1 ဝါယ် အန် တီ အာယုဝ်ဆူအာ ဝီ ဒဲ့ တး ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန်။ အန် ဝီ ကာလာင် ဒီ ဂေ တဝ်း၊ 2 “ဘေ ဟဲ့ ဘူင် တူတ့် ဒွန် မျုဝ် ပဲ့ ဟဲ့ ကာလာင် အာမုဝ်ဆဲ အီ မုး ဒဲစေန့် ဇဝ်ဖြာ တွိုန်။ ဘေ မိူဝ် ဟဲ့ ထူမ် ဂြုဝ်း ဒွန် မျုဝ် ပဲ့ ဟဲ့ ကာလာင် အုဝ်။ 3 ဟဲ့ လှေန့် ကာဆဝ် ကော ဇမ် အာတိုဝ် နီ ဘေ မိူဝ် တူ ဝဲန် ဘီနွင် ဘေ။ ဘေ မိူဝ် ဟဲ့ ဘူင် ဒူပ် ခဲ့ ပီ တဝ်း ဇဝ်ဖြာ ပီ ကြိုပ် ဘေ တဲး ဘေ ဘူင်။ 4 ဒေါ တီ နီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ တဲး ခြိုဝ် ဘီနွင် ဘေ ပွိုန် ဒီ ကွယ် နှိမ်၊ ကွယ် ဒါခိုယ်၊ တဲး န့ ဒူပ် ပီ ဒွိုမ် ဒွါ အန် ကာဒိက် ဆတ်ဇာ။ ကူပ် န့ ပါယ် တီ တဲး ဘေ ဝီ ဝေန့် ဒီ ကာင် ဘေ၊ တဲး ဘေ ဝီ ဟာဝ် ဒီ မိူင် အီ ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန်၊ အီ မုး ဒူင် ပဲ့ ဟဲ့ အာပ် အာမုဝ်ဆဲ အီ မုး ဒဲစေန့် ဇဝ်ဖြာ ဒီ ဘေ။ 5 တဲး ဘေ ဆာဒိက် ဘော ခတ် နဝ်း ဒီ ဘူင် ဒူပ် ဒါရာ ဘော ထူမ် ပီ ကာလာင် အုန် အာမုဝ်ဆဲ အီ မုး ဒဲစေန့် ဇဝ်ဖြာ။ တဲး ဘော နဝ်း ဘော ဖွိုမ် ဘေ ရွက့် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ တဲး ဘေ ဘူင် ပီ အိုင် အန် ဇဝ် ဘော ဒူပ် ဒါရာ အန်၊ ကာဒိုက် ကာဒဝ့် ဒီ အန် ဘော ဘူင် ဂါန် အန် ဇဝ်။”

6 အာယုဝ်ဆူအာ ဟဲ့ ဟွတ့် ကာလာင် ပါယ် တီ အန် မွင့်ကာရာ ဒွါ ဒီ ဂေ ဘော ဘ့လေး တဲး ဂေ ဝေန့်။ ဂေ မိူဝ် လေး ဒီ တီ၊ ဝီ ဝိဝ် ဒီ ထိုပ် ဂေ။ 7 အာမုဝ်ဆဲ ဟဲ့ ဒွိုမ် ဒွါ အုန် မိူင် ဘာဆန် ဒီ ဂေ ခြိုဝ် အာမာနာဆေ အာဒါ အူ ကာတဲ။ ဂေ အီ ဆီ ဂိတ် ခဲင် ခြိုဝ် အာမာနာဆေ အာဒါ ပေါ ကာတဲ၊ အာမုဝ်ဆဲ ဟဲ့ တဲး ဂေ ကွယ် ရိုမ် ဒူပ် ဘီနွင် ဂေ ဘ့လာက် နာ ဂေတ့် ဆီငဲ အိုမ် ဘ့လဲင် ယောဒါန်။ အာတ့် ဝေန့် ဂေ ဒီ မိူင် ဘာဆန်၊ အာယုဝ်ဆူအာ ဝီ မွင့်ကာရာ ဒွါ ဒီ ဂေ။ 8 အန် တဝ်း၊ “တဲး ဘေ ဒိုဝ်း ကြုဝ်ကြာမ် ဘေ အီ ဟဲ့ ကိူန် ကာဆဝ် ဘော ဒုဝ် ဆတ်ဒါဝါ ဘေ ဘော ရွိုန် ဂေ ခြိဝ် ဘေ၊ ဒိုဝ်း ဘော ဘွင့် ဒေန့် ဂေ ဟိန် ဘော ခြိုင် တာ ဘေ အီ ဟဲ့ ကိူန် ကာဆဝ်။ တဲး ဘေ ဝီ ဝေန့် ဒူင် ကွယ် ဘေ၊ တဲး ဘေ ဒိုဝ်း ကြုဝ်ကြာမ် ပဲ့ ဟဲ့ ဖာတ် တး ဘေ ဒီ ရန်ဆူ ဘေ၊ ဝီ ကာဆာင် ဒွါ ဒီ ဘီနွင် ဝေါဝဲ ဘေ။”

