1 ဒေါ အန် တီ န့ မိုဝ်း ဒူအီ တူ မွှိုမ် အူ ဝီ။ အန် စိူဝ် အာဆေဘာ။ အန် မုး ဂွန် အာဘီခါရီ အီ မုး ဒူအီ ခြိုဝ် အာဘေန်ယာမ်။ အန် ဘော ဘုတ် ဝဝ် တဝ်း၊ “အိုယ် ဘေ ဒူအီ အီဆာရေလ၊ အေ အာဝ် ဟူ ဟာဝ် ဒူပ် အာဒါဝိတ်။ အေ တူ လာယ် ဘာ့ ဒီ ဂွန် အာယေဆေ။ အိုယ်၊ ဘေ ဒူအီ အီဆာရေလ ဘောကာဂ့လျီတ်၊ တဲး ဘေ ဒွန် အီ ဝီ ဝေန့် ဒူင် ကွယ် ကာင် ဘေ။”

2 ပန် တီ ဒူအီ အီဆာရေလ ဘော လေး ဒူင် ကွယ် အာဒါဝိတ်၊ အာဝ် ဟူ ဒူပ် အန်။ ဂေ ဝီ ဒူပ် အာဆေဘာ အီ မုး ဂွန် အာဘီခါရီ တွိုန်။ အီ မုး ဒူအီ အာယူဒါ၊ ဂေ ယီ ဒူပ် အာဒါဝိတ်၊ စုး ဒီ ဘ့လဲင် ယောဒါန် ကော ဇမ် ခဲင် မိူင် ယေရူဆာလဲမ်။

3 ခုန်ဒီခမ် အာဒါဝိတ် ဟဲ့ ဟွတ့် ဇမ် ဒူင် ကွယ် ဟုဝ် အန် ခဲင် မိူင် ယေရူဆာလဲမ်၊ အန် ဘော ဒိုဝ်း ဇိုင် နာင် ဂေ ဂိုဝ် ဝီ ပီ အုန် အန် တဲး ဂေ ဘဲန် အီ ဘ်ု ဟုဝ် တွိုန်။ အန် ဘော ခြွင့် အုန် ဂေ ခဲင် ကာင်။ အန် ဘော ဟျီင် လိုမ်လာ ဂေ၊ ယီ တူ ကွယ် ရိုမ် ဒူပ် ဂေ။ နာင် ဂေ တွိုန် ဘော ကွယ် ပီ ယာ ဆီပြး၊ ကော ဇမ် ပန် ဒီ ကတ် ယမ် ဂေ။

4 ပန် တီ ခုန်ဒီခမ် ဝီ တဝ်း ဒီ အာမာဆာ၊ “အူယ် ဆီငဲ မဲ လုဝ် ဟာဝ် စ်ု ဒူအီ အာယူဒါ တး ကာဇု တူတ့်။ အုဝ် လုဝ် ဘော မဲ ဝီ တး ဒီ နီ။” 5 ဟဲ့ ဟွတ့်၊ အာမာဆာ ဘော ဟာဝ် ဒဲ့ ဒူအီ အာယူဒါ လာယ် ကာဇု တူတ့်။ န့ ယီ ပွုန် ဆီငဲ ပီ ဒမ် ခုန်ဒီခမ် ဒီ ဂေ။

