1 ခြိုဝ် အာရူဘေန် ဂါယ် ခြိုဝ် အာဂတ် တွိုန် ဂေ မိုဝ်း ဒုဝ် ဆတ်ဒါဝါ ကိူန် ကာဆဝ်။ ဂေ ဘော ယိုဝ် မိူင် ယာဇေရာ ဂါယ် မိူင် ဂီလေအာတ် ဟဲ့ မွှိုမ် ဟျီင် ဒုဝ် ဆတ်ဒါဝါ ဂေ ဒီ တီ။ 2 ဂေ ဘော ဟာဝ် ဒူင် ကွယ် အာမုဝ်ဆဲ ဂါယ် အာလေအာဆာ အီ မုး ဒါ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် ဂေ ဒူအီ ကိူန်။ ဂေ တဝ်း၊ 3 “မိူင် အာတာရာတ် ဘော မိူင် တီဖူန်၊ မိူင် ယာဇေရာ၊ မိူင် နိမ်ရာ၊ မိူင် ဟေဆာဖူန်၊ မိူင် အေလေအာလေ ဘော မိူင် ဆေဖာမ်၊ မိူင် နေပေါ၊ မိူင် ဖောနာ 4 အီ မုး မိူင် ပဲ့ ဟဲ့ ကာဂုဝ်း ဇဝ်ဖြာ ဒွါ ဒီ အေ ဒူအီ အီဆာရေလ၊ န့ မုး မိူင် အီ မွှိုမ် ဟာဝ် ဟျီင် ဒုဝ် ဆတ်ဒါဝါ။ ယေ အီ မုး ဒဲစေန့် မဲ ဂေ နီ၊ ယေ မိူဝ် ဟဲ့ မိုဝ်း ကိူန် ဒုဝ် ဆတ်ဒါဝါ။ 5 ဆေ န့ ဘော ပွိုန်၊ ယေ မှာန့်၊ တဲး ယေ ကွယ် ခဲင် မိူင် တီ၊ တဲး န့ ဘဲန် မိူင် ယေ။ အာဝ် လုဝ် တဲး ယေ ကာလုဝ်း ဟာဝ် နာ ဒွယ် အိုမ် ဘ့လဲင် ယောဒါန်။”

