1 ပန် တီ နာင် ဟာနာ ဘော ဆာခိုဝ်။ အန် တဝ်း၊

“ဇဝ်ဖြာ ဟဲ့ ဘူင် တဲး နဝ်း အုဝ် ဘျုဝ် ဒါခိုယ် ကူပ် ဒွါ အန် ဟဲန့် ဒီ အုဝ်။

မူတ့် အုဝ် နီ ဝီ ပွိုန် ကာလာင် ဂြုဝ်း အီ ပဲ တူတ့် ရန်ဆူ အုဝ်။ ခုဝ်၊ နဝ်း အုဝ် ဟဲ့ ဘျုဝ် ဒါခိုယ်။ ဂေဇူ ဇဝ်ဖြာ ဟဲ့ ချွတ် အုဝ်။

2 အာဝ် မိုဝ်း အာဆေ အီ ဘွတ် ပီ ဇဝ်ဖြာ ဟဲ့ ဘွတ်။

အာဝ် မိုဝ်း ဇဝ် ပေါ အူ ကာဒင် အီ ပီ ဇဝ်ဖြာ ပီ ကြိုပ် အုဝ်။

အန် ပီ မာဝ် ဂေ ဒါအာင် အီ ပွိုန် ဘိုင်။ အာဝ် မိုဝ်း ပီ ဒီ ဘိုင် ပေါ အူ မျုဝ်။

3 ကွဲ့ တဲး ဘေ ကာလာင် ဂြုဝ်း ပီခိုက်။

ဂြုဝ်း ပီစာ၊ ကွဲ့ တဲး န့ လေး ခဲင် မူတ့် ဘေ။

ခုဝ်၊ အန် ဇဝ် မုး ဇဝ်ဖြာ အီ နပ် တူတ့် ဒွန် မျုဝ်။ အန် ဇဝ် ဒီ ဘော ယွတ် ပီ ဘူင် အေ ဒွန် မျုဝ်၊ တဲး န့ ပီ အန် ဆ ဒဲင် လစူ၊ ယုဝ် န့ ဒီ စန် ဒီ န့ စိုဝ်။

