာ ပီ ကြိုပ် ဘေ အီ ဟဲ့ တာ ပွုန် တာင် အန်၊ ချွတ် လေး ဘေ။ ကူပ် န့ ပါယ် တီ ဇဝ်ဖြာ ပီ ကြိုပ် ဘေ ဟဲ့ စ်ု ဘေ ကမ် ဆီငဲ ဒီလှဝ်။

16 တဲး ဘေ ရုဝ်ဆေ ဂုန့် မာ ဘေ၊ တဲး န့ ဒူပ် ပီ ကာလာင် ဇဝ်ဖြာ ပီ ကြိုပ် ဘေ။ ဆေ ဘေ ဘူင် ပါယ် တီ ဘေ ဒီ ဘျုဝ် ဒါခိုယ် ဘော အာဆာက် ဘေ ဒီ တူင့်၊ တဲး ဘေ ပွိုန် ဒီ ကွယ် လှေန့် ခဲင် မိူင် ပီ ဒီ အာပ် ဇဝ်ဖြာ ဒီ ဘေ။

17 ကွဲ့ ငဝ်း ယမ် အာဆာက် အီ ဟဝ်။

18 အီမာယ် ကွဲ့ လုတ့် အီဘိုန့် အီ။ အီဘိုန့် ကွဲ့ မိုဝ်း နဝ်း ကိူန်။

19 ကွဲ့ ပြာ ကြုဝ်ကြာမ် အီ။

20 ဆေ မဲ ဘဲန် ဆက်ဆေ ဒေါ ဆုင်ဖျာတ် ဂေ အာမူ အီ၊ ကွဲ့ ကာလုဝ် လွင် အီ ဟဝ်။

21 ကွဲ့ တဲး ဘေ လှယ့် အီဘိုန့် အီ ဟဝ်။ ကွဲ့ တဲး ဘေ မိုဝ်း နဝ်း ဆီ ပွိုန် ကာင် အီ ဟဝ် ဘော ကာဒါယ် အန်၊ မှာယ် အန်၊ မာမက် မာလုဝ် အန်၊ ဘော ခဲ့ ပီ မိုဝ်း အန် ကြုဝ်ကြာမ် ဘဲန် မျုဝ် ဘဲန် မျုဝ်။”

22 အာတီ န့ မုး ဒါရာ ပီ ကာလာင် ဇဝ်ဖြာ ဒီ ဘေ ဘောကာဂ့လျီတ် ဒေါ ကွယ် အန် ဒဲင် နွန် တွိုန်။ ဒေါ အန် တီ အန် ဟဲ့ ကာလာင် ဂြုဝ်း တာင် ဒီ ဘေ၊ တဲး န့ လေး ခဲင် ငဝ် ဘော ခဲင် န့အု ဘော ခဲင် အပ် ဝွင့် အီ ဟေတ့် ကာဆဝ်။ ဒဲင် ဒါရာ ဇဝ်ဖြာ တီ၊ အန် ဇဝ် မိူဝ် တူ ဒွါ ဒါရာ ပေါ မျုဝ်။ ဟဲ့ ဟွတ့်၊ အန် ဇဝ် ဟဲ့ ဝီ ဒဲမ် အုန် ဒါရာ တီ ဒီ မာဝ် အာ ဒီဖ့လာင်၊ ဝီ အာပ် ဒွါ ဒီ အုဝ်။

23 ဒေါ ယိုဝ် ဘေ ဂြုဝ်း အီ လေး ခဲင် အပ် ဝွင့် ဘော ယိုဝ် ငဝ် တာင် အီ ဟဲ့ ပ့လိုက် နွန် တွိုန်၊ ဂေ ဒါ တာင် အီ ယဲတ့် ဘေ ဘော ဂေ ဒါ တာင် အီ အိုပ် ခဲင် ခြိုဝ် ဘေ ဒွန် အီ၊ ဂေ ဘော ဝီ တး ဒူင် ကွယ် အုဝ်၊ ကာလာင် ဒီ အုဝ် တဝ်း၊ 24 ‘ဇဝ်ဖြာ ပီ ကြိုပ် အေ ဟဲ့ ဘျ အာဖုင် ဒင်ခုဝ် အန် ဘော ပွုန် အန် အီ တာင် ကာဆဝ်၊ တဲး ယေ ယိုဝ်။ ယေ မိူဝ် ဟဲ့ ယိုဝ် ဂြုဝ်း အန် အီ ဟဲ့ လေး ခဲင် ငဝ်။ အာတိုဝ် နီ၊ ယေ ဟဲ့ နပ်၊ ဇဝ်ဖြာ ဟဲ့ ကာလာင် ဂြုဝ်း ဒီ ဒူအီ။ ဂေ ယီ တူ ယမ်။ 25 ယေ မိူဝ် တူ ဆီ ယမ်။ ဆေ ဇဝ်ဖြာ ပီ ကြိုပ် အေ ဒီ ဝီ ကာလာင် ဂြုဝ်း ဒီ အေ ပေါ အူ ဇေန့်၊ တဲး န့ လေး ခဲင် ငဝ် အီ ကုး တာင်၊ ယေ ဒီ ဘော ယမ် အာခ်ု မှာန်။ 26 ခုဝ်၊ အာဝ် မိုဝ်း ဒူအီ ခေါ အူ ဝီ အီ ဟဲ့ ယိုဝ် ဂြုဝ်း ဇဝ်ဖြာ လေး ခဲင် ငဝ် အီ ကုး တာင် ပါယ် တီ ဝီ လွတ် ယမ်။ 27 မဲ အာမုဝ်ဆဲ အီ မုး ဒါ ကာညာ ယေ၊ တဲး မဲ အူ ဝီ ဟာဝ် ကွယ် ကာတတ် အန် ဇဝ်၊ တဲး မဲ ထူမ် ပီ ကာလာင် ဇဝ်ဖြာ အီ မုး ဇဝ်ဖြာ ပီ ကြိုပ် အေ။ ခဲ့ ပီ ဆီ ကာလာင် အန် ဒီ ယေ၊ တဲး မဲ ဝီ ကာလာင် ဒီ ယေ။ ယေ ဒီ ထူမ် ဘော ဘူင် ဒူပ် တူတ့် ဒွန် မျုဝ်။’

