1 ဇဝ်ဖြာ ဝီ ကာလာင် ဒီ အာမုဝ်ဆဲ ဒေါ ကွယ် ဂေ ခဲင် ဂ့လင် ဒီ မိူင် မုဝ်အာပ် အီ ကွယ် ခူပ် ဘ့လဲင် ယောဒါန် အီ ဝီ လာယ် ကာဆိူဝ် ဒီ မိူင် ယေရီခုဝ် တွိုန်။ 2 ဇဝ်ဖြာ တဝ်း၊ “မဲ လုဝ် ကာလာင် ဒီ ဂေ ဒူအီ အီဆာရေလ လွင် ကာဒါယ် အီ ဒီ ဘဲန် ခါဂုန် ဒီ ဂေ တွိုန်။ ဂေ လုဝ် အုန် မိူင် အီ မိုဝ်း ရဲင် မင် ပ့လုဝ့်၊ လုဝ် ဒွါ ဒီ ဂေ ဒူအီ အာလေဝီ၊ တဲး ဂေ ဒူအီ အာလေဝီ မိုဝ်း ဒူင် ဒီ ကွယ်၊ မိုဝ်း ဒူင် ဒီ ဟျီင် မာဘူ ဂေ ဘော မာမက် ဂေ။ 3 မိူင် တီ၊ တဲး န့ ဘဲန် ဒူင် ကွယ် ဂေ ဘော အူင့် ပေတ့် အီ ကွယ် ရူပ် မိူင် ဂေ တီ၊ တဲး န့ ဘဲန် ဒူင် ဟျီင် ဒူင် ဘ့လေး ဂေ မာဘူ ဂေ မာမက် ဘော ဒုဝ် ဆတ်ဒါဝါ ဂေ ဘဲန် မျုဝ် ဘဲန် မျုဝ်။

4 အူင့် ပေတ့် ဂေ တီ၊ တဲး န့ လဲပ် ရူပ် နာ ရေတ့် ရဲင် မိူင် ဂေ၊ တဲး န့ ကာဝဝ်း အူ ဟြဲန့် ကာနိး အီ မုး အာ မာယဝ်း ဒီ ဖန် ဂိုဝ် ဒပ်။ 5 ဆေ န့ ပါယ် တီ ဘေ လုဝ် ဂဝ် အူ ဘ့လာက် အာ ဟြဲန့် ကာနိး၊ တဲး န့ ကာရမ် ဘော ဖွုန် ဘ့လာက်။

6 မိူင် ပီ ဒီ အာပ် ဘေ ဒီ ဒူအီ အာလေဝီ ဂေ တီ၊ အာဒါ ဒဝ် မိူင် လုဝ် ဘဲန် ဒူင် ပွိုန် တဝ် ဟာဝ် ချြီင် ဂေ ဒူအီ အီ ဟဲ့ ငဝ်း ယမ် အီ ဟဝ်။ ဒဲင် တီ၊ ဘေ လုဝ် ဝီ ဒွါ ဒီ ဂေ ဒူအီ အာလေဝီ ပေါ ဖွုန် ဂိုဝ် ဒီ အာ မိူင်။ 7 ဆေ န့ ပါယ် တီ မိူင် ဂေ ဒူအီ အာလေဝီ ဒီ ကွယ် ဖွုန် ဂိုဝ် ဒီ ဒါ မိူင် ဘော ဒူင် ဒီ ဘဲန် အူင့် ပေတ့်၊ အီ ဟဲ့ ရူပ် မိူင် ဂေ တွိုန်။ 8 ခဲင် ကာဒါယ် ပဲ့ ဟဲ့ ပွိုန် ဂေ ဒူအီ အီဆာရေလ တွိုန်၊ မိူင် ပီ ဒီ ဒွါ ဘေ ဒီ ဒူအီ အာလေဝီ တွိုန်၊ ဘေ လုဝ် တဲး န့ ဒူပ် ခြိုဝ် ဂေ။ ဆေ န့ မိုဝ်း ဒူအီ ကိူန်၊ ဘေ လုဝ် ဒွါ ကာဒါယ် ကိူန်။ ဆေ န့ မိုဝ်း ဒူအီ ပြေတ့်၊ ဘေ လုဝ် ဒွါ ကာဒါယ် ပြေတ့်။”