9 ဟဲ့ ဟွတ့် ပါယ် တီ ဂေ ဒူအီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန်၊ ဂေ ဘော ဝေန့် ဒူင် ကွယ် ခါဂုန် ဂေ။ ဂေ ဘော လာယ် ကာဂဝ်း ဒီ ဂေ ဒူအီ အီဆာရေလ ဒေါ ကွယ် ဂေ ဒီ မိူင် ဆီလုဝ် ခဲင် ကာဒါယ် မိူင် ကာနန့် တွိုန်။ ဂေ ဘော ဝီ ဝေန့် ဒူင် ကွယ် ရဝ် ဂေ ဘော မိူင် ဂေ ခဲင် မိူင် ဂီလေအာတ် အီ မုး ကာဒါယ် ပဲ့ ဟဲ့ စ်ု ဇဝ်ဖြာ ဒီ အာမုဝ်ဆဲ၊ တဲး အန် ဒွါ ဒီ ဂေ။

10 ဂေ ဘော ဟာဝ် ဇမ် ဒူင် စိူဝ် ဂီလီအူတ် အီ ကွယ် ခူပ် အိုမ် ဘ့လဲင် ယောဒါန် အီ ဆီ မုး ကာဒါယ် ခဲင် မိူင် ကာနန့် တွိုန်။ ဒေါ အန် တီ ဂေ ဒူအီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန် ဂေ ဘော ဘူင် ကာစှူင့် လှူ တာင် အူ ဘူင့် ခူပ် အိုမ် ဘ့လဲင် ယောဒါန် တီ။ 11 ဂေ ဒူအီ အီဆာရေလ ဘော ဝီ ယိုဝ် လွင် ဂေ ဒူအီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန် ဟဲ့ ဘူင် ကာစှူင့် လှူ အီ ကွယ် ခဲင် မိူင် ကာနန့် ဒီ မိူင် ဂီလီအူတ် ခဲင် ကာဒါယ် ဂေ ဒူအီ အီဆာရေလ ခူပ် အိုမ် ဘ့လဲင် ယောဒါန် တွိုန်။ 12 ဂေ ဟဲ့ ဟွတ့် ယိုဝ် ပါယ် တီ ခဲ့ ကွယ် ဂေ ဒူအီ ကိူန် ဘော တး ကာဇု ဒီ မိူင် ဆီလုဝ်၊ တဲး ဂေ ပွိုန် ဒီ ရဲန် ဆိုက်၊ တဝ်း ဒီ ဟာဝ် ကာဂုဝ်း ဒီ ဘီနွင် ဂေ။

13 ပါယ် တီ ဂေ ဒူအီ အီဆာရေလ ဘော စ်ု ဒါ အီ လှူ ဒီ ဇဝ်ဖြာ အီ စိူဝ် အာဖီနေဟာတ် အီ မုး ဂွန် အာလေအာဆာ တွိုန်၊ တဲး အန် ဟာဝ် ဒီ မိူင် ဂီလေအာတ် ဒီ ဒူင် ကွယ် ဂေ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန်။ 14 ဂေ ဒါ တာင် ဂိုဝ် ဝီ အီ မုး အာဒါ အူ ခြိုဝ် အူ ဝီ၊ ဂေ မိူဝ် ဟာဝ် ဒူပ် အာဖီနေဟာတ် အီ မုး ဒါ အီ လှူ ဒီ ဇဝ်ဖြာ တွိုန်။