6 အာဒါဝိတ် ဝီ ကာလာင် ဒီ အာဖီဆေ တွိုန် တဝ်း၊ “ဒေါ တီ နီ၊ အာဆေဘာ အီ မုး ဂွန် အာဘီခါရီ တွိုန်၊ အန် ဝီ ဘူင် အီ တူ မွှိုမ် ဒီ အုဝ် လွှိုမ် အာဘာဆာလူမ် တွိုန်။ တဲး မဲ ဒဲ့ ဒူအီ ဒါ ကာညာ မဲ၊ တဲး ဘေ ခုင်ခြး ဒူပ် ဟာဝ် အန်။ ဆေ အာဝ် ပါယ် တီ၊ ယုဝ် အန် ပွိုန် ဒီ လိုပ် ချြီင် ခဲင် မိူင် အီ မိုဝ်း ရဲင်။ ကွဲ့ တဲး အန် လွတ် တ အေ။” 7 ပန် တီ ဂေ ဒူအီ အာယောဖ ဘော ဂေ ဒူအီ ခေရေဆီ ဘော ဂေ ဒူအီ ဘေလဆီ ဂေ အီ မိုဝ်း ပ့လူမ် မိုဝ်း ဟဲန့်၊ ဂေ ဘော လေး ခဲင် မိူင် ယေရူဆာလဲမ် ဘော ခုင်ခြး ဒူပ် ဒီ ပန် အာဆေဘာ အီ မုး ဂွန် အာဘီခါရီ တွိုန်။ 8 ဂေ ဘော တး ဇမ် ဒူင် မိုဝ်း မာဝ် တာင် ဒီ မိူင် ကီပွင် တွိုန်၊ အာမာဆာ တွိုန် ဘော တး ကာတုန့် ဂေ။ အာယောဖ ဟဲ့ စှိုပ် ခြိုင် ပီ တာ ဒါ ဆိုက်။ အန် ဘော စှိုပ် ဆဲ့ ဒီ ညွယ် အန်၊ မိုဝ်း ဘော အာတိုမ် အီ ကွယ် ခဲင် ဘြာမ် အန် ပဲ့ ဟဲ့ ပက် ဒိုက် အန် ဒီ ညွယ် အန်။ ဒေါ ဟာဝ် အန်၊ အန် တဲး အာတိုမ် အန် ဘော စုဝ်း။

9 အာယောဖ ဘော ဒီမွှတ် အာမာဆာ တဝ်း၊ “အိုယ် မဲ ဝါ၊ မဲ ဟဲ့ ကွယ် ဒါခိုယ်။း” အာယောဖ ဘော တာ ဒဲ အန် ဘ့လာက် အာအး ပါ ဒီမုဝ်း ဒီ ကုင်ကာပ် အာမာဆာ တဲး အန် ပွိုန် ဒီ အုး အာမာဆာ တွိုန်။ 10 အာမာဆာ ယီ တူ ဆာဒိက် အာတိုမ် ပီ ဂူင့် အာယောဖ ဒီ ဒဲ အန် ဘ့လာက် အာဂ။ အာယောဖ ဘော ဆတ် ဝတ့် အာမာဆာ၊ တဲး ညွင့် ဝတ့် အန် ဘော လေး စုဝ်း ဒဲင် ကာဒါယ်။ အာမာဆာ ဘော ယမ် အူ ဇေန့်။ အာဝ် ဟူ လုဝ် ဆတ် ပေါ န့ ပွါ။ အာယောဖ ဂါယ် ဝါ အန် အာဖီဆေ ဘော ခုင်ခြး ဒူပ် အာဆေဘာ အီ မုး ဂွန် အာဘီခါရီ တွိုန်။

11 န့ ယီ မုး ဒူအီ အီ ဒူပ် အာယောဖ အူ ဝီ၊ အန် ဝီ စွင့် ဘ်ု ဒီ ခူပ် အာမာဆာ တွိုန်။ အန် ဝီ တဝ်း၊ “အာဆေ မုး ဂိုက် အာယောဖ၊ အာဆေ အီ ကွယ် ဘ့လာက် အာဒါဝိတ်၊ တဲး အန် ဒူပ် အာယောဖ။” 12 ဒုဝ် အာမာဆာ တွိုန် ယီ ဆီ ကွယ် ခဲင် နှာမ် အန်၊ ကွယ် ကာတဲ န့တေန့် တွိုန်။ ဒူအီ ဝီ တွိုန် ဘော ယိုဝ်၊ ဒွန် အီ တး စွင့် ဂိူတ် ဒီ ဒုဝ် အာမာဆာ တီ၊ အန် ဘော ဒိုဝ်း ဒုဝ် အာမာဆာ ဝီ ကာထုဝ့် ဘ့လေး အုန် ခဲင် ဒူင် နာ။ အန် ဘော ဒိုဝ်း ခြိုင် ကာဘိတ် အုန်။ 13 အန် ဟဲ့ ဟွတ့် ကာထုဝ့် လေး ကာတဲ န့တေန့် တွိုန်၊ ခဲ့ ကွယ် ဒူအီ ဂေ တွိုန် ဘော ကာဖြူမ် ဒီ ဒူပ် အာယောဖ၊ ခုင်ခြး ဒူပ် အာဆေဘာ အီ မုး ဂွန် အာဘီခါရီ တွိုန်။