9 ဝါယ် အန် တီ ဇဝ်ဖြာ ပီ ဝီ စ်ု အာမုဝ်ဆဲ 10 တဲး အန် ကာလာင် ဒီ ဂေ ဒူအီ အီဆာရေလ ပေါ န့ ပွါ တဝ်း၊ “ဒေါ ကာလုဝ်း ဘေ အိုမ် ဘ့လဲင် ယောဒါန်၊ ဟာဝ် ဇမ် ခဲင် မိူင် ကာနန့် တွိုန်၊ 11 ဘေ လုဝ် ရဝ်း မိူင်၊ တဲး န့ ဘဲန် မိူင် ဒူင် ဟာဝ် ကွယ် ဟာဝ် ချြီင် ဂေ အီ ဟဲ့ ငဝ်း ယမ် အီ ဟဝ် ဒေါ တူ အုန် ဂေ နဝ်း ဒီ ဘူင်။ 12 ဆေ ဒူအီ အူ ဝီ တဝ် ဟာဝ် ချြီင် ခဲင် မိူင် တီ၊ အန် ဒီ လွတ် အာဖေ အာရေ ဒီ ဂေ ဘီနွင် ဝေါဝဲ ဒူအီ အီ ဟဲ့ ယမ် တွိုန်။ ခုဝ်၊ ဂေ တူ ပွိုန် ငဝ်း ယမ် အန် အာတ့် ဆုင်ဖျာတ် ဂေ ဒါ တာင် အာမူ အန်၊ တဲး ဘော ဂေ ဒူအီ ကိူန် နပ် လွင် အန် တီ။ 13 ဘေ လုဝ် ရဝ်း မိူင် ဇိုဝ် တီ အာဒါ ဒဝ် မိူင်။ 14 တဲး န့ မိုဝ်း အူယ် မိူင် အီ ကွယ် နာ လေး ဆီငဲ ဘ့လဲင် အိုမ် ယောဒါန် ဘော အူယ် မိူင် အီ ကွယ် ခဲင် မိူင် ကာနန့်။ 15 မိူင် ဂေ တီ ဒီ ဘဲန် မိူင် ဒူင် ဟာဝ် ချြီင် ဂေ ဒူအီ အီဆာရေလ ဘော ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဂေ ဒူအီ အီဆာရေလ။ ဆေ ဒူအီ ဟဲ့ ငဝ်း ယမ် အီ ဟဝ် ဒေါ တူ အုန် အန် နဝ်း ဒီ ငဝ်း၊ အန် ပွိုန် တဝ် ဟာဝ် ကွယ် ဒီ တီ။

