1 ပါယ် တီ ဇဝ်ဖြာ ဟဲ့ စွယ် အာဒါဝိတ် တဲး အန် ပဲ ရန်ဆူ အန်၊ တဲး အန် ဘော လွတ် တ အာဆောလူ ဂေ ဒူအီ အန်။ ဒေါ အန် တီ အန် ဝီ တဝ်း မှုဝ်၊ အိူပ် ဇဝ်ဖြာ။ အန် တဝ်း၊

2 “ဇဝ်ဖြာ ဟဲ့ ပီ ဒါအာင် တာင် အီ ရဲ အုဝ်။ အန် ပီ ရဲင် တာင် ဒီ အုဝ်။ အန် ဟဲ့ တဲး အုဝ် လွတ် ဒီ ရန်ဆူ အုဝ်။

3 ဇဝ်ဖြာ ပီ ကြိုပ် အုဝ် ဟဲ့ ပီ ဒါအာင် မာဝ် ပီ ဘိုင် အုဝ်။ အန် ပီ မင် ဂွင့် အီ ဂွင့် အီ ရဲ အုဝ်။ အန် မုး အီ ချွတ် အုဝ်။ အန် ပီ ဒူင် ဒီ ပွိုန် တဝ် ချြီင် အုဝ်။ ဇဝ်ဖြာ ဟဲ့ ချွတ် ဒိုဝ်း လေး အုဝ် တ အီ တူ မွှိုမ် ဒွန် မျုဝ်။

4 အုဝ် ဒီ ကာလာင် ဒီ မဲ ဇဝ်ဖြာ၊ ဟဲ့ ကာအာပ် အုဝ် အိူပ် မဲ ဇဝ်။ မဲ ဟဲ့ ချွတ် အုဝ် ဒီ ရန်ဆူ အုဝ် ဘောကာဂ့လျီတ်။

5 ဂေ ဒူအီ အီ ဆီ ငဝ်း ယမ် အုဝ်၊ ဂေ ဟဲ့ ဒွိုမ် ကွယ် ရူပ် အုဝ်။ န့ ဟဲ့ ပီ အိုမ် ဒီ မ့ပုန် အုဝ်။ အီ တူ မွှိုမ်၊ အီ ဆီ တဲး အုဝ် စှိုမ်၊ ဂေ ဟဲ့ ကိူန် ပီ အိုမ် အီ ဇဲဝ် ကာဆဝ် ဟဲ့ ဇုး အုဝ်။

6 ဂေ အီ ကွယ် ခဲင် မိူင် မာရာန မိူဝ် ဟဲ့ ရူပ် အုဝ်။ န့ ပီ ဂေ တဝ်း ဒီ ပက် အုဝ်။ အုဝ် မိူဝ် ဟဲ့ ရိန် ဒီ ယမ်၊ ဟဲ့ ပီ ယွတ့် ဂေ ဒူအီ ယမ် ဟဲ့ ကိူန်၊ ဟဲ့ ခြွတ် အုဝ်။

7 ဒေါ ဒုက် ညှာပ် ဒီ နဝ်း အုဝ် တီ၊ အုဝ် ဘော ဒဲ့ ဟြေတ့် ဇဝ်ဖြာ၊ အုဝ် ဘော ဒတ် ဒဲ့ ဇဝ်ဖြာ အီ မုး ဒါ ကာညာ အုဝ်။ အန် ဇဝ် အီ ကွယ် ခဲင် ဟုဝ် အန်၊ အန် ဘော ယိုဝ် ဂြုဝ်း အုဝ်။ ဂြုဝ်း ပီ ဒဲ့ အုဝ် တီ ဘော လိုဝ်း ဒီ အန်။

8 ဒေါ အန် တီ မာအိမ် ဘော ယေန့်၊ ကာဒါယ် ဘော ဒီယုး ဒီယေန့် ကာဆဝ်။ ဒင် ဘ့လေန့် ဂေ တွိုန် မိူဝ် ဘော ဒီယုး ဒီယေန့်။ န့ ရ်ု ကူပ် ရူ အန် ဇဝ်။