6 အာမုဝ်ဆဲ ဝီ တဝ်း ဒီ ဂေ၊ “ဂေ ဘီနွင် ဘေ ယီ ဆီ လုဝ် ဟာဝ် ကာဂုဝ်း ဒီ ဒါ ဆိုက်။ ဘေ ဆီ ကွယ် ဒီ နီ တူ စွယ် မာဆေ။း 7 မှဝ် န့ ပါယ် ပီ ပျာတ့် ဘေ နဝ်း ဒူအီ အီဆာရေလ၊ ကွဲ့ တဲး ဂေ မိုဝ်း နဝ်း ဆီ ကာလုဝ်း ဘ့လဲင် အိုမ် ယောဒါန်၊ ဟာဝ် ဇမ် ခဲင် မိူင် ပီ ဒီ အာပ် ဇဝ်ဖြာ ဒီ အေ။း 8 ဂုန့် ဒင် ဘေ မိူဝ် ဟဲ့ ဘူင် ပါယ် တီ ဒေါ စ်ု အုဝ် ဂေ ဟာဝ် ချွင် ဒီ ယွတ် ခဲင် မိူင် နီ၊ ဒေါ ကွယ် ဂေ ဒီ ကာဒေဘာနာ တွိုန်။ 9 ခုဝ်၊ ဒေါ ဟာဝ် ဇမ် ဂေ ဒီ ဒီလယ့် အေခူန်၊ ဝါယ် ဟဲ့ ယိုဝ် ဂေ မိူင် တီ၊ ဂေ ဟဲ့ ဝီ ပျာတ့် နဝ်း ဒူအီ အီဆာရေလ၊ ကွဲ့ တဲး ဂေ မိုဝ်း နဝ်း ဆီ ဟာဝ် လိုပ် ခဲင် မိူင် ပီ ဒွါ ဇဝ်ဖြာ ဒီ ဂေ။ 10 ဒေါ အန် တီ ဇဝ်ဖြာ ဘော ရူ ကာဆဝ် ဒီ ဂေ ဘော ဒိူင် ဂေ တဝ်း၊ 11 ‘ဂေ ဒူအီ အီ လေး တး ခဲင် မိူင် အဲဂိုပ်၊ စုး ဆိန့် အာဆာက် အာ ဂိုဝ် ဟုဝ့် နာ ဒဲင်၊ အူ ဝီ မိူဝ် ဂေ တူ ပွိုန် ဒီ လိုပ် ခဲင် မိူင် ပဲ့ ဟဲ့ တဝ်း အုဝ် ဒီ ဒွါ ဒီ ဂေ။ ဂေ မိူဝ် တူ ပွိုန် ခဲ့ ပီ ဒွါ အုဝ် ကာဒိက် ဆတ်ဇာ ဒီ အာဘြာဟမ်၊ အာဆဲက် ဘော အာကူပ် တွိုန်။ ခုဝ်၊ ဂေ တူ မိုဝ်း နဝ်း ဆီ ဒူပ် အုဝ်။ 12 န့ ယီ မိုဝ်း မီ အာဂါလိပ် အီ မုး ဂွန် အာယေဖုဝ်နာ အီ မုး ဒူအီ အာမျုဝ် ကေနေဆိတ် ဘော အာယုဝ်ဆူအာ အီ မုး ဂွန် အာနုန် တွိုန် အီ ပွိုန် ဒီ လိုပ်။ ဂါယ် ဟဲ့ မိုဝ်း နဝ်း ဆီ ဒူပ် ဆီချာ အုဝ်။’ 13 ခုဝ် အန် တီ၊ ဇဝ်ဖြာ ဟဲ့ ရူ ကာဆဝ် ဒီ ဂေ ဘော တဲး ဂေ ဟာဝ် ဝိဝ် ဟာဝ် ဝေန့် ခဲင် ပြဲ ကာဟဝ်း၊ တဲး န့ ကော နုဝ့် ဖွုန် ဂိုဝ် ဆီနမ်၊ တဲး ဂေ အီ ဘူင် နာ ဟာယ် နာ မိူက် ဒီ အာတ့် ဇဝ်ဖြာ တီ ကော ယမ် တူတ့်။

14 ဒေါ တီ နီ၊ ဘေ ပဲ့ ဟဲ့ ဝီ ကာဒါင် ဂုန့် ဒင် ဘေ။ ဘေ ယီ ဘူင် တဲး ဖိုင် ဂေ ဒူအီ ဟာယ် ဝဲ ဘြဲ ကိူန်။ ဘေ ဘူင် တဲး ဇဝ်ဖြာ ဝဲ ရူ ကာဆဝ် ဒီ ဒူအီ အီဆာရေလ။ 15 ခုဝ်၊ ဆေ ဘေ ဝး ဇဝ်ဖြာ၊ ဆေ ဇဝ်ဖြာ ဝီ ဝဲန် ဒူအီ ဘောကာဂ့လျီတ် တဲး ဂေ စှိုမ် ခဲင် ပြဲ ကာဟဝ်း နီ ပေါ အူ ဇေန့်၊ န့ မုး ကူပ် ဘေ။”

