1-2 ဒေါ ကွယ် ဂေ ခဲင် မိူင် ဆီလုဝ် အီ မုး ကာဒါယ် မိူင် ကာနန့် တွိုန်၊ ဂေ အီ မုး ဒါ တာင် ခဲင် ခြိုဝ် အာလေဝီ ဘော ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ အီ စိူဝ် အာလေအာဆာ ဘော ဒီ အာယုဝ်ဆူအာ အီ မုး ဂွန် အာနုန် တွိုန် ဘော ဒီ ဂေ အီ မုး ဒါ တာင် ဂေ ဒူအီ အီဆာရေလ။ ဂေ ဘော တဝ်း၊ “ဇဝ်ဖြာ ဟဲ့ ကာလာင် ဒီ အာမုဝ်ဆဲ၊ တဲး ဘေ ဒွါ မိူင် ဒီ ယေ ဘော ကာဒါယ် အီ ကွယ် ရူပ် မိူင် ဂေ တီ၊ တဲး န့ ဝီ ဘဲန် အူင့် ပေတ့် ဒူင် ဒီ ဟျီင် ယေ ဒုဝ် ဆတ်ဒါဝါ ယေ။” 3 ပါယ် တီ ဂေ ဒူအီ အီဆာရေလ ဘော ရဝ်း မိူင် မင် မိူင် ခဲင် ခါဂုန် ဂေ။ ဂေ ရဝ်း ဘော ကာဒါယ် အီ ဒီ ဘဲန် အူင့် ပေတ့်၊ ဝီ အာပ် ဒွါ ဒီ ဒူအီ အာလေဝီ၊ တဲး န့ ဒူပ် ပီ ဒွိုမ် ကာလာင် ဇဝ်ဖြာ။

4 ပီ ကာတာမ် ဂေ ဒီ အာတ့်၊ န့ ဘော လေး အာဒါ န့ကြိုဝ်း အာခုဝ်ဟာတ် အီ မုး ခြိုဝ် အာလေဝီ။ ဂေ ဒူအီ အာလေဝီ အီ မုး လှုက်လှာန် အာရူန် အီ မုး ဒါ အီ လှူ ဒီ ဇဝ်ဖြာ။ ဂေ ဘော ပွိုန် မိူင် ဂိုဝ် ဒီ အူယ် မိူင်။ မိူင် ပီ ပွိုန် ဂေ တီ၊ န့ ဘော ကွယ် ခဲင် ကာဒါယ် မိူင် ယူဒါ၊ မိူင် အာဆီမေအူန် ဘော ခဲင် မိူင် အာဘေန်ယာမ်။ 5 လှုက်လှာန် အာခုဝ်ဟာတ် အီ ဆီ ဂိတ် ဆီ ကွယ်၊ ဂေ ဘော ပွိုန် မိူင် ဂိုဝ် မိူင် အီ ကွယ် ခဲင် ကာဒါယ် အာအေဖာရိမ်၊ အာဒါန်၊ ဘော အာမာနာဆေ အာဒါ အူ ကာတဲ။

6 ဂေ လှုက်လှာန် အာဂေန်ရာဆူန် ဘော ပွိုန် ဒီ ဘိုင် မိူင် ဂိုဝ် ဒီ အူယ် မိူင် အီ ကွယ် ခဲင် ကာဒါယ် မိူင် အာအီဆာခါ၊ အာဆေန်၊ အာနာပ်ထာလီ ဘော မိူင် အာမာနာဆေ အီ ကွယ် ခဲင် ကာဒါယ် မိူင် ဘာဆန်။

7 ဂေ လှုက်လှာန် အာမေန်ရာရီ န့ကြိုဝ်း မှဝ် န့ကြိုဝ်း အန်၊ ဂေ ဘော ပွိုန် ဒီ ဘိုင် မိူင် ဂိုဝ် ဒီ အာ မိူင် အီ ကွယ် ခဲင် ကာဒါယ် အာရူဘေန်၊ အာဂတ် ဘော အာဇေဘူလူန်။

8 မိူင် ဂေ တီ ဘော ကာဒါယ် အီ ဒီ ဘဲန် အူင့် ပေတ့် ဂေ တွိုန်၊ ဂေ ဒူအီ အီဆာရေလ ဘော ကာတာမ် ကာယဝ်း ဒွါ ဒီ ဂေ ဒူအီ ခြိုဝ် အာလေဝီ။

9 ခဲင် ကာဒါယ် မိူင် ယူဒါ ဘော ခဲင် ကာဒါယ် အာဆီမေအူန် ဂေ ဘော ဟပ် ခဲင် ဇာရာင် မိူင် ပီ ဒီ ဒွါ ဂေ။ 10 ဂေ ဘော ကာတာမ် တဲး န့ စုဝ်း ဒီ လှုက်လှာန် အာရူန် အီ မုး န့ကြိုဝ်း အာခုဝ်ဟာတ် ခဲင် ခြိုဝ် အာလေဝီ။