15 ဂေ ဟဲ့ ဟွတ့် ဟာဝ် ဇမ် ဒီ မိူင် ဂီလေအာတ် ဒီ ဒူင် ကွယ် ဂေ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန်၊ ဂေ ဝီ တဝ်း၊ 16 “ဂေ ဒူအီ ကိူန် အီ မုး ဒူအီ ပီ အိုပ် ဇဝ်ဖြာ ဘောကာဂ့လျီတ် ဂေ ဒီမွှတ် တဝ်း၊ မှဝ် န့ ပါယ် ပီ ဘူင် ကာဘး ဘေ ဒီ ဇဝ်ဖြာ ပီ ကြိုပ် ဒူအီ အီဆာရေလ ပါယ် နီ။း ဘေ ဟဲ့ ဘူင် ကာစှူင့် လှူ အာဒါ ဘေ ဘော ပီရူ ဒီ ဇဝ်ဖြာ။ ဘေ ဟဲ့ ဟွတ့် ဝဲန် ဇဝ်ဖြာ။ 17 တဲး ဘေ ဝီ လှုဝ်း မှာပ် ပဲ့ ဟဲ့ ဘူင် အေ ဒီ နွန် ဘေအူရာ ဒေါ ဟဲ့ တဲး ဇဝ်ဖြာ ဒူအီ အေ ခမ် ဒုက် တာင် အီ မုး ဆဝ် ရောဂါ။ ပဲ့ ဟဲ့ ခမ် အေ တီ၊ ဘေ ထာင် န့ ညှမ် ဂြုဝ်။း ကော ဇမ် အာတိုဝ် နီ၊ အေ ညှမ် ဘူင် တဲး အေ ဆီငါ၊ တဲး ဇဝ်ဖြာ ဂဝ်း ဝဲန် တူတ့် မှာပ် အေ တီ။ 18 အာတိုဝ် နီ၊ ဘေ ဟဲ့ တဝ်း ဒီ ဝး ဇဝ်ဖြာ ဘော အာဝ် ဟူ ဒူပ် အန် ဇဝ်။ ဆေ ဘေ ဘူင် ကာဘး ဒီ ဇဝ်ဖြာ ပါယ် တီ ခဲညှာ ဇဝ်ဖြာ ဒီ ရူ ကာဆဝ် ဒီ ဒူအီ အီဆာရေလ ဒွန် အီ။ 19 ဆေ ကာဒါယ် ခဲင် မိူင် ဘေ တီ ဟဲ့ ကာဒါတ့်၊ ဆေ အာဝ် ကာအာပ် ကြိုပ် ဘေ ဇဝ်ဖြာ ဒီ တီ၊ တဲး ဘေ ဝီ တး ဒီ ကာဒါယ် ပီ အိုပ် ဇဝ်ဖြာ အီ ဟဲ့ ဟွတ့် မိုဝ်း ထိုပ် ဘိက် ဘွတ်။ တဲး ဘော ဘေ ဘော ယေ ကြိုပ် ဇဝ်ဖြာ မီ ဒူင် တီ။ အာဝ် လုဝ် ဘူင် ကာစှူင့် လှူ ပေါ အူ ဘူင့် အာဒါ ဘေ ဒဲင် ကာစှူင့် လှူ ဒီ ဇဝ်ဖြာ ပီ ကြိုပ် အေ ဘောကာဂ့လျီတ်။ အာဝ် လုဝ် ဘူင် ကာဘး ဒီ ဇဝ်ဖြာ ဘော ဘူင် ကာဘး ဒီ ယေ။ 20 တဲး ဘေ ဝီ လှုဝ်း လွင် ပဲ့ ဟဲ့ ဘူင် လုတ့် အာခါန် အီ မုး ဂွန် အာဇေန်ရာ အီ ဟဲ့ ကာဒုး ဒီ ခမ် ကာဆမ် ဒိူင်။ ဇဝ်ဖြာ ဟဲ့ ပီရူ ကာဆဝ် ဒီ ဒူအီ ကိူန် ဒီ ဒူအီ အီဆာရေလ ဘောကာဂ့လျီတ်။ အာဝ် မုး အာခါန် ယမ် အန် အူ ဝီ ကူပ် မှာပ် ပီ ဘူင် လုတ့် အန် တီ။”

