1 အာဆာမူအေန် ပီ ဝီ ကာလာင် ဒီ ဒူအီ အီဆာရေလ ဘောကာဂ့လျီတ် တဲး ဂေ ထူမ်။

ပန် တီ ဒူအီ အီဆာရေလ တဝ်း ဒီ ဟာဝ် ကာဂုဝ်း ဒီ ဒူအီ ဖီလီထီ။ ဂေ ဒါ ဆိုက် ဒူအီ အီဆာရေလ ဘော တး ချ ခူပ် မိူင် အေပနေစ။ အီ မုး ဒါ ဆိုက် ဖီလီထီ ဘော ချ ခူပ် မိူင် အေဖဲက်။ 2 ဒူအီ ဖီလီထီ ဂေ ရဲန် ဆီချာ ဒုဝ် ဂေ။ ပန် တီ ဂေ ဘော ကာဂုဝ်း ဒီ ဒူအီ အီဆာရေလ။ ဒူအီ အီဆာရေလ ဘော စှိုမ် ဒီ ဂေ ဒူအီ ဖီလီထီ တွိုန်။ ဂေ ဒူအီ ဖီလီထီ ဘော ငဝ်း ယမ် ဒါ ဆိုက် ဒူအီ အီဆာရေလ ဖွုန် ဟြဲန့် ဝီ။ 3 ဂေ ဒါ ဆိုက် ဒူအီ အီဆာရေလ ဘော ဝီ တး ဇမ် ဒူင် ချ ဂေ။ ဂေ အီ မုး ဒါ တာင် ဒူအီ အီဆာရေလ ဘော လာယ် ကာမွုန် တဝ်း၊ “ကူပ် န့ ပါယ် မှဝ်၊ ဇဝ်ဖြာ တဲး အေ စှိုမ် ဒီ ဂေ ဒူအီ ဖီလီထီ အာတိုဝ် နီ။း တဲး အေ ဟာဝ် ဒိုဝ်း လေး ဇီဒိူက် ဇဝ်ဖြာ အီ ကွယ် ဒီ မိူင် ဆီလုဝ် တွိုန်၊ တဲး န့ တး ဇမ် ဒူင် ကွယ် အေ နီ၊ တဲး န့ ချွတ် အေ၊ တဲး အေ လွတ် တ ရန်ဆူ အေ။”

4 ဂေ ဘော စ်ု ဒူအီ မင် အီ ဟာဝ် ဒီ မိူင် ဆီလုဝ် တွိုန်။ ဂေ ဘော ဒိုဝ်း တး ဇီဒိူက် ဇဝ်ဖြာ အီ မုး ဒူင် ကွယ် ဇဝ်ဖြာ အီ အိုပ် တူတ့် ဒွန် မျုဝ်၊ အီ ကွယ် ဒီ ကာတဲ ရာင် အာမူ အာမာတ် ဇဝ်ဖြာ။ အီ မုး ဂွန် အာအေလီ အီ စိူဝ် အာဟောဖိမ် ဂါယ် အာဖီနေဟာတ် အာ ဝီ တွိုန်၊ ဂါယ် မိူဝ် တး ဒူပ် ဇီဒိူက် ဇဝ်ဖြာ တီ။

5 ဇီဒိူက် တီ ပဲ့ ဟဲ့ ဟပ် ဂေ ပီ ကာဆဲန့် ဇဝ်ဖြာ ဒီ ဂေ ဒူအီ အီဆာရေလ၊ န့ ဘော တး ဇမ် ဒူင် ချ ဂေ ဒါ ဆိုက်။ ဟဲ့ ဟွတ့်၊ ဂေ ဒူအီ အီဆာရေလ ဘောကာဂ့လျီတ် ဘော ကာဖြူမ် ဒီ ခူယ်၊ ဒတ် ဆီနန် ဆီနိူင်၊ တဲး ကာဒါယ် ကော နှဲန် ဒီ ဒီယေန့်။