4 အ ဂေ ဘ့လာ ပီ ဂူင့် ဒါ ဆိုက် အန် ဇဝ် ဟဲ့ ပဲ ဒီ ကာဘက် ဝဲန်။

ဂေ အီ ဟဲ့ ကေး ခါ အာတ့်၊ အန် ဇဝ် ယီ ဝီ တဲး ဂေ မိုဝ်း ဟဲန့် ဂေ ပ့လူမ် ကိူန်။

5 ဂေ အီ ဟဲ့ ဒွိုမ် ဟူမ် ဖဲ၊ ဟူမ် တာင်၊ ဂေ ဒီ ဝီ လုဝ် ဇာင် ဒီ ဟူမ်။

ဂေ အီ ဒွိုမ် အေတ့် ပီ ဒီ ဟူမ်၊ ဂေ ယီ ဒီ ဝီ ပွိုန် ဒီ ဟူမ် ဖဲ။

ဂေ အီ တူ ဒွိုမ် မိုဝ်း ဒီ ဟျီင် ဂွန်၊ ဂေ ဒီ ဝီ မိုဝ်း ဂွန် ဘူ ဝီ။

ဂေ အီ ယီ မိုဝ်း ဂွန် ကိူန်၊ ဂေ ဝီ ဒီလှး။ ဟဲန့် ဂေ ဒီ ဝီ ယူမ်။

6 ဇဝ်ဖြာ ဟဲ့ နပ် ဒီ တဲး အီ ယမ် ဘော နပ် ဒီ တဲး အီ အိမ်။

အန် ဇဝ် တီ ဘော တဲး အီ ဇမ် မိူင် မာရာန၊ ပီ ဝီ တဲး အီ ဝီ ယိတ့် ဝီ အိမ်။

7 ဇဝ်ဖြာ ဘူင် တဲး အီ ဖ့လာန် ဘော တဲး အီ ခြမ်။

အန် ဇဝ် တီ အန် တဲး အေ စုဝ်း ဒူင် တျီမ်၊ ပီ ဝီ မျုက် စုဝ့် တဲး အေ ကွယ် ဒူင် စာ။

8 အန် ဇဝ် ဒီ တဲး ဂေ အီ ဖ့လာန် ဝီ ခြမ်၊ တဲး န့ ပီ ဂေ လေး ခဲင် ကာပုး။

ဘော ဂေ အီ တူ မိုဝ်း မာဆေ၊ အန် တဲး ဂေ ဝီ မိုဝ်း၊ တဲး န့ ပီ ဂေ လေး ခဲင် ဖုန် အျီင် မက်။

အန် ဒီ ဝီ မျုက် တဲး ဂေ ပွိုန် ဒီ ကွယ် ဒူပ် ဒါ တာင်၊ တဲး ဂေ ပွိုန် အာဖုင် ဒင်ခုဝ် ကိူန်။

ဇဝ်ဖြာ အီ အိုပ် ကာဒါယ် ဘောကာဂ့လျီတ်၊ အန် ဟဲ့ တဲး ကာဒါယ် ကွယ် မန် ဆီချာ။

9 အန် ဇဝ် ဒီ လိုမ်လာ ဂေ အီ ဆီငါ ဘွတ်၊ အီ ဒူပ် အန်၊ ကွဲ့ တဲး ဂေ ကာလိုပ်။

ဂေ အီ တူ ဘွတ်၊ ဂေ ဒီ ကွယ် ခဲင် အပ် ဝွင့်၊ အာဝ် ဟူ ပွိုန် ကာလာင် ဂြုဝ်း ပီစာ။

အာဝ် မိုဝ်း အာဆေ အီ ပွိုန် ပဲ ကူပ် ဘိုင် အန် ဒုဝ် ဘြိမ် အန်။

10 ဂေ အီ ခဲန့် ဇဝ်ဖြာ၊ ဇဝ်ဖြာ ဒီ ဘျတ် ဝဲန်၊ တဲး ဂေ ဟြာယ်။

အန် ဇဝ် ဒီ ဝီ ကာခဲန့် ဒီ ဂေ၊ တဲး န့ ပီ ကာနမ် ဟမ် ခဲင် ဘ့လေန့်။

ဇဝ်ဖြာ ဒီ ဆုင်ဖျာတ် ဒါရာ ဒီ ဒွန် အီ၊ တဲး န့ ကော ဇမ် ဒူင် ဆိူတ် ကာဒါယ်။

အန် ဇဝ် ဒီ တဲး ဟဲန့် ဂေ ပ့လူမ် ဒီ ခုန်ဒီခမ် ပီ ရဝ်း အန်။

အန် ဒီ အိူပ် မျုက် ဒါ အီ ပီ ရဝ်း ပီ တိုယ် အန်၊ အီ ဒီ ခမ် ဒီ ဖဝ်း နာမန် ဒီ ဂိန့် အန်။”

ခဲ့ တီ နာင် ဟာနာ အိူပ် ဇဝ်ဖြာ။

11 ဝါယ် အန် တီ အာအေန်ခါနာ ဘော ဝီ ဝိဝ် ဒီ ကာင် အန် အီ ကွယ် ခဲင် မိူင် ရာမာ တွိုန်။ ပန် တီ ဂွန် တွိုန် ဘော ဘူင် ဂါန် ခဲင် ဟုဝ် ဇဝ်ဖြာ ဒူပ် အာအေလီ အီ မုး ဒါ အီ လှူ ဒီ ဇဝ်ဖြာ။

