1 ဒေါ အန် တီ န့ မိုဝ်း ဒူအီ ခြိုဝ် အာဘေန်ယာမ်။ အန် စိူဝ် အာကီဆာ၊ အန် မုး ဂွန် အာဘီအေလ အီ မုး ဂွန် အာဇေရုဝ်။ အာဇေရုဝ် မုး ဂွန် အာဘေခေါလာတ်။ အာဘေခေါလာတ် မုး ဂွန် အာဖီ။ အာကီဆာ တွိုန် ဟဲ့ ခြမ် ကာဆဝ် ဘော မိုဝ်း ပွုန် တာင်။ 2 အန် မိုဝ်း ဂွန် အီမာယ် အူ ဝီ၊ အီ စိူဝ် အာဆောလူ။ အာဆောလူ တီ အန် စှိတ် ကာဆဝ်။ ခဲ့ ကွယ် ဒူအီ အီဆာရေလ၊ အူ ဝီ မိူဝ် အာဝ် မိုဝ်း အီ ပီ အန်။ အန် ဟဲ့ စာ လွှိုမ် အီ ဟဝ်။ အီ ဟဝ် ဟဲ့ စာ ခဲ့ ပုင် ယ အန်။

3 န့ ဘော ဇမ် အူ ဆီငဲ၊ မာလုဝ် ဂုန့် အာဆောလူ တွိုန် ဟဲ့ ဘျုဝ်း မင် ဒုဝ်။ ခုဝ်၊ ဂုန့် အာဆောလူ အီ စိူဝ် အာကီဆာ တွိုန်၊ အန် တဝ်း ဒီ အာဆောလူ၊ “တဲး မဲ ဒဲ့ ဒဲစေန့် အုဝ် အူ ဝီ၊ တဲး ဘာယ် ဟာဝ် ဟြေတ့် မာလုဝ် တီ။” 4 ဂါယ် တွိုန် ဘော ဟာဝ် ဟြေတ့် ဒီ နွန် အာအေဖာရိမ် ဘော ခဲင် မိူင် ဆာလီဆာ ဒွန် ပ့လုဝ့်။ ဂါယ် ယီ တူ ကာတုန့်။ ဂါယ် ဘော ကာလုဝ်း ဟာဝ် ခဲင် မိူင် ဆာလိမ်။ မာလုဝ် ယီ တူ ကွယ် ဒီ တီ။ ဂါယ် တူ ယိုဝ်။ ဂါယ် ဘော ဝီ ကာလုဝ်း ဟာဝ်၊ ဟြေတ့် ခဲင် မိူင် အာဘေန်ယာမ် ဒွန် ပ့လုဝ့်။ ဂါယ် ယီ တူ ယိုဝ်။

5 ဒေါ ဝီ ဇမ် ဂါယ် ခဲင် မိူင် အာဇူဖ တွိုန်၊ အာဆောလူ ဘော ဝီ ကာလာင် ဒီ ဒီဘဲ အန် တွိုန် တဝ်း၊ “တဲး အာယ် ဝီ ဝေန့်၊ ဂုန့် အုဝ် တူ နဝ်း မှဲ ကူပ် မာလုဝ် တီ။ အုဝ် ယုဝ် ဂုန့် အုဝ် ဝီ မိုဝ်း နဝ်း မှဲ ကူပ် အာယ်။”

6 ဒီဘဲ အန် တွိုန် ဝီ တဝ်း၊ “ယွတ်၊ ခဲင် မိူင် နီ န့ မိုဝ်း ဒူအီ ပီ တိုယ် ဇဝ်ဖြာ အူ ဝီ။ ဂေ ဂူမ် ကာဆဝ် အန်။ ဂြုဝ်း ပီ ကာလာင် အန် ဟဲ့ မုး၊ န့ မှာန် အာခ်ု။ တဲး အာယ် ဟာဝ် ဒူင် ကွယ် အန် တီ။ အန် ဒီ ခဲ နှဲ န့တေန့်၊ တဲး အာယ် နပ် နာ မှဝ် ဒီ ဟာဝ် ဟြေတ့် မာလုဝ် တီ။”

