1 အာဆာမူအေန် တွိုန် အာဆာက် အန် ဟဲ့ ဂဲ။ အန် ဘော ဒိုဝ်း ဂွန် အီမာယ် အန်၊ တဲး ဂါယ် ဆုင်ဖျာတ် အာမူ ဒူအီ အီဆာရေလ။ 2 အီ မုး ဂွန် ဂိန့် အန်၊ အန် စိူဝ် အာယုဝ်အေလ။ အီ မုး ဝါ အာယုဝ်အေလ တီ၊ အန် စိူဝ် အာဖီယ။ ဂါယ် ဘဲန် ဒါ တာင် အီ ဆုင်ဖျာတ် ဒါရာ အီ ကွယ် ဒီ မိူင် ဘီရာဆေဘာ။ 3 မာလဲ၊ ဂွန် အန် ဂါယ် ယီ တူ ဒူပ် န့တေန့် ပီ ပါယ် ဂုန့် ဂါယ်။ ဂါယ် ဝီ မိုဝ်း နဝ်း ဆီ ဒူပ် န့တေန့် အီ တူ ဒူပ် ဒါရာ။ ဂါယ် မိုဝ်း နဝ်း လောဖ၊ ပြာ ဒီ ဒိုဝ်း ရွိုန် ဒီ အီ ဘော တူ ဆုင်ဖျာတ် နာ မှာန်။

4 ဒေါ အန် တီ ဂေ ဒါ တာင် ခဲင် မိူင် အီဆာရေလ ဒွန် အီ ဘော တး ကာဇု ဒူင် ကွယ် အာဆာမူအေန် ခဲင် မိူင် ရာမာ တွိုန်။ 5 ဂေ ကာဖြူမ် ဒီ တဝ်း ဒီ အန်၊ “မဲ ဆာရာ၊ အာဆာက် မဲ ဟဲ့ ကိူန်။ မဲ မိူဝ် ဟဲ့ ကြဲ ဒီ ကတ်။ အီ မုး ဂွန် မဲ ဂါယ် ယီ တူ ဒူပ် န့တေန့် ပီ ပါယ် မဲ။ ဆေ န့ ပါယ် တီ၊ မှာန့် မဲ ဝီ ရဝ်း တဲး ယေ မိုဝ်း ခုန်ဒီခမ် အီ အိုပ် ယေ။ တဲး န့ ပီ ဒူအီ အာမျုဝ် ဟဝ်။”

6 လွင် ပီ တဝ်း ဂေ၊ “တဲး မဲ ရဝ်း ဒွါ ခုန်ဒီခမ်၊ တဲး အန် အိုပ် ယေ၊” န့ တူ လဝ့် နဝ်း အာဆာမူအေန်။ အန် ဘော ဝီ ဆာခိုဝ် ဒီ ဇဝ်ဖြာ။ 7 ဇဝ်ဖြာ ဘော ဝီ ကာလာင် ဒီ အန် တဝ်း၊ “မဲ ထူမ် ဂြုဝ်း ပီ ကာလာင် ဂေ ဒီ မဲ။ အာဝ် မုး ဂေ ဝဲန် မဲ။ ဂေ ဟဲ့ ဝဲန် အုဝ်။ ဂေ ဟူ တဲး အုဝ် အိုပ် ဂေ။ 8 အူ ဆိန့် ဒေါ တဲး အုဝ် ဘေ လေး ခဲင် မိူင် အဲဂိုပ် တွိုန် ကော ဇမ် အာတိုဝ် နီ၊ ဂေ ဟဲ့ ဝဲန် အုဝ်၊ ဝီ ကြိုပ် ဇဝ် ပီ ကြိုပ် အီ ဟဝ်။ ပီ ဘူင် ဂေ ဒေါ တီ နီ၊ န့ ဘော ပါယ် တီ။ 9 ဒေါ တီ နီ၊ မဲ ထူမ် ဂြုဝ်း ဂေ။ မာလဲ၊ မဲ လုဝ် တဲး ဆာဒိက် ဒီ ဂေ၊ ယီ တူ လုဝ် ခြဲ ဂေ။ မဲ လုဝ် ကာလာင် နှဲ ထုင်ဂျာမ် ပီ ဒီ ပါယ် ခုန်ဒီခမ် ဟီ အိုပ် ဂေ။”

