1 အာဆောလူ တွိုန် ဘဲန် ခုန်ဒီခမ် ဒေါ အာဆာက် အန် အူယ် ဂိုဝ် ဆီနမ်။ အန် အိုပ် ဒူအီ အီဆာရေလ အာဒါ ဖွုန် ဂိုဝ် ဒီ အာ ဆီနမ်။

2 အန် ဘော ရဝ်း ဒူအီ အီဆာရေလ အူယ် ဟြဲန့် ဝီ။ ဟဲ့ ဟွတ့်၊ အာဒါ အာ ဟြဲန့် ဝီ၊ အန် တဲး ဂေ ကွယ် ဒူပ် အန် ဒီ မိူင် မိက်မာတ် ဒီ နွန် ဘေဒါအေန် တွိုန်။ အီ မုး အာဒါ အူ ဟြဲန့်၊ အန် တဲး ဂေ ကွယ် ဒူပ် အာယုဝ်နာထာန် ခဲင် မိူင် ဂီဘီယာ၊ ဒူင် မုး ကာဒါယ် ဒူအီ အာဘေန်ယာမ် ဂေ တွိုန်။ ဂေ အီ ဆီ ဂိတ် အန် ဘော စ်ု ဂေ ဝီ ဝေန့် ဒူင် ကွယ် ဂေ ဒွန် အီ။

3 အာယုဝ်နာထာန် တွိုန် ဘော ကာဂုဝ်း၊ ဘော ပဲ ဒူအီ ဖီလီထီ၊ ဘော ပျာတ့် ဝဲန် ဒါ ဆိုက် ဂေ အီ ကွယ် ဒီ မိူင် ဂီဘာ တွိုန်။ ဒူအီ ဖီလီထီ မိူဝ် ဘော ယိုဝ် လွင် အာတီ။ အာဆောလူ ဘော စ်ု အီ ဘုတ် ဝဝ်၊ တဲး ဒူအီ ဘော မိူင် ကော နပ်။ အန် တဝ်း၊ “တဲး ဒူအီ ဟဲဘြဲ ဂေ ဒွန် အီ ယိုဝ်။” 4 ပါယ် တီ ဒူအီ အီဆာရေလ ဒွန် အီ ဘော ယိုဝ် လွင် အာဆောလူ ဟဲ့ ကာဂုဝ်း၊ ဟဲ့ ပဲ ဒူအီ ဖီလီထီ တွိုန်။ ဒူအီ ဖီလီထီ ဂေ ဘော ဇွင့် ဒူအီ အီဆာရေလ။ ဂေ ဒူအီ အီဆာရေလ ဒွန် အီ ဘော ဒူပ် အာဆောလူ၊ ဟာဝ် ကာဇု ဒီ မိူင် ဂီလဂါ တွိုန်။

5 ဒူအီ ဖီလီထီ ဝီ တး ကာဇု၊ တဝ်း ဒီ ဝီ ကာဂုဝ်း ဒီ ဒူအီ အီဆာရေလ။ ဂေ မိုဝ်း လက်လဝ် အူယ် ဟြဲန့် လှာင် ဘော ဒူအီ အီ ပဝ့် လက်လဝ် တီ ဒဝ် ဟြဲန့် ဝီ။ ဒါ ဆိုက် ဂေ မိူဝ် ကိူန်။ န့ ကော နှဲန် ကာဟာတ့် ဒီ ခူပ် နမ်မုက်ဆာရာ ဒီ ကိူန်။ ဂေ မိူဝ် တး ချ ဒပ် ဂေ ဒီ မိူင် မိက်မာတ်၊ အီ မုး နာ လေး ဆီငဲ မိူင် ဘေတ်အာဝေန် တွိုန်။ 6 ဂေ ဒူအီ အီဆာရေလ ဘော နပ် လွင် ဒီ ဇမ် ဂေ ဒုက် တာင်။ ဂေ ဟဲ့ နပ်၊ န့ ဒီ ညှာပ် ကာဆဝ် ဒီ ဂေ။ အီ ဒီ ခါနှာပ် ဂေ။ ပန် တီ ဂေ ဘော ဟြေတ့် ဒီ ချြီင် ဂေ ခဲင် ကာဒဝ် မာဝ်၊ ခဲင် ကာအူင့် နွန်၊ ကာဒဲ့ ဒါအာင်၊ ကာဒဲ့ နွန်၊ ဘော ဟြေတ့် ဒူင် မိုဝ်း ဒီ ဂ့လုဝ့် ခဲင် ကာဒဝ် ကာဒါယ်။ 7 ဒူအီ ဟဲဘြဲ မင် အီ ဘော ကာလုဝ်း အိုမ် ဘ့လဲင် ယောဒါန်၊ ဝီ ဟာဝ် ဒီ မိူင် ဂတ် ဂါယ် မိူင် ဂီလေအာတ်။ အီ မုး အာဆောလူ၊ အန် ယီ ဆီ ကွယ် ဒီ မိူင် ဂီလဂါ တွိုန်။ ဂေ ဒူအီ ဘောကာဂ့လျီတ် ဒူပ် အန်။ မာလဲ၊ ဂေ ယီ ယုဝ် ကာဆဝ်။ 8 အာဆောလူ ဝီ ကွယ် ဘ်ု ဘူ ဆီငဲ ခဲ့ ပီ ဒွိုမ် တဝ်း အာဆာမူအေန် ဒီ အန်။ ဘော ဇမ် အာခြာဝ် အန်၊ အာဆာမူအေန် ယီ ညှမ် တး ဇမ် ခဲင် မိူင် ဂီလဂါ တီ။ ဒါ ဆိုက် အန် ဘော စုး ဒီ တဝ် ဟာဝ် အူ ဝီ အူ ဘ့လာက်။ 9 အာဆောလူ ဘော တဝ်း၊ “ဒိုဝ်း ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်၊ ဒွါ ဒီ အုဝ်။” ဟဲ့ ဟွတ့် အန် ဘော လှူ ပီ လှူ အီ ဒုဝ့် ဒီ ငဝ် တီ။ 10 အန် ဟဲ့ ဟွတ့် လှူ ပီ လှူ အီ ဒုဝ့် ဒီ ငဝ် တီ၊ အာဆာမူအေန် ဘော တး။ အာဆောလူ ဘော ဟာဝ် ဘ်ု ဒီ ရွုး အန်။