16 အာမုဝ်ဆဲ ဟဲ့ ဟွတ့် ကာလာင် ဂြုဝ်း တီ၊ ဂေ ဝီ တး ကွယ် ချြီ့ အာမုဝ်ဆဲ တဝ်း၊ “ယေ မှာန့် ဒီ ဘူင် အုန် ကာပိုမ် မာဘူ ယေ ဘော ဒဲ အုန် မိူင် တဲး ဂွန် ယေ ပွိုန် ဒီ ကွယ်။ 17 ယီ မုး ယေ၊ ယေ ဒီ ဟာဝ် ရိုမ် ဒူပ် ဂေ ဘီနွင် ယေ ဒူအီ အီဆာရေလ။ ယေ ဒီ ဘဲန် ဒါ အီ ကာဂုဝ်း ယဲတ့် ဒီ အာတ့်၊ တဲး ဘေ ကော ဇမ် ခဲင် မိူင် ဒူင် ဒီ ကွယ် ဘေ တီ။ ဆေ န့ ပါယ် တီ ဂွန် ဂေ လှုက်လှာန် ယေ၊ ဂေ ဒီ ပွိုန် ဒီ ကွယ် ခဲင် မိူင် အီ ဟဲ့ မိုဝ်း ရဲင် အီ ဟဲ့ မန် ဆီချာ။ ဂေ ဒီ လွတ် အာဖေ အာရေ ဒီ ဒူအီ အီ ကွယ် ခဲင် မိူင် နီ။ 18 ယေ မိူဝ် တူ ဝီ တး ဒီ ကာင် ယေ အာတ့် ဇမ် တူတ့် ဂေ ဒူအီ အီဆာရေလ ခဲင် မိူင် အီ ဒီ ဘဲန် ခါဂုန် ဂေ တီ။ 19 ယေ မိူဝ် တူ ဒိုဝ်း ခါဂုန် ခေါ အီ စဲက် အီ ကွယ် နာ ဒွယ် ဘ့လဲင် အိုမ် ယောဒါန်။ ခုဝ်၊ ယေ ဟဲ့ ပွိုန် ခါဂုန် အီ မုး ဘ့လာက် နာ နီ အိုမ် ဘ့လဲင် ယောဒါန် အီ မုး နာ လေး ဆီငဲ အိုမ် နီ။”

20 ဂေ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဝီ တဝ်း ဒီ ဂေ၊ “ဆေ ဘေ ဒီ ဘူင် ပီ တဝ်း ဘေ တီ၊ ဆေ ဘေ ရဲန် ခြိုင် ကာဂုဝ်း ဘေ၊ ဟာဝ် ကာဂုဝ်း နာ အာတ့် ဇဝ်ဖြာ၊ 21 ဆေ ဂေ ဒါ ဆိုက် ဘေ ဒီ ဘော ကာလုဝ်း အိုမ် ဘ့လဲင် ယောဒါန်၊ ဆေ ဂေ ဒီ ဘော ကာဂုဝ်း ဒီ ရန်ဆူ အေ နာ အာတ့် ဇဝ်ဖြာ၊ တဲး ဇဝ်ဖြာ ကော ပဲ တူတ့်၊ တဲး အန် ညွန် တဝ် တူတ့် ရန်ဆူ အန်၊ 22 ဆေ ဇဝ်ဖြာ ဟဲ့ တဲး ဂေ ဒူအီ အီဆာရေလ ပွိုန် ဒီ အိုပ် တူတ့် မိူင် တီ၊ ဘေ ဟဲ့ ပွိုန် ဝီ ဝိဝ် ဒူင် ကွယ် ဘေ။ ဆေ ဘေ ဘူင် ပါယ် တီ ဘေ တူ လုတ့် ဇဝ်ဖြာ ဘော ဂေ ဘီနွင် ဘေ အီ မုး ဒူအီ အီဆာရေလ ဘောကာဂ့လျီတ်။ ပါယ် တီ မိူင် အီ ကွယ် နာ လေး ဆီငဲ ဘ့လဲင် အိုမ် ယောဒါန် နီ၊ န့ ဒီ ဘဲန် မိူင် ပီ အာပ် ဇဝ်ဖြာ ဒီ ဘေ၊ တဲး ဘေ ကွယ်။

23 မာလဲ၊ ဆေ ဘေ တူ ဘူင် ဒူပ် ပီ ကာဆဲန့် ဘေ၊ ဘေ ဒီ လုတ့် ဇဝ်ဖြာ။ တဲး ဘေ နပ်၊ မှာပ် ပီ ဘူင် ဘေ တီ၊ န့ ဒီ ဒူပ် ဒီ ရန် ဘေ။ 24 ဆေ န့ ပါယ် တီ တဲး ဘေ ဘူင် ဒူပ် ပီ ကာဆဲန့် ဘေ တီ၊ တဲး ဘေ ဒဲ မိူင် အာဒါ ဂွန် ဘေ ဘော ဘူင် ကာပိုမ် အာဒါ မာဘူ ဘေ တီ။”

