1 ဝါယ် အန် တီ ဇီဒိူက် ဇဝ်ဖြာ ကွယ် ခဲင် မိူင် ဂေ ဒူအီ ဖီလီထီ အာဒါ ဘူ မာဂျီန်။ 2 ဂေ ဒူအီ ဖီလီထီ ဘော ဒဲ့ ဒူအီ အီ မဲန် ဘေဒါင် ဘော ဂေ ဒူအီ အီ လှူ ဒီ ဇဝ် ဒါဂူန် တွိုန်။ ဂေ ဘော ဒီမွှတ် တဝ်း၊ “အေ လုဝ် ပါယ် မှဝ် ဒီ ဇီဒိူက် ဇဝ်ဖြာ နီ။း ကာလာင် တဲး အေ နပ်၊ ဆေ န့ လုဝ် ဟာဝ် အုန် ဒူင် ကွယ် ဘြိမ် အန်၊ န့ ဒီ လုဝ် ပါယ် မှဝ်။း”

3 ဂေ ဝီ တဝ်း၊ “ဆေ အေ ဘော ဟာဝ် တိုယ် ဝိဝ် ဇီဒိူက် ဇဝ်ဖြာ တီ၊ ကွဲ့ တဲး န့ ဟာဝ် ဒီလူယ်။ န့ လုဝ် မိုဝ်း ကြုဝ် ပီ လှူ အေ ဒူပ်၊ တဲး အီ နပ်၊ အေ လှုဝ်း မှာပ် အေ။ ဆေ အေ ဘူင် ပါယ် တီ၊ ဆဝ် အေ မိူဝ် ဒီ ဟြာယ်။ အေ မိူဝ် ဒီ နပ်၊ မှဝ် န့ ပါယ် ပီ လုဝ် အေ ကာဒုး ဒုက် တာင် ဇိုဝ် တီ။”

4 ဂေ တွိုန် ဝီ ဒီမွှတ် တဝ်း၊ “အေ ဒီ ဒိုဝ်း မာဆေ ကြုဝ် ပီ ဒီ လှူ၊ တဲး န့ လိုဝ်း၊ အေ ဟဲ့ လှုဝ်း မှာပ် အေ။း” ဂေ ဝီ တဝ်း၊ “အေ လုဝ် ဒိုဝ်း ခြိဝ်၊ ဘူင် အာရိုပ် ဘိုပ် တွိုန် ဖန် ဘူင့် ဘော အာရိုပ် မာနှာယ် ဖန် ဒုဝ်၊ တဲး န့ ဒူပ် ခဲ့ မိုဝ်း ဒါ တာင် အီ အိုပ် အေ ဒူအီ ဖီလီထီ။ အေ လုဝ် ဘူင် ပါယ် တီ ကူပ် ဆဝ် တွိုန် ဟဲ့ ဒိုက် ဒီ အေ ဘော ဒီ ဒါ တာင် အေ။ 5 အေ လုဝ် ဘူင် အာရိုပ် ဘိုပ် တီ၊ ဘော ရာင် မာနှာယ် အီ ဟဲ့ ဘူင် တဲး မိူင် အေ ဘော မိူင် လိုဝ်။ ဟဲ့ ဟွတ့်၊ အေ လုဝ် အိူပ် မျုက် ဇဝ်ဖြာ ပီ ကြိုပ် ဒူအီ အီဆာရေလ တီ။ ပန် တီ ဇဝ်ဖြာ မိူဝ် ဒီ ဘော ကာဝေ အေ၊ ကွဲ့ ဟူ တဲး ဘော အေ ဘော ဇဝ် ပီ ကြိုပ် အေ လုဝ် ခမ် ဒုက် တာင် တွိုန်။ 6 ကွဲ့ တဲး အေ မိုဝ်း နဝ်း ဒိူဝ် ပီ ခုန်ဒီခမ် ဖာရုဝ် ဘော ဂေ ဒူအီ အဲဂိုပ် တွိုန်။ အန် ဇဝ် ဟဲ့ ဘူင် အီ မွှိုမ် ယုဝ် ဒီ ဂေ၊ တဲး ဂေ ကော ဝီ ဘ့လေး ဒူအီ အီဆာရေလ၊ တဲး ဂေ ပွိုန် ဒီ ဟာဝ်။