9 န့ ဘော ပီ ဒက် ငဝ် လေး ခဲင် ဂုင်မုး အန် ဇဝ်။ ငဝ် ဘော လေး တး ခဲင် မူတ့် အန် ဇဝ်။ န့ကိုဝ် ငဝ် မိူဝ် ဘော ကုး ခဲင် မူတ့် အန် ဇဝ်။

10 အန် ဇဝ် ဘော တဲး ဂါင်ဟြာဝ် န့ ဝိုဝ်း၊ တဲး အန် ဇဝ် လူင်။ ခြိုမ် ပ့လဝ် အန် ဇဝ်၊ န့ ဘော ပီ န့အု ဝွင့်။

11 အန် ဇဝ် ဘော ပဝ့် ခေရုပ်၊ တဲး အန် ဘိုန့်။ အန် ဇဝ် ဘော တး ဒါခိုယ် ဒူပ် ခုန်။

12 အန် ဇဝ် ဘော တဲး အီ အပ် ဝွင့် ကွယ် ကာဘိတ် အန်၊ တဲး ဘော န့အု ဝွင့် ဘဲန် အီ ဂွင့် ရူပ် အန်။

13 ဘော အာရူင် ဘ့လာင် အီ ကွယ် ရိုမ် ဒူပ် အန် ဇဝ်၊ န့ ပီ န့ကိုဝ် ငဝ်။

14 ဇဝ်ဖြာ ဘော တဲး ဟမ် ကာနမ် လေး ခဲင် ဂါင်ဟြာဝ်၊ န့ ပီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ တဲး ဂြုဝ်း အန် လေး။

15 အန် ဇဝ် ဘန့် ဘ့လာ အ အန်၊ တဲး ရန်ဆူ ကာစှူတ့် ဟာဝ် တဝ်။ အန် ဇဝ် တဲး န့ မိုဝ်း ဘော ပ့လ မ့ပ့လေတ့် တဲး ဂေ စှိုမ်။

16 ဇဝ်ဖြာ ဘော အေး အီ ဘော ဟိုဝ်း လေး ဖွိုမ် အန် ခဲင် ဂုင်မုး အန်။ ပန် တီ အီ ခြိုမ် ဘိူန် အိုမ် နမ်မုက်ဆာရာ ဘော လေး၊ ဘော မ့ဘ့လး၊ တဲး ဒင် ကာဒါယ် လိုဝ်း။

17 အန် ဇဝ် အီ ကွယ် နာ ဒဲင်၊ အန် ဟဲ့ ဆူင့် လူင် ဒဲ အန်၊ တဲး အန် ပါ အုဝ်။ အန် ဇဝ် ဘော ဒိုဝ်း လေး အုဝ် ခဲင် ဒုက် အီ ပီ အိုမ် တာင် တီ။

18 အန် ဇဝ် ဘော ချွတ် အုဝ်၊ တဲး အုဝ် လွတ် ဒီ ရန်ဆူ အုဝ် အီ မိုဝ်း ပ့လူမ် တာင်။ အန် ဘော ချွတ် အုဝ် ဒီ ဂေ အီ ဇွင့် အုဝ်။ ဂေ အီ မိုဝ်း ပ့လူမ် ကိူန် လွှိုမ် အုဝ်၊ ဂေ ယီ တူ ပဲ အုဝ်။

19 ဂေ တး ကာတုန့် အုဝ် ဒေါ မုး ဆီငဲ ဇမ် အုဝ် ဒုက် အီ ညှာပ် တွိုန်။ မာလဲ၊ ဇဝ်ဖြာ ဟဲ့ ဘဲန် အီ စွယ် အုဝ်၊ အီ ပီ ဘိုင် အုဝ်။

20 အန် ဇဝ် ဘော ဒိုဝ်း တိုယ် အုဝ်၊ တဲး အုဝ် ဇမ် ဒူင် ကာဝဝ်း ဆီချာ။ အန် ဇဝ် ဘော ချွတ် အုဝ် ကူပ် မိုဝ်း အန် နဝ်း ဒါခိုယ်၊ နဝ်း ရွက့် အုဝ်။”