7 အာဆောလူ ဝီ တဝ်း ဒီ အန်၊ “ဆေ အာယ် ဟာဝ်၊ အာယ် ဒီ ဒိုဝ်း မာဆေ လှူ။း ခါမုန် ပီ ဂူင့် အာယ် ဟဲ့ ဟွတ့် တူတ့်။ ပီ ပွိုန် ဒီ လှူ ဒီ ဒူအီ ပီ တိုယ် ဇဝ်ဖြာ တီ၊ အူ မျုဝ် မိူဝ် အာယ် တူ မိုဝ်း။ မာဆေ ပီ ဆီ မိုဝ်း အာယ်။း”

8 အန် ဟဲ့ ဟွတ့် ကာလာင် ပါယ် တီ။ ဒဲစေန့် အန် တွိုန် တဝ်း၊ “မဲ ယွတ် နီ၊ အုဝ် ဆီ မိုဝ်း ရွိုန် ဇဲတ် အူ ထေ။ တဲး အာယ် ဒွါ ဒီ ဒူအီ ပီ တိုယ် ဇဝ်ဖြာ တီ၊ တဲး အန် နှဲ ဒူင် ကွယ် မာလုဝ် ဒီ အာယ်။” 9 ဒေါ မွိုန် ဂေ ဒူအီ အီဆာရေလ ဆေ ဂေ ဆီ ဒီမွှတ် ဒီ ဇဝ်ဖြာ၊ ဂေ တဝ်း၊ “တဲး အေ ဟာဝ် ဒီ ဒူအီ အီ ယိုဝ်။” ဒေါ တီ နီ ဂေ ယီ တဝ်း၊ “ဒူအီ ဘျာန် ဂြုဝ်း ဇဝ်ဖြာ” ဒီ ဒူအီ ဇိုဝ် တီ။

10 အာဆောလူ ဝီ တဝ်း ဒီ ဒဲစေန့် အန်၊ “ဟဲ့ မုး၊ တဲး အာယ် ဟာဝ်။” ဂါယ် ဘော ဟာဝ် ဒီ မိူင် ဒူင် ကွယ် ဒူအီ ပီ တိုယ် ဇဝ်ဖြာ တွိုန်။ 11 ဒေါ ဟာဝ် ဂါယ် ဒူပ် နွန် နာ ရေတ့် မိူင် တွိုန်၊ ဂါယ် ဘော ကာတုန့် ဒီဘျာ ဂေ တး တဝ့် အိုမ်။ ဂါယ် ဘော ဒီမွှတ် ဒီဘျာ ဂေ တီ တဝ်း၊ “ဒီ နီ န့ မိုဝ်း ဒူအီ အီ ယိုဝ်။း”

12 ပန် တီ ဂွန် ဒီဘျာ ဂေ ဝီ တဝ်း၊ “ဟဲ့ မိုဝ်း၊ အန် တး အာတ့် တး ဘာယ် နီ။ တဲး ဘာယ် ဟာဝ် ပီခြန် ဘာယ်။ နာ ကာတွိုန် အန် ဟဲ့ တး ဇမ် ခဲင် မိူင် နီ။ အာတိုဝ် နီ၊ ဂေ ဒွန် အီ ဟဲ့ ဘ့လေး ပီ ဒီ လှူ ဂေ ဒဲင် ကာစှူင့် အီ ကွယ် နာ ကွာ တွိုန်။ 13 ဆေ ဘာယ် လိုပ် ဟာဝ် ခဲင် မိူင်၊ ဘာယ် ဒီ ကာတုန့် အန် အာတ့် ဟုဝ့် ဟူမ် အန် ဘ့လွယ် ဒူင် လှူ ဂေ တီ။ ဂေ ဒူအီ အီ ကွယ် နာ ကွာ၊ ဂေ တူ ပွိုန် ဟူမ် အာတ့် တး မွင့်ကာရာ အန် ဒီ ပီ လှူ ဂေ တီ။ အန် ဟီ ဟွတ့် မွင့်ကာရာ တဲး၊ ခဲတ့် အီ ဟဲ့ တး ဟဲ့ ပွိုန် ဟူမ်။ ခုဝ်၊ ဆေ ဘာယ် ဟာဝ် ဒေါ တီ နီ၊ ဘာယ် ဒီ ကာတုန့် အန်။”

