ဒူအီ မိူင် ကီရီယာတ်ယာရိမ် ဘော ဒိုဝ်း ဇီဒိူက် ဇဝ်ဖြာ တွိုန်၊ ဟာဝ် အုန် ဒဲင် နွန် ဒီ ကာင် အာဖီနာဒါပ်။ ဂေ ဘော တဲး ဂွန် အီမာယ် အန် အီ စိူဝ် အာလေအာဆာ မ့ပြာယ် ဒုဝ် အန်၊ တဲး အန် ဆီငါ ဘွတ်၊ တဲး အန် ဘ်ု ဇီဒိူက် ဇဝ်ဖြာ တီ။

2 ဇီဒိူက် ဇဝ်ဖြာ ဘော ကွယ် လှေန့် ခဲင် မိူင် ကီရီယာတ်ယာရိမ် တွိုန်၊ န့ ကော နုဝ့် အာ ဂိုဝ် ဆီနမ်။ ဒူအီ အီဆာရေလ၊ ဂေ ဘောကာဂ့လျီတ် ဘော ဘဲန် နဝ်း က့လိုဝ် ကူပ် မှာပ် ဂေ။ ဂေ ဘော ဝီ ကာဖာ လှုဝ်း ဇဝ်ဖြာ။ 3 ပန် တီ အာဆာမူအေန် ဘော ကာလာင် ဒီ ဂေ ဒူအီ အီဆာရေလ တဝ်း၊ “ဆေ ဟဲ့ မှာန်၊ ဆီ ဒူပ် ဆီချာ ဘေ ဇဝ်ဖြာ၊ ဘေ လုဝ် ဝဲန် ဇဝ် ပီ ကြိုပ် ဂေ ဒူအီ အာမျုဝ် ဟဝ်၊ လုဝ် ဝဲန် ဘော အာရိုပ် နာင် အေဆာထာရိတ်၊ အီ ကွယ် ကာတဲ ဘေ။ ဘေ လုဝ် ဘိုင် ကြိုပ် မီ ဇဝ်ဖြာ အာခ်ု မှာန်။ ဆေ ဘေ ဘူင် ပါယ် တီ ဇဝ်ဖြာ ဒီ စွယ် ဘေ၊ ကွဲ့ ဟူ တဲး ဘေ ကာဒုး ဒုက် ဒီ ဂေ ဒူအီ ဖီလီထီ တွိုန်။” 4 ပန် တီ ဂေ ဒူအီ အီဆာရေလ ဘော ဝဲန် အာရိုပ် ဇဝ် ဘာလ ဘော အာရိုပ် ဇဝ် အေဆာထာရိတ် တွိုန်။ ဂေ ဘော ကြိုပ် မီ ဇဝ်ဖြာ အာခါခ်ု။

5 အာဆာမူအေန် ဘော ကာလာင် ဒီ ဂေ တဝ်း၊ “တဲး ဒူအီ အီဆာရေလ ဘောကာဂ့လျီတ် တး ကာဇု ဒီ မိူင် မီဇာဖာ။ အုဝ် ဒီ ဆာခိုဝ် ဒီ ဇဝ်ဖြာ ဒါင် ဘေ ဒီ တီ။” 6 ဂေ ဘော တး ကာဇု ဒီ မိူင် မီဇာဖာ တီ။ ဟဲ့ ဟွတ့်၊ ဂေ ဘော ကာဖြူမ် ဒီ တဝ့် အိုမ်၊ လှုဝ် ဒီ ကာဒါယ်၊ တဲး န့ ဘဲန် ပီ လှူ ဒီ ဇဝ်ဖြာ။ ဂေ ဘော ယိူန် ပီ ဒီ ဟူမ် ဆီငဲ တီ။ ဂေ ဘော ကာလာင် တဝ်း၊ “ယေ ဟဲ့ ဟွတ့် ဘူင် အီ တူ မွှိုမ် ဒီ အာတ့် မဲ ဇဝ်ဖြာ။” အာဆာမူအေန် ဘော ဆုင်ဖျာတ် အာမူ ဂေ ဒူအီ အီဆာရေလ ဒွန် အီ ဒီ မိူင် တွိုန်။

7 ပန် တီ ဂေ ဒူအီ ဖီလီထီ ဘော ယိုဝ် လွင် ဒူအီ အီဆာရေလ ဟဲ့ တး ကာဇု ဒီ မိူင် မီဇာဖာ တီ။ ဒါ တာင် ဂေ ဘော ရဲန် ဆိုက်၊ ဟာဝ် ဒူင် ကွယ် ဒူအီ အီဆာရေလ၊ တဝ်း ဒီ ကာဂုဝ်း ဒီ ဂေ။ ဒူအီ အီဆာရေလ ဘော ယိုဝ် လွင် အန် တီ၊ ဂေ ဘော ယုဝ် ဒူအီ ဖီလီထီ။

8 ဂေ ဘော ကာဖြူမ် ဒီ ကာလာင် ဒီ အာဆာမူအေန် တဝ်း၊ “အာဝ် လုဝ် ဒီလှဝ်၊ တဲး မဲ ဆာခိုဝ် ဒီ ဇဝ်ဖြာ ဒါင် အေ။ တဲး ဇဝ်ဖြာ စွယ် အေ၊ တဲး အန် ချွတ် အေ၊ ကွဲ့ တဲး ဒူအီ ဖီလီထီ ပဲ အေ။”

9 အာဆာမူအေန် ဘော ဒိုဝ်း ဂွန် မာဘူ အီ ဆီ ပူ အူ ဒုဝ်၊ လှူ ဒီ ဇဝ်ဖြာ။ န့ ဘဲန် ပီ ဒီ လှူ အီ ဒုဝ့် ဒီ ငဝ်။ အန် ဘော ဆာခိုဝ် ဒီ ဇဝ်ဖြာ ဒါင် ဂေ ဒူအီ အီဆာရေလ။ ဇဝ်ဖြာ မိူဝ် ထူမ် ဂြုဝ်း အန်။

10 ဒေါ တဝ်း အာဆာမူအေန် ဒီ လှူ ပီ ဒီ လှူ တီ၊ ဂေ ဒူအီ ဖီလီထီ ဘော တး တဝ်း ဒီ ကာဂုဝ်း ဒီ ဒူအီ အီဆာရေလ။ ဇဝ်ဖြာ ဘော တဲး ကာနမ် ဟမ် ကာဆဝ် ဒဲင် ဒူအီ ဖီလီထီ၊ တဲး ဂေ ကာဝှ်ု ကာဝျှီန်၊ ဘော တဝ် ဒီ ဒူအီ အီဆာရေလ။ 11 ဒူအီ အီဆာရေလ ဘော ကာဖြူမ် ဒီ လေး ခဲင် မိူင် မီဇာဖာ တွိုန်၊ ခုင်ခြး ကာဂုဝ်း ဒီ ဂေ ကော ဇမ် ကာတတ် မိူင် ဘေတ်ဂါ။

12 ပန် တီ အာဆာမူအေန် ဘော ဒိုဝ်း မာဝ်၊ ဘ့လေး ကာစွင့် ဒီ ကာတဲ မိူင် မီဇာဖာ ဂါယ် မိူင် စှေန်၊ တဲး ဂေ လှုဝ်း ဇဝ်ဖြာ ဟဲ့ စွယ် ဂေ။ အန် ဘော တဲး ဒူင် တီ စိူဝ် အေပနေစ။ ကော ဇမ် ဆီငဲ အာတိုဝ် နီ၊ လွင် ဒါင် အန် လေး “ဇဝ်ဖြာ ဟဲ့ စွယ် အေ။” 13 ဟဲ့ ပါယ် တီ ဒူအီ ဖီလီထီ ဂေ တွိုန် ဟဲ့ ဟွတ့် စှိုမ်။ ဝါယ် အန် တီ ဂေ မိူဝ် အာဝ် ဟူ တး ခဲင် မိူင် ဒူအီ အီဆာရေလ။ ဇဝ်ဖြာ ဘော ရဲ ဂေ ဒူအီ ဖီလီထီ တွိုန်။ န့ ကော မုး ဘော စုဝ် အာဆာမူအေန် ဂေ အာဝ် ဟူ ပွိုန် တး။ 14 မာန် မိူင် ပဲ့ ဟဲ့ ပွိုန် ဂေ ဒူအီ ဖီလီထီ မိူဝ်၊ ဒူအီ အီဆာရေလ ဟဲ့ ဟွတ့် ဝီ ပွိုန် ဝိဝ်။ စုး ဒီ မိူင် အေခြူန် ကော ဇမ် မိူင် ဂါထ တွိုန်၊ ဂေ ဟဲ့ ဟွတ့် ကာဒုး ဒီ ဝီ တဲး ဝိဝ် တူတ့် ဒီ ဒူအီ အီဆာရေလ။ အီ မုး မာန် မိူင်၊ ဒူအီ အီဆာရေလ ဝီ ဘ်ု ဆီချာ၊ ကွဲ့ ဟူ တဲး ဂေ ဒူအီ ဖီလီထီ ဝီ ပွိုန်။ ဒေါ အန် တီ ဂေ ဒူအီ အီဆာရေလ ဂါယ် ဒူအီ အာမုဝ်ရိတ် ဘော လာယ် ဖြူမ်၊ အာဝ် ဟူ ကာဂုဝ်း။

15 အာဆာမူအေန် ဘဲန် အီ ဆုင်ဖျာတ် အာမူ ဂေ ဒူအီ အီဆာရေလ ဘော စုဝ် အန်။ 16 ဒွန် ဆီနမ် ဒွန် ဆီနမ် အန် လဲပ် ဒီ ယွတ် မိူင် ဘေဒါအေန် ဘော မိူင် ဂီလဂါ ဘော မိူင် မီဇာဖာ တွိုန်။ ဒေါ ဇမ် အန် မိုင် တီ၊ အန် ဆုင်ဖျာတ် အာမူ ဂေ ဒူအီ အီဆာရေလ။ 17 ဒွန် ဇေန့် အန် ဘော ဟာဝ် မိူင် ရာမာ၊ အီ မုး ဒူင် ကွယ် ကာင် အန်။ အန် ဘော ဆုင်ဖျာတ် အာမူ ဒူအီ အီဆာရေလ ဒီ တီ။ အန် ဘော ဘူင် ဘော ကာစှူင့် လှူ ဒီ ဇဝ်ဖြာ ဒီ တီ။