6 ဂေ ဒူအီ ဖီလီထီ တွိုန် ဘော ယိုဝ် ပီ ဆီနန် ဆီနိူင် ဂေ တွိုန်၊ ဂေ ဝီ ဒီမွှတ် တဝ်း၊ “မာဆေ န့ မုး အီ အာဟိူန် ဒူင် ချ ဒူအီ ဟဲဘြဲ တွိုန်။း” 7 ဂေ ဘော နပ်၊ ဇီဒိူက် ဇဝ်ဖြာ ဟဲ့ တး ဇမ် ဒူင် ကွယ် ဂေ။ ပန် တီ ဒူအီ ဖီလီထီ ဂေ ဘော ယုဝ်။ ဂေ ဝီ လာယ် ကာလာင် တဝ်း၊ “အန် ဇဝ် အူ ကာဒင် ဟဲ့ တး ဇမ် ဒူင် ချ ဂေ။ အေ ဒီ စှိုမ် ဒီ ဂေ။” ဂေ ဝီ တဝ်း၊ “န့ အာဝ် မွှိုမ် ဒီ အေ။ အာဝ် ဒွိုမ် ပါယ် နီ ခေါ အူ ဇေန့်။ 8 အာဆေ ဒီ စွယ် တဲး အေ လွတ် တ အန် ဇဝ် အီ မိုဝ်း အာဖုင် ဒင်ခုဝ် တာင် တီ။း အန် ဇဝ် တီ မုး အန် ဇဝ် အီ ဒွိုမ် တဲး ဒုက် ဒွန် မျုဝ် ဒီ ဂေ ဒူအီ အဲဂိုပ် တွိုန်။ အန် ဒမ် မှာပ် ဒီ ဂေ ဒေါ ကွယ် ဂေ ခဲင် ပြဲ ကာဟဝ်း တွိုန်။ 9 အေ ဒူအီ ဖီလီထီ၊ အေ လုဝ် ဘူင် ပီ ကာအာပ် အီမာယ် ဘူင်။ အေ လုဝ် မိုဝ်း ဟဲန့် ကိူန်၊ ကွဲ့ တဲး အေ ကာဒုး ဒီ ဘဲန် မှာယ် ဒူအီ ဟဲဘြဲ တီ၊ ကွဲ့ တဲး န့ ပီ ဂေ ဟဲ့ ဒွိုမ် ကာဒုး ဒီ ဘဲန် မှာယ် အေ။ တဲး အေ ကာဖြူမ် ဒီ ကာဂုဝ်း ပီ လုဝ် ဘူင် အီမာယ်။”

10 ပန် တီ ဂေ ဘော ကာဂုဝ်း ဒီ ဒူအီ အီဆာရေလ တွိုန်။ ဂေ ဒူအီ အီဆာရေလ ဘော စှိုမ် ဒီ ဂေ။ ဂေ ဒူအီ အီဆာရေလ ဘော တဝ် ဟာဝ် ချြီင် ခဲင် ထိုပ် ဘိက် ဂေ တွိုန်။ ဂေ အီ ဟဲ့ ကာဂုဝ်း၊ ဂေ ကိူန် ကာဆဝ် ဟဲ့ ယမ်။ အီ မုး ဒါ ဆိုက် အီ ဟာဝ် ဒီ ပ့လဝ် တွိုန်၊ ဂေ ဟဲ့ ယမ် အူယ် မှိုန့် ဝီ။ 11 ဘော ဇီဒိူက် ဇဝ်ဖြာ တွိုန်၊ ဒူအီ ဖီလီထီ ဂေ ဟဲ့ ဟွတ့် ဒိုဝ်း ဟာဝ်။ အာဟောဖိမ် ဂါယ် အာဖီနေဟာတ်၊ အီ မုး ဂွန် အာအေလီ တွိုန် မိူဝ် ဟဲ့ ဟွတ့် ယမ်။

12 ဆီငဲ အန် တီ န့ မိုဝ်း ဒူအီ အာမျုဝ် အာဘေန်ယာမ် အူ ဝီ၊ အီ တး ဒူင် ကာဂုဝ်း ဂေ။ ခြိုင် ပီ တာ အန် ဟဲ့ ကာယာတ့်၊ ဘော ကာပုး ဟဲ့ ဟုယ် ဒဲင် ဂိန့် အန်။ အန် ဘော ကာဘ့လဲပ် ဟာဝ် ဇမ် မိူင် ဆီလုဝ် တွိုန်။ 13 ဒေါ တး ဇမ် အန် ခဲင် မိူင်၊ အာအေလီ တုတ့် ဒဲင် ကာစှူင့် ခူပ် န့တေန့်။ နဝ်း အန် မိူဝ် အာဝ် ဟူ ဒါခိုယ် ကူပ် လှုဝ်း အန် ဇီဒိူက် ဇဝ်ဖြာ တွိုန်၊ ယုဝ် န့ ဘဲန် ဒုက်။ ဒူအီ တွိုန် ဘော ကာလာင် ဒီ ဒူအီ လွင် ပီ ပါယ် ဂေ ဒီ ကာဂုဝ်း တီ။ ပန် တီ ဒူအီ ဂေ တွိုန် ဘော မိူင် ဘော ကာဖြူမ် ဒီ ယာမ်။

14 အာအေလီ ဘော ယိုဝ် ဆီနန် ယာမ် ဂေ တွိုန်၊ အန် ဝီ တဝ်း၊ “န့ မုး ဆီနန် မာဆေ။း” ဒူအီ တွိုန် ဘော ပီခြန် အန်၊ တဝ်း ဒီ ဟာဝ် ကာလာင် ဒီ အာအေလီ။ 15 ဒေါ အန် တီ အာဆာက် အာအေလီ ဟဲ့ ပွိုန် ဒိမ် ဂိုဝ် ဒီ ဒါ ဆီနမ်။ ငါယ် အန် မိူဝ် အာဝ် ဟူ လိုဝ်း။ အာဝ် ဟူ ပွိုန် ယိုဝ် မာဆေ။ 16 ဒူအီ တွိုန် ဘော ကာလာင် ဒီ အာအေလီ။ အန် တဝ်း၊ “အုဝ် ဟဲ့ တး ဒူင် ကာဂုဝ်း ဂေ။ အာတိုဝ် နီ အုဝ် ဟဲ့ တဝ် လေး ဒူင် ကာဂုဝ်း ဂေ တီ။” အာအေလီ ဘော ဒီမွှတ် တဝ်း၊ “အိုယ် ဂွန် အုဝ်၊ န့ ပါယ် မှဝ်။း”