21 ပါယ် တီ ဂေ ဒူအီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ တွိုန်၊ ဂေ ဘော ဝီ ကာဖြူမ် ဒီ ကာလာင် ဒီ ဂေ ဒါ တာင် အီ အိုပ် ခြိုဝ် ဂေ အီ ကွယ် ဘ့လာက် နာ ဂေတ့် ဆီငဲ တွိုန် တဝ်း၊ 22 “ဇဝ်ဖြာ အီ အိုပ် တူတ့် ဒွန် မျုဝ် မုး ဇဝ်ဖြာ အီ ကွယ် မီ အူ ကာဒင်။ ဇဝ်ဖြာ အီ အိုပ် တူတ့် ဒွန် မျုဝ် အန် ဟဲ့ နပ် လွင် အန် တီ။ တဲး ဘေ ဒူအီ အီဆာရေလ မိူဝ် နပ်၊ ဆေ ယေ ဟဲ့ ကာဘး ဒီ ဇဝ်ဖြာ ဘော တူ မိုဝ်း နဝ်း ဆိူဝ် နဝ်း မှာန် ဒီ အန် ဇဝ်၊ ကွဲ့ တဲး ယေ လွတ် ခမ် မှာပ် ယေ အာတိုဝ် နီ။ မာလဲ၊ ဇဝ်ဖြာ ဟဲ့ နပ်၊ ဘော ယေ ဆီ တဲး ဂေ ဒူအီ အီဆာရေလ နပ်၊ 23 ယေ တူ ဘူင် ကာစှူင့် လှူ အာဒါ ယေ၊ ကူပ် ဆီ ကာဘး ယေ ဒီ ဇဝ်ဖြာ။ ယေ မိူဝ် ဒူ ဆီ လှူ ပီ ဒီ လှူ အီ ဒုဝ့် ဒီ ငဝ်၊ ပီ လှူ ဒီဂါဝ် ဘော ပီ လှူ အီ ကွယ် ကာဇု ဟူမ် ရိုမ် ဒီ ကာစှူင့် လှူ တီ။ ဆေ ယေ မိုက် နဝ်း ပါယ် တီ တဲး ဇဝ်ဖြာ ဒမ် မှာပ် ဒီ ယေ။

24 ယေ တူ မိုဝ်း ဒီ ခြာမ် ပါယ် တီ။ ယေ ယုဝ် နာ အာတ့် နီ ဟာဝ် လှုက်လှာန် ဘေ ဒီ ဘော တဝ်း ဒီ လှုက်လှာန် ယေ၊ ‘ဇဝ်ဖြာ ပီ ကြိုပ် ယေ ဒူအီ အီဆာရေလ၊ အာဝ် မုး ဇဝ်ဖြာ ပီ ကြိုပ် ဘေ။ 25 ဇဝ်ဖြာ ဟဲ့ ဟွတ့် တဲး အိုမ် ဘ့လဲင် ယောဒါန် ကာခန် ဒီ ကာတဲ အေ။ ဘေ အီ မုး ဒူအီ အာရူဘေန် ဘော ဒူအီ အာဂတ်၊ ဘေ အာဝ် ဟူ ကာအာပ် ကြိုပ် ဇဝ်ဖြာ ပီ ကြိုပ် ယေ။’ ယေ ယုဝ် လှုက်လှာန် ဘေ တူ တဲး လှုက်လှာန် ယေ ကြိုပ် ဇဝ်ဖြာ။

26 ကူပ် န့ ပါယ် တီ ယေ တဝ်း၊ ‘ယေ ဘူင် ကာစှူင့် လှူ။’ အာဝ် မုး ယေ ဒီ လှူ ပီ ဒီ လှူ အီ ဒုဝ့် ဒီ ငဝ်၊ ဘော ပီ ဒီ လှူ အာမျုဝ် ဟဝ်။ 27 ယေ ဘူင် ကာစှူင့် လှူ နီ၊ တဲး န့ ဘဲန် ဆက်ဆေ ဒီ ကာတဲ ဘေ ဂါယ် ယေ ဘော ဒီ ကာတဲ လှုက်လှာန် ဘေ ဂါယ် လှုက်လှာန် ယေ။ တဲး န့ ဘျ၊ ယေ ဒီ ကြိုပ် ဇဝ်ဖြာ နာ အာတ့် ထိုပ် ဘိက် ဘွတ် ဘော လှူ ပီ ဒီ လှူ အီ ဒုဝ့် ဒီ ငဝ်၊ ပီ ဒီ လှူ ဘဲန် မျုဝ် ဘဲန် မျုဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်။ ဘော နာ အာတ့် နီ ဟာဝ်၊ ကွဲ့ တဲး လှုက်လှာန် ဘေ မိုဝ်း ဒီ တဝ်း ဒီ လှုက်လှာန် ယေ လွင် တူ လာယ် ဘာ့ ယေ ဒီ ဇဝ်ဖြာ ပီ ကြိုပ် ဘေ။

28 ယေ ကာဖာ တဝ်း၊ ဆေ ဟီ ဘုဝ် ဘဲန် ပါယ် တီ ဒီ ယေ ဘော ဒီ လှုက်လှာန် ယေ၊ ယေ ဘော ဂေ ဒီ ဘော မိုဝ်း ဒီ တဝ်း၊ ‘ယွတ်၊ ဒါ အေ ဂေ ဂုန့် အေ ဟဲ့ ဘူင် ကာစှူင့် လှူ အီ ပီ ကာစှူင့် လှူ ဒီ ဇဝ်ဖြာ တွိုန်။ အာဝ် မုး အီ ပွိုန် လှူ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အာမျုဝ် ဟဝ်။ န့ ယီ ဘျ ဒီ ဒူအီ ဘေ ဂါယ် ဒူအီ ယေ လွင် ကြိုပ် အေ ဇဝ်ဖြာ အူ ကာဒင်။’