11 အာဆာမူအေန် ဘော ဒီမွှတ် အန် တဝ်း၊ “မဲ ဟဲ့ ဘူင် မာဆေ။း” အာဆောလူ တဝ်း၊ “ကူပ် တူ တး မဲ ဆီငဲ တဝ်း မဲ ဒီ တး၊ ဒါ ဆိုက် ဟဲ့ တဝ် ကာယဝ်း ဒီ အုဝ်၊ ဟာဝ် အူ ဝီ အူ ဘ့လာက်။ ဒူအီ ဖီလီထီ ဟဲ့ ဝီ တး ကာဇု တူတ့် ဒီ မိူင် မိက်မာတ် တွိုန်။ 12 ဒေါ ယိုဝ် အုဝ် ဇိုဝ် တီ၊ အုဝ် ဝီ ကာဖာ ခဲင် နဝ်း အုဝ်၊ ‘ဒူအီ ဖီလီထီ ဒီ တး ကာဂုဝ်း ဒီ ယေ ဒီ မိူင် ဂီလဂါ နီ။ အုဝ် ယီ ညှမ် ပွိုန် ဒီ ဂန်ဒုဝ် ဇဝ်ဖြာ။ ကူပ် န့ ပါယ် တီ အုဝ် ကော နပ် ခဲင် နဝ်း၊ အုဝ် လုဝ် လှူ ပီ လှူ အီ ဒုဝ့် ဒီ ငဝ် တီ။’”

13 အာဆာမူအေန် ဝီ တဝ်း ဒီ အာဆောလူ၊ “မဲ ဟဲ့ ဟွတ့် ဘူင် နာ မိူက်။ မဲ တူ ဒူပ် ဒါရာ ဇဝ်ဖြာ၊ ခဲ့ ပီ ဒမ် အုန် ဇဝ်ဖြာ ဒီ မဲ။ ဆေ မဲ ဘော ဘူင် တဲး န့ လဝ့် နဝ်း ဇဝ်ဖြာ၊ ဇဝ်ဖြာ ဒီ တဲး ဘော မဲ အိုပ် ဒူအီ အီဆာရေလ ဆေဆေ နာ အာတ့် နီ ဟာဝ်။ 14 ဒေါ တီ နီ၊ န့ အာဝ် ဟူ ဘဲန် ပါယ် တီ။ ကူပ် တူ ထူမ် မဲ ဂြုဝ်း ပီ စ်ု ဇဝ်ဖြာ ဒီ မဲ၊ ဇဝ်ဖြာ ဟဲ့ ဟွတ့် ဝီ ဟြေတ့် ဒူအီ ပေါ အူ ဝီ အီ လဝ့် နဝ်း အန်၊ အီ ပီ အိုင် အန်၊ တဲး အန် ယဲတ့် ဒူအီ ပီ အိုပ် အန်။” 15 အာဆာမူအေန် ဘော လေး တ မိူင် ဂီလဂါ၊ ဝီ ဟုဝ့် ဒီ မိူင် ဂီဘီယာ အီ မုး ခဲင် ကာဒါယ် ဒူအီ အာဘေန်ယာမ် တွိုန်။ အာဆောလူ ဘော တိး ဒူအီ အီ ကွယ် ဒူပ် အန်။ န့ မိုဝ်း ဒူအီ ဒဝ် မာယဝ်း ဝီ။

