1 အာဆာမူအေန် ကာလာင် ဂြုဝ်း ဒီ ဒူအီ အီဆာရေလ။ အန် တဝ်း၊ “ဘေ ယွတ်၊ အုဝ် ဟဲ့ ထူမ် ဂြုဝ်း ပီ ကာလာင် ဘေ ဒီ အုဝ်။ အုဝ် ဟဲ့ တဲး ဘေ မိုဝ်း ခုန်ဒီခမ် အီ အိုပ် ဘေ။ 2 ဒေါ တီ နီ ခုန်ဒီခမ် တီ ဒီ ဘဲန် အီ ယဲတ့် ဘေ။ အီ ယီ မုး အုဝ်၊ အုဝ် ဟဲ့ ကတ်။ ဟိုက် ဂိန့် အုဝ် မိူဝ် ဟဲ့ လုယ်။ ဂွန် အုဝ် မိူဝ် ကွယ် ရိုမ် ဒူပ် ဘေ။ အုဝ် ဟဲ့ ဘဲန် အီ ယဲတ့် ဘေ ဆိန့် ဒီတဲတ် အုဝ် ကော ဇမ် အာတိုဝ် နီ။ 3 အုဝ် ယီ ဆီ ကွယ် ဒီ နီ။ ဘော ဇဝ်ဖြာ ဘော ခုန်ဒီခမ် ပီ ဒွိုမ် ဖဝ်း အုဝ် နာမန်၊ ဂါယ် မိူဝ် ဟဲ့ ကွယ် ဒီ နီ၊ ထူမ် ဂြုဝ်း ဘေ။ တဲး ဘေ ကာလာင် ဒီ အုဝ်။ အုဝ် ဟဲ့ ဒွိုမ် ဒိုဝ်း မက် အာဆေ။း အုဝ် ဟဲ့ ဒွိုမ် ဒိုဝ်း မာလာ အာဆေ။း အုဝ် ဟဲ့ ဒွိုမ် ပီလွှက့် ဒီ အာဆေ။း အုဝ် ဟဲ့ ဒွိုမ် ခါနှာပ် ဒီ အာဆေ။း အုဝ် ဟဲ့ ဒွိုမ် ပြာ ဒီ ဒိုဝ်း ရွိုန် ဒီ အာဆေ၊ အီ မုး ရွိုန် အီ တူ တဲး အုဝ် ယိုဝ် နာ မှာန်။း ဆေ အုဝ် ဟဲ့ ဘူင် ဇိုဝ် တီ ဒီ ဘေ၊ အုဝ် ဒီ ဝီ တဲး ဝိဝ် တူတ့်။”

4 အန် ဟဲ့ ဟွတ့် တဝ်း ပါယ် တီ ဂေ ဝီ တဝ်း ဒီ အန်၊ “မဲ ဆာရာ၊ မဲ တူ ဒွိုမ် ပီလွှက့် ဒီ ယေ။ မဲ တူ ဒွိုမ် ခါနှာပ် ဒီ ယေ။ မဲ တူ ဒိုဝ်း ကြုဝ် အာဆေ ဘော တူ ဒွိုမ် ပြာ ဒီ ကိုဝ်း ရွိုန် ခေါ အီ စဲက်။”

5 အန် ပီ ဝီ တဝ်း၊ “ဇဝ်ဖြာ ဘော ခုန်ဒီခမ် ပီ ဒွိုမ် ဖဝ်း အုဝ် နာမန် ဟဲ့ ဘဲန် ဆက်ဆေ လွင် အန် တီ။ ဘေ တူ မိုဝ်း မာဆေ ပီ ဒီ ဖျာက် အုဝ်။” ပန် တီ ဂေ ပီ ဝီ တဝ်း၊ “ဟဲ့ မုး။”

6 ပန် တီ အာဆာမူအေန် ဝီ တဝ်း၊ “အန် ဇဝ် အီ မုး ဇဝ်ဖြာ အီ ရဝ်း အာမုဝ်ဆဲ ဂါယ် အာရူန် တွိုန်၊ အန် ဟဲ့ တဲး ဂုန့် ဒင် ဘေ လေး ခဲင် မိူင် အဲဂိုပ် တွိုန်။ 7 ဒေါ တီ နီ တဲး ဘေ ကွယ် ဒီ နီ ဘော ထူမ် ဆီချာ။ အုဝ် ဒီ ဝီ ခဲ ဒီ ဘေ ပီ ဒီ ပါယ် ဇဝ်ဖြာ ဒီ ဘေ ဘော ဒီ ဂုန့် ဒင် ဘေ။ န့ မုး နာ မှာန် ဘော နာ မွှိုမ် အာမ် ကာဆဝ် ဒွန် မျုဝ်။

