1 ဝါယ် အန် တီ အေ ဘော ဝီ ကာဘတ် ဟုဝ့် ဒီ မိူင် တာင် အီ စိူဝ် ဘာဆန်။ ဒေါ အန် တီ ခုန်ဒီခမ် အာအောခ ဂေ ဒါ ဆိုက် အန် ဘောကာဂ့လျီတ် ဟဲ့ လေး တး၊ တဝ်း ဒီ ကာဂုဝ်း ဒီ အေ ဒီ ခူပ် မိူင် အေတာရီ။ 2 ဇဝ်ဖြာ ဝီ ကာလာင် ဒီ အုဝ် တဝ်း၊ “မဲ ကွဲ့ ယုဝ် အန်။ အုဝ် ဒီ ဒိုဝ်း အန် ဘော ဒူအီ အန် ဘောကာဂ့လျီတ် ဘော မိူင် ပီ အိုပ် အန်၊ ဝီ အာပ် ဒွါ ဒီ မဲ။ တဲး မဲ ဘူင် ဒီ အန်၊ တဲး န့ ပီ ပီ ဘူင် မဲ ဒီ ခုန်ဒီခမ် အာဆီဟူန် အီ မုး ဒူအီ အာမုဝ်ရိတ်၊ အီ အိုပ် မိူင် ဟေဆာဖူန် တွိုန်။”

3 ပါယ် တီ ဇဝ်ဖြာ ဘော အာပ် ခုန်ဒီခမ် အာအောခ ဘော ဒူအီ ပီ အိုပ် အန် ဘောကာဂ့လျီတ် ဒီ အေ။ အေ မိူဝ် ငဝ်း ဝဲန် ဂေ ဘောကာဂ့လျီတ်၊ ကွဲ့ တဲး န့ ဆီ မိုဝ်း။ 4 ဒေါ အန် တီ အေ ဟဲ့ ပွိုန် တူတ့် ခဲ့ ကွယ် မိူင် ပီ အိုပ် အန်။ ဒူင် တူ ပွိုန် အေ အာဝ် မိုဝ်း ခေါ အူ မိူင်။ မိူင် ပဲ့ ဟဲ့ ကာဂုဝ်း ပွိုန် အေ တီ၊ န့ ကွယ် ဒဝ် ဂိုဝ် မိူင် အီ ကွယ် ခဲင် ကာဒါယ် အာကောဖ ဘော ခဲင် မိူင် တာင် ပီ အိုပ် ခုန်ဒီခမ် အာအောခ အီ မုး ကာဒါယ် မိူင် ဘာဆန်။ 5 မိူင် ဂေ တီ ဘော မုး မိူင် အီ မိုဝ်း ရဲင် အီ စာ ကာဆဝ်၊ မိုဝ်း ဘော မာလုဝ်း မိူင် အီ မိုဝ်း ဆဲ အန်။ ဒဲင် တီ အေ ဟဲ့ ပွိုန် ဘော မိူင် အီ တူ မိုဝ်း ရဲင်၊ အီ ဟဲ့ ကိူန် ကာဆဝ်။ 6 အေ ဘော ပျာတ့် ဝဲန် မိူင် တီ ဘောကာဂ့လျီတ် ဘော ငဝ်း ယမ် ဘော အီဘိုန့် ဘော အီမာယ် ဘော ဂွန် ဒီရွယ်။ န့ ဟဲ့ ပီ ပီ ဘူင် အေ ဒီ ခုန်ဒီခမ် အာဆီဟူန် အီ အိုပ် မိူင် ဟေဆာဖူန် တွိုန်။ 7 အေ ဘော ဒိုဝ်း မီ ဒုဝ် ဆတ်ဒါဝါ ဘော ကြုဝ်ကြာမ် ခဲင် မိူင် တီ။