28 ဇဝ်ဖြာ ဟဲ့ ယိုဝ် ဂြုဝ်း ပဲ့ ဟဲ့ ကာလာင် ဘေ ဒီ အုဝ် တီ။ အန် ပီ ဝီ တဝ်း ဒီ အုဝ်၊ ‘အုဝ် ဟဲ့ ဟွတ့် ယိုဝ် ဂြုဝ်း ပီ ကာလာင် ဒူအီ ဂေ တီ။ ဂြုဝ်း ပီ ကာလာင် ဂေ တီ ဒွန် မျုဝ် ဟဲ့ မှာန်။ 29 အုဝ် ဘော ကာပြာ ကာဆဝ်၊ တဲး ဂေ မိုဝ်း နဝ်း ပါယ် တီ။ န့ ဟဲ့ မွှိုမ် အာခါခ်ု။ ဆေ ဂေ ဘော ရုဝ်ဆေ အုဝ် ဘော ဘူင် ဒူပ် ဆေဆေ ပီ စ်ု အုဝ်၊ ဂေ မိူဝ် ဒီ ဘျုဝ် ဒါခိုယ် ဆေဆေ ဘော စုဝ် ဂေ ဘော စုဝ် လှုက်လှာန် ဂေ ဒွန် စုဝ် ဒွန် ဘာန်။

30 တဲး မဲ ဝီ ကာလာင် ဒီ ဂေ၊ တဲး ဂေ ဝီ ဝေန့် ဒူင် ကွယ် ထိုပ် ဘိက် ဂေ။ 31 အီ မုး မဲ၊ တဲး မဲ ကွယ် ဒူပ် အုဝ် ဒီ နီ။ အုဝ် ဒီ ဒွါ ဒါရာ အုဝ် ဒီ မဲ၊ ဒွါ ဘော ပီ ဒမ် အုဝ် ဒွန် မျုဝ်၊ တဲး မဲ ဝီ မာနုဝ် ဂေ၊ တဲး ဂေ ဘူင် ဒူပ် ဆီချာ ဒေါ ကွယ် ဂေ ခဲင် မိူင် ပီ ဒီ အာပ် အုဝ် ဒီ ဂေ၊ တဲး န့ ဘဲန် မိူင် ဂေ။’ ခဲ့ တီ ဇဝ်ဖြာ ဟဲ့ ကာလာင် ဒီ အုဝ်။

32 အိုယ် ဘေ ဒူအီ အီဆာရေလ၊ တဲး ဘေ ဘူင် ဒူပ် ခဲ့ ပီ စ်ု ဇဝ်ဖြာ ဘေ ဘူင် ဒွန် မျုဝ်။ ကွဲ့ တဲး ဘေ လုတ်၊ ဘေ ဝဲန် ခေါ အူ မျုဝ်။ တဲး န့ ပီ ဘေ ဟာဝ် ဆိူဝ် ဆိူဝ် ဒူပ် န့တေန့်၊ ကွဲ့ ဝး နာ ဂ နာ အး။ 33 တဲး ဘေ ဆာဒိက် ဒီ ဘူင် ဒူပ် ဒါရာ တီ။ ဆေ ဘေ ဘူင် ပါယ် တီ ဘေ ဒီ ပွိုန် နာ ဘွတ် နာ မွှိုမ်။ အာဆာက် ဘေ ဒီ ဘော တူင့်။ ဘေ ဘော ပွိုန် ဒီ ကွယ် လှေန့် ခဲင် မိူင် ပီ ဒီ အာပ် အုဝ် ဒီ ဘေ၊ တဲး န့ ဘဲန် မိူင် ဘေ။