21 “ဇဝ်ဖြာ ဒွါ အာဂျိုဝ် ခဲ့ ကာဒါန် နဝ်း ဆိူဝ် နဝ်း မှာန် အုဝ်။ အန် ဇဝ် ဝီ ဝျီ့ ဒွါ ဒီ အုဝ် တဲး န့ ဒူပ် နဝ်း လုယ် အုဝ်။

22 အန် ဘူင် ဇိုဝ် တီ ဒွန် မျုဝ် ခုဝ်၊ အုဝ် ဟဲ့ ဒူပ် ဇဝ်ဖြာ ဆေဆေ။ အုဝ် တူ ဘူင် နာ စာဝ်၊ တူ ဝး ဝဲန် ဇဝ်ဖြာ ပီ ကြိုပ် အုဝ် တီ။

23 ဒါရာ ဇဝ်ဖြာ ဒွန် ညွင့် အုဝ် ဟဲ့ လှုဝ်း ဆေဆေ။ ခဲ့ ပီ စ်ု အန် ဇဝ် အီ ဘူင်၊ အုဝ် တူ ဝဲန် ဒေါ မှဝ်။

24 အာဝ် မိုဝ်း အာဆေ အီ ပွိုန် ဖျာက် အုဝ် ဒီ အာတ့် အန် ဇဝ်။ အုဝ် ဝဲန် အီ တူ မွှိုမ်၊ အုဝ် တူ ဘူင်။

25 ခုဝ်၊ ဇဝ်ဖြာ ဝီ ဒွါ အာဂျိုဝ် ဒီ အုဝ် တဲး န့ ကာဒါန် နဝ်း ဆိူဝ် အုဝ်၊ တဲး န့ ဘော ကာဒါန် နဝ်း ဆီငါ ဘွတ် ခဲ့ ပီ ယိုဝ် အန် ဇဝ် ဒီ အုဝ်။”

26 “အာဆေ မိုဝ်း နဝ်း မှာန်၊ မဲ ဇဝ် မိူဝ် ဒီ ဘူင် နာ မှာန် နာ မွှိုမ် ဒီ အန်။ အာဆေ ဟူ မိုဝ်း ပီ ဒီ ပွိုန် အီ ဒီ ဖျာက်၊ အီ မိုဝ်း ဇေ့ဇုင်၊ မဲ ဇဝ်ဖြာ မိူဝ် တူ ဖျာက် အန်။

27 အာဆေ အီ မိုဝ်း နဝ်း ဆီငါ၊ မဲ ဇဝ်ဖြာ မိူဝ် ဒီ ဒွါ အီ ဆီငါ ဒီ အန်။ အာဆေ ဘူင် ကာဘး ဒီ မဲ၊ မဲ ဇဝ် ဒီ ဝီ ဘဲန် ရန်ဆူ အန်။

28 ဂေ အီ တူ ပီခိုက် နဝ်း ဂေ မဲ ဇဝ်ဖြာ မိူဝ် ဒီ ချွတ် ဂေ။ ဂေ အီ မိုဝ်း နဝ်း စာ နဝ်း ပီခိုက်၊ မဲ ဇဝ် မိူဝ် ဒီ ဝီ တဲး ဂေ စုဝ်း တျီမ်။

29 မဲ ဇဝ်ဖြာ၊ မဲ ပီ ငဝ် ရာင် ဒီ အုဝ်။ ဒေါ အပ် ဝွင့် ဒီ အုဝ်၊ မဲ ဇဝ်ဖြာ ဟဲ့ ဘူင် တဲး န့ ဝီ ဘ့လာင်။

30 ဆေ မဲ ဇဝ်ဖြာ စွယ် အုဝ်၊ အုဝ် ဘော ပွိုန် ဒီ ကာဘ့လဲပ် ကာဂုဝ်း ဒီ ဒါ ဆိုက် ဘော ဖိုင်။ ဆေ မဲ ဇဝ်ဖြာ ကွယ် ရိုမ် ဒူပ် အုဝ်၊ အုဝ် ဘော ပွိုန် ဒီ ဒဲန် ဟာဝ် ကာလုဝ်း ရဲင် တာင်။