17 ပန် တီ ဒူအီ အီ တး ကာလာင် လွင် ကာဂုဝ်း တွိုန်၊ အန် ဝီ တဝ်း၊ “ဒူအီ အီဆာရေလ ဟဲ့ ကာဒုး ဒီ တဝ် တ ဒူအီ ဖီလီထီ။ ဂေ ဟဲ့ ကာဂုဝ်း၊ ဟဲ့ ကာငဝ်း ကိူန် ကာဆဝ်။ ဂွန် မဲ အီ မုး အာဟောဖိမ် ဂါယ် အာဖီနေဟာတ် မိူဝ် ဟဲ့ ဟွတ့် ယမ်။ ဇီဒိူက် ဇဝ်ဖြာ မိူဝ် ဂေ ဒူအီ ဖီလီထီ ဟဲ့ ဟွတ့် ဒိုဝ်း ဟာဝ်။”

18 ဒူအီ တွိုန် ဟဲ့ ဟွတ့် ကာလာင် လွင် ဇီဒိူက် ဇဝ်ဖြာ တွိုန်၊ အာအေလီ ဘော ကာဘ့လျီ့ ကေး နာ ပန်။ အန် ဘော စုဝ်း ဒဲင် မ့ဘာင် ဒူင် တုတ့် အန် ဒီ ခူပ် မာလုဝ်း တွိုန်။ မဲင် အန် ဘော ကာဘက်။ အန် ဘော ယမ် ဒီ တီ။ အန် မိူဝ် ဟဲ့ ကတ် ကာဆဝ်။ ဒုဝ် အန် ဘော စန် ကာဆဝ်။ အန် ဟဲ့ ဘဲန် ဒါ တာင် အီ ဆုင်ဖျာတ် အာမူ ဒူအီ အီဆာရေလ အာဒါ ဖွုန် ဂိုဝ် ဆီနမ်။

19 န့ ယီ မုး အဝ် အန်၊ အီဘိုန့် အာဖီနေဟာတ် တွိုန်၊ အန် ဟဲ့ တူ အး၊ ဟဲ့ ကာတတ် ဒီ ဂွိုတ် ဂွန် အန်။ အန် ဘော ယိုဝ် လွင် အီ ဟဲ့ ဒိုဝ်း ဟာဝ် ဇီဒိူက် ဇဝ်ဖြာ ဘော လွင် ဘိုဝ် အန် ဂါယ် အီမာယ် အန် ဟဲ့ ဟွတ့် ယမ်၊ ဘော ဘဲန် ဝတ့် ဆဝ်။ ဂွန် အန် ဘော ဂွိုတ် အူ ဇေန့်။ 20 ပန် တီ အန် ဘော ရိန် ဒီ ယမ်။ အီဘိုန့် အီ စွယ် အန် တွိုန် ဘော ကာလာင် ဒီ အန် တဝ်း၊ “မဲ ကွဲ့ က့လိုဝ်၊ မဲ ဟဲ့ ဂွိုတ် ဂွန် အီမာယ်။” အန် တွိုန် ယီ တူ ဂြုဝ်း၊ ယီ တူ တဝ်း မာဆေ။

21 ဟဲ့ ဟွတ့် ပန် တီ အန် ဘော တဲး ဂွန် အီမာယ် အန် စိူဝ် အာအီခါဘုတ်။ လွင် ဒါင် အန် န့ လေး၊ “အာဖုင် ဒင်ခုဝ် ဇဝ်ဖြာ အီ ကွယ် ကာတဲ ဂေ ဒူအီ အီဆာရေလ ဟဲ့ ဟြာယ်။” ဂေ တဝ်း ပါယ် တီ ခုဝ်၊ အီ ဟဲ့ ဒိုဝ်း ဟာဝ် ဇီဒိူက် ဇဝ်ဖြာ တွိုန် ဘော ကူပ် မှာပ် ပီ ဘူင် ဘိုဝ် အန် ဂါယ် အီမာယ် အန် တွိုန်။ 22 အန် တဝ်း၊ “အာဖုင် ဒင်ခုဝ် ဇဝ်ဖြာ ဟဲ့ ဟွတ့် ဟြာယ် ခဲင် မိူင် အီဆာရေလ ကူပ် ဟဲ့ ပွိုန် အီ ဟဝ် ဒီ ဒိုဝ်း ဟာဝ် ဇီဒိူက် ဇဝ်ဖြာ။”