1 ဒေါ မုး စုဝ် ဘာန် ခုန်ဒီခမ် အာဒါဝိတ် တွိုန်၊ န့ မိုဝ်း အာခြာဝ် အေတ့် ပီ ဒီ ဟူမ် အာဒါ အူယ် ဆီနမ်။ ဒေါ အန် တီ အာဒါဝိတ် ဘော ဒီမွှတ် ဇဝ်ဖြာ။ ဇဝ်ဖြာ ဝီ တဝ်း ဒီ အန်၊ “န့ မုး အာဆောလူ ဂေ ဝေါဝဲ အန်။ ဂေ မိုဝ်း မှာပ် ဒေါ ငဝ်း ဂေ ဒီ အီ။ ကူပ် ငဝ်း ယမ် ဂေ ဒူအီ ကီပွင်၊ ဘေ လုဝ် ခမ် ဒီ အေတ့် ဘူမ်။”

2 ဝါယ် အန် တီ ခုန်ဒီခမ် ဘော ဒဲ့ ဒူအီ ကီပွင် တး၊ ဘော လာယ် ကာမွုန် ဒီ ဂေ။ ဒူအီ ကီပွင် ယီ တူ မုး ဒူအီ အာမျုဝ် အီဆာရေလ။ ဂေ မုး ဒူအီ အာမျုဝ် အာမုဝ်ရိတ် အီ ဆီ ဂိတ် ဂေ တွိုန်။ ဂေ ဒူအီ အီဆာရေလ ဟဲ့ ဒွါ ကာဒိက် ဆတ်ဇာ ဒီ ဂေ။ ဘော အာဆောလူ ယီ ဒီငန့် ဂျုဝ်ဂျာ ဒီ တဲး ဒူအီ အီဆာရေလ ဘော ဒူအီ အာယူဒါ အိုင် အန်။ ခုဝ်၊ အန် ဟဲ့ တဝ်း ဒီ ငဝ်း ဝဲန် တူတ့် ဂေ ဒူအီ ကီပွင်။ 3 ဒေါ တး ဂေ၊ ခုန်ဒီခမ် အာဒါဝိတ် ဘော ကာလာင် ဒီ ဒူအီ ကီပွင် တဝ်း၊ “ဘေ ဆီ တဲး အုဝ် ဘူင် မာဆေ၊ တဲး န့ ဂဝ်း ဝဲန် မှာပ် ပဲ့ ဟဲ့ ဘူင် ယေ ဒီ ဘေ၊ တဲး ဘေ ဝီ မွင့်ကာရာ ဒွါ ဒီ ယေ အီ ဟဲ့ ပွိုန် ခါဂုန် ပီ ဒွါ ဇဝ်ဖြာ။း”

4 ဒူအီ ကီပွင် ဂေ ဘော တဝ်း၊ “အာဝ် ကာအာပ် ယေ မှာန့် ရွိုန် ဂေ ခြိဝ် ဒီ အာဆောလူ ဂေ ဘီနွင် ဝေါဝဲ အန်။ အာဝ် ကာအာပ် ယေ ငဝ်း ယမ် ဒူအီ အီဆာရေလ ခေါ အူ ဝီ။” ဟဲ့ ဟွတ့်၊ ခုန်ဒီခမ် ဝီ တဝ်း၊ “မာဆေ ပီ ဆီ မှာန့် ဘေ တဲး အုဝ် ဘူင်။း”