8 ဝါယ် ဟဲ့ ဇမ် အာယာကူပ် ခဲင် မိူင် အဲဂိုပ်၊ ဒါ ဒါ ဘေ တွိုန် ဟဲ့ ဆာခိုဝ် မှာန့် ကာဆဝ် ဒီ ဇဝ်ဖြာ။ ဇဝ်ဖြာ ဘော စ်ု အာမုဝ်ဆဲ ဂါယ် အာရူန်၊ တဲး ဂါယ် တိုယ် ဒါ ဒါ ဘေ လေး ခဲင် မိူင် အဲဂိုပ်၊ ဝီ တး ဇမ် ခဲင် မိူင် နီ။

9 မာလဲ၊ ဂေ ဟဲ့ ဝီ ပိဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ အန် ဇဝ် ဟဲ့ တဲး ရန်ဆူ ကာဂုဝ်း ဒီ ဂေ။ ဟဲ့ ဟွတ့်၊ အန် ဝီ အာပ် ဂေ ဒီ အာဆီဆာလ၊ အီ မုး ဒါ ဘုဝ် တာင် ခဲင် မိူင် ပီ အိုပ် ခုန်ဒီခမ် အာဟာစော တွိုန်။ ဟဲ့ အာပ် ဘော ဒီ ဒူအီ ဖီလီထီ ဘော ဒီ ခုန်ဒီခမ် အီ အိုပ် ဒူအီ မုဝ်အာပ် တွိုန်။

10 ပန် တီ ဂေ ဘော ဆာခိုဝ် ဒီ ဇဝ်ဖြာ၊ ဘော တဝ်း၊ ‘ယေ ဟဲ့ ဝဲန် မဲ ဇဝ်၊ ဟဲ့ ဝီ ကြိုပ် ဇဝ် ဘာလ ဘော ဇဝ် အေဆာထာရိတ်။ အာတိုဝ် နီ ယေ ယီ မှာန့် တဝ်း၊ တဲး မဲ ဇဝ်ဖြာ စွယ် ယေ၊ တဲး ယေ လွတ် တ ရန်ဆူ ယေ။ ပန် တီ ယေ ဒီ ဝီ ကြိုပ် မီ မဲ ဇဝ်ဖြာ။’ 11 ဂေ ဟဲ့ ဟွတ့် တဝ်း ပါယ် တီ ဇဝ်ဖြာ ဘော စ်ု အာယေရုပ်ဘာလ ဘော အာဘေဒါန်၊ အာယေဖာဒါ ဘော အာဆာမူအေန်၊ တဲး ဂေ စွယ် ဘေ၊ တဲး ဘေ လွတ် တ ရန်ဆူ ဘေ အီ ဟဲ့ ရူပ် ဘေ။ ဘေ ကော ပွိုန် ဒီ လွတ် ဆီချာ၊ ကော ပွိုန် ဒီ ကွယ် ဒါခိုယ်။

12 ဝါယ် အန် တီ ဒေါ ယိုဝ် ဘေ အာနာဟာဆာ အီ မုး ခုန်ဒီခမ် ဒူအီ အမ်မူန် တး ကာဂုဝ်း ဒီ ဘေ၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဟဲ့ ပီ ခုန်ဒီခမ် ဘေ။ ဘေ ယီ ဝီ တဝ်း ဒီ အုဝ်၊ ‘အာဝ် မုး၊ ယေ ဆီ ပွိုန် ခုန်ဒီခမ်၊ တဲး အန် ဘဲန် အီ အိုပ် ယေ။’ 13 ဒေါ တီ နီ၊ တဲး ဘေ ယွတ်၊ ခုန်ဒီခမ် ပဲ့ ဟဲ့ မှာန့် ဘေ တီ၊ ဇဝ်ဖြာ ဟဲ့ ဒွါ၊ တဲး အန် အိုပ် ဘေ။ 14 ဆေ ဘေ ဘော ရုဝ်ဆေ ဇဝ်ဖြာ၊ တူ ဝဲန် ဂြုဝ်း အန်၊ ဆေ ဘေ ကြိုပ် မီ အန် ဇဝ်၊ န့ ဟဲ့ မုး။ ပါယ် တီ ဘော ဘေ ဘော ခုန်ဒီခမ် အီ အိုပ် ဘေ ဒီ ဒူပ် ဆီချာ ဇဝ်ဖြာ။ 15 ဆေ ဘေ ယီ တူ ထူမ်၊ ယီ တူ ဒိုဝ်း ဂြုဝ်း ဇဝ်ဖြာ၊ ဘေ ဟီ လှိုဝ် ဒါရာ ဇဝ်ဖြာ၊ ဇဝ်ဖြာ မိူဝ် တူ စွယ် ဘေ။ ဇဝ်ဖြာ ဒီ ဘူင် ဒီ ဘေ တဲး န့ ပီ ပဲ့ ဟဲ့ ဒွိုမ် ဘူင် အန် ဒီ ဒါ ဒါ ဘေ တွိုန်။

