ခါန် 33
လွင် ဂေ ဒူအီ အီဆာရေလ ကာထုဝ့် ဒူင် ချ ဂေ
1 အာနီ န့ မုး လွင် ဒူင် ဟဲ့ ချ ဂေ ဒူအီ အီဆာရေလ ဝါယ် ဟဲ့ လေး ဂေ ခဲင် မိူင် အဲဂိုပ်။ ဂေ မိူဝ် ဟဲ့ ချ ဒူပ် ဖိုင် မှဝ် ဖိုင် အန် ဒေါ ဟာဝ် ဂေ ဒူပ် န့တေန့်။ အာမုဝ်ဆဲ ဂါယ် အာရူန် ဟဲ့ ဘဲန် အီ ယဲတ့် ဂေ။ 2 အာမုဝ်ဆဲ မိူဝ် ဟဲ့ ဒဲမ် အုန် ဒူင် ချ ဂေ ဒွန် ပ့လုဝ့် ဒူပ် ပဲ့ ဟဲ့ စ်ု ဇဝ်ဖြာ အန် ဘူင်။
3 ဂေ ဒူအီ အီဆာရေလ ဟဲ့ လေး ခဲင် မိူင် အဲဂိုပ် ဒေါ မုး မာဂျီန် လှေး၊ ဆီငဲ ဂိုဝ် ဒီ မ့ဖန်။ ဝါယ် ဟဲ့ ဟွတ့် ဂေ ဟူမ် မာဘူ အီ တဲး ဇဝ်ဖြာ ကာလုဝ်း ကာင် ဂေ၊ ပါ ခဲညှာ ဆိန့်ဝး ဂေ မိူဝ် ဟဲ့ လေး ခဲင် မိူင် ရာမေဆေတ်၊ တဲး ဂေ ဒူအီ အဲဂိုပ် ဘောကာဂ့လျီတ် ပွိုန် ဒီ ယိုဝ်။ ဂေ မိူဝ် အာဝ် ဟူ ယုဝ် အာဆေ။ 4 ခုဝ်၊ ဒေါ အန် တီ ဂေ ဒူအီ အဲဂိုပ် ဆီငျာ ဒိပ် ဂွန် ဂိန့် ဂေ ပဲ့ ဟဲ့ ငဝ်း ဇဝ်ဖြာ တဲး ဂေ ယမ် တူတ့်။ ပါယ် တီ ဇဝ်ဖြာ ဟဲ့ ဒိုဝ်း ဝဲန် ပွုန် ဇဝ် ပီ ကြိုပ် ဂေ ဒူအီ ခဲင် မိူင် အဲဂိုပ် ဒွန် ကာဒင်။
5 ဂေ ဒူအီ အီဆာရေလ ဘော လေး ဒီ မိူင် ရာမေဆေတ် ဘော ဝီ ဟာဝ် ချ ဒီ မိူင် ဆူခူတ်။
6 ဂေ ဘော ယိတ့် ဒီ မိူင် ဆူခူတ် တီ၊ ပီ ဝီ ဟာဝ် ချ ဒီ ဒူင် အီ စိူဝ် အေထာမ် အီ ကွယ် ခူပ် ပြဲ ကာဟဝ်း။
7 ဂေ ဘော လေး ဒီ ဒူင် စိူဝ် အေထာမ် တီ၊ ပီ ဝီ ကာဘတ် ဝိဝ် ဒီ အူ ပ့လုဝ့် အီ စိူဝ် ပီဟာဟီရူတ် အီ ကွယ် နာ လေး ဆီငဲ မိူင် ဘာလဆေဖူန်။ ဂေ ဘော ချ ကွယ် ခူပ် မိူင် မိက်ဒူန်။
8 ဂေ ဘော ဝီ ယိတ့် ဒီ ဒူင် ပီဟာဟီရူတ် တီ၊ ပီ ဝီ ကာလုဝ်း ဟာဝ် ကာတဲ အိုမ် ဒီနှူင် ရေန့်၊ ဝီ ဟာဝ် ဒူပ် န့တေန့် ခဲင် ပြဲ ကာဟဝ်း အာဒါ အူယ် ဆီငဲ။ ဂေ ဘော ဟာဝ် ချ ဒီ ဒူင် စိူဝ် မာရာ။