25 ဂေ ဒူအီ ခြိုဝ် အာဂတ် ဘော ဒူအီ ခြိုဝ် အာရူဘေန် ဝီ တဝ်း၊ “အိုဝ်၊ ယေ ဒီ ဘူင် ဒူပ် ပီ တဝ်း မဲ တီ။ 26 အီ မုး အီဘိုန့် ယေ ဂေ ဂွန် ယေ ဘောကာဂ့လျီတ် ဘော ဖိုင် မာဘူ၊ ဖိုင် မာမက် ယေ၊ ယေ ဒီ အုန် တူတ့် ဒီ မိူင် ဂေ နီ၊ အီ ကွယ် ခဲင် ကာဒါယ် မိူင် ဂီလေအာတ်။ 27 အီ မုး ယေ ဒဲစေန့် မဲ နီ၊ ယေ ဒီ ဒိုဝ်း ခြိုင် ကာဂုဝ်း ယေ။ ယေ ဒီ ကာလုဝ်း ဟာဝ် ဇမ် နာ ဒွယ် ဘ့လဲင် အိုမ် ယောဒါန်၊ ကာဂုဝ်း ဒီ အာတ့် ဇဝ်ဖြာ ဘော ဘူင် ဒူပ် ပီ တဝ်း မဲ တီ။”

28 ပါယ် တီ အာမုဝ်ဆဲ ဝီ ကာလာင် ဒီ အာလေအာဆာ အီ မုး ဒါ အီ လှူ ဒီ ဇဝ်ဖြာ ဘော ဒီ အာယုဝ်ဆူအာ အီ မုး ဂွန် အာနုန် တွိုန် ဘော ဒီ ဂေ ဒါ တာင် အီ အိုပ် ဂေ ဒူအီ အီဆာရေလ။ အန် တဝ်း ဒီ ဂေ၊ 29 “ဆေ ဒူအီ အာမျုဝ် အာဂတ် ဘော ဒူအီ အာမျုဝ် အာရူဘေန် ဟဲ့ ဂူင့် ခြိုင် ကာဂုဝ်း၊ ဟာဝ် ရိုမ် ဒူပ် ဘေ၊ ကာလုဝ်း ဘ့လဲင် အိုမ် ယောဒါန်၊ ဝီ ကာဂုဝ်း ဒီ အာတ့် ဇဝ်ဖြာ၊ ဆေ ဘေ ဟဲ့ ဟွတ့် ပဲ တူတ့် မိူင် တီ၊ ဘေ လုဝ် ဝီ အာပ် မိူင် ဂီလေအာတ်၊ ဒွါ ဒီ ဂေ၊ တဲး န့ ဘဲန် မိူင် ဂေ။ 30 မာလဲ၊ ဆေ ဂေ တူ ကာလုဝ်း ဟာဝ် ဇမ် နာ ဒွယ် ဘ့လဲင် ယောဒါန်၊ တူ ကာဂုဝ်း ဒူပ် ဘေ၊ ဂေ ဒီ ပွိုန် ခါဂုန် ခဲင် မိူင် ကာနန့် ပီ ဘေ။”

31 ဂေ ဒူအီ အာမျုဝ် အာဂတ် ဘော ဒူအီ အာမျုဝ် အာရူဘေန် ဝီ ကာဖြူမ် ဒီ တဝ်း၊ “ယေ အီ မုး ဒဲစေန့် မဲ၊ ယေ ဒီ ဘူင် ဒူပ် ခဲ့ ပီ စ်ု ဇဝ်ဖြာ ယေ ဘူင်။ 32 ယေ ဒီ ကာလုဝ်း ဟာဝ် ဇမ် နာ ဒွယ် ဘ့လဲင် အိုမ် ယောဒါန်၊ ကာဂုဝ်း နာ အာတ့် ဇဝ်ဖြာ၊ တဲး ယေ ပွိုန် ခါဂုန် အီ ကွယ် နာ လေး ဆီငဲ ဘ့လဲင် အိုမ် ယောဒါန် နီ။”

