1 ဂေ ဒူအီ ဖီလီထီ ဘော ဒိုဝ်း လေး ဇီဒိူက် ဇဝ်ဖြာ ခဲင် မိူင် အေပနေစ၊ ဝီ ဟာဝ် ခဲင် မိူင် အာစုတ်။ 2 ဒူအီ ဖီလီထီ ဘော ဒိုဝ်း ဇီဒိူက် ဇဝ်ဖြာ၊ အုန် ခဲင် ဟုဝ် ပီ ကြိုပ် ဂေ အန် ဇဝ် အီ စိူဝ် ဇဝ် ဒါဂူန်။ ဂေ တဲး ဇီဒိူက် တီ ကွယ် ခူပ် အာရိုပ် ဇဝ် ဒါဂူန် တီ။ 3 ပါ ခဲညှာ ဂေ ဒူအီ ခဲင် မိူင် အာစုတ် တွိုန် ဘော ယိတ့် ဆိန့်ဝး စေဝ်။ ဂေ ဘော ယိုဝ် အာရိုပ် ဇဝ် ဒါဂူန် တွိုန် ဟဲ့ ကေး ကာတပ် ဒီ ကာဒါယ်၊ ကွယ် နာ အာတ့် ဇီဒိူက် ဇဝ်ဖြာ။ ဂေ ဝီ ဘျိတ့် အာရိုပ် တီ၊ ဝီ အုန် ဒူင် ကွယ် အန်။ 4 ပေါ အူ ဆီငဲ ဆိန့်ဝး စေဝ် ဂေ ယိတ့် ယိုဝ် အာရိုပ် ဇဝ် ဒါဂူန် တွိုန် ကာတပ် ဒီ ကာဒါယ် နာ အာတ့် ဇီဒိူက် ဇဝ်ဖြာ တွိုန်။ ဘော ဂိန့် အန် ဘော ဒဲ အန် ဘော အာ ဘ့လာက် ဟဲ့ ဟွတ့် ကာဒတ် လေး၊ ဝီ ကွယ် ဒဲင် ဘန်ဒူက် မာလုဝ်း တွိုန်။ န့ ဂိတ် မီ ဒုဝ် အန် ပါယ် ဒီ ဂိုင်။ 5 ခုဝ် အန် တီ၊ ကော ဇမ် အာတိုဝ် နီ၊ ဂေ ဒူအီ လှူ ဒီ ဇဝ် ဒါဂူန် တီ ဘော ဂေ အီ လိုပ် ခဲင် ဟုဝ် ဇဝ် ဒါဂူန် တွိုန် ဘောကာဂ့လျီတ်၊ ဂေ တူ ညဲတ့် ဘန်ဒူက် မာလုဝ်း ဒီ ဟုဝ် ဇဝ် ဒါဂူန် အီ ကွယ် ခဲင် မိူင် အာစုတ် တွိုန်။

6 ဇဝ်ဖြာ ဘော ဒွါ ဒုက် ဘဲန် မျုဝ် ဘဲန် မျုဝ် ဒီ ဂေ အီ ကွယ် ခဲင် မိူင် အာစုတ် ဘော မိူင်။ အန် တဲး မာန် မိူင် ဂေ ဘော ကာပျာတ့် လိုဝ် ဘော တဲး ဂေ ဒူအီ မိုဝ်း ဘိုပ် ဒီ ဒုဝ် ဂေ။ 7 ဂေ ဒူအီ အာစုတ် တွိုန်၊ ဂေ ဘော ယိုဝ် လွင် ဟဲ့ ပါယ် တီ ဂေ ဘော ကာလာင် တဝ်း၊ “ဇီဒိူက် ဇဝ်ဖြာ ပီ ကြိုပ် ဂေ ဒူအီ အီဆာရေလ တွိုန်၊ န့ တူ ပွိုန် ကွယ် ဒူင် ကွယ် အေ။ အန် ဇဝ် တီ ဟဲ့ ဒွါ ဒုက် ကာဆဝ် ဒီ အေ ဘော ဒီ ဇဝ် ဒါဂူန် အေ။” 8 ဂေ ဝီ ဒဲ့ ကာဇု ဂေ ဒါ တာင် ခဲင် မိူင် ဖီလီထီ၊ ဝီ ဒီမွှတ် ဂေ တဝ်း၊ “မှဝ် အေ ဒီ ပါယ် ဒီ ဇီဒိူက် ဇဝ်ဖြာ ပီ ကြိုပ် ဂေ ဒူအီ အီဆာရေလ နီ။း” ဂေ ပီ ဝီ လာယ် တဝ်း၊ “တဲး အေ ဒိုဝ်း ဇီဒိူက် တီ၊ ဟာဝ် အုန် ဒီ မိူင် ဂါထ။” ပန် တီ ဂေ ဘော ဒိုဝ်း ဟာဝ် ဇီဒိူက် တွိုန်။