11 ဂေ ဘော ပွိုန် မိူင် အီ စိူဝ် မိူင် ကီရီယာတ်အာဘာ။ အာဘာ ဘော မုး ဂုန့် အာနာက်။ ဂေ ဘော တဝ်း မိူင် ဟေဘြုဝ်။ န့ ဘော ကွယ် ခဲင် ကာဒါယ် ဒူအီ အာယူဒါ။ ဘော အူင့် ပေတ့် အီ ကွယ် ရူပ် မိူင် ဂေ တီ၊ ဂေ ဟဲ့ ပွိုန်။ 12 မာလဲ၊ အီ မုး မာန် ဂေ ဒူင် နာ ဘော ရဝ် ဂေ၊ အာဂါလိပ် အီ မုး ဂွန် အာယေဖုဝ်နာ ဟဲ့ ပွိုန်။

13 ဒဲင် မိူင် ဟေဘြုဝ် အီ မုး မိူင် ဒူင် ဒီ ပွိုန် တဝ် ဟာဝ် ချြီင် ဒူအီ အီ ဟဲ့ တာ ဒိုဝ် ယမ် အီ ဟဝ်၊ မိူင် ပဲ့ ဟဲ့ ပွိုန် လှုက်လှာန် အာရူန် တွိုန် ဟဲ့ မုး မိူင် လီပါနာ၊ 14 မိူင် ယာတီရာ၊ မိူင် အေဆာတာမော၊ 15 မိူင် ဟောလူန်၊ မိူင် ဒေဘီရာ၊ 16 မိူင် အာအိန်၊ မိူင် ယူထာ၊ မိူင် ဘေတ်ဆေမေတ် ဘော ကာဒါယ် အီ ကွယ် ရူပ် မိူင် ဂေ တီ အီ ဒီ ဘဲန် အူင့် ပေတ့်။ န့ မိုဝ်း တူတ့် ဒိမ် မိူင် အီ ကွယ် ခဲင် ကာဒါယ် အာယူဒါ ဂါယ် ကာဒါယ် အာဆီမေအူန်။

17 အီ မုး ကာဒါယ် အာဘေန်ယာမ်၊ ဂေ ဘော အာပ် ဒွါ မိူင် ဖွုန် မိူင်။ န့ ဘော မုး မိူင် ကီပွင်၊ မိူင် ဂီဘာ၊ 18 မိူင် အာနာထူတ် ဘော မိူင် အာလာမုန် ဘော ကာဒါယ် အီ ဒီ ဘဲန် အူင့် ပေတ့် အီ ကွယ် ရူပ် မိူင် ဂေ တီ။

19 မိူင် ပဲ့ ဟဲ့ ပွိုန် ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာရူန် ဘောကာဂ့လျီတ်၊ န့ ကွယ် ဂိုဝ် ဒီ အူယ် မိူင်။ ဘော ကာဒါယ် အီ မုး အူင့် ပေတ့် အီ ဟဲ့ ကွယ် ရူပ် မိူင် ဂေ တီ ဂေ ဟဲ့ ပွိုန်။

20 ဂေ ဒူအီ အာအေဖာရိမ် ဘော ဒွါ ကာဒါယ် ဒီ ဒူအီ အာလေဝီ အီ မုး န့ကြိုဝ်း အာခုဝ်ဟာတ် အီ ဆီ ဂိတ် ဆီ ကွယ်။

21 ခဲင် ကာဒါယ် နွန် အာအေဖာရိမ် ဂေ ဟဲ့ ပွိုန် ဖွုန် မိူင်။ န့ ဘော မုး မိူင် ဆေခေမ် ဘော ကာဒါယ် အီ ဒီ ဘဲန် အူင့် ပေတ့် အီ ကွယ် ရူပ် မိူင် ဂေ တီ။ န့ မုး မိူင် ဒူင် ဒီ ပွိုန် တဝ် ဟာဝ် ချြီင် ဒူအီ အီ ဟဲ့ တာ ဒိုဝ် ယမ် အီ ဟဝ်။ ဒဲင် တီ န့ ဘော မုး မိူင် ကေစာ၊ 22 မိူင် ကိပ်စေမ် ဘော မိူင် ဘေတ်ဟုဝ်ရုန် ဘော အူင့် ပေတ့် အီ ကွယ် ရူပ် မိူင် ဂေ တီ။