14 ယီ မုး အာဆေဘာ တွိုန်၊ အန် ဘော ကာလုဝ်း ဒူင် ကွယ် ဒူအီ အီဆာရေလ ဒွန် ခြိုဝ်၊ တဲး ကော ဇမ် မိူင် အာဘေလဘေတ်မာခါ၊ ဘော ဒူင် စိူဝ် ဘေရီကာ။ အန် ဟဲ့ ဒဲ့ ကာဇု ဂေ တီ၊ တဲး ဂေ ကာဒိုမ် ဒူပ် ဒီ ပန် အန်။ 15 ဂေ ဒါ ဆိုက် အီ ဒူပ် အာယောဖ တွိုန် ဘော ဟာဝ် ရူပ် မိူင် အာဘေလဘေတ်မာခါ။ ဂေ ဂိုဝ်း ကာဒါယ်၊ ဘူင် ဘ့လဝ့် န့တဲင် ဒီ ရဲင် မိူင်။ ဂေ ဘော ကွယ် ဘ်ု ပေါ အူ ပ့လုဝ့်၊ ထေဝ် ဒီ ဒုး ရဲင် မိူင် တဲး န့ ကာပျာတ့်။

16 ပန် တီ န့ မိုဝ်း အီဘိုန့် ယီ လွှက့် ကာဆဝ် အူ ဝီ၊ အီ ကွယ် ခဲင် မိူင် တွိုန်။ အန် ဒတ် တဝ်း၊ “ထူမ် ထူမ် အိုယ်၊ ကာလာင် ဒီ အာယောဖ၊ တဲး အန် တး ဒီ နီ၊ တဲး အုဝ် ကာလာင် ဂြုဝ်း ဒီ အန်။”

17 အာယောဖ ဘော တး ဒူင် ကွယ် အီဘိုန့် တွိုန်။ အီဘိုန့် တွိုန် ဘော ဒီမွှတ် အန် တဝ်း၊ “မဲ မုး အာယောဖ။း” အန် ဝီ တဝ်း၊ “ဟဲ့ မုး အုဝ် နီ။” ဟဲ့ ဟွတ့်၊ အီဘိုန့် ဝီ တဝ်း၊ “မှာန့် မဲ ထူမ် ဂြုဝ်း အုဝ်။” အန် ဝီ တဝ်း၊ “အိုဝ်၊ အုဝ် ဒီ ထူမ်။” 18 အီဘိုန့် တွိုန် ဝီ တဝ်း၊ “ဂြုဝ်း အီ ဒေါ မွိုန် န့ တဝ်း၊ ‘တဲး အေ လာယ် ဆင်ချာင် ဒီ မိူင် အာဘေလ။’” ပါယ် တီ ဂေ ဘော ဆုင်ဖျာတ် အာမူ တဲး န့ မှာန်။

19 “ယေ မုး ဒူအီ နဝ်း နှိမ်၊ နဝ်း ဆိူဝ် ခဲင် မိူင် အီဆာရေလ။ မှဝ် န့ ပါယ် ပီ ဟြေတ့် မဲ ဒီ ပျာတ့် မိူင် အီ မုး မိူင် ဒင် ခဲင် မိူင် အီဆာရေလ။ ယေ ပီ မာ ဂေ ဒူအီ အီဆာရေလ ဒွန် အီ။ ယေ ဘော ပီ ခါဂုန် ပီ ဒွါ ဇဝ်ဖြာ ဒီ ဒူအီ အီဆာရေလ။ မှဝ် န့ ပါယ် ပီ ဆီ ပျာတ့် မဲ ဒီ ယေ။း”