33 ပါယ် တီ အာမုဝ်ဆဲ ဘော ဒိုဝ်း မာန် မိူင် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ် ဘော မာန် မိူင် ခုန်ဒီခမ် အာအောခ အီ ကွယ် ခဲင် မိူင် ဘာဆန် ဘော မိူင် ဟဝ် ဘော ရဝ် အီ ကွယ် ကာချြီ့ ဒီ မိူင် ဂေ တီ။ အန် ဒိုဝ်း ဘော ဝီ အာပ် မိူင် ဂေ တီ ဒီ ဒူအီ ခြိုဝ် အာဂတ် ဘော ဒီ ဒူအီ ခြိုဝ် အာရူဘေန် ဘော ဒီ ဒူအီ ခြိုဝ် အာမာနာဆေ အာဒါ အူ ကာတဲ။

34 ဂေ ဒူအီ ခြိုဝ် အာဂတ် ဘော ဒဲ မိူင် ဂေ အီ မုး မိူင် ဒီဖူန်၊ မိူင် အာတာရာတ် ဘော မိူင် အာရော၊ 35 မိူင် အာတာရာဆောဖာန်၊ မိူင် ယာဇေရာ၊ မိူင် ယောဖေဟာ၊ 36 မိူင် ဘေတ်နီမာရာ ဘော မိူင် ဘေဟာရာန်။ မိူင် ဂေ တီ ဘောကာဂ့လျီတ် ဘော မုး မိူင် အီ မန် ဆီချာ။ ဂေ ဘော ဘူင် ကာပိုမ် မာဘူ ဂေ။

37 ဂေ ဒူအီ အာရူဘေန် ဝီ ဒဲ မိူင် ဂေ အီ မုး မိူင် ဟေဆာဖူန်၊ မိူင် အေလေအာလေ၊ မိူင် ကီရီယာဆိမ်၊ 38 မိူင် နေပေါ ဘော မိူင် ဘာလမွင်။ မိူင် ဂေ တီ ဂေ ဝီ ကာပ့လု ကာမာယ်။ ဂေ ဒဲ ဘော မိူင် ဆီဘာမာ။ ဂေ ဘော ဝီ ဒွါ စိူဝ် ကာမာယ် ဒီ မိူင် ပီ ဝီ ဒဲ ကာမာယ် ဂေ တီ။

39 ဂေ ဒူအီ အာမာခီရာ အီ မုး ဂွန် အာမာနာဆေ တွိုန်၊ ဂေ ဘော ဟာဝ် ကာဂုဝ်း ဒီ မိူင် ဂီလေအာတ်။ ဂေ ဘော ပွိုန် မိူင် တီ ဘော ဟုဝ် တဝ် ဒူအီ အာမုဝ်ရိတ် အီ ကွယ် ခဲင် မိူင် တီ။ 40 အာမုဝ်ဆဲ ဘော အာပ် မိူင် တီ ဒီ ဂေ ဒူအီ အာမာခီရာ၊ တဲး ဂေ ကွယ် ခဲင် မိူင် တီ။ 41 အာယာအီရာ အီ မုး ဂွန် အာမာနာဆေ တွိုန် ပီ ဝီ ဟာဝ် ကာဂုဝ်း ဘော ပွိုန် ရဝ် အီ ကွယ် နာ ရေတ့် မိူင် တီ မင် ရဝ်။ ဂေ ဘော တဲး ဒူင် တီ စိူဝ် ဟာဝူတ်ယာအီရာ။ 42 အီ မုး အာနောဘ၊ အန် ပီ ဝီ ဟာဝ် ကာဂုဝ်း ပွိုန် ဘော မိူင် ကေနာတ် ဘော ရဝ် အီ ကွယ် နာ ရေတ့် မိူင် တီ။ ဂေ ဘော တဝ်း၊ မိူင် တီ စိူဝ် မိူင် နောဘ။