9 ဝါယ် ဟဲ့ ဟွတ့် ဂေ ဟာဝ် အုန် ဇီဒိူက်၊ ဇဝ်ဖြာ ဘော ပျာတ့် ဂေ အီ ကွယ် ခဲင် မိူင် တွိုန်၊ တဲး ဂေ ဒူအီ အီ ကွယ် ခဲင် မိူင် တီ ဘော စှိုမ်။ အန် ဇဝ် တဲး ဘော ဂွန် ဘော ဒူအီ ဒီ တာင် လေး ဘိုပ် ဒီ ဂေ ဘော ဒုဝ်။ 10 ပန် တီ ဂေ ဝီ ကာဖြူမ် ဒီ ဒိုဝ်း ဇီဒိူက် ဇဝ်ဖြာ တီ၊ ဝီ ဟာဝ် အုန် ဒီ မိူင် အေခြူန်။

ဒေါ တး ဇမ် ဇီဒိူက် ဇဝ်ဖြာ ခဲင် မိူင် အေခြူန်၊ ဂေ ဒူအီ ခဲင် မိူင် အေခြူန် တီ ဘော ကာဖြူမ် ဒီ ဒတ် တဝ်း၊ “ဂေ ဟဲ့ ဒိုဝ်း တး ဇီဒိူက် ဇဝ်ဖြာ ပီ ကြိုပ် ဂေ ဒူအီ အီဆာရေလ ဒူင် ကွယ် အေ၊ တဲး ဘော အေ ဒီ ယမ် ဒီ စှိုမ်။” 11 ဂေ ပီ ဝီ ဒဲ့ ကာဇု ဒါ တာင် ဒူအီ ဖီလီထီ၊ ဝီ ကာလာင် ဒီ ဂေ တဝ်း၊ “တဲး ဘေ ဒိုဝ်း ဟာဝ် အုန် ဇီဒိူက် ဇဝ်ဖြာ ပီ ကြိုပ် ဂေ ဒူအီ အီဆာရေလ၊ တဲး န့ ဝီ ဇမ် ဒူင် ကွယ် ဘြိမ် အန်။ ကွဲ့ တဲး န့ တဲး ဘော ယေ လုဝ် ယမ်။” ဆဝ် အီ တဲး အီ ယမ် န့ ဟဲ့ ကာလယ့် ဘော မိူင် ဒွန် ပ့လုဝ့်၊ တဲး ဂေ ဒွန် အီ ကော ယုဝ် ကာဆဝ်။ န့ ယီ မုး ဇဝ်ဖြာ အီ ဟဲ့ ဘူင်။ 12 ဂေ အီ တူ ယမ်၊ ဂေ ဘော မိုဝ်း ဆဝ် ဘိုပ်။ ပီ ငှုန် ကာဆဝ် ဂေ ဝီ ပွိုန် ယိုဝ် ဒွန် နာ ဒွန် ပ့လုဝ့်၊ တဲး န့ ကော လိုဝ်း ဇမ် ဂါင်ဟြာဝ်။