5 ဂေ မိူဝ် ဝီ တဝ်း ဒီ ခုန်ဒီခမ်၊ “ဒူအီ အီ ဘူင် နာ စီစိဝ် ဒီ ယေ တွိုန်၊ အီ တဝ်း ဒီ ပျာတ့် ယေ ကွဲ့ ဟူ တဲး ယေ ပွိုန် ဒီ ကွယ် ကာတဲ ဒူအီ အီဆာရေလ၊ 6 မှာန့် တဲး မဲ အာပ် ဂွန် အန် ဘူ ဝီ ဒီ ယေ။ ယေ ဒီ ဒိုဝ်း ဂေ တီ ဝီ ငဝ်း၊ ဝီ ဟွယ် အုန် ဒုဝ် ဂေ ဒီ မိူင် ဂီဘီယာ တွိုန်၊ အီ မုး ဒူင် ဒွိုမ် ကွယ် အာဆောလူ။ အာဆောလူ ယီ မုး ဒူအီ ပဲ့ ဟဲ့ ဒွိုမ် ရဝ်း ဇဝ်ဖြာ။ ယေ ဒီ ဘူင် ပါယ် တီ တဲး ဘော ဇဝ်ဖြာ ယိုဝ်။” ဂေ ဟဲ့ ဟွတ့် တဝ်း ပါယ် တီ ခုန်ဒီခမ် အာဒါဝိတ် ဝီ တဝ်း၊ “အုဝ် ဒီ ဒွါ ဂေ ဒီ ဘေ။”

7 မာလဲ၊ ခုန်ဒီခမ် ယီ လှယ့် အာဆာက် အာမေဖီဘောဆေတ် အီ မုး ဂွန် အာယုဝ်နာထာန်၊ အာယုဝ်နာထာန် ဝီ မုး ဂွန် အာဆောလူ။ ခုဝ်၊ အာဒါဝိတ် ဂါယ် အာယုဝ်နာထာန် ဟဲ့ လာယ် ဒွါ ကာဒိက် ဆတ်ဇာ ဒီ ဇဝ်ဖြာ။ 8 ကူပ် န့ ပါယ် တီ ခုန်ဒီခမ် ဝီ ဒိုဝ်း အာမောနီ ဂါယ် အာမေဖီဘောဆေတ်၊ အီ မုး ဂွန် အာဆောလူ ဂါယ် နာင် ရီဇာဘာ တွိုန်။ နာင် ရီဇာဘာ ယီ မုး ဂွန် အာအေယာ။ အာဒါဝိတ် ဒိုဝ်း ဘော ဂွန် နာင် မေရာပ် ဖန် ဝီ။ နာင် မေရာပ် ယီ မုး ဂွန် အီဘိုန့် အာဆောလူ။ ဂုန့် ဂေ ဖန် ဝီ တီ ယီ မုး အာဒါရေလ အီ မုး ဂွန် အာဘာစီ အီ မုး ဒူအီ အာမျုဝ် မေဟုဝ်လဆီ။ 9 အန် ဘော အာပ် ဘူ ဝီ တီ ဒီ ဒူအီ ကီပွင် ဂေ တွိုန်။ ဟဲ့ ဟွတ့်၊ ဂေ ဒူအီ ကီပွင် ဘော ငဝ်း ဂေ၊ ဝီ ဟွယ် ဒုဝ် ဂေ ဒဲင် နွန် အူ ပ့လုဝ့် တဲး ဇဝ်ဖြာ ယိုဝ်။ ဂေ ဘူ ဝီ တွိုန် ဘော ယမ် ကာဒူပ် အူ ဆီငဲ။ ဒေါ အန် တီ န့ မုး အာခြာဝ် ဆုဝ့် ငှုဝ်၊ ဆီငဲ ကာစုး အီ ဒီ ဆုဝ့် ဆီဂူင့်ရာ။