16 ဆေ န့ မိုဝ်း ဒူအီ အီ ဟဲ့ ဂူင့် ဟိန်၊ မး တဲး အီ ဟဝ် ကော ယမ်၊ ဒူအီ ဝီ တီ ဟဲ့ မိုဝ်း မှာပ် ငဝ်း ယမ် အီ ဟဝ်။ န့ ကာအာပ် ငဝ်း ယမ် ဘော အန်။ 17 ဆေ န့ ဘော မိုဝ်း ဒူအီ အီ ငဝ်း ယမ် အီ တာ မာဝ်၊ ဘော ဒူအီ ဝီ တီ ဟဲ့ မိုဝ်း မှာပ် ငဝ်း ယမ် အီ ဟဝ်။ န့ ကာအာပ် အီ ငဝ်း ယမ် ဘော အန်။ 18 ဆေ န့ မိုဝ်း ဒူအီ အီ ငဝ်း ယမ် အီ တာ ဟေ၊ န့ ဘဲန် မှာပ် ဒီ အန်။ န့ ဟဲ့ ကာအာပ် ငဝ်း ယမ် ဘော အန်။ 19 န့ မုး ဂေ ဘီနွင် ဝေါဝဲ ဒူအီ ယမ် တွိုန်၊ ဂေ ဟဲ့ ပွိုန် ငဝ်း ယမ် ဒူအီ ဝီ တီ။ ဂေ ဘော ကာတုန့် အန် ဒီ မှဝ်၊ ဂေ ဟဲ့ ပွိုန် ငဝ်း ယမ် အန်။ 20 ဆေ န့ မိုဝ်း ဒူအီ အီ အုန် နဝ်း ဒီ အီ ဟဝ်၊ အန် ဘော ဇုန် တဲး အီ စုဝ်း ယမ်၊ ဆေ အန် ဘ်ု ဒီ ငဝ်း အီ ဘော ဒိုဝ်း အူ မျုဝ် အူ မျုဝ်၊ ဝိုန့် တဲး အီ ယမ်၊ 21 ဆေ အာဝ် ပါယ် တီ ဆေ အန် တာ ကာလိုမ် အန်၊ မး တဲး အီ ဟဝ် ကော ယမ်၊ ဒူအီ အီ ဘူင် ပါယ် တီ ဟဲ့ မိုဝ်း မှာပ် ငဝ်း ယမ် အာဆာက် အီ ဟဝ်။ အီ ဟဝ် လုဝ် ငဝ်း ယမ် ဘော အန်။ ဘီနွင် ဝေါဝဲ ဒူအီ ယမ် တီ၊ ဂေ ဘော ကာတုန့် အန် ဒေါ မှဝ်၊ ဟဲ့ ပွိုန် ငဝ်း ယမ် ဒူအီ ဝီ တီ။

22 ဆေ အာဝ် မုး ပါယ် တီ ဆေ န့ မိုဝ်း ဒူအီ အူ ဝီ၊ အန် တူ အုန် နဝ်း ဒီ ဘူင်၊ အန် တူ မိုဝ်း ဒီ ဇွင့် အီ ဟဝ်၊ အန် ယီ တာ ဇုန် စုဝ်း အီ ဟဝ်၊ ဆေ အန် တူ ခြာမ် ဒီ ဘူင်၊ အန် ယီ ဒိုဝ်း အူ မျုဝ် အူ မျုဝ် ဘော တာ ဒိုဝ် ယမ် အီ ဟဝ်၊ 23 ဆေ အန် တူ မိုဝ်း ဒီ ဘဲန် ရန်ဆူ ဒီ အီ ဟဝ်၊ ယီ ဒိုဝ်း မျုဝ် အီ ပဲ ပီယမ် ဒူအီ ဘော ဝိုန့် မာဝ် ဘော တာ ဒိုဝ် ယမ် အီ ဟဝ် ဒေါ တူ ထာင် အန်၊ ဂေ ဒူအီ ကိူန် ဒွန် အီ လုဝ် ဂွင့် ရဲ ဒူအီ ဝီ တီ။ 24 ဂေ ဒူအီ ကိူန် တူ ပွိုန် ကွယ် ဘ့လာက် ဘီနွင် ဝေါဝဲ ဒူအီ ယမ် အီ ဝီ ဆီ ဘူင် ဝျီ့ ဒီ အန် တွိုန်။ ဂေ လုဝ် ဆုင်ဖျာတ် အာမူ တီ၊ တဲး န့ ဒူပ် ခဲ့ ပီ ဒမ် အုဝ် ဒီ ဘေ။ 25 ဂေ ဒူအီ ကိူန် လုဝ် စွယ် ဒူအီ အီ ဟဲ့ တာ ဒိုဝ် ယမ် ဒူအီ ဟဝ် တွိုန်၊ တဲး အန် လွတ် ဒီ ဂေ ဘီနွင် ဒူအီ ယမ် တွိုန် ဘော တိုယ် အန် ဟာဝ် ဇမ် ခဲင် မိူင် အီ မုး ဒူင် ပွိုန် ချြီင် အန်။ အန် မိူဝ် လုဝ် ကွယ် ဒီ တီ၊ တဲး န့ ကော ဇမ် ပန် ဒီ ယမ် ဒါ တာင် လှူ ဒီ ဇဝ်ဖြာ။