16 ဝါယ် အန် တီ အာဆောလူ ဂါယ် အာယုဝ်နာထာန် အီ မုး ဂွန် အန် ဘော ဂေ ဒူအီ အီ ကွယ် ဒူပ် ဂါယ် တွိုန်၊ ဂေ ကွယ် ဒီ မိူင် ဂီဘာ အီ မုး ခဲင် ကာဒါယ် ဒူအီ အာဘေန်ယာမ် တွိုန်။ ဒူအီ ဖီလီထီ ဘော ချ ဒီ မိူင် မိက်မာတ် တွိုန်။ 17 န့ ဘော မိုဝ်း ဒါ ဆိုက် ဂေ ဒူအီ ဖီလီထီ အူယ် ဖိုင်၊ ဂေ လေး ဟာဝ် တ ဒပ် ဂေ။ အူ ဖိုင် ဘော ဟာဝ် ဒူပ် န့တေန့် ဟာဝ် ဒီ မိူင် အောဖာရ အီ မုး ခဲင် မိူင် တာင် ဆူအာန် တွိုန်။ 18 ပေါ အူ ဖိုင် ဘော ဟာဝ် ဒူပ် န့တေန့် မိူင် ဘေတ်ဟုဝ်ရုန်။ ပေါ အူ ဖိုင် ဝီ ဟာဝ် ဒူပ် န့တေန့် ကာအုန် ကာဒါယ် အီ မုး ခဲင် ဒီလ ဇေဘုဝ်ယိမ် နာ ပြဲ ကာဟဝ်း တွိုန်။

19 ဂေ ဒူအီ ဖီလီထီ ဟဲ့ ဒွိုမ် တဝ်း၊ “အေ တူ တဲး အာဆေ နပ် ပီ နပ် အေ။ ယုဝ် ဒူအီ ဟဲဘြဲ ဂေ ဝီ ဘူင် ဘ့လာ လျီး ဘော အာတိုမ် ရာင် ဂေ။ ကူပ် တဝ်း ဂေ ပါယ် တီ ခဲင် မိူင် အီဆာရေလ၊ အူ ဝီ မိူဝ် တူ မိုဝ်း အီ နပ် ဒီ စိုမ်။” 20 ခုဝ်၊ ဆေ ဒူအီ အီဆာရေလ ဆီ တဲး ဘ့လာ ထဲ ဂေ၊ န့လုဝ့် ဘော မိုယ် ဂေ န့ဝါတ့် ဂေ ဝီ လမ်၊ ဂေ ဒွန် အီ လုဝ် လူင် ဒူင် ကွယ် ဒူအီ ဖီလီထီ တီ။ 21 ဂေ ယီ မှာန့် ရွိုန် ကိူန် ဒေါ စိုမ် ဂေ။ ဆေ န့ မုး ဘ့လာ ထဲ ဂေ န့လုဝ့်၊ ဂေ မှာန့် ရွိုန် ဇဲတ် အူယ် ထေ။ အီ မုး မိုယ် ဂေ န့ဝါတ့် ဂေ မှာန့် အူ ထေ။ ဆေ ဝီ မ့ပြာယ် န့ရိး ဂေ ဘော မှာန့် ခဲ့ တီ။

22 ခုဝ် အန် တီ၊ ဒေါ ကာဂုဝ်း ဂေ ဒူအီ အီဆာရေလ၊ ဂေ အာဝ် ဟူ ဝီ မိုဝ်း ဒီ ဂူင့် ဘ့လာ လျီး ဂေ မာပွါ့ လာင်။ မီ အာဆောလူ ဂါယ် အာယုဝ်နာထာန် တွိုန် ဝီ မိုဝ်း ဒီ ဂူင့် မာပွါ့ လာင်။

23 ဒေါ အန် တီ ဒူအီ ဖီလီထီ ဘော တိုယ် ဒါ ဆိုက် ဂေ မင် အီ ဟာဝ် ဒူပ် န့တေန့် အီ ဟာဝ် နာ မိူင် မိက်မာတ် တွိုန်။