10 နာင် ရီဇာဘာ အီ မုး ဂွန် အာအေယာ တွိုန်၊ ဘော ဒိုဝ်း စာန် ဒ ဒဲင် မာဝ် တဲး အန် ပွိုန် ဒီ ကွယ် နာ ဒဲင်။ ဆိန့် ကာစုး ဂေ ဒီ ဆုဝ့် ငှုဝ် ကော ဇမ် အာခြာဝ် စုဝ်း ဂ့လာယ်။ အန် ဘော ဘ်ု ဒီ ယွတ်။ ကာတဲ ဆီငဲ အန် တူ တဲး မာဆိမ် ပွိုန် ဒီ ဇုဝ့် ဒုဝ် ဒူအီ ယမ် ဂေ တွိုန်။ ခဲင် မှိုဝ် အန် တူ တဲး မာဒုဝ် ပြဲ ပွိုန် ဒီ တး ဟူမ် ယင် ဂေ။ 11 အီ ဟဝ် ဘော ကာလာင် ဒီ အာဒါဝိတ် လွင် ပီ ဘူင် အီဘိုန့် တျီ့ အာဆောလူ အီ စိူဝ် နာင် ရီဇာဘာ အီ မုး ဂွန် အာအေယာ တွိုန်။ 12 အာဒါဝိတ် ဘော ဟာဝ် ဒိုဝ်း ကာအာင် အာဆောလူ ဘော ကာအာင် အာယုဝ်နာထာန် အီ မုး ဂွန် အာဆောလူ တွိုန်။ အန် ဒိုဝ်း ကာအာင် တီ ဒီ ဒူအီ ခဲင် မိူင် ယာဘေတ် အီ ကွယ် ခဲင် ကာဒါယ် မိူင် ဂီလေအာတ် တွိုန်။ ဂေ ဒူအီ ယာဘေတ် ဟဲ့ ဒွိုမ် ပြာ ဒီ ဒိုဝ်း တး ကာအာင် တီ ဒီ ဂ့လင် ခဲင် မိူင် ဘေတ်ဆန်။ ဒူင် တီ မုး ဒူင် ဟွယ် ဂေ ဒူအီ ဖီလီထီ ဒုဝ် ဂေ ဝါယ် ငဝ်း ယမ် ဂေ အာဆောလူ ဒီ နွန် ဂီလပေါ တွိုန်။ 13 အာဒါဝိတ် ဘော ဒိုဝ်း တး ကာအာင် အာဆောလူ ဘော ကာအာင် ဂွန် အန် အီ စိူဝ် အာယုဝ်နာထာန် တွိုန်။ ဟဲ့ ဟွတ့်၊ အန် ဘော ဒိုဝ်း ဘော ကာအာင် ဒူအီ ဟဝ် အီ ယမ်၊ အီ မုး ကာအာင် ပီ ညှမ် ဒိုဝ်း အုန် အီ။ 14 ဂေ ဘော ဒိုဝ်း ကာအာင် အာဆောလူ ဘော ကာအာင် အာယုဝ်နာထာန် အီ မုး ဂွန် အာဆောလူ တွိုန်၊ ဟာဝ် အုန် ခဲင် ဘာရေဝ် ဂုန့် အာဆောလူ အီ စိူဝ် အာကီဆာ။ ဘာရေဝ် တီ ကွယ် ဒီ မိူင် စေလ ခဲင် ကာဒါယ် ဒူအီ အာဘေန်ယာမ်။ ဂေ ဘော ဘူင် တူတ့် ဒွန် မျုဝ် ခဲ့ ပီ ဒမ် အုန် ခုန်ဒီခမ် အာဒါဝိတ်။ ဝါယ် အန် တီ ဇဝ်ဖြာ မိူဝ် ဝီ ထူမ် ဂြုဝ်း ပီ ဆာခိုဝ် ဂေ ဒါင် မာန် မိူင် ဂေ တွိုန်။

15 ဝါယ် တီ၊ ဒူအီ ဖီလီထီ ဝီ ကာဂုဝ်း ဒီ ဒူအီ အီဆာရေလ ပေါ အူ ဇေန့်။ အာဒါဝိတ် ဘော ဒါ ဆိုက် အန် ဘော ဟာဝ် ကာဂုဝ်း ဒီ ဒူအီ ဖီလီထီ ဂေ တွိုန်၊ တဲး အာဒါဝိတ် နုန် ဘော ဒီလှး ကာဆဝ်။