31 န့တေန့် မဲ ဇဝ်ဖြာ န့ ဇေ့ဇုင် ဆေဆေ။ ဂြုဝ်း မဲ ဇဝ်ဖြာ ဟဲ့ မှာန်၊ ဟဲ့ မွှိုမ်။ ဂေ အီ တး ဘိုင် အန် ဇဝ်၊ အန် ဇဝ် ဘဲန် အီ ရဲ အီ ဂွင့် ဂေ ဒွန် အီ။

32 ဒဲင် ဇဝ်ဖြာ နီ အာဝ် မိုဝ်း ဇဝ်ဖြာ ပေါ အူ ကာဒင်။ ဒဲင် ဇဝ်ဖြာ နီ အာဝ် မိုဝ်း အီ ပီ ဒါအာင် မာဝ် ပီ ပွိုန် ဘိုင် အုဝ်။

33 ဇဝ်ဖြာ နီ တဲး န့ ဘဲန် ပ့လူမ် ဒီ အုဝ်၊ တဲး အုဝ် ပွိုန် ဒီ ဒူပ် န့တေန့် အီ ဆီချာ။

34 အန် ဇဝ် ဘော တဲး ပ့လဝ် အုဝ် ဟာဝ် ဟဲ၊ ကော ပီ ပ့လဝ် မာဇ ဒုဝ် မာ။ အန် ဇဝ် ဘော တဲး အုဝ် ကွယ် ဒူင် စာ။

35 အန် ဇဝ် ဘော မာနုဝ် တဲး ဒဲ အုဝ် နပ် ဒီ ကာဂုဝ်း၊ ဘော တဲး အုဝ် ပွိုန် ဒီ ဝိတ့် အ ဘွင့်။

36 မဲ ဇဝ် ဒွါ ဘော မင် ဂွင့်၊ တဲး န့ ချွတ် အုဝ်။ မဲ ဟဲ့ ကာဝေ အုဝ်၊ ဝီ စုဝ့် အုဝ် ဘဲန် ဒါ တာင်။

37 မဲ ဇဝ် ဟဲ့ ဘူင် န့တေန့် အီ ကာဝဝ်း၊ တဲး အုဝ် ပွိုန် ဒီ ဟာဝ် ဆီချာ။ မဲ ဇဝ် တူ တဲး ပ့လဝ် အုဝ် ဒီပ့လာတ်။

38 အုဝ် ဘော ခုင်ခြး ဒူပ် ရန်ဆူ အုဝ်၊ ဘော ပျာတ့် ဝဲန် ဂေ။ ဒေါ ညှမ် ဒိုဝ်း ဝဲန် တူတ့် အုဝ် ဒီ ဂေ၊ အုဝ် မိူဝ် ညှမ် ဝီ တး။

39 အုဝ် ဟဲ့ ပျာတ့် ဝဲန် ဂေ ဘော ဘ့လုး တဲး ဂေ ကော ကာလှုး၊ ကွဲ့ တဲး ဂေ ဆီ ပွိုန် ဒီ ဝီ ယိတ့်၊ တဲး အုဝ် အိုပ် တူတ့် ဂေ။

40 ခုဝ်၊ မဲ ဇဝ် တဲး ဘဲန် ပ့လူမ် ဒီ အုဝ်၊ တဲး အုဝ် နပ် ဒီ ကာဂုဝ်း ဒီ ရန်ဆူ တဲး န့ ပီ မဲ ဟဲ့ ဒိုဝ်း ဆဲ့ ပက် ရိတ် ဒီ ညွယ် အုဝ်။ ဂေ အီ တး တဝ်း ဒီ ကာဂုဝ်း ဒီ အုဝ်၊ မဲ ဇဝ် ဟဲ့ တဲး ဂေ ကေး စှိုမ် တူတ့် ဒီ အာတ့် အုဝ်။

41 မဲ ဇဝ် ဟဲ့ တဲး ရန်ဆူ အုဝ် ဝီ မာငး ဝိဝ် လေး တဝ် ဒီ အုဝ်။ အုဝ် ဟဲ့ ပျာတ့် ဝဲန် ဂေ ဘောကာဂ့လျီတ် အီ ဇွင့် အုဝ်။

42 ဂေ ဟြေတ့် အီ ဒီ စွယ် ဂေ၊ ယီ တူ ယိုဝ် အာဆေ။ ဂေ ဘော ဒဲ့ ဇဝ်ဖြာ။ အန် ယီ တူ ဝျီ့ ဂြုဝ်း ဂေ။