14 ဂါယ် တွိုန် ဘော လိုပ် ဟာဝ် ခဲင် မိူင် တွိုန်။ ဒေါ လိုပ် ဂါယ် ခဲင် မိူင် တီ၊ အာဆာမူအေန် ဘော တး ကာတုန့် ဂါယ် ဒေါ ဟာဝ် အန် ဒူင် လှူ ဂေ တွိုန်။

15 ဆိန့် အာမှိုဝ်၊ အာတ့် ဇမ် အာဆောလူ တွိုန်၊ ဇဝ်ဖြာ ဟဲ့ ကာလာင် ဒီ အာဆာမူအေန် တဝ်း၊ 16 “ခဲညှာ ခြာဝ် နီ၊ အုဝ် ဒီ စ်ု ဒူအီ အူ ဝီ အီ တး ခဲင် မိူင် အာဘေန်ယာမ်၊ တဲး အန် တး ဇမ် ဒူင် ကွယ် မဲ။ မဲ လုဝ် ဖဝ်း နာမန် ဒီ အန်၊ တဲး အန် ဘဲန် ဒါ တာင် အီ ယဲတ့် ဒူအီ အီဆာရေလ။ အန် တီ မုး ဒူအီ ဒီ ချွတ် ဂေ ဒူအီ အာမျုဝ် အုဝ်၊ ကွဲ့ တဲး ဂေ ဒူအီ ဖီလီထီ ဝီ ဒွါ ဒုက် ဒီ ဂေ။ အုဝ် ဟဲ့ ဟွတ့် ယိုဝ် ပီ ဆာခိုဝ် ဂေ၊ ဘော ဝီ ကာဝေ ဂေ။”

17 ဝါယ် အန် တီ ဒေါ ယိုဝ် အာဆာမူအေန် အာဆောလူ တွိုန်၊ ဇဝ်ဖြာ ဝီ တဝ်း ဒီ အန်၊ “တဲး မဲ ယွတ် ဒူအီ ပဲ့ ဟဲ့ ကာလာင် အုဝ် ဒီ မဲ တွိုန်။ ဒူအီ တီ၊ အန် ဒီ အိုပ် ဒူအီ အာမျုဝ် အုဝ် ဘောကာဂ့လျီတ်။”

18 ပန် တီ အာဆောလူ ဘော တး ကာတတ် အာဆာမူအေန် ဒီ ဘာင် မာလုဝ်း မိူင် တွိုန်။ အန် ဘော ဒီမွှတ် တဝ်း၊ “မှာန့် မဲ နှဲ ကာင် ဒူအီ အီ ယိုဝ် ဒီ အုဝ်။”

19 အာဆာမူအေန် ဝီ ကာလာင် ဒီ အာဆောလူ တဝ်း၊ “အုဝ် နီ မုး ဒူအီ အီ ယိုဝ်။ တဲး မဲ ယဲတ့် ဒီ အာတ့်၊ ဟုဝ့် နာ ကွာ ဒူင် လှူ ဂေ။ အာတိုဝ် နီ မဲ ဒီ ပွိုန် ဒီ ဟူမ် ဒီ ရိုမ် ဒူပ် အုဝ်။ ပါ ခဲညှာ ဆိန့်ဝး အုဝ် ဒီ တဲး မဲ ဟာဝ်။ အုဝ် ဒီ ကာလာင် ဘျ ခဲ့ ပီ ကာဖာ မဲ ခဲင် နဝ်း မဲ တီ။ 20 မာလုဝ် မဲ အီ ဟဲ့ ဘျုဝ်း တ အာမှိုဝ် တွိုန် မိူဝ်၊ မဲ ကွဲ့ က့လိုဝ်။ ဂေ ဟဲ့ ဟွတ့် ယိုဝ်။ လွင် ပီ ဆီ ပွိုန် ပီ ဆီ မှာန့် ဂေ ဒူအီ အီဆာရေလ နီ၊ ပီ နှဝ့် န့ဒဝ့် ဒွန် အီ၊ န့ မုး မဲ ဘော န့ဟူမ် ဂုန့် မဲ။”

