1 ဝါယ် အန် တီ န့ မိုဝ်း ဒူအီ အမ်မူန် အူ ဝီ၊ အန် စိူဝ် အာနာဟာဆာ။ ဘော အန် ဘော ဒါ ဆိုက် အန် တး ချ နာ ရေတ့် မိူင် ယာဘေတ် ခဲင် ကာဒါယ် မိူင် ဂီလေအာတ် တွိုန်။ ဂေ ဝီ ဘ်ု မိူင် ယာဘေတ် တီ၊ ကွဲ့ တဲး အီ ပွိုန် ဒီ လိုပ်၊ ပွိုန် ဒီ လေး။ ဂေ ဒူအီ ခဲင် မိူင် ကာလာင် ဒီ အာနာဟာဆာ တွိုန် တဝ်း၊ “တဲး အေ လာယ် ကာဆဲန့်။ ဆေ မဲ တူ ကာဂုဝ်း ဒီ ယေ၊ ယေ ဒီ တဲး မဲ အိုပ် ယေ။”

2 အာနာဟာဆာ အီ မုး ဒူအီ အမ်မူန် တွိုန်၊ အန် ဝီ တဝ်း ဒီ ဂေ၊ “ဆေ ဘေ ဒီ တဲး အုဝ် အိုပ် ဘေ၊ ခဲ့ ကွယ် ဒူအီ အီဆာရေလ၊ ဘေ ဒီ ခမ် တဲး အုဝ် ဂွယ့် လေး ငါယ် ဘေ ဘ့လာက် အာအး ဒွန် အီ၊ တဲး ဆာရေ ဘေ ဘော စှိုမ်။”

3 အန် ဟဲ့ ဟွတ့် တဝ်း ပါယ် တီ၊ ဂေ အီ မုး ဒါ တာင် ခဲင် မိူင် ယာဘေတ် တွိုန် ဘော ဝီ တဝ်း ဒီ အန်၊ “ယေ မှာန့် ဒီ ဘ်ု တဲး န့ နုဝ့် ဘူ ဆီငဲ၊ တဲး ယေ ပွိုန် ဒီ စ်ု ဒါလာမ် ဟာဝ် ဒီ မိူင် အီဆာရေလ ဒွန် ပ့လုဝ့်။ ပန် တီ ဆေ အာဝ် ဟူ မိုဝ်း အာဆေ အီ ဒီ တး စွယ် တဲး ယေ လွတ်၊ ယေ ဒီ အာပ် ဒုဝ် ယေ ဒီ မဲ။”

4 ဒါလာမ် ဂေ တွိုန် ဘော ဟာဝ် ဇမ် ဒီ မိူင် ဂီဘီယာ အီ မုး ဒူင် ကွယ် အာဆောလူ တွိုန်။ ဂေ ဘော ကာလာင် ဂြုဝ်း တွိုန် တဲး အီ နပ်။ ဂေ ဒူအီ ဒွန် အီ ဘော ကာဖြူမ် ဒီ ယာမ် တာင် တာင်။ 5 ဒေါ အန် တီ အာဆောလူ ဒူပ် မက် အန်၊ တး ဒီ ဒူင် နာ အန်။ အာဆောလူ ဘော ဒီမွှတ် တဝ်း၊ “ဒူအီ ဂေ နီ ယာမ် ကူပ် မာဆေ။း” ဂေ ဘော ကာလာင် တဲး အန် နပ် ဂြုဝ်း ပီ တဝ်း ဒူအီ အီ တး ခဲင် မိူင် ယာဘေတ် တွိုန်။

6 ဒေါ ယိုဝ် အာဆောလူ ဂြုဝ်း တီ၊ နဝ်း ဖွိုမ် ဇဝ်ဖြာ အီ မိုဝ်း ပွုန် တာင် ဘော တး ပ့လိုက် ကာဆဝ် အန်။ အန် မိူဝ် ဟဲ့ ရူ ကာဆဝ်။ 7 အန် ဘော ငဝ်း မက် အန် အူ ဂူ၊ ကာဒဲပ် ဘဲန် ဒီဂ်ု ဒီဂ်ု၊ ဒွါ ဒီ ဒါလာမ် ဂေ တွိုန်၊ တဲး ဂေ ဟာဝ် ကာလယ့် ခဲင် မိူင် ဒူအီ အီဆာရေလ ဒွန် ပ့လုဝ့်၊ တဲး ဂေ ကာလာင် တဝ်း၊ “အာဆေ တူ လေး ဒူပ် ဒီ ပန် အာဆောလူ ဂါယ် အာဆာမူအေန်၊ မက် အန် လုဝ် ခမ် ဒီ ဘူင် ပါယ် နီ။” ဂေ ဒွန် အီ ဘော ယုဝ် ကာဆဝ် ဇဝ်ဖြာ။ ဂေ ဘော လာယ် ဖြူမ် ဒွန် အီ၊ တဝ်း ဒီ ကာဂုဝ်း၊ ဝီ ဘဲန် အူ နဝ်း။ 8 အာဆောလူ ဘော ဒဲမ် ဇာရာင် ဒူအီ အီ ဒီ ကာဂုဝ်း ဒီ မိူင် ဖေရေဆိက် တွိုန်။ န့ မိုဝ်း ဒူအီ အီဆာရေလ အူယ် ဆဲန် ဝီ။ ဘော ဒူအီ အာယူဒါ မိုဝ်း အူယ် မှိုန့် ဝီ။

