1 အာမုဝ်ဆဲ ဝီ တဝ်း၊ “အိုယ် ဘေ ဒူအီ အီဆာရေလ၊ ဒေါ တီ နီ တဲး ဘေ ထူမ် ပီ ဒီ ဒမ် ဇဝ်ဖြာ ဒီ ဘေ ဘော ထူမ် ဒါရာ ဇဝ်ဖြာ ပီ ဒီ မာနုဝ် အုဝ် ဒီ ဘေ။ တဲး ဘေ ဘော ဘူင် ဒူပ်၊ ကွဲ့ တဲး ဘေ ယမ် ဘော တဲး ဘေ ပွိုန် ဒီ ဘိုင် မိူင် ပီ ဒီ ဒွါ ဇဝ်ဖြာ ဒီ ဘေ။ အန် မုး ဇဝ်ဖြာ ပီ ကြိုပ် ဂုန့် ဒင် ဘေ။ 2 ဂြုဝ်း ပီ ဒီ ကာလာင် အုဝ် ဒီ ဘေ တီ၊ ဘေ ကွဲ့ ပွါ၊ ကွဲ့ တဲး န့ လွှိုမ်။ ဘေ ဘော ကွဲ့ ဒိုဝ်း လေး၊ ကွဲ့ တဲး န့ ယူမ်။ တဲး ဘေ ထူမ် ဆီချာ ဒါရာ ဇဝ်ဖြာ ပီ ကာလာင် အုဝ် ဒီ ဘေ နီ။ အန် မုး ဇဝ်ဖြာ ပီ ကြိုပ် ဘေ။

3 ဘေ မိူဝ် ဟဲ့ ဟွတ့် ယိုဝ် ပဲ့ ဟဲ့ ဘူင် ဇဝ်ဖြာ ဒီ ဒူင် စိူဝ် ဘာလဘေအူရာ တွိုန်။ အန် ဇဝ် ဟဲ့ ပျာတ့် ဝဲန် ဂေ ဒူအီ ဒွန် အီ အီ ကြိုပ် ဇဝ် ဘာလ ဒီ ဒူင် စိူဝ် ဘေတ်ဘေအူရာ။ 4 ဘေ အီ ကွယ် ကာဒိုက် ကာဒဝ့် ဒီ ဇဝ်ဖြာ ပီ ကြိုပ် ဘေ ဘော တူ ဝဲန် အန်၊ ဘေ မိူဝ် တူ ယမ်၊ ဟဲ့ မိုဝ်း အာဆာက် ကော ဇမ် ဒေါ တီ နီ။

5 ဒါရာ ပီ ကာလာင် ဇဝ်ဖြာ ဒီ အုဝ်၊ အုဝ် မိူဝ် ဟဲ့ ဝီ မာနုဝ် ဘေ ဒွန် မျုဝ်၊ တဲး ဘေ ဘူင် ဒူပ် ဒါရာ တီ ဒေါ ဟာဝ် ကွယ် ဘေ ခဲင် မိူင် ပီ ဒီ အာပ် ဇဝ်ဖြာ ဒီ ဘေ။ 6 တဲး ဘေ ဒူပ် ဆီချာ ဒါရာ တီ။ ဆေ ဘေ ဘူင် ပါယ် တီ ဂေ ဒူအီ အာမျုဝ် ဟဝ်၊ ဂေ ဒီ ယိုဝ် လွင် မိုဝ်း ဘေ အာငျာန် ဘော လွင် ဘဲန် မျုဝ် ဘဲန် မျုဝ် အီ ကာလှုး ဆီချာ ဒီ နဝ်း ဘေ။ ဒေါ ယိုဝ် ဂေ လွင် ပီ ဒမ် ဇဝ်ဖြာ တီ၊ ဂေ ဒီ ဘော တဝ်း၊ ဒူအီ အာမျုဝ် တာင် နီ၊ ဂေ မုး ဒူအီ အီ မိုဝ်း အာငျာန်၊ အီ နပ် ဘဲန် မျုဝ် ဘဲန် မျုဝ်။ 7 ဂေ ဒူအီ အာမျုဝ် ဟဝ်၊ ဂေ ပီ ဘော တာင် ခဲ့ မှဝ် မိူဝ်၊ ဂေ ယီ တူ မိုဝ်း ဇဝ်ဖြာ အီ ကွယ် ချြီ့ ဂေ၊ တဲး န့ ပီ ဇဝ်ဖြာ ပီ ကြိုပ် အေ အီ ကွယ် ချြီ့ အေ ဒေါ ဆာခိုဝ် အေ ဒီ အန်။ 8 ဂေ ဒူအီ အာမျုဝ် ဟဝ် တီ၊ ဂေ ပီ ဘော တာင် ခဲ့ မှဝ် မိူဝ်၊ ဂေ ယီ တူ မိုဝ်း ဒါရာ အီ ပီ ဒါရာ ပီ မာနုဝ် အုဝ် ဒီ ဘေ အာတိုဝ် နီ။

