1 ဇဝ်ဖြာ ဝီ စ်ု အာမုဝ်ဆဲ၊ 2 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ ဘေ ဟီ ဟာဝ် ဇမ် ခဲင် မိူင် ကာနန့် တွိုန်၊ ကာအုန် ကာဒါယ် မိူင် ပဲ့ ဟဲ့ ပွိုန် ဘေ တီ၊ န့ ပါယ် နီ။

3 ဘ့လာက် နာ တေတ့်၊ န့ ဒီ မိုဝ်း ပြဲ ကာဟဝ်း အီ စိူဝ် စီနာ။ ကာအုန် မိူင် ဘေ ဘော ဒူပ် ကာအုန် မိူင် အေဒူမ်။ ဘ့လာက် နာ လေး ဆီငဲ ကာအုန် မိူင် ဘေ တီ ဒီ ဒူပ် နာ တေတ့် အိုမ် ဒိုင် ဆယ့် ဆွင့်။ 4 ဟဲ့ ဟွတ့်၊ န့ ဒီ ဟာဝ် ဒူပ် န့တေန့် အာရာဘိမ်၊ ဝီ ဟာဝ် ဘော ခဲင် ပြဲ ကာဟဝ်း စီနာ တွိုန်၊ တဲး န့ ဝီ ဇမ် နာ တေတ့် ကာဒေဘာနာ၊ ပီ ဝီ ဝိတ့် ဝိဝ် ဘ့လာက် နာ ဂေတ့် ဆီငဲ၊ ဝီ ဟာဝ် ဒီ ဒူင် စိူဝ် ဟာစာအာဒါရာ။ ဟဲ့ ဟွတ့်၊ ပီ ဝီ ဟာဝ် ဒီ ဒူင် စိူဝ် အာစာမူန်။ 5 စုး ဒီ တီ၊ န့ ပီ ဝီ ဝိတ့် ဟာဝ် ဒီ ဒီလယ့် အီ စိူဝ် ဒီလယ့် အဲဂိုပ် ဘော ဟာဝ် ဆိူတ် ဒီ အိုမ် နမ်မုက်ဆာရာ။

6 အီ မုး ကာအုန် မိူင် ဘေ အီ ကွယ် နာ ဂေတ့် ဆီငဲ၊ န့ ဒီ ဒူပ် ဘာင် အိုမ် နမ်မုက်ဆာရာ။

7 အီ မုး ကာအုန် နာ ကွာ၊ န့ စုး ဒီ အိုမ် နမ်မုက်ဆာရာ၊ ဟာဝ် ဆိူဝ် ဒီ နွန် ဟုဝ်ရာ၊ 8 ပီ ဝီ ဟာဝ် ဇမ် ဒူပ် န့တေန့် လေဘုဝ်ဟာမာတ်၊ ပီ ဝီ ဟာဝ် ဆိူဝ် ဒီ ဒူင် စိူဝ် စေတာတ်၊ 9 ပီ ဝီ ဟာဝ် ဒီ ဒူင် စိူဝ် စီဘြူန်၊ ဘော ဟာဝ် ဆိူတ် ဒီ ဒူင် စိူဝ် ဟာစာရေ အီ မုး ကာအုန် ဘ့လာက် နာ ကွာ။

10 အီ မုး ကာအုန် ဘ့လာက် နာ လေး ဆီငဲ၊ မိူင် ဘေ ဒီ စုး ဒီ ဒူင် စိူဝ် ဟာစာရေ တီ၊ ဟာဝ် ဇမ် ဒူင် စိူဝ် ဆာဖာန်။ 11 ဟဲ့ ဟွတ့်၊ ကာအုန် မိူင် ဘေ တီ ဒီ ဟာဝ် ဒီ မိူင် ရီဘာလာ အီ ကွယ် နာ လေး ဆီငဲ မိူင် အာအိန်။ န့ ဘော ဟာဝ် ဒူပ် ဆန် နွန် နာ လေး ဆီငဲ အိုမ် ဒိုင် ကီနာရေတ် တွိုန်။^a 12 န့ ဘော ဟာဝ် နာ တေတ့် ဘ့လဲင် အိုမ် ယောဒါန်၊ ဟာဝ် ဆိူတ် ဒီ အိုမ် ဒိုင် ဆယ့် ဆွင့် တွိုန်။ အာတီ န့ မုး ကာအုန် ကာဒါယ် အီ ရူပ် မိူင် ဘေ ဘော ဖွုန် ဘ့လာက်။”

