1 အာဆာမူအေန် ဘူင် ဂါန် ဇဝ်ဖြာ ဒူပ် အာအေလီ တွိုန်။ ဒေါ မုး ခြာဝ် တီ၊ ဇဝ်ဖြာ တူ ကူပ် ကာလာင် ဂြုဝ်း ဒီ အီ။ န့ ရာမ် နာန် ဒီ ယိုဝ် အာရူင် ပီ ဘျ ဇဝ်ဖြာ။

2 ဒေါ အန် တီ ငါယ် အာအေလီ အာဝ် ဟူ လိုဝ်း ဆီချာ။ အူ မှိုဝ်၊ အန် ဘော ဟာဝ် အိတ် ဒူင် အိတ် အန်။ 3 ငဝ် ရာင် ပီ ပီဒဝ့် ဂေ နာ အာတ့် ဇဝ်ဖြာ ညှမ် ယတ်။ အာဆာမူအေန် တွိုန် မိူဝ် အိတ် ဒူင် အိတ် အန် ခဲင် ဒူင် ကြိုပ် ဂေ ဇဝ်ဖြာ၊ အီ မုး ဒူင် ကွယ် ဇီဒိူက် ဇဝ်ဖြာ တွိုန်။ 4 ဇဝ်ဖြာ ဘော ဒဲ့ အာဆာမူအေန် တွိုန်။ အန် ဘော ဝျီ့ ဂြုဝ်း တီ တဝ်း၊ “အုဝ် ကွယ် ဒီ နီ။” 5 အန် ဟဲ့ ဟွတ့် တဝ်း ပါယ် တီ အန် ဝီ ကာဘ့လဲပ် ဟာဝ် ဒူင် ကွယ် အာအေလီ တွိုန်။ အန် တဝ်း၊ “မဲ ဒါ၊ မဲ ဟဲ့ ဒဲ့ အုဝ်။း အုဝ် ဟဲ့ တး ဒီ နီ။” အာအေလီ ဝီ တဝ်း၊ “အုဝ် တူ မိုဝ်း ဒီ ဒဲ့ မဲ၊ မဲ ဝီ ဟာဝ် အိတ် ဒူင် အိတ် မဲ။” အန် ပီ ဝီ ဟာဝ် အိတ် ဒူင် အိတ် အန်။

6 ဇဝ်ဖြာ ပီ ဝီ ဒဲ့ ပေါ အူ ဇေန့်၊ ဝီ တဝ်း၊ “အိုယ် အာဆာမူအေန်၊ အိုယ် အာဆာမူအေန်။” အန် ပီ ဝီ ယိတ့် ဟာဝ် ဒူင် ကွယ် အာအေလီ တွိုန်။ အန် ပီ ဝီ တဝ်း၊ “မဲ ဒါ၊ မဲ ဟဲ့ ဒဲ့ အုဝ်။ အုဝ် ဟဲ့ တး။” အာအေလီ ပီ ဝီ တဝ်း၊ “အုဝ် တူ မိုဝ်း ဒီ ဒဲ့ မဲ၊ ဂွန် အိုယ်။ တဲး မဲ ဟာဝ် အိတ် ဒူင် အိတ် မဲ။”

7 အာဆာမူအေန် ညှမ် နပ် ဇဝ်ဖြာ။ အန် ညှမ် ဒွိုမ် ယိုဝ် ဂြုဝ်း ဇဝ်ဖြာ။

8 ပေါ အူ ဇေန့်၊ ဇဝ်ဖြာ ဒဲ့ အာဆာမူအေန် တွိုန်။ အန် ဘော ယိတ့် ဟာဝ် ဒူင် ကွယ် အာအေလီ တွိုန်။ အန် တဝ်း၊ “ကူပ် မာဆေ မဲ ဒါ ဟဲ့ ဒဲ့ အုဝ်။း အုဝ် ဟဲ့ ဟွတ့် တး။” ပန် တီ အာအေလီ ဘော နပ်၊ န့ မုး ဇဝ်ဖြာ အီ ဒဲ့ ဂွန် ဝီ နီ။ 9 အာအေလီ ဝီ ကာလာင် ဒီ အန် တဝ်း၊ “တဲး မဲ ဝီ ဟာဝ် ဒူင် အိတ် မဲ။ ဆေ မဲ ယိုဝ် အီ ဒဲ့ မဲ ပေါ အူ ဇေန့်၊ တဲး မဲ ဝီ တဝ်း၊ ‘အိုယ် မဲ ဇဝ်၊ မာဆေ ပီ လုဝ် မဲ။း အုဝ် ဟဲ့ ကွယ် ဒီ နီ ထူမ်၊ တဲး မဲ ကာလာင် ဒီ အုဝ်။’” ဝါယ် အန် တီ အာဆာမူအေန် ဘော ဝီ ဟာဝ် အိတ် ဒူင် အိတ် အန်။

10 ဇဝ်ဖြာ ဘော တး ပီ ခါ အာတ့် တွိုန်။ အန် တဝ်း၊ “အိုယ် အာဆာမူအေန်၊ အိုယ် အာဆာမူအေန်။” ဟဲ့ ဟွတ့် ပန် တီ အာဆာမူအေန် ဝီ တဝ်း၊ “အိုယ် မဲ ဇဝ်၊ မာဆေ ပီ လုဝ် မဲ။း အုဝ် ဟဲ့ ထူမ်။”