9 တဲး ဘေ ဆာဒိက်၊ ကွဲ့ တဲး ဘေ ပိဝ် လွင် ပဲ့ ဟဲ့ ယိုဝ် ဘေ။ တဲး န့ ကွယ် ခဲင် နဝ်း ဘေ ဘော စုဝ် ဘေ၊ တဲး ဘေ ဝီ မာနုဝ် လွင် အန် တီ ဒီ လှုက်လှာန် ဘေ။ 10 တဲး ဘေ လှုဝ်း ဒေါ ဟဲ့ ကွယ် ဘေ ဒီ အာတ့် ဇဝ်ဖြာ ပီ ကြိုပ် ဘေ ဒီ နွန် ဆီနာယ် တွိုန်။ ဒေါ အန် တီ ဇဝ်ဖြာ ဟဲ့ တဝ်း ဒီ အုဝ်၊ ‘ဒဲ့ တး ကာဇု ကာဒိုမ် ဒူအီ ဂေ တီ၊ တဲး ဂေ ထူမ် ဂြုဝ်း အုဝ်၊ တဲး ဂေ ဟေန် ဒီ ရုဝ်ဆေ အုဝ် ဆေဆေ ဘော စုဝ် ဂေ ဒေါ ကွယ် ဂေ ခဲင် မိူင် နီ၊ တဲး ဂေ ဘော နပ် ဒီ ဝီ မာနုဝ် ဘော လှုက်လှာန် ဂေ။’ 11 တဲး ဘေ လှုဝ်း ဒေါ ဟဲ့ တး ကွယ် ဘေ ဒီ ဒင် နွန် အီ မိုဝ်း ငဝ် အီ ကုး စာ ကော ဇမ် ဂါင်ဟြာဝ်၊ မိုဝ်း ဘော န့အု ဝွင့် အီ ပ့လိုက် နွန် တီ။ 12 ပန် တီ ဇဝ်ဖြာ ဟဲ့ ကာလာင် ဂြုဝ်း ဒီ ဘေ၊ တဲး န့ လေး ခဲင် ငဝ် တီ။ ဘေ မိူဝ် ဟဲ့ ယိုဝ် ဂြုဝ်း တီ၊ ယီ တူ ယိုဝ် အာရိုပ် ဇဝ်ဖြာ။ န့ မိုဝ်း မီ ဂြုဝ်း။ 13 ဇဝ်ဖြာ ဟဲ့ ကာလာင် ဒီ ဘေ လွင် ပီ ကာဆဲန့် အန် ဒီ ဘေ အီ မုး ဒါရာ ဂိုဝ် ညွင့်။ အန် ဇဝ် မိူဝ် ဟဲ့ စ်ု ဘေ၊ တဲး ဘေ ဘူင် ဒူပ် ဆီချာ ဒါရာ တီ။ ဟဲ့ ဟွတ့်၊ အန် ဟဲ့ ဒဲမ် ဒိုက် ဒီ မာဝ် အာ ဒီဖ့လာင် တွိုန်။ 14 ဒေါ အန် တီ ဇဝ်ဖြာ ဟဲ့ စ်ု အုဝ် မာနုဝ် ဘေ ဒါရာ ဘဲန် မျုဝ် ဘဲန် မျုဝ် ပီ လုဝ် ဘူင် ဒူပ် ဘေ ခဲင် မိူင် ဒူင် ဒီ ဟာဝ် ကွယ် ဘေ တီ။

