အာဆာမူအေန် ဘော ဒိုဝ်း ကာပဝ် နာမန်၊ ဖဝ်း ဒီ ဂိန့် အာဆောလူ ဘော အုး အန်။ အန် ဘော တဝ်း၊ “ဇဝ်ဖြာ ဟဲ့ စ်ု အုဝ် ဖဝ်း နာမန် ဒီ ဂိန့် မဲ။ အန် ဒီ တဲး မဲ ဘဲန် ဒါ တာင် အီ အိုပ် ဒူအီ အီဆာရေလ။ 2 အာတိုဝ် မဲ ဟီ လေး ဒူင် ကွယ် အုဝ် နီ၊ မဲ ဒီ ယိုဝ် ဒူအီ အာ ဝီ။ ဂါယ် ဒီ ကွယ် ခူပ် ဘာရေဝ် နာင် ရာအေန် အီ မုး ဒီ ရဝ် စေလီစာ ခူပ် ကာအုန် ကာဒါယ် မိူင် အာဘေန်ယာမ် တွိုန်။ ဂါယ် အာ ဝီ တီ ဒီ ကာလာင် ဒီ မဲ တဝ်း၊ ‘မာလုဝ် ပီ ဟာဝ် ဟြေတ့် ဘာယ် တွိုန်၊ အီ ဟဲ့ ဟွတ့် ဝီ ယိုဝ်။ ဂုန့် မဲ မိူဝ် တူ မိုဝ်း နဝ်း မှဲ ကူပ် မာလုဝ် တီ။ အန် ဝီ မိုဝ်း နဝ်း မှဲ ကူပ် ဘာယ်။’ အန် တဝ်း၊ ’အုဝ် ဒီ ပါယ် မှဝ် ကူပ် ဂွန် အုဝ် နီ။း’

3 ဆေ မဲ ဟီ ပွုန် ဒီ တီ၊ ဝီ ဇမ် ဒူင် မိုဝ်း ဟေ တာင် အီ ကွယ် ကာတတ် ရဝ် ထာဘောရာ၊ မဲ ဒီ ကာတုန့် ဒူအီ အူယ် ဝီ။ ဂေ ဒီ ဟာဝ် ဒူင် ကြိုပ် ဂေ ဇဝ်ဖြာ ခဲင် မိူင် ဘေဒါအေန်။ အူ ဝီ ဒီ စုဝ့် ဂူင့် ဂွန် မာပဲ အူယ် ဒုဝ်။ ပေါ အူ ဝီ ဒီ ဂူင့် ခါမုန် အူယ် ဘူင့်။ ပေါ အူ ဝီ၊ အန် ဒီ ဂူင့် အိုမ် မာငုန်။ 4 ဂေ တီ၊ ဂေ ဒီ ကာလာင် ဂြုဝ်း ဒီ မဲ။ ဂေ ဒီ ဒွါ ခါမုန် တီ ဒီ မဲ အာဒါ အာ ဘူင့်။ မဲ ဒီ ဘော ဒိုဝ်း ဒီ ဂေ။

5 ဝါယ် အန် တီ မဲ ဒီ ဟာဝ် ဇမ် ဒီ နွန် ဒူင် ကွယ် ဇဝ်ဖြာ၊ ဒူင် မိုဝ်း ဒပ် ဒူအီ ဖီလီထီ တွိုန်။ မဲ ဟီ ရာမ် ကာတတ် မိူင် တီ၊ မဲ ဒီ ကာတုန့် ဖိုင် ဒူအီ အီ ဘျာန် ဂြုဝ်း ဇဝ်ဖြာ။ ဂေ ဒီ ဂူင့် ဒိင် ဒီရဝ် ဘော ဂြိုင် ဘော ဝဝ် ဘော ဒိင် အီ ပွိုန် ဘး။ ဂေ ဒီ တး နာ ကွာ တွိုန်၊ ဝီ လူင် ဘော ဘျာန် ဂြုဝ်း ဇဝ်ဖြာ။ 6 ဒေါ အန် တီ နဝ်း ဖွိုမ် ဇဝ်ဖြာ အီ မိုဝ်း ပွုန် တာင် အန် ဒီ တး လူင် ဒီ မဲ။ မဲ မိူဝ် ဒီ ဘျာန် ဂြုဝ်း ဇဝ်ဖြာ ဒူပ် ဂေ။ န့ ဒီ တဲး နဝ်း မဲ ကာပ့လု၊ အာဝ် ဟူ ပီ ဒူအီ ဘြိမ်။ 7 ဆေ ဟဲ့ ဘဲန် တူတ့် ဒွန် မျုဝ် ပီ တဝ်း အုဝ် ဒီ မဲ ဇိုဝ် တီ၊ တဲး မဲ ဘူင် ခဲ့ ပီ လုဝ် မဲ ဘူင်။ ခုဝ်၊ ဇဝ်ဖြာ ဟဲ့ ကွယ် ရိုမ် ဒူပ် မဲ။