16 န့ ယီ မုး အာဆာဘီဘေနုတ် အီ မုး ဒူအီ အာမျုဝ် အာရာဖ တွိုန်။ အန် ဟဲ့ တာင် စာ ကာဆဝ်။ အန် ဘော ဒိုဝ်း ဒီ ဂူင့် ဘ့လာ လျီး အီ မိုဝ်း ကာဒဲ့ ဘွင့် ဒေန့် အီ စန် အူယ် မာယဝ်း ဆေခေန်။^a အန် ဘော ဂူင့် မာပွါ့ လာင် ကာမာယ်၊ တဝ်း ဒီ ငဝ်း ယမ် အာဒါဝိတ်။ 17 အာဖီဆေ အီ မုး ဂွန် နာင် စေရူယာ တွိုန်၊ အန် ဘော တး စွယ် အာဒါဝိတ် ဘော ကာဂုဝ်း ဒီ ဒူအီ တွိုန် ဘော ငဝ်း ယမ် အန်။ ပန် တီ ဂေ ဒါ ဆိုက် အာဒါဝိတ် ဘော တဝ်း ဒီ အန်၊ “ယေ တူ ဝီ တဲး မဲ ခုန်ဒီခမ် ဟာဝ် ကာဂုဝ်း ဒူပ် ယေ ဒေါ မှဝ်။ ယေ တူ ဆီ တဲး ဒူအီ အီ ပီ ဘ့လာင် ခဲင် မိူင် ဒူအီ အီဆာရေလ ယတ်။”

18 ဝါယ် တီ ပေါ အူ ဇေန့် ဂေ ပီ ဝီ ကာဂုဝ်း ဒီ ဒူအီ ဖီလီထီ ဒီ မိူင် ကောဘ တွိုန်။ ဒေါ အန် တီ အာဆီဘေခေ အီ မုး ဒူအီ အာမျုဝ် ဟူဆာ၊ အန် ဘော ငဝ်း ယမ် အာဆာဖ အီ မုး အာမျုဝ် အာရာဖ အူ ဝီ၊ အီ ဟဲ့ တာင် စာ ကာဆဝ် တွိုန်။

19 ဝါယ် တီ၊ ဂေ ဝီ လာယ် ကာဂုဝ်း ဒီ ဒူအီ ဖီလီထီ ဒီ မိူင် ကောဘ တွိုန် ပေါ အူ ဇေန့်။ အာအေဟာနန် အီ မုး ဂွန် အာယာအီရ အီ တး မိူင် ဘေတ်လဲမ်၊ အန် ဘော ငဝ်း ယမ် ဝါ အာကောလာတ် အီ မုး အာမျုဝ် ဒူအီ ကိတ်တီ၊ အီ ဂူင့် ဘ့လာ လျီး အီ မိုဝ်း ဂ့လွင့် တာင်၊ ကော ဒါန် ကာဘွင့် ဒဝ့် ဂ့လာင် တွိုန်။

20 ဝါယ် တီ ဂေ ပီ ဝီ ကာဂုဝ်း ဒီ မိူင် ဂါထ တွိုန်။ န့ မိုဝ်း ဒူအီ အူ ဝီ အီ တာင် စာ။ ကာနူ ဒဲ အန် အူ ဘ့လာက် န့ ကွယ် ဒဝ် ကာနူ။ ကာနူ ပ့လဝ် အန် အူ ဘ့လာက် န့ ကွယ် ဘော ဒဝ် ကာနူ။ ဆေ ဝီ လာယ် ကာဇု ဘော ပ့လဝ် ဘော ဒဲ၊ ဟဲ့ ဘဲန် အာ ဂိုဝ် ဒီ ဖွုန် ကာနူ။ ဘော အန် မုး ဒူအီ အာရာဖ တွိုန်။ 21 ဂေ ယီ ဆီ လာယ် ကာခဲန့် ဒီ ဒူအီ အီဆာရေလ။ န့ မုး အာယုဝ်နာထာန် အီ မုး ဂွန် အီကတ် အာဒါဝိတ် အီ စိူဝ် အာဆီမေအာတ် တွိုန်၊ အန် ဘော ငဝ်း ယမ် ဒူအီ တာင် စာ တီ။

22 ဂေ ဒူအီ အီ တာင် စာ ဖွုန် ဝီ တီ၊ ဂေ မုး ဒူအီ အာရာဖ အီ ကွယ် ဒီ မိူင် ဂါထ တွိုန်။ ဂေ ဘော ယမ် ဒီ အာဒါဝိတ် ဂေ ဒါ ဆိုက် အန်။