23 ခဲင် ကာဒါယ် ခြိုဝ် အာဒါန် ဂေ ဟဲ့ ပွိုန် ဖွုန် မိူင်။ န့ မုး မိူင် အေလာတေကာ၊ မိူင် ဂီဘေဆူန်၊ 24 မိူင် အာစာလုန် ဘော မိူင် ဂါထရိမ်မူန် ဘော အူင့် ပေတ့် အီ ကွယ် ရေတ့် မိူင် ဂေ တီ။

25 ခဲင် ကာဒါယ် ခြိုဝ် အာမာနာဆေ အာဒါ အူ ကာတဲ၊ ဂေ ဟဲ့ ပွိုန် အာ မိူင်။ န့ ဘော မုး မိူင် ထာနက်၊ မိူင် ဂါထရိမ်မူန် ဘော အူင့် ပေတ့် အီ ကွယ် ရေတ့် မိူင် ဂေ တီ။

26 မိူင် ဂိုဝ် မိူင် ဘော အူင့် ပေတ့် အီ ကွယ် ရူပ် မိူင် ဂေ တီ၊ ဂေ ဒူအီ အီဆာရေလ ဟဲ့ ဒွါ ဒီ ဒူအီ အာခုဝ်ဟာတ် အီ ဆီ ဂိတ် ဆီ ကွယ်။

27 ဂေ ဒူအီ အာဂေန်ရာဆူန် အီ ဘာ ခဲင် ခြိုဝ် အာလေဝီ၊ ဂေ မိူဝ် ဟဲ့ ပွိုန် အာ မိူင် ခဲင် ကာဒါယ် အာမာနာဆေ အာဒါ အူ ကာတဲ။ မိူင် ဂေ တီ၊ န့ ကွယ် ဘ့လာက် နာ လေး ဆီငဲ။ န့ ဘော မုး မိူင် ကောလန် အီ ကွယ် ခဲင် ကာဒါယ် မိူင် ဘာဆန်။ န့ ဘော ဘဲန် မိူင် ဒူင် ဒီ ပွိုန် တဝ် ဟာဝ် ချြီင် ဒူအီ အီ ဟဲ့ တာ ဒိုဝ် ယမ် အီ ဟဝ်။ န့ မုး ဘော မိူင် ဘေဆာတေရာ ဘော အူင့် ပေတ့် အီ ကွယ် ရေတ့် မိူင် တီ။

28 ခဲင် ကာဒါယ် ခြိုဝ် အာအီဆာခါ မိူဝ်၊ ဂေ ဟဲ့ ပွိုန် မိူင် ဖွုန် မိူင်။ န့ ဘော မုး မိူင် ဂီဆီအူန်၊ မိူင် တာဘာရာတ်၊ 29 မိူင် ယာမူတ် ဘော မိူင် အေန်ကာနိမ် ဘော အူင့် ပေတ့် အီ ကွယ် ရေတ့် မိူင် ဂေ တီ။

30 ခဲင် ကာဒါယ် ခြိုဝ် အာဆေန် မိူဝ် ဂေ ဟဲ့ ပွိုန် မိူင် ဖွုန် မိူင်။ န့ ဘော မုး မိူင် မီဆာလာ၊ မိူင် အာဘာတူန်၊ 31 မိူင် အေလာကာ ဘော မိူင် ရေဟူပ် ဘော အူင့် ပေတ့် အီ ကွယ် ရေတ့် မိူင် ဂေ တီ။

32 ခဲင် ကာဒါယ် ခြိုဝ် အာနာပ်ထာလီ မိူဝ် ဂေ ဟဲ့ ပွိုန် အူယ် မိူင်။ န့ ဘော မုး မိူင် ကေဒေဆ အီ ကွယ် ခဲင် အိူင် ဂါလီလေ ဘော အူင့် ပေတ့် အီ ကွယ် ရေတ့် မိူင် တီ။ န့ မုး မိူင် ဒူင် ဒီ ပွိုန် တဝ် ဟာဝ် ချြီင် ဒူအီ အီ ဟဲ့ တာ ဒိုဝ် ယမ် အီ ဟဝ်။ န့ မိုဝ်း ဘော မိူင် ဟမ်မုတ်ဒေါရာ၊ မိူင် ကာတာန် ဘော အူင့် ပေတ့် အီ ကွယ် ရေတ့် မိူင် ဂေ တီ။

33 ဂေ ဒူအီ အာဂေန်ရာဆူန် ဘောကာဂ့လျီတ်၊ ဂေ ဟဲ့ ပွိုန် ဒီ ဘိုင် မိူင် ဂိုဝ် ဒီ အူယ် မိူင် ဘော အူင့် ပေတ့် အီ ကွယ် ရေတ့် မိူင် ဂေ တီ။