8 ဒေါ အန် တီ အေ မိူဝ် ဟဲ့ ကာဂုဝ်း၊ ဟဲ့ ပဲ ခုန်ဒီခမ် ဒူအီ အာမုဝ်ရိတ် အာ ကာဒင် အီ ကွယ် နာ လေး ဆီငဲ ဘ့လဲင် ယောဒါန်၊ စုး ဒီ အိုမ် ဘ့လဲင် အာရာနုန် ကော ဇမ် ဒီ နွန် ဟေရာမူန်။ 9 နွန် ဟေရာမူန် တီ၊ ဂေ ဒူအီ ဆီဒူန် ဘော တဝ်း နွန် ဇီရူန်။ ဒူအီ အာမုဝ်ရိတ် ဂေ ဘော တဝ်း နွန် ဆေနီရာ။ 10 အေ ဟဲ့ ပဲ ဒွန် မိူင် အီ ကွယ် ဒီ နွန် ခဲင် ကာဒါယ် မိူင် ဂီလေအာတ် ဘော မိူင် ဘာဆန်၊ ကော ဝီ ဇမ် နာ လေး ဆီငဲ မိူင် ဆာလာကာ ဘော မိူင် အေတာရီ။ န့ ဘော မုး မိူင် အီ ကွယ် ခဲင် ကာဒါယ် မိူင် ဘာဆန် ပီ အိုပ် ခုန်ဒီခမ် အာအောခ တွိုန်။ 11 အီ မုး ဒူအီ အာမျုဝ် ရာဖာတ်၊ န့ ဟဲ့ ဂိတ် မီ ခုန်ဒီခမ် အာအောခ တီ အူ ဝီ။ ကာစှူင့် အိတ် အန်၊ ဂေ ဘော ဘူင် တာ ဟိန်။ ဆေ အေ ဂဝ်၊ တာ ကာနိး အေ ဒူအီ၊ န့ ဘော တူင့် ဒိမ် ကာနိး။ နာ ကာဝဝ်း အန် ဖွုန် ကာနိး။ ဂေ ဘော အုန် ခဲင် ကာဒါယ် ဒူအီ အမ်မူန် ဒီ မိူင် ရာဘာ။

12 ဝါယ် ဟဲ့ ပွိုန် အေ မိူင် ဂေ တီ၊ အုဝ် ဝီ ဒိုဝ်း ဒွါ ဒီ ခြိုဝ် အာရူဘေန် ဘော ခြိုဝ် အာဂတ်။ န့ မုး ကာဒါယ် အီ ကွယ် နာ ကွာ မိူင် အာရော အီ ကွယ် ခူပ် ဒီလယ့် ဘ့လဲင် အာရာနုန်။ န့ ဘော မုး မာန် မိူင် ဂီလေအာတ် အာဒါ အူ ကာတဲ။ 13 ကာဒါယ် မိူင် ဂီလေအာတ် အီ ဆီ ဂိတ် တွိုန်၊ အုဝ် ဟဲ့ ဝီ အာပ် ဒွါ ဒီ ဒူအီ ခြိုဝ် အာမာနာဆေ အူ ကာတဲ။ န့ မုး ဘော မိူင် ဘာဆန် အီ မုး မိူင် ပီ အိုပ် ခုန်ဒီခမ် အာအောခ အီ ကွယ် ခဲင် ကာဒါယ် အီ စိူဝ် အာကောဖ။ မိူင် ဘာဆန် တီ ဘော မိူင် ဟဲ့ ဒွိုမ် မုး ဒူင် ကွယ် ဒူအီ ဒုဝ် ဒီ တူင့် ဒီ တာင် အီ စိူဝ် ဒူအီ ရာဖာတ် တွိုန်။ 14 ဂေ ဒူအီ အာယာအီရာ အီ မုး လှုက်လှာန် အာမာနာဆေ တွိုန်၊ ဂေ ဟဲ့ အိုပ် မိူင် အာကောဖ ကော ဇမ် ဒီ ကာအုန် ဂေ ဒူအီ ဂေဆူရာ ဘော ကာအုန် ဂေ ဒူအီ မာခါ ဘော မိူင် ဘာဆန်။ ဂေ ဘော ဒဲ့ စိူဝ် မိူင် ဂေ တီ ဒူပ် ပီ စိူဝ် ဂေ တဝ်း၊ ဒူင် ကွယ် ဟာဝူတ်ယာအီရာ ကော ဇမ် ဒေါ တီ နီ။^a 15 ကာဒါယ် မိူင် ဂီလေအာတ် အုဝ် ဟဲ့ ဒွါ ဒီ ဒူအီ အာမာခီရာ အီ မုး ဒူအီ ခြိုဝ် အာမာနာဆေ တွိုန်။ 16 ယီ မုး ခြိုဝ် အာရူဘေန် ဘော ခြိုဝ် အာဂတ်၊ အုဝ် ဟဲ့ အာပ် ဒွါ ဒီ ဂေ ကာဒါယ် အီ စုး ဒီ မိူင် ဂီလေအာတ် ကော ဇမ် ဒီ ဒီလယ့် ဘ့လဲင် အိုမ် အာရာနုန်။ ဒီ ကာတဲ ဒီလယ့် တီ၊ န့ ဘဲန် ကာအုန် ဒူင် ကွယ် ဂေ။ ဘ့လာက် နာ ကွာ မိူင် ဂေ ဘော ဇမ် ဘ့လဲင် အိုမ် ယာဘူက် အီ မုး ကာအုန် ကာဒါယ် ဒူအီ အမ်မူန်။ 17 ဘ့လာက် နာ ဂေတ့် ဆီငဲ န့ ကော ဇမ် ဒီ ဘ့လဲင် အိုမ် ယောဒါန် အီ မုး ဒူင် ကာဝဝ်း အီ စိူဝ် အာရာဖ။ နာ ကွာ န့ စုး ဒီ အိုမ် ဒိုင် ဂါလီလေ၊ ဝီ လူင် ဇမ် ဒီ အိုမ် ဒိုင် ဆယ့် ဆွင့် ဒီ ဒင် နွန် ပီဆာကာ။