21 အာဆောလူ ဝီ ကာလာင် ဒီ အန် တဝ်း၊ “အုဝ် နီ အုဝ် ဟဲ့ မုး ဒူအီ ခြိုဝ် အာဘေန်ယာမ်။ န့ မုး အီ ပြေတ့် ဆိူတ် ကာတဲ ဂေ ဒူအီ အီဆာရေလ။ န့ဟူမ် ဂုန့် အုဝ် မိူဝ် ပြေတ့် လွှိုမ် အီ ဟဝ် ခဲင် ခြိုဝ် အာဘေန်ယာမ်။ ကူပ် န့ ပါယ် မှဝ်၊ မဲ ကာလာင် ဒီ အုဝ် ပါယ် တီ။း”

22 ပန် တီ အာဆာမူအေန် ဘော ဒဲ့ အာဆောလူ ဂါယ် ဒဲစေန့် အန် တွိုန်၊ တဲး ဂါယ် လိုပ် ခဲင် ဟုဝ် ဒူင် ကွယ် ခဲတ့် တွိုန်၊ တဲး ဂါယ် တုတ့် ကွယ် ဒူင် ကွယ် ဒါ တာင်။ န့ ယီ မိုဝ်း ခဲတ့် ပဲ့ ဟဲ့ ဘာင် တး ဂေ ကာဘက် အူယ် ဂိုဝ် ဝီ။ 23 အာဆာမူအေန် ဘော ဒဲ့ ဒူအီ အီ စွိုမ် ပီ ဒီ ဟူမ် တွိုန်၊ ဘော ကာလာင် ဒီ အန် တဝ်း၊ “ယင် ပီ စ်ု အုဝ် မဲ အုန် တွိုန်၊ တဲး မဲ ဒိုဝ်း တး ဒေါ တီ နီ။”

24 ပန် တီ ဒူအီ စွိုမ် ပီ ဒီ ဟူမ် တွိုန်၊ အန် ဘော ဒိုဝ်း တး အီ မုး ယင် ဂိုမ် ဘော တူတ့်၊ ဝီ ဘ့လေး နာ အာတ့် အာဆောလူ။ အာဆာမူအေန် ဘော ကာလာင် ဒီ အန် တဝ်း၊ “မဲ ယွတ်၊ အာတီ မုး ပီ အုန် အုဝ် ဒီ မဲ။ တဲး မဲ ဟူမ်။ အာတီ အုဝ် ဟဲ့ အုန် အာဒါ မဲ၊ အူ ဆိန့် ဒေါ ဘာင် အုဝ် ခဲတ့် တး ဒီ နီ။” ဆီငဲ တီ၊ အာဆောလူ ဘော ဟူမ် ရိုမ် ဒူပ် အာဆာမူအေန်။

25 ဂါယ် ဘော ယိတ့် ဒူင် လှူ ဂေ တွိုန်၊ ဝီ လူင် လိုပ် ခဲင် မိူင် တွိုန်။ မှိုဝ် တီ၊ အာဆာမူအေန် ဂါယ် အာဆောလူ ဘော လာယ် ကာမွုန် ခဲင် ကာင် ခြွင့် ဒဲင်။ 26 ဂါယ် ဘော ယိတ့် ဆိန့် ဆိန့်ဝး စေဝ်၊ ပြဲ ညှမ် ဘ့လာင်။ အာဆာမူအေန် ဘော ဒဲ့ အာဆောလူ ခဲင် ကာင် တွိုန် တဝ်း ဒီ အန်၊ “မဲ မ့ပြာယ် ဒုဝ် မဲ။ အုဝ် ဒီ တိုယ် မဲ ဟာဝ်။” ဟဲ့ ဟွတ့်၊ အာဆောလူ ဘော ယိတ့်။ ဂါယ် ဘော ကာဒူပ် လေး ဟာဝ်။ 27 ဒေါ ဇမ် ဂါယ် ဒီ ခူပ် မာလုဝ်း မိူင် တွိုန်၊ အာဆာမူအေန် ဘော ကာလာင် ဒီ အာဆောလူ တဝ်း၊ “တဲး ဒဲစေန့် မဲ ဟာဝ် ယဲတ့် နာ အာတ့်။” ပန် တီ ဒဲစေန့် အန် တွိုန် ဘော ယဲတ့်။ အန် ပီ ဝီ တဝ်း၊ “မဲ ကွယ် အူ ကာစန်။ အုဝ် ဒီ ကာလာင် ပီ တဝ်း ဇဝ်ဖြာ ဒီ မဲ။”