9 ဂေ ပီ ဝီ ယိတ့် ဒီ မာရာ တီ၊ ပီ ဝီ ကာထုဝ့် ဟာဝ် ဒီ ဒူင် စိူဝ် အေလိမ်။ ဒီ အေလိမ် တီ၊ န့ မိုဝ်း အိုမ် ခိုမ် ဂိုဝ် ဒီ အာ ဘူင့် ဘော ဟေ စိုက် ဘူ ဂိုဝ် ကာဒင်။ ဂေ ဘော ချ ဒီ တီ။
10 ဂေ ဝီ ယိတ့် ဒီ ဒူင် စိူဝ် အေလိမ် တီ၊ ပီ ဝီ ဟာဝ် ချ ဒီ ခူပ် နှူင် ရေန့်။
11 ဝါယ် တီ၊ ဂေ ပီ ဝီ ဟာဝ် ချ ခဲင် ပြဲ ကာဟဝ်း အီ စိူဝ် ဆေအိန်။
12 ဝါယ် အန် တီ ဂေ ပီ ဝီ ဟာဝ် ချ ဒီ ဒူင် စိူဝ် တောဖာကာ။
13 ဟဲ့ ဟွတ့်၊ ဂေ ပီ ဝီ ဟာဝ် ချ ဒီ ဒူင် စိူဝ် အာလူဆာ။
14 ဝါယ် တီ ဂေ ပီ ဝီ ဟာဝ် ဒီ ဒူင် စိူဝ် ရေဖီဒိမ် အီ မုး ဒူင် တူ မိုဝ်း ဒီ ဒျီင် အိုမ် တွိုန်။
15 ဂေ ဘော ယိတ့် ဒီ ရေဖီဒိမ် တီ၊ ပီ ဝီ ဟာဝ် ချ ခူပ် နွန် ဆီနာယ် ခဲင် ပြဲ ကာဟဝ်း။
16 ဂေ ဘော ယိတ့် ဒီ နွန် ဆီနာယ် တီ၊ ပီ ဝီ ဟာဝ် ချ ဒီ မိူင် ဂီဘာရုတ်ဟာတာဝါ။
17 ဂေ ဘော ယိတ့် ဒီ ဂီဘာရုတ်ဟာတာဝါ တီ၊ ပီ ဝီ ဟာဝ် ချ ဒီ ဒူင် စိူဝ် ဟာစာရုတ်။
18 ဂေ ပီ ဝီ ယိတ့် ဒီ ဟာစာရုတ် တီ၊ ပီ ဝီ ဟာဝ် ချ ဒီ ဒူင် စိူဝ် ရိတ်ဆာမာ။
19 ဂေ ဘော ယိတ့် ဒီ ရိတ်ဆာမာ တီ၊ ပီ ဝီ ဟာဝ် ချ ဒီ ဒူင် စိူဝ် ရိမ်မူန်ဖေရေတ်။
20 ဂေ ဘော ယိတ့် ဒီ ရိမ်မူန်ဖေရေတ် တီ၊ ပီ ဝီ ဟာဝ် ချ ဒီ ဒူင် စိူဝ် လီပါနာ။
21 ဂေ ဘော ယိတ့် ဒီ လီပါနာ တီ၊ ပီ ဝီ ဟာဝ် ချ ဒီ ဒူင် စိူဝ် ရိတ်ဆာ။
22 ပီ ဝီ ယိတ့် ဒီ ရိတ်ဆာ တီ၊ ပီ ဝီ ဟာဝ် ချ ဒီ ဒူင် စိူဝ် ကီဟာလာဆ။
23 ပီ ဝီ ယိတ့် ဒီ ကီဟာလာဆ တီ၊ ပီ ဝီ ဟာဝ် ချ ဒီ နွန် ဆာဖာ။
24 ပီ ဝီ ယိတ့် ဒီ နွန် ဆာဖာ တီ၊ ပီ ဝီ ဟာဝ် ချ ဒီ ဒူင် စိူဝ် ဟာရာတ။
25 ပီ ဝီ ယိတ့် ဒီ ဟာရာတ တီ၊ ပီ ဝီ ဟာဝ် ချ ဒီ ဒူင် စိူဝ် မာကာလူတ်။
26 ပီ ဝီ ယိတ့် ဒီ မာကာလူတ် တီ၊ ပီ ဝီ ဟာဝ် ချ ဒီ ဒူင် စိူဝ် ထာဟာတ်။
27 ပီ ဝီ ယိတ့် ဒီ ထာဟာတ် တီ၊ ပီ ဝီ ဟာဝ် ချ ဒီ ဒူင် စိူဝ် ထေန်ရာ။
28 ပီ ဝီ ယိတ့် ဒီ ထေန်ရာ တီ၊ ပီ ဝီ ဟာဝ် ချ ဒီ ဒူင် စိူဝ် မီဆာကာ။