13 ဟဲ့ ဟွတ့် ပါယ် တီ အာမုဝ်ဆဲ ပီ ဝီ ကာလာင် ဒီ ဂေ ဒူအီ အီဆာရေလ တဝ်း၊ “အာနီ မုး မိူင် ပီ လုဝ် ဘေ ကာတာမ်၊ လုဝ် လာယ် ကာဆာင်။ န့ မုး မိူင် ပီ ဒီ အာပ် ဒွါ ဇဝ်ဖြာ ဒီ ဒူအီ အီဆာရေလ အီ မုး ဒိမ် ခြိုဝ် ဒီ အူ ကာတဲ တွိုန်။ 14 ခုဝ်၊ ဂေ ဒူအီ ခြိုဝ် အာမာနာဆေ အာဒါ အူ ကာတဲ ဘော ဒူအီ ခြိုဝ် အာရူဘေန် ဘော ဒူအီ ခြိုဝ် အာဂတ်၊ ဂေ ဟဲ့ ဟွတ့် ပွိုန် မိူင် ဂေ။ ဂေ ဟဲ့ ဟွတ့် လာယ် ကာဆာင် ကာဒါယ် ဒီ ဂေ၊ တဲး န့ ဘဲန် ခါဂုန် ဂေ ခြိုဝ် မှဝ် ခြိုဝ် အန်။ 15 ဂေ ဟဲ့ ပွိုန် ကာဒါယ် အီ ကွယ် နာ လေး ဆီငဲ ဘ့လဲင် ယောဒါန် အီ ဝီ လာယ် ကာဆိူဝ် ဒီ မိူင် ယေရီခုဝ် တွိုန်။”

16 ဝါယ် အန် တီ ဇဝ်ဖြာ ပီ ဝီ တဝ်း ဒီ အာမုဝ်ဆဲ၊ 17 “အာလေအာဆာ အီ မုး ဒါ အီ လှူ ဒီ ဇဝ်ဖြာ ဘော အာယုဝ်ဆူအာ အီ မုး ဂွန် အာနုန် တွိုန်၊ ဂါယ် အီ ဒီ ကာဆာင် ကာဒါယ် ခဲင် မိူင် တီ ဒီ ဂေ ဒူအီ ကိူန်။ 18 ဒဲင် တီ၊ မဲ လုဝ် ဝီ ရဝ်း ဒူအီ အာဒါ အူ ခြိုဝ် အူ ဝီ၊ တဲး ဂေ ဘဲန် ဒါ အီ စွယ် ဂါယ် ဒေါ ကာဆာင် ဂါယ် ကာဒါယ် ခဲင် မိူင် ဘော မိူင်။

19 အာနီ န့ ဘော မုး စိူဝ် ဂေ ဒူအီ ပီ ရဝ်း ဂေ တီ။ ခဲင် ခြိုဝ် အာယူဒါ န့ ဘော မုး အာဂါလိပ် အီ မုး ဂွန် အာယေဖုဝ်နာ။

20 ခဲင် ခြိုဝ် အာဆီမေအူန် န့ ဘော မုး အာဆေမူအေလ အီ မုး ဂွန် အာမီဟုတ်။

21 ခဲင် ခြိုဝ် အာဘေန်ယာမ် န့ ဘော မုး အာအေလီတတ် အီ မုး ဂွန် အာခီလူန်။

22 ခဲင် ခြိုဝ် အာဒါန် န့ ဘော မုး အာဘူကီ အီ မုး ဂွန် အာယောကာလီ။

23 ခဲင် ခြိုဝ် အာမာနာဆေ အီ မုး ဂွန် အာယုဝ် န့ ဘော မုး အာဟာယေလာ အီ မုး ဂွန် အာအေဝှူတ်။

24 ခဲင် ခြိုဝ် အာအေဖာရိမ် န့ ဘော မုး အာကေမူအေန် အီ မုး ဂွန် အာဆီဖာဒါန်။

25 ခဲင် ခြိုဝ် အာဇေဘူလူန် န့ ဘော မုး အာအေလီဇာဖာန် အီ မုး ဂွန် အာဖာနာက်။

26 ခဲင် ခြိုဝ် အာအီဆာခါ န့ ဘော မုး အာဘာလာဒေစ အီ မုး ဂွန် အာဇန်။

27 ခဲင် ခြိုဝ် အာဆေန် န့ ဘော မုး အာဟီဟုတ် အီ မုး ဂွန် အာဆာလောမီ။

28 ခဲင် ခြိုဝ် အာနာပ်ထာလီ၊ န့ ဘော မုး အာဘေဒါဟေလ အီ မုး ဂွန် အာမီဟုတ်။”

29 ဒူအီ ဂေ တီ၊ ဂေ မုး ဒူအီ ပီ စ်ု ဇဝ်ဖြာ၊ တဲး ဂေ စွယ် ကာဆာင် ကာဒါယ် ခဲင် မိူင် ကာနန့် တွိုန်၊ ဒွါ ဒီ ဂေ ဒူအီ အီဆာရေလ။