7 ဒေါ တီ နီ၊ န့ လုဝ် ရဲန် လဝ် ကာမာယ်၊ ဘော ဒိုဝ်း မက် အာဟျာင် အာ ဒုဝ် အီ ညှမ် ဒွိုမ် ဒါင်၊ အီ ယီ ဟဲ့ ဟွတ့် မိုဝ်း ဂွန်။ အေ လုဝ် ဒိုဝ်း ဟပ် ဒီ လဝ် တီ၊ ဒိုဝ်း ဂွန် ဂါယ်၊ ဝီ ကာယဝ်း ဒီ မာ ဂါယ်၊ ဝီ တဲး ဂါယ် ကွယ် ဒူင် ကွယ် ဘြိမ် ဂါယ်။ 8 ဟဲ့ ဟွတ့်၊ အေ လုဝ် ဒိုဝ်း ဇီဒိူက် ဇဝ်ဖြာ တီ၊ ဒါင် ဒဲင် လဝ် တွိုန်၊ ဘော ဒိုဝ်း ဘော ပီ ဒီ လှူ အေ အီ မုး ရာင် ခြိဝ် တွိုန်၊ အီ တဲး ဂေ နပ်၊ အေ လှုဝ်း မှာပ် အေ။ အေ လုဝ် ဒိုဝ်း ကြုဝ် တီ၊ ဝီ ဟပ် ခဲင် ဇီဒိူက် ပေါ အူ ဘူင့်၊ ဝီ အုန် ခူပ် ဇီဒိူက် ဇဝ်ဖြာ တွိုန်။ ဟဲ့ ဟွတ့်၊ ဟဲ့ ပွိုန် တိုယ် မက် လဝ် တီ၊ တဲး အန် ဟာဝ် ရာင် အန်။ 9 ဘေ ယီ လုဝ် ယွတ် နာ ဟာဝ် အန်။ ဆေ ဇီဒိူက် တီ ဒူပ် န့တေန့် မိူင် ဘေတ်ဆေမေတ် အီ မုး န့တေန့် ဘြိမ် အန်၊ ဟဲ့ မုး အန် ဇဝ် တီ အီ ဘူင် ဒုက် တာင် ဒီ အေ။ ဆေ အာဝ် ပါယ် တီ၊ အေ ဒီ နပ်၊ အာဝ် မုး အန် ဇဝ် တီ အီ ဘူင် ဒုက် ဒီ အေ။ န့ မုး ဆဝ် ပီ လုဝ် ခမ် အေ ပါယ် တီ။”

10 ဂေ ဟဲ့ ဟွတ့် လာယ် ဆင်ချာင်၊ ဂေ ဘော ဘူင် ဒူပ် ပါယ် တီ။ ဂေ ဘော ဒိုဝ်း မာမက် အာ ဒုဝ် အီ ဟဲ့ ဟွတ့် မိုဝ်း ဂွန်၊ ဘော စှိုပ် ဒီ လဝ် တွိုန်။ ဂေ ဘော ဒိုဝ်း ဂွန် အန်၊ ခြွင့် အုန် ခဲင် ကာပိုမ် ခြိုမ် ကာင် ဂေ တွိုန်။ 11 ဂေ ဘော ဒိုဝ်း ဇီဒိူက် ဇဝ်ဖြာ ဘော ဇီဒိူက် ဒီတဲတ် ပီ ဟပ် ဂေ ရာင် မာနှာယ် ခြိဝ် တွိုန် ဘော ရာင် ဘိုပ် ခြိဝ် တွိုန်၊ ဘော ဘ့လေး ဒဲင် လဝ် တီ။ 12 မာမက် တွိုန် ဘော ဟာဝ် ဆိူဝ် ဒူပ် န့တေန့် မိူင် ဘေတ်ဆေမေတ် တွိုန်။ မာမက် ဘော မ့ပေါ ဘော ဟာဝ်။ ဒေါ ဟာဝ် မာမက် ဒူပ် န့တေန့် တာင် တွိုန်၊ ဂါယ် ယီ တူ ဝး နာ မှဝ်။ ဂေ ဒူအီ ဖီလီထီ ယီ ဒူပ် ဒီ ပန် မာမက် တီ၊ ကော ဇမ် ကာဒါယ် မိူင် ဘေတ်ဆေမေတ် တွိုန်။