29 ပီ ဝီ ယိတ့် ဒီ မီဆာကာ တီ၊ ပီ ဝီ ဟာဝ် ချ ဒီ ဒူင် စိူဝ် ဟာဆမောနာ။
30 ပီ ဝီ ယိတ့် ဒီ ဟာဆမောနာ တီ၊ ပီ ဝီ ဟာဝ် ချ ဒီ ဒူင် စိူဝ် မောဆာရူတ်။
31 ပီ ဝီ ယိတ့် ဒီ မောဆာရူတ် တီ၊ ပီ ဝီ ဟာဝ် ချ ဒီ ဒူင် စိူဝ် ဘေန်ယာကာန်။
32 ပီ ဝီ ယိတ့် ဒီ ဘေန်ယာကာန် တီ၊ ပီ ဝီ ဟာဝ် ချ ဒီ ဒူင် စိူဝ် ဟာရာကိတ်။
33 ပီ ဝီ ယိတ့် ဒီ ဟာရာကိတ် တီ၊ ပီ ဝီ ဟာဝ် ချ ဒီ ဒူင် စိူဝ် ယုတ်ဖာဆ။
34 ပီ ဝီ ယိတ့် ဒီ ယုတ်ဖာဆ တီ၊ ပီ ဝီ ဟာဝ် ချ ဒီ ဒူင် စိူဝ် အေပါရောနာ။
35 ပီ ဝီ ယိတ့် ဒီ အေပါရောနာ တီ၊ ပီ ဝီ ဟာဝ် ချ ဒီ ဒူင် စိူဝ် အေစာယူန်ကာဘာ။
36 ပီ ဝီ ယိတ့် ဒီ အေစာယူန်ကာဘာ တီ၊ ပီ ဝီ ဟာဝ် ချ ဒီ မိူင် ဆာဒေတ် အီ ကွယ် ခဲင် ပြဲ ကာဟဝ်း အီ စိူဝ် စီနာ။
37 ပီ ဝီ ယိတ့် ဒီ ဆာဒေတ် တီ၊ ပီ ဝီ ဟာဝ် ချ ဒီ နွန် ဟုဝ်ရာ အီ ကွယ် ဒီ ကာအုန် ကာဒါယ် မိူင် အေဒူမ် တွိုန်။ 38 ဝါယ် ဟဲ့ လေး ဂေ ဒူအီ အီဆာရေလ ခဲင် မိူင် အဲဂိုပ် အာဒါ ဖွုန် ဂိုဝ် ဆီနမ်၊ ဒေါ မုး မာဂျီန် မ့ဖန်၊ ဆီငဲ လှေး၊ အာရူန် အီ မုး ဒါ အီ လှူ ဒီ ဇဝ်ဖြာ တွိုန်၊ အန် ဘော ဝီ ဟုဝ့် ဒဲင် နွန် ဟုဝ်ရာ ကူပ် ဟဲ့ ကာလာင် အုန် ဇဝ်ဖြာ ဒီ အန်။ အန် ဘော ဟုဝ့် ယမ် ဒီ တီ။ 39 ဒေါ အန် တီ အာဆာက် အန် ဟဲ့ ပွိုန် အူ မာယဝ်း ဒီ အာ ဂိုဝ် ဒီ အူယ် ဆီနမ်။
40 ခုန်ဒီခမ် အီ အိုပ် မိူင် အာရာတ်၊ အီ မုး ဒူအီ အာမျုဝ် ကာနန့်၊ အီ ကွယ် ခဲင် မိူင် ကာနန့် ဘ့လာက် နာ တေတ့် တွိုန်၊ အန် ဘော ယိုဝ် လွင် ဂေ ဒူအီ အီဆာရေလ ဟဲ့ တး။
41 ဝါယ် အန် တီ ဂေ ပီ ဝီ ယိတ့် ဒီ နွန် ဟုဝ်ရာ တီ၊ ပီ ဝီ ဟာဝ် ချ ဒီ ဒူင် စိူဝ် စာလမောန။
42 ပီ ဝီ ယိတ့် ဒီ စာလမောန တီ၊ ပီ ဝီ ဟာဝ် ချ ဒီ မိူင် ပူနုန်။
43 ပီ ဝီ ယိတ့် ဒီ ပူနုန် တီ၊ ပီ ဝီ ဟာဝ် ချ ဒီ ဒူင် စိူဝ် အောဘူတ်။