11 ဇဝ်ဖြာ မိူဝ် ဝီ တဝ်း ဒီ အန်၊ “ဘ်ု မဲ ယွတ်၊ ပီ ဒီ ဘူင် အုဝ် ဒီ ဂေ ဒူအီ အီဆာရေလ။ အုဝ် ဒီ တဲး ဂေ အီ ထူမ် လွင် အန် တီ၊ န့ ပီ ဒီ ဟမ် ဆဝ်း ခဲင် ကာဒဝ် ဟျုဝ့် ဂေ၊ ကွဲ့ တဲး ဂေ ဆီ ပွိုန် ခမ်။ 12 ဆီငဲ တီ၊ အုဝ် ဒီ ဘူင် ဒီ အာအေလီ ခဲ့ ပီ ဒွိုမ် ကာလာင် အုန် အုဝ် လွင် န့ဟူမ် အန်။ ပီ ဒွိုမ် ကာလာင် အုဝ် ဆိန့် ဒေါ ဂုဝ်၊ တဲး န့ ကော ဇမ် ကာဒဲ့ ဟွတ့် တူတ့်၊ အုဝ် ဒီ ဘူင် ဒွန် မျုဝ်။ 13 အုဝ် ဟဲ့ ဒွိုမ် ကာလာင် အုန် ဒီ အန် လွင် ပီ ဒီ ဒမ် အုဝ် မှာပ် ဒီ န့ဟူမ် အန်။ န့ မုး မှာပ် ပဲ့ ဟဲ့ နပ် အန်၊ မှာပ် ပဲ့ ဟဲ့ ဘူင် ဂွန် အန် ဂါယ် တွိုန်။ ဂါယ် တူ ဂူမ် ဇဝ်ဖြာ။ အန် မိူဝ် တူ မာနုဝ်၊ တူ ခြဲ ဂွန် အန်၊ ကွဲ့ တဲး ဂါယ် ဘူင်။ 14 ခုဝ်၊ အုဝ် ဟဲ့ ဒွါ ကာဒိက် ဆတ်ဇာ ဒီ န့ဟူမ် အာအေလီ တွိုန်။ အုဝ် ဟဲ့ တဝ်း၊ အာဝ် မိုဝ်း ကြုဝ် ပီ ဒီ လှူ အီ ပွိုန် ဂဝ်း ဝဲန် မှာပ် တီ ဒေါ မှဝ်။” ခဲ့ တီ ဇဝ်ဖြာ ကာလာင် ဒီ အာဆာမူအေန်။

15 ဘော ဇမ် ဆိန့်ဝး၊ အာဆာမူအေန် ဘော ဟာဝ် ဝိုဝ်း မာလုဝ်း ခဲင် ဟုဝ် ဇဝ်ဖြာ။ အန် ယီ တူ ယ ကာလာင် ဒီ အာအေလီ လွင် ပဲ့ ဟဲ့ ယိုဝ် အန် ခဲင် မှိုဝ်။ 16 အာအေလီ ဘော ဒဲ့ အာဆာမူအေန်။ အန် တဝ်း၊ “အိုယ် အာဆာမူအေန်၊ ဂွန် အုဝ်။” အာဆာမူအေန် ဘော ဝျီ့ ဂြုဝ်း အန် တဝ်း၊ “အိုဝ်၊ အုဝ် ကွယ် ဒီ နီ။”

17 အာအေလီ ဘော တဝ်း ဒီ အန်၊ “မာဆေ ပီ တဝ်း ဇဝ်ဖြာ ဒီ မဲ။း မဲ ကွဲ့ ချြီင် မာဆေ ဒီ အုဝ်။ ဆေ မဲ ဟီ ချြီင် အူ မျုဝ်၊ ဇဝ်ဖြာ ဒီ ဘူင် တဲး န့ ကာဆဝ် ဘော ဒီ မဲ။” 18 အာဆာမူအေန် တွိုန် မိူဝ် တူ ချြီင် မာဆေ။ အန် ကာလာင် တူတ့်၊ တဲး အာအေလီ နပ်။ အာအေလီ ဘော ထူမ်။ အန် ဝီ တဝ်း၊ “န့ မုး ဇဝ်ဖြာ၊ တဲး အန် ဘူင် ခဲ့ ပီ အိုင် အန်။”

19 အာဆာမူအေန် မိူဝ် ကြဲ ဒီ တာင်။ ဇဝ်ဖြာ မိူဝ် ကွယ် ရိုမ် ဒူပ် အန် ဆေဆေ။ ဂြုဝ်း ပီ ကာလာင် အန်၊ အူ ဒဲ မိူဝ် တူ စှိုမ်။ န့ ဘဲန် တူတ့် ဒွန် မျုဝ် ပီ ဒွိုမ် ကာလာင် အန်။ 20 ဂေ ဒူအီ အီဆာရေလ ဘောကာဂ့လျီတ် အီ ကွယ် စုး ဒီ မိူင် ဒါန် ကော ဇမ် မိူင် ဘီရာဆေဘာ၊ ဂေ ဟဲ့ နပ် တူတ့် လွင် အာဆာမူအေန် ဟဲ့ ဘဲန် ဒူအီ အီ ဘျာန် ဂြုဝ်း ဇဝ်ဖြာ။ 21 ဆေ ဇဝ်ဖြာ တး ကာလာင် ဂြုဝ်း ဒီ ဒူအီ၊ အန် တး ကာလာင် ဒီ မိူင် ဆီလုဝ် ဆေဆေ။ ဇဝ်ဖြာ ဘော ကာလာင် ဂြုဝ်း ဒီ အာဆာမူအေန်၊ တဲး အန် နပ် တူတ့် ဒွန် မျုဝ် လွင် ဇဝ်ဖြာ။