29 ယေ နီ ယေ ဒိူန် တူ ဘူင် အီ ကာဘး ဒီ ဇဝ်ဖြာ။ ယေ ဒိူန် တူ ဝး ဇဝ်ဖြာ ဘော ဆမ် ကာစှူင့် လှူ တဲး ယေ ဒုဝ့် ပီ ဒီ လှူ နာ ဒဲင် ဘော ပီ ဒီ လှူ ဒီဂါဝ် ဘော ပီ ဒီ လှူ အာမျုဝ် ဟဝ်။ ယေ ဒိူန် တူ ဘူင် ပါယ် တီ ဒေါ မှဝ်။”

30 ဒါ အီ လှူ ဒီ ဇဝ်ဖြာ အီ စိူဝ် အာဖီနေဟာတ် ဘော ဂေ ဒါ တာင် ဒူအီ အီဆာရေလ ဂိုဝ် ဝီ၊ ဒေါ ယိုဝ် ဂေ ဂြုဝ်း ပီ ကာလာင် ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ ဒီ ဂေ၊ န့ ဘော လဝ့် ကာဆဝ် နဝ်း ဂေ။ 31 အာဖီနေဟာတ် အီ မုး ဂွန် အာလေအာဆာ တွိုန်၊ အန် ဝီ ကာလာင် ဒီ ဂေ တဝ်း၊ “အာတိုဝ် နီ ယေ ဟဲ့ နပ်၊ ဇဝ်ဖြာ ဟဲ့ ကွယ် ရိုမ် ဒူပ် အေ။ ဘေ တူ ပီရူ တူ ဘူင် ကာဘး ဒီ ဇဝ်ဖြာ။ ဒေါ တီ နီ ဘေ ဟဲ့ တဲး အေ ဒူအီ အီဆာရေလ ဘောကာဂ့လျီတ် လွတ် ခဲင် ဒုက် ပီ ဒီ ဒမ် ဇဝ်ဖြာ မှာပ် ဒီ အေ။”

32 ဟဲ့ ဟွတ့် ပါယ် တီ ဒါ အီ လှူ ဒီ ဇဝ်ဖြာ အာဖီနေဟာတ် အီ မုး ဂွန် အာလေအာဆာ ဘော ဂေ ဒါ တာင် တွိုန်၊ ဂေ ဘော လေး တ မိူင် ဂီလေအာတ်၊ ဝီ ဝေန့် ဒီ မိူင် ကာနန့် ဒူင် ကွယ် ဂေ ဒူအီ အီဆာရေလ။ ဂေ ဘော ကာလာင် လွင် ပဲ့ ဟဲ့ လာယ် ကာလာင် ဂေ ဒီ ဘီနွင် ဂေ၊ တဲး ဂေ ဒူအီ အီဆာရေလ ထူမ်။ 33 န့ ဘော လဝ့် နဝ်း ဂေ ဒူအီ အီဆာရေလ။ ဂေ ဘော အိူပ် မျုက် ဇဝ်ဖြာ။ ဝါယ် အန် တီ လွင် ဒီ ရဲန် ဂေ ဆိုက်၊ ဟာဝ် ပျာတ့် မိူင် ဒူင် ကွယ် ဂေ ဒူအီ အာရူဘေန် ဘော ဒူအီ အာဂတ် တွိုန်၊ ဂေ မိူဝ် အာဝ် ဟူ ဝီ ကာလာင် မာဆေ။

34 ဂေ ဒူအီ ခြိုဝ် အာရူဘေန် ဘော ခြိုဝ် အာဂတ်၊ ဂေ ဝီ တဝ်း၊ “ကာစှူင့် လှူ နီ၊ တဲး န့ ဘျ ဒီ အေ ဘော ဒီ ဇဝ်ဖြာ ပီ ကြိုပ် အေ လွင် တူ ကြိုပ် အေ ဇဝ် ပီ ကြိုပ် အီ ဟဝ်။” ဟဲ့ ဟွတ့် ပါယ် တီ ဂေ ဘော တဲး ကာစှူင့် တီ စိူဝ်၊ “ဒူင် ဘျ။”