1 ဒူအီ အီ အိုပ် အီ ယဲတ့် ခဲင် ဒူအီ အာဂီလေအာတ် အီ မုး ဂွန် အာမာခီရာ ဘော လှာန် အာမာနာဆေ အီ မုး ဂွန် အာယုဝ် တွိုန်၊ ဂေ ဘော တး ဒူင် ကွယ် အာမုဝ်ဆဲ ဘော ဒူင် ကွယ် ဂေ ဒါ တာင် အီ အိုပ် ဂေ ဒူအီ အီဆာရေလ။ 2 ဂေ တဝ်း၊ “ဇဝ်ဖြာ ဟဲ့ စ်ု မဲ ကာတာမ် လာယ် ကာယဝ်း ကာဒါယ် အီ ဒီ ဘဲန် ခါဂုန် ဒူအီ အီဆာရေလ။ ဟဲ့ ဟွတ့်၊ အန် ဇဝ် ဟဲ့ ဝီ တဝ်း၊ တဲး မဲ ဒိုဝ်း ခါဂုန် အာစာလောဖတ် အီ မုး အီကတ် ယေ တွိုန်၊ ဝီ ဒွါ ဒီ ဂေ ဂွန် အီဘိုန့် အန်။ 3 မာလဲ၊ ဆေ ဂွန် အီဘိုန့် အန် ဂေ တီ ဝီ ခတ် ဒိုဝ်း အီမာယ် ဒူအီ အီဆာရေလ အီ မုး ခြိုဝ် ဟဝ်၊ ဒူအီ အာမျုဝ် ဟဝ် တီ အီ ဒီ ပွိုန် ဒီ ဘိုင် ခါဂုန် ဂေ တီ။ ဆေ န့ ပါယ် တီ ကာဒါယ် ခါဂုန် ယေ၊ န့ ဒီ ယူမ်။ 4 ဆေ ဟီ ဇမ် ဆီနမ် ပန် ဒီ လုဝ် ဒွါ ဝိဝ် ကာဒါယ် ပဲ့ ဟဲ့ ပွိုန် ဂေ တီ၊ ဂေ ဒူအီ အာမျုဝ် ဟဝ် ဒီ ဘော ပွိုန် ဒီ အိုပ် ဆေဆေ ကာဒါယ် တီ။ ဟဲ့ ဟွတ့်၊ ကာဒါယ် ခါဂုန် ဒူအီ အာမျုဝ် ယေ၊ န့ ဒီ ဘော ဟြာယ် တူတ့်။”

5 ပန် တီ အာမုဝ်ဆဲ ဝီ ကာလာင် ဒီ ဂေ ဒူအီ အီဆာရေလ ဒူပ် ပီ ကာလာင် ဇဝ်ဖြာ ဒီ အန်။ အန် တဝ်း၊ “ဂြုဝ်း ပီ တဝ်း ဂေ ဒူအီ အာမာနာဆေ တီ ဟဲ့ မုး ဟဲ့ မှာန်။ 6 ဇဝ်ဖြာ ဟဲ့ ဒွိုမ် ကာလာင် လွင် ဂွန် အီဘိုန့် အာစာလောဖတ် တီ တဝ်း၊ ‘တဲး ဂေ ဒိုဝ်း ပီ အိုင် ဂေ။ ယီ ဒိုဝ်း မီ ဒူအီ အီ မုး ခြိုဝ် ဂေ။ 7 ပါယ် တီ ကာဒါယ် ခါဂုန် ဒူအီ အီဆာရေလ ဘောကာဂ့လျီတ်၊ န့ ဒီ ဘော ကွယ် ခဲင် ခြိုဝ် မှဝ် ခြိုဝ် အန်၊ တူ ယူမ် တူ ဟြာယ် ဒေါ မှဝ်။ 8 အီဘိုန့် အီ မိုဝ်း ခါဂုန် ကာတဲ ဒူအီ အီဆာရေလ ဒွန် ခြိုဝ်၊ တဲး ဂေ ဝီ ခတ် ဒိုဝ်း အီ မုး ခြိုဝ် ဂေ။ ဆေ န့ ပါယ် တီ ဂေ ဒူအီ အာမျုဝ် အီဆာရေလ ဒွန် ခြိုဝ် ဒီ ဘော ပွိုန် ဒီ ဘိုင် ခါဂုန် ဂုန့် ဒင် ဂေ ခြိုဝ် မှဝ် ခြိုဝ် အန်။ 9 ကာဒါယ် ဂေ တီ မိူဝ် တူ လုဝ် တဲး န့ ဘဲန် ကာဒါယ် ပေါ အူ ခြိုဝ်။ ခုဝ်၊ ဂေ ဒူအီ အီဆာရေလ လုဝ် ကွယ် ဒူင် အီ မုး ကာဒါယ် ဂုန့် အာဆေ ဂုန့် အန်။’”

10 ဂေ ဂွန် အီဘိုန့် အာစာလောဖတ်၊ ဂေ မိူဝ် ဘူင် ပါယ် တီ တဲး န့ ဒူပ် ပဲ့ ဟဲ့ ကာလာင် ဇဝ်ဖြာ ဒီ အာမုဝ်ဆဲ တီ။ 11 ခုဝ်၊ နာင် မာလာ၊ နာင် ဒီရာစာ၊ နာင် ဟောကာလာ၊ နာင် မဲက် ဘော နာင် နောအာ၊ ဂေ ဘော ဝီ ခတ် ဒိုဝ်း ဂွန် ဂုန့် တဲ့ ဂုန့် အာန် ဂေ။ 12 ပါယ် တီ ဂေ ဘော ခတ် လာယ် ဒိုဝ်း မီ ဂေ အီ မုး ခြိုဝ် အာမာနာဆေ အီ မုး ဂွန် အာယုဝ် တွိုန်။ ကာဒါယ် ပီ ပွိုန် ဂေ မိူဝ်၊ န့ ဘော ကွယ် ခဲင် ခြိုဝ် ဂုန့် ဒင် ဂေ။

13 အာတီ န့ မုး ဒါရာ ပီ ဒမ် အုန် ဇဝ်ဖြာ ဒီ ဂေ ဒူအီ အီဆာရေလ။ ဇဝ်ဖြာ ဟဲ့ ကာလာင် လွင် အန် တီ ဒီ အာမုဝ်ဆဲ ဒေါ ကွယ် ဂေ ခဲင် ဂ့လင် မိူင် မုဝ်အာပ် အီ ကွယ် ခူပ် အိုမ် ဘ့လဲင် ယောဒါန် အီ လာယ် ကာဆိူဝ် ဒီ မိူင် ယေရီခုဝ် တွိုန်။