44 ပီ ဝီ ယိတ့် ဒီ အောဘူတ် တီ၊ ပီ ဝီ ဟာဝ် ချ ဒီ ဒူင် စိူဝ် အာဟာဘာရိမ် အီ မုး ဒီ ကာအုန် ကာဒါယ် မိူင် မုဝ်အာပ် တွိုန်။
45 ဂေ ဘော ဝီ ယိတ့် ဒီ အာဟာဘာရိမ် တီ၊ ပီ ဝီ ဟာဝ် ချ ဒီ မိူင် ဘုဝ်နာကာတ်။
46 ဂေ ပီ ဝီ ယိတ့် ဒီ ဘုဝ်နာကာတ် တီ၊ ပီ ဝီ ဟာဝ် ချ ဒီ ဒူင် စိူဝ် အာဘာလာမုန်ဘာလာဆိမ်။
47 ဂေ ပီ ဝီ ယိတ့် ဒီ တီ၊ ပီ ဝီ ဟာဝ် ချ ဒီ နွန် အာဘာရိမ် အီ ကွယ် ခူပ် နွန် နေပေါ။
48 ဂေ ပီ ဝီ ယိတ့် ဒီ တီ၊ ပီ ဝီ ဟာဝ် ချ ဒီ ဂ့လင် မုဝ်အာပ် အီ ကွယ် ခူပ် ဘ့လဲင် အိုမ် ယောဒါန် အီ ဝီ လာယ် ကာဆိူဝ် ဒီ မိူင် ယေရီခုဝ် တွိုန်။ 49 ပါယ် တီ ဂေ ဘော ချ ကွယ် ခူပ် ဘ့လဲင် အိုမ် ယောဒါန် တီ၊ စုး ဒီ မိူင် ဘီယေဆီမာတ် ကော ဇမ် မိူင် အာဘေလဆိတ်၊ အီ ကွယ် ခဲင် ဂ့လင် မုဝ်အာပ် တီ။
50 ဒေါ ကွယ် ဂေ ခဲင် ဂ့လင် မိူင် မုဝ်အာပ် အီ ကွယ် ခူပ် ဘ့လဲင် အိုမ် ယောဒါန်၊ အီ ဝီ လာယ် ကာဆိူဝ် ဒီ မိူင် ယေရီခုဝ် တီ၊ ဇဝ်ဖြာ ဝီ စ်ု အာမုဝ်ဆဲ၊ 51 တဲး အန် ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဆေ ဘေ ဟီ ကာလုဝ်း အိုမ် ဘ့လဲင် ယောဒါန်၊ ဟာဝ် ဇမ် ခဲင် မိူင် ကာနန့် တွိုန်၊ 52 ဘေ လုဝ် ဟုဝ် လေး ဂေ ဒူအီ အီ ကွယ် ခဲင် ရဝ် ခဲင် မိူင် တီ ဘောကာဂ့လျီတ်။ ဘေ လုဝ် ပျာတ့် ဝဲန် ဘော အာရိုပ် ရာင် ပဲ့ ဟဲ့ ဘူင် ဂေ၊ ပျာတ့် ဝဲန် ဘော အာရိုပ် ပဲ့ ဟဲ့ လှုဝ် ဂေ၊ ပျာတ့် ဝဲန် တူတ့် ဘော ဒူင် ကြိုပ် ဂေ ဒီ ဇဝ် ဘဲန် ကာဒင် ဘဲန် ကာဒင်။ 53 ခုဝ်၊ အုဝ် ဟဲ့ ဒိုဝ်း မိူင် တီ ဒွါ ဒီ ဘေ။ ဘေ လုဝ် ကွယ်၊ လုဝ် ဘိုင် မိူင် တီ။ 54 တဲး ဘေ ကာတာမ် လာယ် ကာယဝ်း ကာဒါယ် တီ ဒီ ဘေ၊ တဲး န့ ဒူပ် ခြိုဝ် မှဝ် ခြိုဝ် အန်။ ဆေ ဒူအီ ကိူန်၊ ဘေ ဘော လုဝ် ဒွါ ကိူန်။ ဆေ ဒူအီ ပြေတ့်၊ ဘေ ဘော လုဝ် ဒွါ ပြေတ့်။