18 ဒေါ အန် တီ အုဝ် ဟဲ့ ဝီ ကာလာင် ဒီ ဘေ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဟဲ့ အာပ် ဒွါ မိူင် တီ ဒီ ဘေ။ ဒူအီ ဘေ အီ ဟဲ့ ပွိုန် ကာဂုဝ်း၊ ဂေ လုဝ် ဂူင့် ခြိုင် ကာဂုဝ်း ဂေ၊ ကာလုဝ်း ဘ့လဲင် ယောဒါန်၊ ဟာဝ် ယဲတ့် နာ အာတ့် ဘီနွင် ဘေ အီ မုး ဒူအီ အီဆာရေလ။ ဘေ လုဝ် စွယ် ဂေ၊ တဲး ဘော ဂေ ပွိုန် မိူင် ဂေ တီ။ 19 အီဘိုန့် ဘေ ဂေ ဂွန် ဘေ ဘော ဒုဝ် ဆတ်ဒါဝါ ဘေ၊ အုဝ် ဟဲ့ နပ်၊ ဘေ ဟဲ့ မိုဝ်း ကိူန် ကာဆဝ် ဒုဝ် ဆတ်ဒါဝါ။ ဘေ ယီ လုဝ် အုန် တဲး ဂေ ကွယ် ခဲင် မိူင် ပဲ့ ဟဲ့ အာပ် ဒွါ အုဝ် ဒီ ဘေ။ 20 ဘေ လုဝ် စွယ် ဂေ ဘီနွင် ဘေ၊ တဲး ဘော ဂေ ပွိုန် မိူင် ပီ ဒီ ဒွါ ဇဝ်ဖြာ ဒီ ဂေ ဘ့လာက် နာ တ အိုမ် ဘ့လဲင် ယောဒါန် တွိုန်။ တဲး ဘေ စွယ်၊ တဲး န့ ကော ဇမ် ပန် ဒီ ဒွါ ဇဝ်ဖြာ ဘော ပန် ဒီ ကွယ် ဒါခိုယ်၊ ကွယ် ဂျာမ်ဆာ ဂေ။ တဲး န့ ကော ပီ ပဲ့ ဟဲ့ ဒွါ ဇဝ်ဖြာ ဒီ ဘေ။ ဆေ ဘေ ဟဲ့ ဟွတ့် ဘူင် ပါယ် တီ ဘေ ဒွန် အီ ပွိုန် ဝီ တး ခဲင် မိူင် ပဲ့ ဟဲ့ ဟွတ့် ဒွါ အုဝ် ဒီ ဘေ။”