34 ဘော ဂေ ဒူအီ အာမေန်ရာရီ အီ မုး ခြိုဝ် အာလေဝီ အီ ညှမ် ကာလာင် လွင် ဂေ၊ ဂေ ဟဲ့ ပွိုန် ဒီ ဘိုင် မိူင် ဖွုန် မိူင် ခဲင် ကာဒါယ် အာဇေဘူလူန်။ န့ ဘော မုး မိူင် ယောကာနမ်၊ မိူင် ကာတာ၊ 35 မိူင် ဒေမာ ဘော မိူင် နာဟာလာ ဘော အူင့် ပေတ့် အီ ကွယ် ရေတ့် မိူင် ဂေ တီ။

36 ခဲင် ကာဒါယ် ခြိုဝ် အာရူဘေန် ဂေ ဟဲ့ ပွိုန် မိူင် ဖွုန် မိူင်။ န့ ဘော မုး မိူင် ဘီစာ၊ မိူင် ယာဟာတ်၊ 37 မိူင် ကေဒါမုတ် ဘော မိူင် မေဖာတ် ဘော အူင့် ပေတ့် အီ ကွယ် ရေတ့် မိူင် ဂေ တီ။

38 ခဲင် ကာဒါယ် ခြိုဝ် အာဂတ် မိူဝ် ဂေ ဟဲ့ ပွိုန် မိူင် ဖွုန် မိူင်။ န့ ဘော မုး မိူင် ရာမူတ် အီ ကွယ် ခဲင် ကာဒါယ် အိူင် ဂီလေအာတ်။ န့ မုး မိူင် ဒူင် ပွိုန် တဝ် ဟာဝ် ချြီင် ဒူအီ အီ ဟဲ့ တာ ဒိုဝ် ယမ် အီ ဟဝ်။ ဂေ ဘော ပွိုန် ဘော မိူင် မာဟာနာအိမ်၊ 39 မိူင် ဟေဆာဖူန် ဘော မိူင် ယာဇေရာ ဘော အူင့် ပေတ့် အီ ကွယ် ရေတ့် မိူင် ဂေ တီ။

40 ပါယ် တီ ဂေ ဒူအီ အာမေန်ရာရီ အီ ဆီ ဂိတ် ခဲင် ခြိုဝ် အာလေဝီ ဟဲ့ ပွိုန် ဒီ ဘိုင် မိူင် ဂိုဝ် ဒီ အာ မိူင် ဘော အူင့် ပေတ့် အီ ကွယ် နာ ရေတ့် မိူင် ဂေ တီ။

41 ခဲင် ကာဒါယ် အီ မုး ခါဂုန် ဂေ ဒူအီ အီဆာရေလ တီ၊ 42 ဂေ ဒူအီ ခြိုဝ် အာလေဝီ ဘောကာဂ့လျီတ် ဟဲ့ ပွိုန် ဒီ ဘိုင် မိူင် ဖွုန် ဂိုဝ် ဒီ ဒါ မိူင်။ ဘော အူင့် ပေတ့် အီ ကွယ် ရူပ် လဲပ် မိူင် ဂေ တီ ဟဲ့ မိုဝ်း။

43 ပါယ် တီ ဇဝ်ဖြာ ဟဲ့ ဒိုဝ်း မိူင် ပဲ့ ဟဲ့ ဒွိုမ် ကာဆဲန့် အန် ဒီ ဒွါ ဒီ ဂုန့် ဒင် ဂေ ဒူအီ အီဆာရေလ။ ဂေ ဘော ဒိုဝ်း မိူင် တီ ဘော ပွိုန် ဒီ ကွယ် ခဲင် မိူင် ဂေ တီ။ 44 ဇဝ်ဖြာ မိူဝ် ဟဲ့ တဲး န့ ယေန်၊ အာဝ် ဟူ မိုဝ်း ရန်ဆူ အီ လုဝ် ကာဂုဝ်း။ န့ ဟဲ့ ဘဲန် တူတ့် ပီ ဒွါ ဇဝ်ဖြာ ကာဒိက် ဆတ်ဇာ ဒီ ဂုန့် ဒင် ဂေ။ ဇဝ်ဖြာ ဟဲ့ တဲး ဂေ ဒူအီ အီဆာရေလ အွင် ရန်ဆူ ဂေ။ ကွဲ့ တဲး န့ မိုဝ်း အီ ဆီ ပွိုန် ခမ် ဂေ ခေါ အူ ဝီ။ 45 ဇဝ်ဖြာ မိူဝ် ဘူင် တူတ့် ဒွန် မျုဝ် ခဲ့ ပီ ဒွိုမ် ဒွါ အန် ကာဒိက် ဆတ်ဇာ ဒီ ဂေ ဒူအီ အီဆာရေလ၊ တူ တဲး န့ ဂါတ် ခေါ အူ မျုဝ်။