10 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာဆာမူအေန် ဘော ဒိုဝ်း ဂြုဝ်း ဇဝ်ဖြာ တီ၊ ဝီ ကာလာင် ဒီ ဂေ အီ ဆီ ပွိုန် ခုန်ဒီခမ် တွိုန်။ အန် တဝ်း၊ 11 “တဲး ဘေ ထူမ် လွင် ထုင်ဂျာမ် ခုန်ဒီခမ်။ ဆေ အန် ဟီ အိုပ် ဘေ၊ အန် ဒီ ဒိုဝ်း ဂွန် ဘေ၊ တဲး န့ ဘဲန် အီ လိုမ်လာ လက်လဝ် အန်၊ တဲး ဂေ ဟျီင် ဘော မ့ပြွင့် အန်။ မင် အီ အန် ဒီ တဲး ဂေ ကာဘ့လဲပ် ယဲတ့် နာ အာတ့် လက်လဝ် အန်။ 12 အန် ဒီ တဲး မင် အီ ဘဲန် ဒါ ဘုဝ် အီ အိုပ် ဒါ ဆိုက် အူ ဟြဲန့်။ မင် အီ ဒီ အိုပ် ဖန် ဂိုဝ်။ အန် ဒီ ဒိုဝ်း မင် အီ၊ တဲး ဂေ ထဲ မာန်၊ ထဲ ဒူင် နာ အန်။ မင် အီ တဲး ဂေ ဆုဝ့် ငှုဝ်။ မင် အီ အန် ဒီ တဲး ဂေ ဘူင် ခြိုင် ကာဂုဝ်း ပီ တာ ဒါ ဆိုက်။ မင် အီ၊ အန် ဒီ စ်ု ဂေ ဘူင် ခြိုင် လက်လဝ်။ 13 အီ မုး ဂွန် အီဘိုန့် ဘေ၊ အန် ဒီ ဒိုဝ်း တဲး ဂေ ဘူင် နာမန် အုး ငှုန်။ မင် အီ အန် ဒီ တဲး ဂေ ဘဲန် အီ စွိုမ် ပီ ဒီ ဟူမ် အန်၊ တဲး ဂေ ဘူင် ခါမုန် ဘဲန် မျုဝ် ဘဲန် မျုဝ် ပီ ဒီ ဟူမ် အန်။ 14 အန် ဒီ ဒိုဝ်း ဘော မာန် ဘေ ဘော ဒူင် နာ ဘေ၊ မာန် ဘ့လေ မာငုန် ဘေ ဘော ကာပိုမ် ဟေ နာမန် ဘေ။ အန် ဒီ ရဝ်း ဇိုဝ် တီ အီ ဘွတ် လွှိုမ် တူတ့်၊ ဝီ ဒွါ ဒီ ဒူအီ အန်၊ ဒွါ ဒီ ဒဲစေန့် အန်။ 15 အန် ဒီ ဒိုဝ်း ပီ ဆမ် ပီ ရန့် ဘေ။ ဘေ ဟီ မိုဝ်း ဂိုဝ် ဘုန်၊ အူ ဘုန် ဘေ လုဝ် ဒွါ ဒီ အန်။ အန် ဒီ ဝီ ဒွါ ဒီ ဂေ အီ အိုပ် ဒါ ဆိုက် အန် ဘော ဂေ အီ မုး အာမူ အာမာတ် အန်။ 16 အန် ဒီ ဒိုဝ်း မှာယ် ဘေ ဘော မုး အီဘိုန့် အီမာယ် အီ အွန် ကာဆဝ် လွှိုမ် အီ။ ဘော မာလုဝ် ဘေ အီ မွှိုမ်၊ အန် ဒီ ဒိုဝ်း တဲး ဂေ ဝီ ဘူင် ဂါန် အန်။ 17 ဒုဝ် ဆတ်ဒါဝါ ဘေ ဂိုဝ် ဘုန် အူ ဘုန် အန် ဒီ ဒိုဝ်း။ ဘေ ဒီ ကာဒုး ဒီ ဘဲန် မှာယ် အန်။ 18 ပန် တီ ဘေ ဒီ ကာဒုး ဒီ ယာမ် ကူပ် ခုန်ဒီခမ် ပီ ရဝ်း ဘေ တီ။ ပန် အန် တီ ဇဝ်ဖြာ မိူဝ် တူ ထူမ် ဂြုဝ်း ဘေ။”

19 အာဆာမူအေန် ဟဲ့ ဟွတ့် ကာလာင် လွင် အန် တီ ဒွန် မျုဝ်၊ ဒူအီ ဂေ တွိုန် ယီ တူ ထူမ် ဂြုဝ်း အန်။ ဂေ ဝီ တဝ်း၊ “အာဝ် မုး၊ ယေ ဆီ ပွိုန် ခုန်ဒီခမ်၊ တဲး အန် အိုပ် ယေ။ 20 တဲး ယေ ပီ ဒူအီ အာမျုဝ် ဟဝ်။ တဲး ခုန်ဒီခမ် ဆုင်ဖျာတ် အာမူ ယေ။ တဲး အန် ပွိုန် ဒီ လိုပ် လိုပ် လေး လေး နာ အာတ့် ယေ၊ တဲး အန် ကာဂုဝ်း ဒီ ရန်ဆူ ယေ။”

21 အာဆာမူအေန် ဟဲ့ ယိုဝ် တူတ့် ဂြုဝ်း ဂေ တွိုန် ဒွန် မျုဝ်၊ အန် ဝီ ကာလာင် ဒီ ဇဝ်ဖြာ။ 22 ဇဝ်ဖြာ ပီ ဝီ ကာလာင် ဒီ အာဆာမူအေန် တဝ်း၊ “ထူမ် ဒူပ် ဂြုဝ်း ဂေ တီ။ ဒွါ ခုန်ဒီခမ် ဒီ ဂေ။”

အာဆာမူအေန် ဘော ဝီ ကာလာင် ဒီ ဒူအီ အီဆာရေလ တဝ်း၊ “တဲး ဘေ ဝီ ဝေန့် ခဲင် မိူင် ဒူင် ကွယ် ဘေ ဒွန် အီ။”