12 ဂွန် အာအေလီ တွိုန် မုး ဂွန် တူ ထူမ် ဂြုဝ်း။ ဂါယ် တူ ရုဝ်ဆေ ဇဝ်ဖြာ။ 13 ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အီ တး လှူ၊ ဂေ ဒူပ် ထုင်ဂျာမ် အူ မျုဝ်။ ဆေ န့ မိုဝ်း အူ ဝီ အူ ဝီ အီ တး လှူ ဒုဝ် ဆတ်ဒါဝါ၊ ဂေ ဝီ ကွင့် ယင် တီ ခဲင် ကာလုဝ့်။ ဆေ န့ တူ မုး ခဲင် ကာလုဝ့်၊ ဂေ ဝီ ကွင့် ခဲင် မာခါင်။ ဆေ န့ တူ မုး ခဲင် မာခါင်၊ ဂေ ကွင့် ခဲင် ဂ့လာဝ်။ ဒေါ ကွင့် ဂေ တီ၊ န့ မိုဝ်း ဒဲစေန့် ဒါ အီ လှူ ဒီ ဇဝ်ဖြာ အူ ဝီ၊ အန် ဒီ တး ဂူင့် မင် ဇဲတ့် အီ မိုဝ်း ကာရာ အူယ် ဘတ့်။ 14 အန် တာ ဒုး ဒုး ခဲင် ကာလုဝ့် တွိုန်။ ယင် အီ ဒိုက် ဒီ မင် ဇဲတ့် အီ ဘတ့်၊ ဒါ အီ လှူ တွိုန် ဘော ဒိုဝ်း ဒီ အန်။ ဂေ ဘူင် ပါယ် တီ ဒီ ဒူအီ အီဆာရေလ ဒွန် အီ အီ တး လှူ ဒီ မိူင် ဆီလုဝ် တွိုန်။ အာတ့် ကွင့် ဂေ ယင်၊ ဒါ အီ လှူ ဒီ ဇဝ်ဖြာ ယီ လုဝ် ဒိုဝ်း ဘျြီင်၊ ဝီ ဒုဝ့် ခဲင် ငဝ် ဒီ အာတ့်။ 15 ဂေ ယီ တူ ဘူင် ပါယ် တီ။ အာတ့် ဒုဝ့် ဂေ ဘျြီင်၊ ဒဲစေန့် ဒါ အီ လှူ ဒီ ဇဝ်ဖြာ ဘော တး တဝ်း ဒီ ဒူအီ အီ တး လှူ၊ “ဒွါ ယင် အူ ဘုန် ဒီ ဒါ အီ လှူ ဒီ ဇဝ်ဖြာ၊ တဲး အန် ပွိုန် ဒီ ခုဝ်။ အန် တူ လုဝ် ယင် ပဲ့ ဟဲ့ ကွင့်။ အန် ဒိုဝ်း မီ ယင် အိမ် ဒီလူယ်။”

16 ဆေ ဒူအီ တွိုန် တဝ်း၊ “တဲး မဲ ဒိုဝ်း ယင် ဘျြီင် ဒုဝ့် ခဲင် ငဝ် ဒီ အာတ့်။ ဝါယ် တီ၊ မဲ ပွိုန် ဒီ ဘူင် ပီ ဆီ ဘူင် မဲ။” အန် ပီ ဝီ ကာလာင် တဝ်း၊ “အာဝ် မုး ပါယ် တီ။ မဲ လုဝ် ဒွါ ဒီ အုဝ် ဒေါ တီ နီ။ ဆေ အာဝ် ပါယ် တီ အုဝ် ဒီ ဖာတ် ဒိုဝ်း ပါယ် တီ။”

17 ဂွန် အာအေလီ နပ် ဒီ ဘူင် ပါယ် တီ။ ခုဝ်၊ မှာပ် ဂါယ် ဟဲ့ ကိူန် ကာဆဝ် ဒီ အာတ့် ဇဝ်ဖြာ ကူပ် တူ ရုဝ်ဆေ ဂါယ် ပီ ဒီ လှူ ဒီ ဇဝ်ဖြာ။