43 အုဝ် ဘော မး ဂေ၊ တဲး ဂေ ကာမုန် ပီ ကာပုး ဒဲင် ကာဒါယ်။ အုဝ် ဘော ညဲတ့် ဂေ ကော ပီ ညုဝ့် ည အီ ကွယ် ဒူပ် န့တေန့်၊ အီ ကာစှူတ့် ဒွန် ဘ့လာက်။

44 မဲ ဇဝ် ဘော စွယ် အုဝ်၊ တဲး အုဝ် လွတ် ဒီ ဒူအီ အီ ကာခဲန့် ကာဂုဝ်း ဒီ အုဝ်။ မဲ ဇဝ် မိူဝ် ဟဲ့ ဘ်ု ရိတ် အုဝ်၊ တဲး အုဝ် ဝီ ဘဲန် ဒါ တာင် အီ ယဲတ့် ဖိုင် ဒူအီ ဘဲန် မျုဝ် ဘဲန် မျုဝ်။ ဘော ဒူအီ ပီ တူ ဒွိုမ် နပ် အုဝ်၊ မဲ ဟဲ့ တဲး ဂေ ဘဲန် မှာယ် အုဝ်။

45 ဘော ဒူအီ အာမျုဝ် ဟဝ် ဟဲ့ တး ဘိုင် အုဝ်။ ဆေ ဂေ ဘော ယိုဝ် ဂြုဝ်း အုဝ်၊ ဂေ ဘော ထူမ် ဒူပ် အူ ဇေန့်။

46 ဂေ ဘဲန် နဝ်း ဒီတဲတ်၊ ဒီယုး ဒီယေန့် ဒူင် ချြီင် ဂေ။

47 မဲ ဇဝ်ဖြာ အီ အိမ်၊ အုဝ် အိူပ် မဲ ဇဝ်ဖြာ အီ ပီ ဒါအာင် မာဝ် ပီ ဘိုင် အုဝ်။ အုဝ် ဘော အိူပ် မျုက် မဲ ဇဝ်ဖြာ၊ အီ ပီ ဒါအာင် မာဝ် အီ ဟဲ့ ချွတ် အုဝ်။

48 မဲ ဇဝ်ဖြာ ဝီ ဘူင် ဝျီ့ ခဲ့ ပီ ဘူင် အီ ဟဝ် ဒီ အုဝ်။ မဲ ဘော တဲး ဒူအီ အာမျုဝ် ဟဝ် ကွယ် ခြိုမ် အုဝ်။

49 မဲ ဇဝ် တဲး အုဝ် လွတ် ဒီ ရန်ဆူ အုဝ်။ မဲ ဇဝ် ဟဲ့ မျုက် ဟဲ့ စုဝ့် အုဝ် တဲး အုဝ် အိုပ် ဂေ အီ ကာဂုဝ်း ဒီ အုဝ်။ မဲ ဇဝ် ဟဲ့ စွယ် ဒိုဝ်း လေး အုဝ် ဒီ ဂေ အီ တူ မွှိုမ်။

50 ကူပ် န့ ပါယ် တီ အုဝ် အိူပ် မျုက် ဂုင် ဂေဇူ မဲ ဇဝ်ဖြာ၊ တဲး ဘော ဒူအီ အာမျုဝ် ဟဝ် နပ် လွင် အန် တီ။

51 မဲ ဇဝ်၊ မဲ ဟဲ့ စွယ် ခုန်ဒီခမ် ပီ ဒါင် မဲ၊ တဲး အန် ပဲ ကိူန် ရန်ဆူ အန်။ မဲ ဇဝ် ဘော ဂေဇူ ဘော ရွက့် အုဝ် အီ မုး ဝီ ပဲ့ ဟဲ့ ဖဝ်း မဲ နာမန် ဒီ ဂိန့်။ မဲ ရွက့် အုဝ် အာဒါဝိတ် ဘော ခြိုဝ် အုဝ် ဒွန် စုဝ် ဒွန် ဘာန်။” ခဲ့ တီ အာဒါဝိတ် ဟဲ့ အိူပ် ဇဝ်ဖြာ။