20 အာယောဖ တွိုန် ဝီ တဝ်း၊ “အုဝ် တူ ဆီ ပျာတ့် မိူင် ဘေ တီ၊ အုဝ် မိူဝ် တူ ဆီ ပျာတ့် ဒူအီ ခဲင် မိူင် ဘေ။ 21 အာဝ် မုး ပါယ် တီ။ ယီ မုး ဒူအီ တး ဒီ နွန် အာအေဖာရိမ်၊ အီ စိူဝ် အာဆေဘာ၊ အီ မုး ဂွန် အာဘီခါရီ တွိုန်။ အန် ဟဲ့ တဝ်း ဒီ ကာဂုဝ်း ဒီ ခုန်ဒီခမ်၊ တဝ်း ဒီ ကာခဲန့် ဒီ အာဒါဝိတ်။ တဲး ဘေ ဒိုဝ်း အာပ် ဒွါ ဒူအီ ဝီ တီ။ ဟဲ့ ဟွတ့်၊ အုဝ် ဒီ ဝီ လေး တ မိူင် နီ။” အီဘိုန့် တွိုန် ဝီ တဝ်း ဒီ အာယောဖ၊ “ဘ်ု မဲ ယွတ်၊ အုဝ် ဒီ ဒိုဝ်း ဂိန့် အန် ဇတ့် ကာလုဝ်း ရဲင် တီ ဒွါ ဒီ မဲ။”

22 အီဘိုန့် တွိုန် ဘော ဟာဝ် ဒူင် ကွယ် ဒူအီ ဒွန် အီ ခဲင် မိူင် တွိုန် ဘော ကာလာင် အာကျာမ် အာငျာန် အန် ဒီ ဂေ။ ဂေ ဘော ဒဲပ် ဂိန့် အာဆေဘာ အီ မုး ဂွန် အာဘီခါရီ တွိုန်၊ ဇတ့် ဒီ အာယောဖ အီ ကွယ် နာ ရေတ့် ရဲင် မိူင် တွိုန်။ အာယောဖ ဘော ဘုတ် ဝဝ်၊ တဲး ဂေ ဒွန် အီ ဘော လေး ဒီ မိူင် တွိုန်၊ ဝီ ဝေန့် ဒူင် ကွယ် ဂေ။ အာယောဖ ဘော ဝီ ဝေန့် ခဲင် မိူင် ယေရူဆာလဲမ်၊ ဝီ ဟာဝ် ဒူင် ကွယ် ခုန်ဒီခမ်။

23 အာယောဖ တွိုန် ဘဲန် ဒါ ဘုဝ် အီ အိုပ် ဒူအီ အီဆာရေလ ဘောကာဂ့လျီတ်။ အာဘီနာယာ အီ မုး ဂွန် အာယေဟောယာဒါ အန် ဘဲန် အီ အိုပ် ဂေ ဒူအီ ခေရေဆီ ဘော ဒူအီ ဘေလဆီ။ 24 အာတောရမ် တွိုန် ဘော ဘဲန် ဒါ အီ ဂဲပ် ရွိုန် စိုင်။ အာယောဆာဖာတ် အီ မုး ဂွန် အာဟီလုတ် တွိုန်၊ အန် ဘဲန် ဒါ စာရေ။ 25 အာဆီဝါ ဘော ဘဲန် ဒါ အီ စွယ် ဒါ စာရေ တာင်။ အာဇာဒူက် ဂါယ် အာဘာထာ တွိုန် ဂါယ် ဘဲန် ဒါ အီ လှူ ဒီ ဇဝ်ဖြာ။

26 အာအီရာ အီ မုး ဂွန် အာယာအီရ၊ အန် ဘဲန် ဒါ အီ လှူ ဒီ ဇဝ်ဖြာ အာဒါ အာဒါဝိတ်။