1 ဝါယ် အန် တီ ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ 2 “တဲး မဲ ဝီ ကာလာင် ဒီ ဂေ ဒူအီ အီဆာရေလ၊ တဲး ဂေ ရဝ်း အုန် မိူင် ဒူင် ဒီ ပွိုန် တဝ် ဟာဝ် ချြီင်၊ တဲး န့ ပီ ပီ ကာလာင် အုန် အုဝ် ဒီ အာမုဝ်ဆဲ တွိုန်။ 3 ဆေ န့ မိုဝ်း ဒူအီ အီ ဟဲ့ တာ ဒိုဝ် ယမ် အီ ဟဝ်၊ ယီ တူ အုန် နဝ်း ဒီ ငဝ်း၊ တဲး အန် ပွိုန် ဒီ တဝ် ဟာဝ် ချြီင် ဒီ တီ၊ တဲး အန် လွတ် ဒီ ဂေ အီ ဝီ ဆီ ဘူင် ဝျီ့ ဒီ အန်။

4 ဆေ အန် တဝ် ဟာဝ် ခဲင် မိူင် ဂေ တီ အူ မိူင်၊ အန် လုဝ် ဟာဝ် ဒီ ဘာင် မာလုဝ်း မိူင် အီ မုး ဒူင် ဒီ ဆုင်ဖျာတ် ဒါ တာင် အာမူ အီ။ အန် လုဝ် ကာလာင် နှဲ လွင် အာရေ အန် ဒီ ဂေ ဒါ တာင် တီ။ ပန် တီ ဂေ ဒီ ဝီ တဲး အန် လိုပ် ခဲင် မိူင်၊ ဒွါ ဒူင် ကွယ် ဒီ အန်။ တဲး အန် ပွိုန် ဒီ ကွယ်။ 5 ဆေ ဒူအီ အီ ဆီ ဘူင် ဝျီ့ ဒီ အန် အီ ဆီ ငဝ်း အန် တွိုန် ဝီ ခုင်ခြး ဒူပ် အန်၊ ဂေ ဒူအီ ခဲင် မိူင် တီ တူ ပွိုန် ဒိုဝ်း ဒူအီ ပီ ဖျာက် အန်၊ အီ တူ အုန် နဝ်း ဒီ ငဝ်း ယမ် အီ ဟဝ်။ ဂေ တူ ပွိုန် အာပ် ဒွါ ဒီ ဂေ ဒူအီ အီ ဆီ ဘူင် ဝျီ့ ဒီ အန် တီ။ ဂေ လုဝ် ဂွင့် ရဲ အန်။ ခုဝ်၊ အန် တူ အုန် နဝ်း ဒီ ငဝ်း ယမ် အီ ဟဝ် ဘော တူ ဒွိုမ် မိုဝ်း ဒီ လာယ် ကာလုတ့် ဒီ အီ။ 6 အန် လုဝ် ကွယ် ခဲင် မိူင် တီ၊ တဲး န့ ကော ဇမ် ပန် ဒီ ဟွတ့် ဂေ ဒူအီ ကိူန် ဆုင်ဖျာတ် အာမူ အန် ဘော တဲး န့ ကော ဇမ် ပန် ဟီ ဟွတ့် ယမ် ဒါ အီ လှူ ဒီ ဇဝ်ဖြာ အီ မုး စုဝ် ဘာန် အန် တီ။ ဝါယ် အန် တီ အန် ဟဲ့ ဝီ ပွိုန် ဝေန့် ဒီ ကာင် ဘြိမ် အန် အီ မုး ခဲင် မိူင် ဒူင် တး အန်။”

7 ပါယ် တီ ဂေ ဘော အုန် မိူင် ကေဒေဆ အီ မုး ခဲင် ကာဒါယ် မိူင် ဂါလီလေ အီ ကွယ် ခဲင် ကာဒါယ် ခြိုဝ် အာနာပ်ထာလီ အီ မိုဝ်း နွန်။ ဂေ အုန် ဘော မိူင် ဆေခေမ် အီ ကွယ် ဒဲင် နွန် အာအေဖာရိမ် ဘော မိူင် ကီရီယာတ်အာဘာ အီ ဘော စိူဝ် မိူင် ဟေဘြုဝ် အီ ကွယ် ခဲင် ကာဒါယ် ယူဒါ အီ မိုဝ်း နွန်။ 8 ဘ့လာက် နာ လေး ဆီငဲ ဘ့လဲင် ယောဒါန် ဘော မိူင် ယေရီခုဝ်၊ ဂေ ဟဲ့ ရဝ်း မိူင် ဘီစာ အီ ကွယ် ခဲင် ပြဲ ကာဟဝ်း ဒဲင် ဂ့လင် နာ ကွာ အီ မုး ကာဒါယ် အာရူဘေန်။ ဂေ ဟဲ့ ရဝ်း ဘော မိူင် ရာမူတ်ဂီလေအာတ် ခဲင် ဒူင် ကွယ် ခြိုဝ် အာဂတ် ဘော မိူင် ကောလန် အီ ကွယ် ခဲင် ကာဒါယ် အီ စိူဝ် ဘာဆန် အီ မုး ကာဒါယ် ခြိုဝ် အာမာနာဆေ ဂေ တွိုန်။ 9 မိူင် ဂေ တီ၊ ဟဲ့ ဘဲန် မိူင် ပီ ရဝ်း အုန် ဂေ အာဒါ ဒူအီ အီဆာရေလ ဘော ဒူအီ အာမျုဝ် ဟဝ် အီ ဟဲ့ တာ ဒိုဝ် ယမ် အီ ဟဝ် ယီ တူ အုန် နဝ်း ဒီ ငဝ်း ယမ် အာဆာက် အီ၊ တဲး န့ ဘဲန် ဒူင် ရဲ ဒူင် ဂွင့် ဂေ။ ဆေ ဒူအီ ကိူန် ညှမ် ပွိုန် ဒီ ဆုင်ဖျာတ် အာမူ ဂေ တီ၊ ဒူအီ ညှမ် ပွိုန် ဘူင် ဝျီ့ တဲး အန် ယမ်။