8 မဲ လုဝ် ဟာဝ် ဒီ အာတ့်၊ လူင် ဒီ မိူင် ဂီလဂါ။ အုဝ် မိူဝ် ဒီ ဝီ လူင် ဒူင် ကွယ် မဲ ဒီ တီ။ မဲ ဒီ ပွိုန် ဒီ လှူ ပီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်။ မာလဲ၊ မဲ လုဝ် ဘ်ု ဘူ ဆီငဲ၊ တဲး န့ ကော ဇမ် ပန် ဒီ တး နှဲ အုဝ် ဒီ မဲ လွင် ပီ လုဝ် ဘူင် မဲ။” ခဲ့ တီ အာဆာမူအေန် ဟဲ့ ကာလာင် ဒီ အာဆောလူ။

9 ပန် တီ အာဆောလူ ဘော ဝီ လေး ဒူင် ကွယ် အာဆာမူအေန် တွိုန်။ ဆီငဲ တီ ဇဝ်ဖြာ ဘော တဲး နဝ်း အာဆောလူ ဘ့လိူင်။ န့ ဘော ဘဲန် တူတ့် ပီ ဒွိုမ် ကာလာင် အာဆာမူအေန် ဒီ အန်။ 10 ဒေါ တး ဇမ် အာဆောလူ ဘော ဒဲစေန့် အန် ဒီ နွန် တွိုန်၊ အန် ဘော ဝီ ကာတုန့် ဖိုင် ဒူအီ အီ ဘျာန် ဂြုဝ်း ဇဝ်ဖြာ တွိုန်။ နဝ်း ဖွိုမ် ဇဝ်ဖြာ ဟဲ့ တး လူင် ဒီ အန်။ အန် ဘော ဘျာန် ဂြုဝ်း ဇဝ်ဖြာ ဒူပ် ဂေ တွိုန်။ 11 ဂေ ဂိုက် အန်၊ ဂေ ဒူအီ အီ ဟဲ့ ဒွိုမ် နပ် အန် အာတ့် နီ၊ ဂေ ဝီ ယိုဝ် အန် ဘျာန် ရိုမ် ဂြုဝ်း ဇဝ်ဖြာ ဒူပ် ဖိုင် ဒူအီ အီ ဘျာန် ဂြုဝ်း ဇဝ်ဖြာ တွိုန်၊ ဂေ ဝီ လာယ် ကာမွုန် တဝ်း၊ “အော၊ န့ ပါယ် မှဝ် ဒီ ဂွန် အာကီဆာ အီ မုး အာဆောလူ။း န့ ပီ ဘော အန် ဟဲ့ ဝီ ဘဲန် ဒူအီ ဘျာန် ဂြုဝ်း ဇဝ်ဖြာ။”

12 ဂေ ဒူအီ အီ ကွယ် ဒီ တီ န့ မိုဝ်း အူ ဝီ အီ တဝ်း၊ “ဂုန့် အန် မုး အာဆေ။း” ပန် တီ န့ ဝီ ဘဲန် ဂြုဝ်း မာကာထ အီ တဝ်း၊ “ဘော အာဆောလူ ဟဲ့ ဘဲန် ဒူအီ ဘျာန် ဂြုဝ်း ဇဝ်ဖြာ။” 13 ဝါယ် အန် တီ အာဆောလူ ဟဲ့ ဟွတ့် ဘျာန် ဂြုဝ်း ဇဝ်ဖြာ၊ အန် ဟာဝ် ဇမ် ဒူင် လှူ ဂေ တွိုန်။