13 ဂေ ဒူအီ အီ ကွယ် မိူင် ဘေတ်ဆေမေတ် တွိုန်၊ ဂေ ဆုဝ့် ငှုဝ် ခူပ် ဒီလယ့် တီ၊ ဂေ ဘော ယိုဝ် ဇီဒိူက် ဇဝ်ဖြာ ဟဲ့ တး၊ ဂေ ဘော ခူယ် ကာဆဝ်။ 14 မက် လဝ် တွိုန် ဘော လိုပ် ဟာဝ် ခဲင် ဒူင် နာ အာယုဝ်ဆူအာ အီ မုး ဒူအီ ဘေတ်ဆေမေတ် တွိုန်။ မက် ဘော ဟာဝ် ဂိူတ်၊ ကွယ် ခူပ် မာဝ် တာင် ဒီ တီ။ ဟဲ့ ဟွတ့်၊ ဂေ ဘော ဒိုဝ်း လဝ် တွိုန်၊ ဆာလုဝ်း တဲး န့ ဘဲန် ဟေ ဒုဝ့်။ ဂေ ဘော ငဝ်း မာမက် တွိုန်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ ပါယ် တီ ဂေ ဘော လှူ ဒီ ဇဝ်ဖြာ ဒီ တီ။ 15 ပန် တီ ဂေ ဒူအီ ခြိုဝ် အာလေဝီ ဂေ ဘော ဒိုဝ်း လူင် ဇီဒိူက် ဇဝ်ဖြာ ဘော ဇီဒိူက် ဒီတဲတ် ပီ ဟပ် ခြိုင် ခြိဝ် တွိုန်၊ ဝီ ဘ့လေး ဒဲင် မာဝ် တာင် တွိုန်။ ဂေ ဟဲ့ ဟွတ့် ဘ့လေး တူတ့်၊ ဂေ ဒူအီ ဘေတ်ဆေမေတ် ဘော ကာဖြူမ် ဒီ လှူ ပီ လှူ အီ ဒုဝ့် ဒီ ငဝ်။ ဘော ပီ လှူ ဒွန် မျုဝ် ဂေ ဘော လှူ ဒီ ဇဝ်ဖြာ ဆီငဲ တီ အူ ဇေန့်။ 16 ဒါ ကာညာ အီ အိုပ် ဒူအီ ဖီလီထီ၊ ဂေ ဖန် ဝီ တွိုန် ဘော ယိုဝ် လွင် အန် တီ။ ဂေ ဘော ဝီ ဝေန့် ဒီ မိူင် အေခြူန် ဆီငဲ တီ။

17 အီ မုး အာရိုပ် ဘိုပ် ခြိဝ် ပီ ဘူင် ဂေ တွိုန်၊ ပီ လှူ ဂေ ဒီ ဇဝ်ဖြာ၊ ပီ တဝ်း ဂေ၊ တဲး န့ ဂဝ်း ဝဲန် မှာပ် ဂေ တွိုန်၊ န့ မုး အူ ဘူင့် အာဒါ မိူင် အာစုတ်၊ အူ ဘူင့် အာဒါ မိူင် ဂါဆာ၊ အူ ဘူင့် အာဒါ မိူင် အာဆာခေလူန်၊ အူ ဘူင့် အာဒါ မိူင် ဂါထ ဘော အူ ဘူင့် အာဒါ မိူင် အေခြူန်။ 18 အီ မုး မာနှာယ် ခြိဝ် တွိုန် မိူဝ် ပါယ် တီ။ ဂေ တိး ဒူပ် မိူင် ဂေ ဘော ဒါ တာင် ဖန် ကာဒင် အီ အိုပ် မိူင် တွိုန်၊ ဘော မုး မိူင် တာင်၊ ဘော မုး ရဝ် ဒီတဲတ်။ မာဝ် တာင် ဒူင် ဒိုဝ်း ဘ့လေး ဂေ ဇီဒိူက် ဇဝ်ဖြာ တွိုန်၊ န့ ဆီ ကွယ် ခဲင် ဒူင် နာ အာယုဝ်ဆူအာ အီ မုး ဒူအီ ဘေတ်ဆေမေတ် တွိုန်။ န့ ဟဲ့ ဘဲန် လက်ဆာနာ၊ ကွဲ့ တဲး ဂေ ပိဝ် လွင် အန် တီ။

19 အန် ဇဝ် ဒမ် မှာပ် ဒီ ဂေ ဒူအီ ဘေတ်ဆေမေတ် တီ ကူပ် ငွိုပ် ဂေ နာ ခဲင် ဇီဒိူက် ဇဝ်ဖြာ တီ။ ဂေ ဘော ယမ် ဘူ ဂိုဝ် ဝီ။ ဒူအီ ဂေ တွိုန်၊ ဘော ကာဖြူမ် ဒီ ယာမ် ဘော က့လိုဝ် ကူပ် ဒမ် ဇဝ်ဖြာ မှာပ် ဒီ ဂေ ဟဲ့ ငဝ်း ကိူန် ဒူအီ ဂေ။ 20 ဒူအီ အီ ကွယ် ခဲင် မိူင် ဘေတ်ဆေမေတ် တွိုန် တဝ်း၊ “အာဝ် မိုဝ်း အာဆေ အီ ခမ် ဒီ ကွယ် နာ အာတ့် ဇဝ်ဖြာ၊ အီ ဆီငါ ဘွတ် ကာဆဝ်။ အေ ဒီ ဝီ တဲး ဇီဒိူက် တီ ဝီ ဟာဝ် ကွယ် ဒူပ် အာဆေ။း”

21 ဂေ ဘော စ်ု ဒူအီ ဟာဝ် မိူင် ကီရီယာတ်ယာရိမ်၊ ကာလာင် ဒီ ဂေ ဒူအီ ခဲင် မိူင် တီ တဝ်း၊ “ဒူအီ ဖီလီထီ ဟဲ့ ဝီ ဒိုဝ်း ဇီဒိူက် ဇဝ်ဖြာ တး တိုယ် ဒီ ယေ။ မှာန့် တဲး ဘေ ဝီ ဒိုဝ်း ဟာဝ် အုန် ဒူင် ကွယ် ဘေ။”