21 ဒေါ အန် တီ အုဝ် ပီ ဝီ ကာလာင် ဒီ အာယုဝ်ဆူအာ တဝ်း၊ “မဲ ဟဲ့ ယိုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ အန် ဟဲ့ ဘူင် မျုဝ် မှဝ် ဒီ ခုန်ဒီခမ် အာဆီဟူန် ဂါယ် ခုန်ဒီခမ် အာအောခ။ အန် ဇဝ် ပီ ဒီ ဝီ ဘူင် ပါယ် တီ ခဲင် မိူင် ဒွန် မိူင် ပီ ဒီ လုဝ် လိုပ် ဟာဝ် မဲ။ 22 ကွဲ့ တဲး ဘေ ယုဝ် ဂေ။ ဇဝ်ဖြာ ပီ ကြိုပ် မဲ ဒီ ကာဂုဝ်း ဒွါ ဒီ မဲ။”

23 ဒေါ အန် တီ အုဝ် ဘော ဝီ ဆာခိုဝ် ဒီ ဇဝ်ဖြာ တဝ်း၊ 24 “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ ဟဲ့ စုး ဒီ ဘျ အာဖုင် ဒင်ခုဝ် မဲ ဒီ အုဝ် အီ မုး ဒဲစေန့် မဲ။ မဲ ဟဲ့ ဘျ ဘော ခဲ့ တာင် ပ့လူမ် မဲ။ ဘော ခဲင် ဂါင်ဟြာဝ် ဘော ဒဲင် ကာဒါယ် အာဝ် မိုဝ်း အီ မွှိုမ်၊ အာဝ် မိုဝ်း ပေါ အူ ဝီ အီ မိုဝ်း အာဖုင် ဒင်ခုဝ် ပီ မဲ။ 25 မဲ ဇဝ်ဖြာ၊ အုဝ် မှာန့်၊ တဲး အုဝ် ပွိုန် ဒီ ကာလုဝ်း အိုမ် ဘ့လဲင် ယောဒါန်၊ တဲး အုဝ် ပွိုန် ဒီ ဟာဝ် ယွတ် မိူင် ဘွတ်၊ မိူင် မွှိုမ် အီ ကွယ် ဘ့လာက် နာ တ ဒွယ်၊ တဲး အုဝ် ယိုဝ် ဘော မိူင် အီ ကွယ် ဒီ နွန် အီ စှိတ်၊ အီ မုး နွန် လေဘာနုန်။”

26 အုဝ် ပီ ဘော ဟဲ့ တဝ်း ပါယ် တီ မိူဝ်၊ ကူပ် ပဲ့ ဟဲ့ ဒွိုမ် ဘူင် ဘေ၊ ဇဝ်ဖြာ ယီ ဟဲ့ ရူ ကာဆဝ် ဒီ အုဝ်၊ တူ ထူမ် ဂြုဝ်း ပီ ဆာခိုဝ် အုဝ် တီ။ ဇဝ်ဖြာ ဝီ တဝ်း ဒီ အုဝ်၊ “စူ ခဲ့ တီ၊ မဲ ကွဲ့ ဟူ ကာလာင် ပေါ မ့ပွါ လွင် အန် တီ။ 27 တဲး မဲ ဟုဝ့် ကွယ် ဒဲင် နွန် ပီဆာကာ၊ တဲး မဲ ယွတ် နာ ဂေတ့် ဆီငဲ ဘော နာ လေး ဆီငဲ၊ နာ တေတ့်၊ နာ ကွာ၊ တဲး မဲ ယွတ် ခဲ့ ပီ ပွိုန် ယိုဝ် မဲ။ ခုဝ်၊ မဲ တူ ပွိုန် ဒီ ကာလုဝ်း အိုမ် ဘ့လဲင် ယောဒါန်။ 28 မဲ ယီ လုဝ် ကာလာင် ဒီ အာယုဝ်ဆူအာ၊ တဲး ပ့လူမ် တဲး ဟဲန့် ဒီ နဝ်း အန်။ အန် အီ ဒီ ယဲတ့် ဟာဝ် ဒူအီ ဂေ နီ၊ တဲး ဂေ ဟာဝ် ဒိုဝ်း ကာဒါယ် ပီ ယွတ် မဲ တီ၊ တဲး န့ ဘဲန် ခါဂုန် ဂေ။” 29 ကူပ် န့ ပါယ် တီ အေ ဘော ဝီ ဂိူတ် ကွယ် ခဲင် ဂ့လင် အီ လာယ် ကာဆိူဝ် ဒူင် စိူဝ် ဘေတ်ဘေအူရာ။