18 န့ ယီ မုး အာဆာမူအေန် အီ စှိုပ် ဆီတုဝ် ဒီကြး အီ စိူဝ် ဆီတုဝ် အေဖူတ်။ န့ မုး ဆီတုဝ် ကာတမ် လုယ်။ အန် ဘော ဘူင် ဂါန် ဇဝ်ဖြာ။ 19 ဒွန် ဆီနမ်၊ ဒေါ ဝီ ဟုဝ့် ဂုန့် မာ အန် ဘော လှူ ပီ ဒွိုမ် ဘူင် ဂေ ခါ အာတ့်၊ မာ အန် နပ် ဒီ စိန့် ဆီတုဝ် ဒီတဲတ်၊ ဒိုဝ်း တး ဒွါ ဒီ အန်။ 20 အာအေလီ ဘော မွင့်ကာရာ တဲး အာအေန်ခါနာ ဂါယ် အီဘိုန့် အန်။ အန် တဝ်း၊ “အီဘိုန့် မဲ ဟဲ့ ဟွတ့် မှာန့် ဂွန် ဒီ ဇဝ်ဖြာ။ အန် ဟဲ့ ဟွတ့် ဝီ လှူ ဒီ ဇဝ်ဖြာ။ တဲး ဇဝ်ဖြာ ဝီ ဒွါ ဂွန် ပေါ ဝီ ဒီ အီဘိုန့် မဲ၊ တဲး ဂွန် တီ ကာဒါင် ဂွန် ပဲ့ ဟဲ့ လှူ အန် တီ။” ဟဲ့ ဟွတ့် ပန် တီ အာအေန်ခါနာ ဂါယ် အီဘိုန့် အန် ဝီ ဝေန့် ဒူင် ကွယ် ဂါယ်။ 21 ဇဝ်ဖြာ ဘော ကာဝေ နာင် ဟာနာ၊ ဘော တဲး အန် ဒဲ ဘာဒိက် ဆန်ထေ၊ တဲး အန် ပွိုန် ဒီ ဟျီင် ဂွန် အီမာယ် ပေါ အူယ် ဝီ၊ ဂွန် အီဘိုန့် အာ ဝီ။ ဂွန် အီ စိူဝ် အာဆာမူအေန် တွိုန် ဘော ဟြေး ဘော တာင် ဒေါ ကွယ် အန် ခဲင် ဒူင် ကြိုပ် ဂေ ဇဝ်ဖြာ။

22 အာအေလီ တွိုန် ဟဲ့ ကြဲ ဒီ ကတ် ကာဆဝ်။ အန် ဘော ယိုဝ် လွင် ပီ ဘူင် ဂွန် အန် ဒွန် မျုဝ် ဒီ ဒူအီ အီဆာရေလ။ အန် ဘော နပ် လွင် ပဲ့ ဟဲ့ လာယ် လာယ် ဂေ ဒီ ဂွန် အီဘိုန့် အီ ကွယ် ဒီ ခူပ် မာလုဝ်း ခဲင် ဟုဝ် ဇဝ်ဖြာ တွိုန်။ 23 အန် ဘော တဝ်း ဒီ ဂါယ်၊ “မှဝ် န့ ပါယ် ပီ ဘူင် ဘာယ် ပါယ် တီ။း မှာပ် ပဲ့ ဟဲ့ ဘူင် ဘာယ် တီ ဒွန် မျုဝ်၊ အီ ဟဝ် ဟဲ့ ကာလာင် တူတ့်၊ တဲး အုဝ် ယိုဝ်။ 24 ဂွန် ဘာယ် အိုယ်၊ အာဝ် မွှိုမ် ပဲ့ ဟဲ့ ယိုဝ် အုဝ် တီ။ ဘာယ် ဘူင် တဲး ဒွန် အီ ဟဲ့ နပ် လွင် ပီ ဘူင် ဘာယ် တီ။ 25 ဆေ ဒူအီ ဟဲ့ လာယ် ကာလုတ့်၊ ဇဝ်ဖြာ နပ် ဒီ စွယ် တဲး န့ ဝီ ဒါခိုယ်။ ဆေ ဒူအီ ယီ ကာလုတ့် ဒီ ဇဝ်ဖြာ၊ အာဝ် မိုဝ်း အီ ဒီ ပွိုန် စွယ် အန်။” ဂွန် အာအေလီ တွိုန် ယီ တူ ထူမ် ဂြုဝ်း ဂုန့် ဂါယ်။ ခုဝ်၊ ဇဝ်ဖြာ ဟဲ့ ဟွတ့် ဆုင်ဖျာတ် ဒီ တဲး ဂါယ် ယမ်။