15 ဒေါ ကွယ် ဘေ ဒီ ဒင် နွန် ဆီနာယ် တွိုန်၊ ဘေ ဟဲ့ ယိုဝ် ဂြုဝ်း ဇဝ်ဖြာ အီ ဟဲ့ လေး ခဲင် ဂါင်ဟြာဝ်။ ဘေ ယီ တူ ယိုဝ် အာရိုပ် အန် ဇဝ်။ ခုဝ် အန် တီ၊ တဲး ဘေ ဆာဒိက်။ 16 ကွဲ့ တဲး ဘေ ဘူင် မှာပ် ကူပ် ဘူင် ဘေ အာရိုပ် ရာင်။ န့ ဘော မုး အာရိုပ် အီဘိုန့်၊ အာရိုပ် အီမာယ် 17 ဘော အာရိုပ် ဒုဝ် ဆတ်ဒါဝါ အီ ဟာဝ် ဒဲင် ကာဒါယ်၊ အာရိုပ် မာဆိမ် အီ ဘိုန့် ခဲင် ဘ့လေန့်၊ 18 အာရိုပ် ဒုဝ် အီ နပ် ဒီ မွိုန် ဘော ဒုဝ် အီ လှန် လှိန်၊ ဟာဝ် ဒီ ကာဒါယ် ဘော အာရိုပ် မာဂါ အီ ကွယ် ခဲင် အိုမ်၊ ကွဲ့ တဲး ဘေ ဘူင် အာရိုပ် ဇိုဝ် တီ ဒေါ မှဝ်။ 19 ဆေ ဘေ ယွတ် ခဲင် ဘ့လေန့် ဘော ယိုဝ် ဆီငဲ၊ မာဂျီန်၊ ဆီမန့် ဘော တူတ့် ဒွန် မျုဝ် အီ ကွယ် ခဲင် ဂါင်ဟြာဝ်၊ ကွဲ့ တဲး ဘေ ကြိုပ်၊ ကွဲ့ တဲး ဘေ ဒူပ် ပီ ကာဆုး အီ ဟဝ် ဒီ ဘေ။ ခုဝ်၊ ဇိုဝ် တီ ဒွန် မျုဝ် ဇဝ်ဖြာ ပီ ကြိုပ် ဘေ ဟဲ့ ဘူင် တဲး န့ ဘဲန် အာဂျိုဝ် ဒီ ဒူအီ ဘောကာဂ့လျီတ် ဒဲင် ကာဒါယ် နီ။ 20 အီ မုး ဘေ၊ ဇဝ်ဖြာ ဟဲ့ ထုတ် လေး ဘေ ခဲင် မိူင် အဲဂိုပ် အီ ပီ ငဝ် အီ ဒါတ် ကာဆဝ် ပီ ဒူင် စိုမ် အီ ဒီ ဟိန်။ အန် ဇဝ် ဟဲ့ ထုတ် လေး ဘေ၊ တဲး ဘေ ဝီ ဘဲန် ဒူအီ ပီ အိုပ် အန် ပီ ပီ ဘဲန် ဘေ ဒေါ တီ နီ နီ။

21 ကူပ် ပဲ့ ဟဲ့ ဘူင် ဘေ၊ ဇဝ်ဖြာ ဟဲ့ ဝီ ရူ ဒီ အုဝ် ဘော ကာလာင် ဂြုဝ်း ဒိူင် တဝ်း၊ အုဝ် တူ ပွိုန် ဒီ ကာလုဝ်း အိုမ် ဘ့လဲင် ယောဒါန်။ အန် မိူဝ် တူ တဲး အုဝ် လိုပ် ခဲင် မိူင် ပီ ဒီ ဒွါ အန် ဒီ ဘေ။ 22 ခုဝ် အန် တီ၊ အုဝ် ဒီ ကာဒုး ဒီ ယမ် ခဲင် မိူင် နီ။ အုဝ် အာဝ် ဟူ ကာလုဝ်း အိုမ် ဘ့လဲင် ယောဒါန်။ အီ မုး ဘေ၊ အာဝ် လှေန့် ဘေ ဒီ ပွိုန် ဒီ ကာလုဝ်း ဇမ် ခဲင် မိူင် ဘွတ်၊ မိူင် မွှိုမ် ပီ ဒီ ဒွါ ဇဝ်ဖြာ ဒီ ဘေ၊ တဲး န့ ဘဲန် မိူင် ဘေ။ 23 တဲး ဘေ ဆာဒိက် ဆီချာ၊ ယုဝ် ဘေ ပိဝ် ပဲ့ ဟဲ့ ကာဆဲန့် ဇဝ်ဖြာ ဒီ ဘေ အီ မုး ဇဝ်ဖြာ ပီ ကြိုပ် ဘေ။ ကွဲ့ တဲး ဘေ ဘူင် အာရိုပ် ရာင် ပဲ့ ဟဲ့ ခြဲ ဇဝ်ဖြာ ဘေ ဘူင်။ အန် မုး ဇဝ်ဖြာ ပီ ကြိုပ် ဘေ။ 24 ခုဝ်၊ ဇဝ်ဖြာ ပီ ကြိုပ် ဘေ တီ၊ အန် ဘော ပီ ငဝ် အီ နပ် ဒီ တဲး န့ ကာဆိုမ် ဒွန် မျုဝ်။ အန် ဘော မုး ဇဝ်ဖြာ အီ တူ ခမ် အီ ကြိုပ် ပေါ အူ မျုဝ် ဒဲင် အန်။

25 ဆေ ဘေ ဟဲ့ ကွယ် လှေန့် ခဲင် မိူင် တီ၊ ဆေ ဘေ မိူဝ် ဟဲ့ မိုဝ်း လှုက်လှာန် ဒေါ အန် တီ၊ ဆေ ဘေ ဝီ ဝဲန် ဂြုဝ်း ဇဝ်ဖြာ ဘော ဘူင် အာရိုပ် ရာင် ပဲ့ ဟဲ့ တဝ်း ဇဝ်ဖြာ ဘေ တူ ပွိုန် ဘူင် ဒေါ မှဝ်၊ န့ ဒီ ဘဲန် မှာပ် တာင် ဒီ ဘေ။ န့ ဒီ ဘော တဲး ဇဝ်ဖြာ ရူ ကာဆဝ် ဒီ ဘေ။ 26 လွင် အန် တီ အုဝ် ကာလာင် ဒီ ဘေ အာတိုဝ် နီ၊ တဲး ဘော ဂါင်ဟြာဝ် ဘော ကာဒါယ် ထူမ်။ ဆေ ဘေ ဒီ ဘူင် ပါယ် တီ ဘေ ဒီ စှိုမ် တူတ့် ခဲင် မိူင် တီ။ ဘေ တူ ပွိုန် ဒီ ကွယ် လှေန့် ခဲင် မိူင် ဒူင် ဒီ ဟာဝ် ကွယ် ဘေ နာ တ ဘ့လဲင် အိုမ် ယောဒါန် တီ။ အာဝ် လှေန့် ဘေ ဒီ ဟာဝ် လိုဝ် စှိုမ် တူတ့် ဘောကာဂ့လျီတ်။ 27 ဇဝ်ဖြာ ဒီ ဘူင် တဲး ဘေ ကွယ် ကာယဝ်း ကာရေး ကာတဲ ဂေ ဒူအီ အာမျုဝ် ဟဝ်။ ဘေ ဒီ ဂိတ် မီ အီ စဲက် ဘော လုဝ် ကွယ် ကာတဲ ဂေ ဒူအီ အာမျုဝ် ဟဝ် ခဲင် မိူင် အီ ဟဝ် ပဲ့ ဟဲ့ ဟုဝ် တဝ် ဇဝ်ဖြာ ဒီ ဘေ။ 28 ခဲင် မိူင် ဂေ တီ၊ ဘေ ဒီ ဝီ ကြိုပ် ဇဝ် ဘဲန် မျုဝ် ဘဲန် မျုဝ် ပီ ဘူင် ဂေ ဒူအီ တာ ဒဲ ဂေ။ န့ မုး အာရိုပ် ဟေ ဂေ မာဝ် အီ တူ ပွိုန် ယိုဝ် မာဆေ၊ တူ နပ် ဒီ ထူမ် ဂြုဝ်း၊ တူ နပ် ဒီ ဟူမ် မာဆေ၊ တူ ပွိုန် ယိုဝ် အုး မာဆေ။ 29 ဒေါ ကွယ် ဘေ ဒီ တီ၊ ဆေ ဘေ ကော ဝီ ဟြေတ့် ဇဝ်ဖြာ၊ ဘေ ဒီ ယိုဝ် အန်။ ဘေ ယီ လုဝ် တဲး ဘော နဝ်း ဘော ဖွိုမ် ဘေ ဘော တူတ့် ဟြေတ့် အန် ဇဝ်၊ တဲး ဘေ ပွိုန် ဒီ ကာတုန့် အန်။ 30 ဆေ ဘေ ဟီ ဟွတ့် ခမ် ဒုက် ဇိုဝ် တီ ဒွန် မျုဝ်၊ ဘေ ဒီ ဝီ ဘိုင် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဘေ ဒီ ဘော ထူမ် ဂြုဝ်း အန်။ 31 ခုဝ်၊ အန် ဇဝ် ဘော မုး ဇဝ်ဖြာ အီ နပ် ဒီ ကာဝေ အီ ဆေဆေ။ အန် ဇဝ် တူ ဘ့လေး တူ ဝဲန် ဘေ ဒေါ မှဝ်။ အန် မိူဝ် တူ ပျာတ့် ဘေ၊ တူ ပိဝ် ပီ ဒွိုမ် လာယ် ကာဆဲန့် အန် ဒီ ဂေ ဂုန့် ဒင် ဘေ။ အန် ဟဲ့ ဒိူင် လွင် အန် တီ ဒီ ဂေ၊ တဲး ဂေ နပ် ဆီချာ ပဲ့ ဟဲ့ ကာဆဲန့် အန် ဟဲ့ မှာန် အာခါခ်ု။

32 တဲး ဘေ ဟြေတ့် ဒီမွှတ် လွင် ဆိန့် ဒေါ မွိုန်၊ ဆိန့် အာတ့် ဂွိုတ် ဘေ။ ဆိန့် ဒေါ ဂုဝ် ဒေါ ဖာန် ဘ့လေး ဇဝ်ဖြာ ဒူအီ ဒဲင် ကာဒါယ် နီ၊ တဲး ဘေ ဟြေတ့် ဒီမွှတ်၊ ယုဝ် န့ မိုဝ်း ဇဝ် ပီ ကြိုပ် အီ ဟဝ် အီ ကွယ် ခဲင် ဂါင်ဟြာဝ်၊ တဲး န့ ကော ကာလတ့်။ တဲး ဘေ ဟြေတ့်၊ ယုဝ် န့ ဟဲ့ ဒွိုမ် မိုဝ်း အီ ခိုက်ခမ် ကာဆဝ် ပီ အန် ဇဝ်၊ ယုဝ် ဘေ ဒွိုမ် ယိုဝ် ဇဝ် အီ ကာလာင် ပါယ် တီ။ 33 ဒူအီ မျုဝ် မှဝ် ဟဲ့ ဒွိုမ် ယိုဝ် ဂြုဝ်း ဇဝ် ပီ ကြိုပ် ဂေ လေး ခဲင် ငဝ် အီ ပီ ပီ ဒွိုမ် ယိုဝ် ဘေ ဂြုဝ်း ဇဝ်ဖြာ၊ ယီ တူ လုဝ် ယမ်။ 34 ဘေ မိူဝ် တူ ဒွိုမ် ယိုဝ် ဇဝ် ပေါ အူ ကာဒင် အီ ဟဲ့ ဒွိုမ် ထုတ် လေး ဒူအီ အူ မျုဝ် ခဲင် ဒူအီ အာမျုဝ် ဟဝ် ပီ ဇဝ်ဖြာ ပီ ကြိုပ် ဘေ ဟဲ့ ထုတ် လေး ဘေ ခဲင် မိူင် အဲဂိုပ် တွိုန်။ အန် ဇဝ် တီ ဟဲ့ ဘျ အာဖုင် ဒင်ခုဝ် အန်၊ ဘူင် တဲး န့ ဘဲန် ဒုက် တာင် ဒီ အီ ဟဝ် ဘော လာယ် ကာဂုဝ်း ဒီ ရန်ဆူ၊ ဘျ ဘော အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်၊ ဘော ရဲန် ဆိုက် ဘော ဘူင် အီ မွှိုမ် ယုဝ် ကာဆဝ် ပဲ့ ဟဲ့ ဘျ အန် ဇဝ် ခဲင် မိူင် အဲဂိုပ် တွိုန်၊ တဲး ဘေ ယိုဝ် ဒီ ငါယ် ဘေ။ န့ တူ ဒွိုမ် မိုဝ်း ဇဝ် ပေါ ကာဒင် အီ ဟဲ့ ဒွိုမ် ဘူင် ဇိုဝ် တီ။