16 ဒေါ တီ နီ၊ ဘေ ကွယ် နှိမ် နှိမ်။ ဘ်ု ဘေ ယွတ်၊ ဇဝ်ဖြာ ဒီ ဘူင် အီ မွှိုမ် အာမ်၊ တဲး ဘေ ယိုဝ်။ 17 အာတိုဝ် နီ မုး ဆီငဲ ဆုဝ့် ခဝ်ချုင်။ အုဝ် ဒီ ဆာခိုဝ် ဒီ ဇဝ်ဖြာ။ အန် ဇဝ် ဒီ တဲး ဂ့လာယ် စုဝ်း။ န့ ဒီ မိုဝ်း ဘော ဟမ် ကာနမ်။ ဒေါ အန် တီ ဘေ ဒီ နပ် မှာပ် ပဲ့ ဟဲ့ ဘူင် ဘေ ဒီ ဇဝ်ဖြာ ဒေါ မှာန့် ကာဆဝ် ဘေ ခုန်ဒီခမ်။”

18 ဝါယ် အန် တီ အာဆာမူအေန် ဘော ဆာခိုဝ် ဒီ ဇဝ်ဖြာ။ ဆီငဲ တီ ဇဝ်ဖြာ ဘော တဲး ဂ့လာယ် စုဝ်း ဘော မိုဝ်း ဘော ဟမ် ကာနမ်။ ဒူအီ ဂေ တွိုန် ဘောကာဂ့လျီတ် ဘော အာမ် ဘော ယုဝ် ကာဆဝ် ဇဝ်ဖြာ ဘော အာဆာမူအေန်။

19 ဂေ ဘောကာဂ့လျီတ် ဘော ဝီ ကာဖြူမ် ဒီ တဝ်း ဒီ အာဆာမူအေန်၊ “မှာန့် မဲ ဆာခိုဝ် ဒါင် ယေ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ ကွဲ့ တဲး ယေ ကာဒုး ဒီ ယမ်။ ယေ ဟဲ့ ဘူင် မှာပ် ကိူန်။ ဘော ပဲ့ ဟဲ့ မှာန့် ယေ ခုန်ဒီခမ် ဟဲ့ ဝဲ ဘဲန် မှာပ် န့ ပွါ ဒီ ယေ။”

20 အာဆာမူအေန် ဝီ တဝ်း ဒီ ဂေ၊ “ဘေ ကွဲ့ ယုဝ်။ ဘေ ပီ ဘော ဟဲ့ ဘူင် မှာပ် တီ၊ ဘေ ကွဲ့ ဝး လဲ န့တေန့် ဇဝ်ဖြာ၊ ဒိုဝ်း ခဲ့ ကွယ် နဝ်း ဖွိုမ် ဘေ၊ ဝီ ဆာခိုဝ် ဒီ ဇဝ်ဖြာ။ 21 ဘေ ကွဲ့ ဝး န့တေန့် ဇဝ်ဖြာ။ ကွဲ့ ဝီ ကြိုပ် အာရိုပ် အီ တူ မိုဝ်း ဒီ လွင် ဒီ ဒါင်။ ဂေ တူ ပွိုန် စွယ် ဘေ၊ တူ ပွိုန် ချွတ် ဘေ။ ဂေ တူ မိုဝ်း ပွုန် မာဆေ။ 22 ဇဝ်ဖြာ ဆီ တဲး ဒွန် အီ နပ် နဝ်း ဒီဟာင် အန်။ ခုဝ်၊ အန် မိူဝ် တူ ဘ့လေး တူ ဝဲန် ဘေ အာမျုဝ် ဒူအီ ပီ ရဝ်း အန်။ န့ ဟဲ့ လဝ့် နဝ်း ဇဝ်ဖြာ။ အန် မိူဝ် ဟဲ့ ရဝ်း တဲး ဘေ ဘဲန် ဒူအီ ပီ အိုပ် အန်။ 23 အီ မုး အုဝ်၊ ဆေ အုဝ် တူ ဆာခိုဝ် ဆေဆေ ဒါင် ဘေ ဒီ ဇဝ်ဖြာ၊ န့ ဒီ ဘဲန် မှာပ် ဒီ အုဝ်။ ခုဝ်၊ အုဝ် ဒီ ဆာခိုဝ် ဒါင် ဘေ ဆေဆေ။ အုဝ် ဒီ ဘော မာနုဝ် ဘေ ဆေဆေ လွင် နာ ဘွတ် နာ မွှိုမ်၊ တဲး ဘေ နပ် ဆီချာ။ 24 ဘေ လုဝ် ရုဝ်ဆေ ဇဝ်ဖြာ။ ဘေ လုဝ် ဒိုဝ်း တူတ့် တူတ့် ခဲ့ ကွယ် နဝ်း ဖွိုမ် ဘေ၊ ဒူပ် မီ အန် ဇဝ် တီ ဆေဆေ။ ဘေ လုဝ် ဇေန့်ဇာ လွင် အီ မွှိုမ် အာမ် ကာဆဝ် ပဲ့ ဟဲ့ ဘူင် ဇဝ်ဖြာ ဒီ ဘေ။ 25 ဆေ ဘေ ယီ နဲ့ ဘူင် အီ တူ မွှိုမ်၊ ဘော ဘေ ဘော ခုန်ဒီခမ် ဘေ တီ ဒီ လိုဝ် စှိုမ် တူတ့်။”