14 ဂုန့် တဲ့ အာဆောလူ ဒီမွှတ် အန် ဂါယ် ဒဲစေန့် အန် တွိုန် တဝ်း၊ “အိုယ်၊ ဘာယ် တး နာ မှဝ်။း” ဂါယ် တွိုန် ဝီ တဝ်း၊ “ယာယ် ဟာဝ် ဟြေတ့် မာလုဝ်၊ ယာယ် ဘော နပ် အာဝ် ဟူ ယိုဝ်၊ ယာယ် မိူဝ် ဘော ဝီ ဟာဝ် ဇမ် ဒူင် ကွယ် အာဆာမူအေန်။”

15 ဂုန့် တဲ့ အာဆောလူ တွိုန် ပီ ဝီ တဝ်း၊ “ကာလာင် ဒီ အုဝ်၊ မာဆေ ပီ ခဲ အာဆာမူအေန် ဒီ ဘာယ်။း”

16 အာဆောလူ ဝီ ကာလာင် ဒီ ဂုန့် တဲ့ အန် တွိုန် တဝ်း၊ “အာဆာမူအေန် ကာလာင် တဲး ယာယ် နပ် ဆီချာ၊ အီ ဟဲ့ ဟွတ့် ယိုဝ် မာလုဝ် တွိုန်။” လွင် ဒီ အိုပ် အန် မာန် မိူင် ပီ ကာလာင် အာဆာမူအေန် တွိုန်၊ အန် ယီ တူ ခဲ။

17 ပန် တီ အာဆာမူအေန် တွိုန် ဘော ဒဲ့ ကာဇု ဒူအီ အီဆာရေလ ဒွန် အီ၊ တဲး ဂေ တး ဒူင် ကွယ် ဇဝ်ဖြာ ခဲင် မိူင် မီဇာဖာ တွိုန်။ 18 အန် ဘော ကာလာင် ဒီ ဒူအီ အီဆာရေလ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် တဝ်း၊ ‘အုဝ် ဟဲ့ တဲး ဒူအီ အီဆာရေလ လေး ခဲင် မိူင် အဲဂိုပ်၊ တး ဒီ နီ။ အုဝ် ဟဲ့ တဲး ဘေ လွတ် တ ဂေ အီ မိုဝ်း ပွုန်၊ အီ ခါနှာပ် ဘေ ဘူင် ဂါန် ကိူန်။’ 19 ဒေါ တီ နီ၊ ဘေ ယီ ဝီ ဝဲန် အီ မုး ဇဝ်ဖြာ ဘေ၊ အီ ဟဲ့ စွယ် တဲး ဘေ ပွုန် ဒုက်၊ ပွုန် ညှာပ် ဒွန် မျုဝ်။ ဘေ ဟဲ့ ကာလာင် တဝ်း၊ ‘ယေ မှာန့် ခုန်ဒီခမ်၊ တဲး အန် အိုပ် ယေ။’ ကူပ် န့ ပါယ် တီ ဘေ လုဝ် ဝီ ကြိုပ် ဇဝ်ဖြာ၊ တဲး ဘေ တး ဒီ အန် ခြိုဝ် မှဝ် ခြိုဝ် အန်၊ တဲး ဇဝ်ဖြာ ရဝ်း အီ ဒီ အိုပ် ဘေ။”

20 ပန် တီ အာဆာမူအေန် ဘော တဲး ဒူအီ ဒွန် မျုဝ် ဒွန် ခြိုဝ် တး ကွယ် ချြီ့ အန်။ ဟဲ့ ဟွတ့်၊ ဒူအီ အာဘေန်ယာမ် ဘဲန် ဒူအီ ပဲ့ ဟဲ့ ရဝ်း ဇဝ်ဖြာ။ 21 အန် တဲး ဒူအီ ခြိုဝ် အာဘေန်ယာမ် တွိုန် တး ဘဲန် န့ကြိုဝ်း ဘဲန် န့ကြိုဝ်း။ န့ ဘော မုး န့ကြိုဝ်း အာမာတာရီ ပဲ့ ဟဲ့ ရဝ်း အန် ဇဝ်။ ခဲင် န့ကြိုဝ်း တီ န့ ဝီ မုး အာဆောလူ အီ မုး ဂွန် အာကီဆာ တွိုန်၊ အီ ပီ ရဝ်း အန်။ ဂေ ဝီ ဟြေတ့် အန်၊ ယီ တူ ယိုဝ် အန်။ 22 ဂေ ပီ ဝီ ဒီမွှတ် ဇဝ်ဖြာ တဝ်း၊ “အီ မုး ဂွန် အီမာယ် ဝီ တီ၊ အန် ဟဲ့ တး ဒီ နီ။း”