35 ဇဝ်ဖြာ ဟဲ့ ဘူင် တဲး ဘေ ယိုဝ် ပါယ် တီ တဲး ဘေ နပ် န့ မိုဝ်း မီ အန် ဇဝ် အူ ကာဒင် အီ မုး ဇဝ်ဖြာ။ အာဝ် မိုဝ်း ဇဝ်ဖြာ ပေါ အူ ကာဒင်။ 36 ဇဝ်ဖြာ တဲး ဘေ ယိုဝ် ဂြုဝ်း အန် ခဲင် ဂါင်ဟြာဝ်၊ တဲး အန် မာနုဝ် ဘေ။ ဒဲင် ကာဒါယ် နီ မိူဝ်၊ ဇဝ်ဖြာ ဟဲ့ တဲး ဘေ ယိုဝ် ငဝ် တာင်၊ ဟဲ့ တဲး ဂြုဝ်း အန် လေး ခဲင် ငဝ်၊ တဲး ဘေ ယိုဝ်။ 37 ကူပ် ရွက့် ဇဝ်ဖြာ ဂုန့် ဒင် ဘေ ဘော ရွက့် လှုက်လှာန် ဘေ၊ အန် ဟဲ့ တာ ပွုန် တာင် အန်၊ ယဲတ့် လေး ဘေ ခဲင် မိူင် အဲဂိုပ်။ 38 ပန် ဒီ လိုပ် ဘေ ခဲင် မိူင် အီ ဟဝ်၊ အီ ဟဝ် ပီ ဘော ဟဲ့ ကိူန် လွှိုမ် ဘေ ဘော မိုဝ်း ပ့လူမ် လွှိုမ် ဘေ မိူဝ်၊ အန် ဇဝ် ယီ ဟုဝ် တဝ် ဒူအီ ခဲင် မိူင် ဂေ တီ၊ ဝီ တဲး ဘေ ကွယ်၊ တဲး န့ ဘဲန် ခါဂုန် ဘေ။ အာခြာဝ် တီ ဟဲ့ ဇမ် ဒေါ တီ နီ။

39 ခုဝ် အန် တီ၊ အာတိုဝ် နီ တဲး ဘေ လှုဝ်း၊ ကွဲ့ တဲး ဘေ ပိဝ် ဒေါ မှဝ် လွင် ဇဝ်ဖြာ မုး ဇဝ်ဖြာ အီ အိုပ် ဘော ဂါင်ဟြာဝ် ဘော ကာဒါယ်။ န့ မိူဝ် တူ မိုဝ်း ဇဝ်ဖြာ ပေါ အူ ကာဒင်။ 40 တဲး ဘေ ဘူင် ဒူပ် ဒါရာ ဇဝ်ဖြာ ခဲ့ ပီ ကာလာင် အုဝ် ဒီ ဘေ အာတိုဝ် နီ။ တဲး န့ ဘော ဘဲန် နာ မွှိုမ် ဒီ ဘေ ဘော ဒီ ဂေ လှုက်လှာန် ဘေ။ ပါယ် တီ အာဆာက် ဘေ ဒီ ဘော တူင့်၊ တဲး ဘေ ဘော ကွယ် လှေန့် ခဲင် မိူင် ပီ ဒီ ဒွါ ဇဝ်ဖြာ ဒီ ဘေ၊ တဲး ဘေ ဘော ဘိုင် မိူင် တီ ဆေဆေ။”

41-42 ဟဲ့ ဟွတ့် ပါယ် တီ အာမုဝ်ဆဲ ဘော ဝီ ရဝ်း မိူင် အာဒါ အူယ် မိူင်။ မိူင် ဂေ တီ၊ န့ ဘော ကွယ် နာ လေး ဆီငဲ ဘ့လဲင် ယောဒါန်။ အန် တဲး န့ ဘဲန် မိူင် ဒူင် ဒီ တဝ် ဟာဝ် ချြီင် ဂေ အီ ဟဲ့ ကာလုတ့် ဒီ ငဝ်း ယမ် အီ ဟဝ်၊ အီ တူ မုး ရန်ဆူ ဂေ၊ အီ တူ အုန် နဝ်း ဒီ ဘူင်။ ဒူအီ ဂေ တီ ပွိုန် ဒီ တဝ် ဟာဝ် ချြီင် ခဲင် မိူင် တီ၊ တူ တဲး ဂေ ယမ်။ 43 အာဒါ ဂေ ဒူအီ ခြိုဝ် အာရူဘေန်၊ န့ ဘော မုး မိူင် ဘီစာ အီ ကွယ် ခဲင် ဂ့လင် တာင် အီ မုး ခဲင် ပြဲ ကာဟဝ်း။ အာဒါ ဂေ ဒူအီ ခြိုဝ် အာဂတ်၊ န့ ဘော မုး မိူင် ရာမူတ် အီ ကွယ် ခဲင် ကာဒါယ် မိူင် ဂီလေအာတ်။ အာဒါ ဒူအီ ခြိုဝ် အာမာနာဆေ၊ န့ ဘော မုး မိူင် ကောလန် အီ ကွယ် ခဲင် ကာဒါယ် မိူင် ဘာဆန် တွိုန်။

44 အာနီ မုး ဒါရာ ဇဝ်ဖြာ ပီ ကာလာင် အာမုဝ်ဆဲ ဒီ ဂေ ဒူအီ အီဆာရေလ။ 45 န့ ဘော မုး ပီ ဒမ် အုန် ဇဝ်ဖြာ ဘော ပီ မာနုဝ် အာမုဝ်ဆဲ ဒီ ဂေ ဒူအီ အီဆာရေလ ဝါယ် လေး ဂေ ခဲင် မိူင် အဲဂိုပ်။ 46 ဒေါ အန် တီ၊ ဒူင် ကွယ် ဂေ န့ ဘော မုး နာ လေး ဆီငဲ ဘ့လဲင် အိုမ် ယောဒါန် အီ လာယ် ကာဆိူဝ် ဒီ မိူင် ဘေတ်ဘေအူရာ။ န့ မုး မိူင် ပီ အိုပ် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ် အီ ကွယ် ခဲင် မိူင် ဟေဆာဖူန် တွိုန်။ မိူင် ဂေ တီ၊ အာမုဝ်ဆဲ ဂေ ဒူအီ အီဆာရေလ ဟဲ့ ကာဂုဝ်း ဘော ပွိုန် ဝါယ် လေး ဂေ ခဲင် မိူင် အဲဂိုပ် တွိုန်။ 47 ဂေ ဟဲ့ ကာဂုဝ်း ဟဲ့ ပွိုန် ဘော မိူင် ပီ အိုပ် ခုန်ဒီခမ် အာအောခ အီ မုး မိူင် ဘာဆန် တွိုန်။ ခုန်ဒီခမ် အာအောခ ဘော မုး ခုန်ဒီခမ် ဒူအီ အာမုဝ်ရိတ် ပေါ အူ ကာဒင်။ အန် အီ အိုပ် နာ လေး ဆီငဲ အိုမ် ဘ့လဲင် ယောဒါန် တွိုန်။ 48 မိူင် တီ၊ န့ ဘော စုး ဒီ မိူင် အာရော အီ ကွယ် ဒီ ခူပ် ဒီလယ့် ဘ့လဲင် အာရာနုန်၊ ဝီ ဟုဝ့် ဘ့လာက် နာ ကွာ၊ ကော ဝီ ဇမ် ဒီ နွန် စီရုန် အီ မုး နွန် ဟေရာမူန် တွိုန်။ 49 န့ ပီ ဝီ ဟာဝ် ဇမ် ဘော ခဲင် ဂ့လင် အာရာဖ အီ ကွယ် တူတ့် နာ လေး ဆီငဲ ဘ့လဲင် အိုမ် ယောဒါန်။ ဘ့လာက် နာ တေတ့်၊ န့ ဘော လူင် ကော ဇမ် ဒီ အိုမ် နမ်မုက်ဆာရာ အီ ကွယ် ဒီ ဒင် နွန် ပီဆာကာ။