26 အာဆာမူအေန် ယီ ဟြေး ဘော တာင် ဘော ဘူင် ဂါန် အီ ဘွတ် အီ မွှိုမ် ဒီ အာတ့် ဇဝ်ဖြာ။ ဘော ဒူအီ ဒွန် အီ အိုင် ပီ ဘူင် အန်။

27 ဝါယ် အန် တီ ဒူအီ ပီ တိုယ် ဇဝ်ဖြာ အူ ဝီ၊ အန် တး ကာလာင် ဒီ အာအေလီ။ အန် တဝ်း၊ “ဇဝ်ဖြာ တဝ်း၊ ‘အုဝ် ဟဲ့ ကာပ့လုး ဒီ ဒူအီ အာမျုဝ် မဲ ဒေါ ကွယ် ဂေ ခဲင် မိူင် အဲဂိုပ်၊ ဘဲန် မှာယ် ခုန်ဒီခမ် ဖာရုဝ် တွိုန်။ 28 အုဝ် ဟဲ့ ရဝ်း ဂုန့် မဲ ခဲင် ဒူအီ အီဆာရေလ ဘောကာဂ့လျီတ်၊ တဲး အန် ဘဲန် ဒူအီ အီ လှူ ဒီ အုဝ်၊ တဲး အန် လှူ ဒဲင် ကာစှူင့် လှူ ဒီ အုဝ်၊ တဲး အန် ဘော ဒုဝ့် န့ကြိုဝ်း အုး ငှုန် ခဲင် ငဝ်။ အုဝ် မိူဝ် တဲး အန် စှိုပ် ဆီတုဝ် အေဖူတ် နာ အာတ့် အုဝ်။ အုဝ် မိူဝ် ဒွါ ဒီ အန် ဘော န့ဟူမ် အန်၊ တဲး အန် ပွိုန် ဒီ ဟူမ် ပီ ဒီ လှူ ဒွန် မျုဝ် အီ ဒုဝ့် ခဲင် ငဝ်။ 29 မှဝ် န့ ပါယ်၊ ပီ တူ ရုဝ်ဆေ မဲ ပီ ဒီ လှူ အီ ဒီ အုဝ်။း န့ မုး ပီ စ်ု အုဝ် ဂေ လှူ ဒီ ဒူင် ကွယ် အုဝ်။ ကူပ် မာဆေ ပီ ဝီ ရုဝ်ဆေ မဲ ဂွန် မဲ လွှိုမ် ရုဝ်ဆေ မဲ ဒီ အုဝ်။း ဘေ ဟဲ့ ဂ့လန့် ကာဆဝ် ဒွန် အီ၊ ကူပ် ဒိုဝ်း ဘေ ယင် အီ မွှိုမ် ဒီ ဒွန် ဒုဝ် ပီ လှူ ဒူအီ အီဆာရေလ ဒီ အုဝ်။’