9 ဂေ ဘော ကာလာင် ဒီ ဒါလာမ် ဂေ တွိုန် တဝ်း၊ “တဲး ဘေ ကာလာင် ဒီ ဒူအီ အီ ကွယ် ခဲင် မိူင် ယာဘေတ်ဂီလေအာတ် တွိုန် တဝ်း၊ ‘ခဲညှာ ဆောဒါတ် ဟီ ဂဲ၊ န့ ဒီ မိုဝ်း ဒူအီ တး ချွတ် ဘေ။’” ဒါလာမ် ဂေ တွိုန် ဘော ဝီ တး ကာလာင် ဒီ ဂေ ဒူအီ ခဲင် မိူင် ယာဘေတ် တွိုန်၊ တဲး ဂေ ဒွန် အီ ဝီ ခူယ်။ 10 ပန် တီ ဒူအီ မိူင် ယာဘေတ် ဘော ကာလာင် ဒီ အာနာဟာဆာ အီ မုး ဒူအီ အမ်မူန် တွိုန် တဝ်း၊ “ခဲညှာ ယေ ဒီ တး ဂူမ် မဲ၊ တဲး မဲ ပွိုန် ဒီ ဘူင် ခဲ့ လဝ့် နဝ်း မဲ။”

11 ပါ ခဲညှာ ဆိန့်ဝး စေဝ်၊ အာဆောလူ ဘော ကာယဝ်း ဒူအီ အန် ဘဲန် အူယ် ဖိုင်။ ဂေ ဘော လိုပ် ဟာဝ် ခဲင် ဒူင် ချ ရန်ဆူ ဂေ တွိုန်။ ဂေ ဘော ကာဂုဝ်း ဒီ ဒူအီ အမ်မူန်။ ဆောဒါတ် ဘော ဂဲ မိူဝ်၊ ဂေ ဟဲ့ ဟွတ့် ပဲ တူတ့်။ ဒူအီ အမ်မူန်၊ ဂေ အီ ဆီ ဂိတ် တွိုန်၊ ဂေ ဘော ကာယဝ်း ဟာဝ် အူ ဝီ အူ ဘ့လာက်။ အာ ဝီ မိူဝ် အာဝ် မိုဝ်း အီ ပွိုန် ဒီ ကာဒူပ်။

12 ဝါယ် အန် တီ ခဲ့ ကွယ် ဒူအီ အီဆာရေလ၊ ဒွန် အီ ဘော ကာဖြူမ် ဒီ ကာလာင် ဒီ အာဆာမူအေန် တဝ်း၊ “အာဆေ ဟဲ့ ဒွိုမ် တဝ်း၊ ‘ယေ တူ လုဝ် အာဆောလူ အိုပ် ယေ။း’ ဂေ အီ ကာလာင် ပါယ် တီ ဒဲ့ ဂေ တး ဒီ နီ၊ တဲး ယေ ပွိုန် ဒီ ငဝ်း ယမ် ဘော ဂေ။”

13 အာဆောလူ ဝီ တဝ်း၊ “အာတိုဝ် နီ အာဝ် ပွိုန် ငဝ်း ဒူအီ ခေါ အူ ဝီ၊ တဲး အန် ယမ်။ အာတိုဝ် နီ၊ န့ မုး ဆီငဲ ချွတ် ဇဝ်ဖြာ ဒူအီ အီဆာရေလ။”

14 အာဆာမူအေန် ဘော ကာလာင် ဒီ ဒူအီ ဂေ တွိုန် တဝ်း၊ “တဲး ဘေ ဝီ ဝေန့် ဒီ မိူင် ဂီလဂါ တွိုန်၊ တဲး ဒွန် အီ ဝီ ဂူမ် ခုန်ဒီခမ် ကာမာယ် အေ နီ။” 15 အန် ဟဲ့ ဟွတ့် တဝ်း ပါယ် တီ၊ ဒူအီ ဂေ တွိုန် ဒွန် အီ ဘော ဟာဝ် ဒီ မိူင် ဂီလဂါ။ ဂေ ဘော အိူပ် မျုက် အာဆောလူ၊ တဝ်း အန် မုး ခုန်ဒီခမ် ဂေ၊ တဲး ဘော ဇဝ်ဖြာ ထူမ် ဂြုဝ်း ဂေ တီ။ ဂေ ဘော လှူ ပီ ဒီ လှူ အီ ကွယ် ကာဇု ဒီ အာတ့် ဇဝ်ဖြာ၊ ဝီ ဟူမ် ရိုမ်။ အာဆောလူ ဘော ဂေ ဒူအီ အီဆာရေလ ဒွန် အီ ဘော ဘူင် ဘ့လွယ် ဘျုဝ် ဒါခိုယ် ဒီ တီ။