26 ဒူအီ အီ ဟဲ့ တာ ဒိုဝ် ယမ် အီ ဟဝ် တွိုန်၊ ဆေ အန် လေး ဟာဝ် နာ ရေတ့် မိူင် အီ မုး ဒူင် ပွိုန် ချြီင် အန် တီ၊ 27 ဆေ ဂေ ဘီနွင် ဒူအီ ယမ် တွိုန် ဘော ယိုဝ် အန်၊ ဂေ ဟဲ့ ပွိုန် ငဝ်း ယမ် အန်။ လွင် ပီ ဘူင် ဝျီ့ ဂေ ဒီ အန် တီ၊ အာဝ် ဘဲန် မှာပ် ဒီ ဂေ။ 28 ခုဝ်၊ ဒူအီ ဝီ တီ ပွိုန် ကွယ် မီ ခဲင် မိူင် ဒူင် ဟာဝ် ချြီင် အန် တီ။ အန် လုဝ် ကွယ် ဒီ တီ၊ တဲး ဒါ တာင် လှူ ဒီ ဇဝ်ဖြာ ကော ယမ်။ ဆေ ဒါ တာင် လှူ ဒီ ဇဝ်ဖြာ ဟဲ့ ဟွတ့် ယမ်၊ အန် ဟဲ့ ပွိုန် ဝီ တး ကွယ် ဒူင် ကွယ် ဘြိမ် အန်။

29 လွင် အန် တီ တဲး န့ ဘဲန် ဒါရာ ဒီ ဘေ ဒူင် ကွယ် ဘေ ဒွန် ပ့လုဝ့် ဒွန် နာ၊ တဲး န့ ကော ဇမ် စုဝ် လှုက်လှာန် ဘေ ဒွန် စုဝ် ဒွန် ဘာန်။

30 ဆေ ဒူအီ အူ ဝီ ဟဲ့ ငဝ်း ယမ် အီ ဟဝ်၊ အန် မိူဝ် လုဝ် ယမ် ဒူပ် ဂြုဝ်း ပီ ကာလာင် ဂေ အီ ဘဲန် ဆက်ဆေ လွင် အန်။ ဆေ န့ ယီ မိုဝ်း ဆက်ဆေ မီ အူ ဝီ၊ အာဝ် ပွိုန် ငဝ်း ယမ် ဒူအီ။

31 ဒဲင် တီ ဘေ တူ ပွိုန် ဒိုဝ်း ရွိုန် ပီ ထုတ် ဒူအီ အီ ဟဲ့ ငဝ်း ယမ် အီ ဟဝ်၊ န့ ဒိူန် လုဝ် ငဝ်း ယမ် အန်။

32 ဘော ဒူအီ အီ ဟဲ့ တဝ် ဟာဝ် ချြီင် ခဲင် မိူင် တွိုန်၊ ဘေ တူ ပွိုန် ဒိုဝ်း ရွိုန် ဒီ အန်၊ တဲး အန် ဝီ ထုတ် ဒုဝ် အန်၊ တဲး အန် ပွိုန် ဒီ ဝီ တး ကွယ် ဒူင် ကွယ် ဘြိမ် အန် အာတ့် ယမ် ဒါ တာင် လှူ ဒီ ဇဝ်ဖြာ။

33 ကွဲ့ ဘူင် တဲး မိူင် ဘေ တူ ဆီငါ။ ဆေ ဒူအီ အူ ဝီ ငဝ်း ယမ် အီ ဟဝ်၊ န့ တဲး မိူင် တူ ဆီငါ။ ဆေ ဘေ တူ ဝီ ငဝ်း ယမ် ဒူအီ အီ ဟဲ့ ငဝ်း ယမ် အာဆာက် အီ ဟဝ် တီ၊ အာဝ် မိုဝ်း ပီ ပွိုန် ဘူင် ဘေ ခေါ အူ မျုဝ် အီ တဲး မိူင် တီ ဝီ ဆီငါ။ 34 ဘေ ကွဲ့ ဘူင် တဲး မိူင် ဘေ တူ ဆီငါ။ ခုဝ်၊ အုဝ် မုး ဇဝ်ဖြာ အီ ကွယ် ကာတဲ ဘေ ဒူအီ အီဆာရေလ။”