ဟဲ့ ဟွတ့်၊ ဇဝ်ဖြာ ဝီ တဝ်း၊ “အန် ချြီင် အန် ဒူင် ကွယ် ကြုဝ် ဂေ။”

23 ဂေ ဘော ကာဘ့လဲပ် ဟာဝ် ဒဲ့ တး အာဆောလူ။ ဒေါ တး ကွယ် အန် ကာတဲ ဒူအီ ကိူန် တွိုန်၊ အန် စာ လွှိုမ် ဂေ ဒွန် အီ။ ဂေ ဘောကာဂ့လျီတ် ကာရမ် ခဲ့ ပုင် ယ အန်။ 24 အာဆာမူအေန် ဘော ကာလာင် ဒီ ဂေ ဒူအီ ကိူန် တဝ်း၊ “တဲး ဘေ ယွတ်၊ ဒူအီ ပဲ့ ဟဲ့ ရဝ်း ဇဝ်ဖြာ ဒွါ ဒီ ဘေ။ ကာတဲ ဘေ ဒူအီ ကိူန် နီ၊ အာဝ် မိုဝ်း အီ ပီ အန် ခေါ အူ ဝီ။” ခဲ့ ကွယ် ဒူအီ ဘောကာဂ့လျီတ်၊ ဂေ ဘော ကာဖြူမ် ဒီ ဒတ် တာင် တဝ်း၊ “တဲး ခုန်ဒီခမ် ယေ ဒါခိုယ် ဆေဆေ။”

25 ဟဲ့ ဟွတ့်၊ အာဆာမူအေန် ဘော ဝီ ကာလာင် ဒီ ဂေ လွင် ပီ ဒီ ပါယ် ခုန်ဒီခမ် ဒီ အိုပ် ဂေ၊ တဲး ဂေ ကော နပ် ဆီချာ ဒွန် အီ လွင် အန် တီ။ အန် ဘော ဒဲမ် ဟပ် တူတ့် ဒွန် မျုဝ် ခဲင် ဘပ်၊ အုန် နာ အာတ့် ဇဝ်ဖြာ။ ဝါယ် အန် တီ အန် ဘော စ်ု ဂေ၊ တဲး ဂေ ဝီ ဝေန့် ဒီ ကာင် ဒူင် ကွယ် ဂေ ဒွန် အီ။

26 အာဆောလူ မိူဝ် ဝေန့် ဒီ ကာင် အန် ခဲင် မိူင် ဂီဘီယာ တွိုန်။ ဇဝ်ဖြာ ဘော ဝီ မ့ပြာယ် နဝ်း ဒူအီ အီ ပ့လူမ် ခ၊ အီ မိုဝ်း ဟဲန့်၊ တဲး ဂေ ဘဲန် ဒါ အီ အီ ကွယ် ဆေဆေ ရိုမ် ဒူပ် အန်။ 27 အီ မုး ဂေ အီ တူ မွှိုမ် မင် အီ၊ ဂေ ယီ လာယ် ကာလာင် တဝ်း၊ “ဒူအီ ဝီ နီ၊ အန် ဒီ ပါယ် မှဝ် ဒီ ချွတ် အေ။း” ခုဝ်၊ ဂေ တူ မိုဝ်း ဒီ အာပ် လက်ဆွင် မာဆေ ဒီ ခုန်ဒီခမ် ကာမာယ် ဂေ။ ဂေ မိူဝ် တူ ရုဝ်ဆေ အန်။ အာဆောလူ ယီ တူ ထူမ် ဂြုဝ်း ဂေ။