30 ကူပ် ဘူင် ဘေ ပါယ် တီ၊ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် တဝ်း၊ ‘အုဝ် ဟဲ့ ဒွါ ကာဒိက် ဆတ်ဇာ ဘော ဒီ မဲ တဝ်း၊ န့ကြိုဝ်း မဲ ဘော န့ကြိုဝ်း ဂုန့် မဲ၊ ဘေ ဒီ ပွိုန် ဒီ ဘူင် ဂါန် အုဝ် ဆေဆေ။’ ဒေါ တီ နီ ဇဝ်ဖြာ ယီ ဝီ ကာလာင် တဝ်း၊ ‘အုဝ် ဟဲ့ ဝဲန် ကာဒိက် ဆတ်ဇာ တီ။ အုဝ် ဒီ ဝီ မျုက် အိူပ် ဂေ ဒူအီ အီ အိူပ် မျုက် အုဝ်။ ဂေ အီ တူ ရုဝ်ဆေ အုဝ်၊ ဂေ ယီ လုဝ် ခမ် တဲး ဆာရေ ဂေ စှိုမ်။’ 31 မဲ ယွတ်၊ န့ ဒီ ဇမ် ဆီငဲ ဒီ ဝဲန် အုဝ် ဟဲန့် မဲ ဘော ဟဲန့် ဂေ အီ မုး န့ကြိုဝ်း ဂုန့် မဲ။ ခဲင် ဝေါဝဲ မဲ အာဝ် ဟူ မိုဝ်း ဒူအီ ကတ်။ အူ ဝီ မိူဝ် အာဝ် ဟူ မိုဝ်း။ 32 မဲ ဒီ ယိုဝ် ဒုက် တာင် ခဲင် ဒူင် ကွယ် အုဝ်။ န့ ဒီ ဘော မိုဝ်း နာ မွှိုမ် ပီ ဒီ ဘူင် အုဝ် ဒီ ဒူအီ အီဆာရေလ။ ခဲင် န့ဟူမ် မဲ န့ ယီ တူ ဝီ မိုဝ်း ဒူအီ ကတ် ဒေါ မှဝ်။ 33 အုဝ် တူ ဝဲန် အီ မုး ဒူအီ အာမျုဝ် မဲ ဒွန် အီ။ ဂေ အီ ဆီ ကွယ် တီ ဒီ ဘော ယာမ် ကိူန်၊ တဲး ငါယ် ဂေ ကော အူပ်၊ အာဝ် ပွိုန် ယိုဝ် မာဆေ။ အုဝ် ဒီ တဲး မဲ ယိုဝ် လွင် အန် တီ၊ တဲး နဝ်း မဲ ဒီတဲတ် ဘော က့လိုဝ် ကာဆဝ်။ ဂေ လှုက်လှာန် မဲ ဒွန် အီ ဒီ ယမ် အာတ့် ကတ် ဂေ။

34 န့ ယီ မုး ဂွန် မဲ အီ စိူဝ် အာဟောဖိမ် ဂါယ် အာဖီနေဟာတ်၊ ဂါယ် အာ ဝီ တီ၊ ဂါယ် ဒီ ယမ် အူ ဆီငဲ။ လွင် အန် တီ ဒီ တဲး မဲ နပ်၊ ပဲ့ ဟဲ့ ကာလာင် အုဝ် ဟဲ့ မှာန်။ 35 ပန် တီ အာဆေ ဒူပ် ဆီချာ အုဝ်၊ အုဝ် ဒီ တဲး အန် ဝီ ဘဲန် ဒါ အီ လှူ ဒီ အုဝ်။ အန် ဒီ ဘူင် ခဲ့ ပီ အိုင် အုဝ်၊ ခဲ့ ပီ ကာဖာ အုဝ်။ အုဝ် မိူဝ် ဒီ ဘူင် တဲး လှုက်လှာန် အန် ကွယ် ဆီချာ။ အန် ဒီ ပွိုန် ဒီ ဘူင် ဂါန် ဒူအီ ပီ ရဝ်း ပီ တိုယ် အုဝ် ဆေဆေ၊ အီ မုး ဒူအီ ပဲ့ ဟဲ့ ဖဝ်း အုဝ် နာမန် ဒီ ဂိန့် အန်။ 36 ဂေ အီ ဆီ ဂိတ်၊ အီ မုး န့ကြိုဝ်း မဲ ဒွန် အီ၊ ဂေ ဒီ ကာဖြူမ် ဒီ တး ဒူင် ကွယ် ဒါ အီ လှူ ဒီ ဇဝ်ဖြာ တီ။ ဂေ ဒီ ကာဒုး ဒီ တး ကြိုပ် မှာန့် ရွိုန် အူ ဘျာ ဘော ခါမုန် အူ ဘူင့်။ ဂေ ဒီ ဘော တး တဝ်း ဒီ အန်၊ “မှာန့် တဲး မဲ ခ့ဝါင် အုဝ် ဘူင် ဂါန် ခဲင် ဒူင် လှူ မဲ နီ၊ တဲး အုဝ် မိုဝ်း ပီ ဒီ ဟူမ်။”