1 ပန် တီ အီ ဟဝ် ဘော ကာလာင် ဒီ အာယောဖ လွင် ခုန်ဒီခမ် ဟဲ့ ယာမ် ဘော က့လိုဝ် ကူပ် ဟဲ့ ယမ် အာဘာဆာလူမ်။ 2 ဆီငဲ တွိုန် ယီ ဟဲ့ ကာဂုဝ်း အွင်။ မာလဲ၊ န့ ဝီ ဘဲန် ဒုက် ဒီ နဝ်း ဒွန် အီ။ ခုဝ်၊ ဂေ ဟဲ့ ယိုဝ် လွင် ခုန်ဒီခမ် ဟဲ့ က့လိုဝ် ဟဲ့ ငှဝ် ကူပ် ဟဲ့ ယမ် ဂွန် အန်။ 3 ဂေ ဘော ပြာ ဒီ လိုပ် တး ခဲင် မိူင် တဲး န့ ပီ အီ တဝ် ဆိုက်၊ အီ ဘူင် နာ မွှိုမ် ဆာယ်၊ ဝီ ပြာ ဒီ လိုပ် တး။ 4 ခုန်ဒီခမ် မိူဝ် ကာမှုဝ့် နာ အန် ဘော ယာမ် တာင် တဝ်း၊ “အိုယ် ဂွန် အုဝ် အာဘာဆာလူမ်၊ အာဘာဆာလူမ် အိုယ်။ အိုယ် ဂွန် အီမာယ် အုဝ်၊ အိုယ် ဂွန် အုဝ်။”

5 ပန် တီ အာယောဖ ဘော လိုပ် ခဲင် ဟူင် ဒူင် ကွယ် ခုန်ဒီခမ် တွိုန်၊ ဘော ကာလာင် ဒီ အန် တဝ်း၊ “အာတိုဝ် နီ မဲ ဟဲ့ ဖျာက် ယေ ဘောကာဂ့လျီတ်၊ ယေ ဟဲ့ ချွတ် အာဆာက် မဲ ဘော ဂွန် အီဘိုန့် အီမာယ် မဲ၊ ဘော နာင် ဟောခမ် ဂေ အီဘိုန့် တျီ့ မဲ။ ပီ ဘူင် မဲ ဒေါ တီ နီ န့ ယီ တဲး ယေ မွှိုမ် ဆာယ် ပီ ဒူအီ အီ ဟဲ့ ဘူင် အီ တူ မွှိုမ်။

6 မဲ ယီ ရွက့် ဂေ အီ ဇွင့် မဲ၊ ဝီ ဇွင့် ယေ အီ ရွက့် မဲ။ အာတိုဝ် နီ မဲ ဟဲ့ ဘျ လွင် တူ မာတ် မဲ အာမူ အာမာတ် မဲ ဂေ ဒါ ဆိုက် မဲ။ အုဝ် ဟဲ့ ဟွတ့် ယိုဝ် ဆီချာ၊ ဆေ န့ မုး အာဘာဆာလူမ် ဝီ အိမ်၊ ဆေ ယေ ဒဲစေန့် မဲ ယီ ယမ် တူတ့်၊ အာတီ ဒီ ဝီ လဝ့် နဝ်း မဲ၊ ဝီ ဒူပ် ပီ အိုင် မဲ။ 7 ဒေါ တီ နီ၊ အုဝ် မှာန့် မဲ၊ တဲး မဲ လေး ကာလာင် ဂြုဝ်း၊ တဲး န့ လဝ့် နဝ်း ဒါ ဆိုက် မဲ။ အုဝ် ဒိူင် တဲး ဘော ဇဝ်ဖြာ ထူမ်။ ဆေ မဲ တူ လေး ဟာဝ် ဒေါ တီ နီ၊ ခဲင် မှိုဝ် နီ၊ န့ အာဝ် ဟူ မိုဝ်း အာဆေ အီ ဒီ ကွယ် ရိုမ် ဒူပ် မဲ။ ဆေ န့ ပါယ် တီ န့ ဒီ မွှိုမ် ယုဝ် လွှိုမ် ဒုက် ပဲ့ ဟဲ့ ဒွိုမ် ကာဒုး မဲ ဆိန့် ဒေါ နှိုမ် ဒေါ ဒီတဲတ် မဲ ကော ဇမ် အာတိုဝ် နီ။”

8 ပန် တီ ခုန်ဒီခမ် ဘော ယိတ့် တုတ့် ဘာင် မာလုဝ်း မိူင် တွိုန်။ ဂေ ဒွန် အီ ဘော တဝ်း၊ “ခုန်ဒီခမ် ဟဲ့ ယိတ့် တုတ့် ဘာင် မာလုဝ်း မိူင်။” ခဲ့ ကွယ် ဒူအီ ဂေ ဘော တး ဒီ အာတ့် ခုန်ဒီခမ်။ ဒေါ အန် တီ အီ မုး ဒူအီ အီဆာရေလ၊ ဂေ ဘော တဝ် ဟာဝ် ဒူင် ကွယ် ဘြိမ် ဂေ။ 9 ခဲ့ ကွယ် ခြိုဝ် ဒူအီ အီဆာရေလ ဒွန် ခြိုဝ်၊ ဂေ နင်ဂန် လာယ် ဆင်ချာင် တဝ်း၊ “ခုန်ဒီခမ် ဟဲ့ တဲး ယေ လေး တ ရန်ဆူ ယေ၊ ကွဲ့ တဲး ဒူအီ ဖီလီထီ အိုပ် ယေ။ ဒေါ တီ နီ၊ အန် ဟဲ့ ဝီ တဝ် ဟာဝ် တ မိူင် နီ ကူပ် ဆီ ဝဲန် အာဘာဆာလူမ် ဂုန့် အန်။ 10 အာဘာဆာလူမ် ပဲ့ ဟဲ့ ဒါင် အေ တွိုန်၊ ယဲ့ ဟဲ့ ယမ် ဒေါ ကာဂုဝ်း ဂေ။ ခုဝ်၊ ဒေါ တီ နီ တဲး အေ ဝီ ဒဲ့ တး ခုန်ဒီခမ် အေ။”

11 ခုန်ဒီခမ် အာဒါဝိတ် ဘော စ်ု ဒူအီ ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ အီ မုး အာဇာဒူက် ဂါယ် အာဘာထာ တွိုန် တဝ်း၊ “တဲး ဘာယ် ကာလာင် ဒီ ဂေ ဒါ တာင် ခဲင် မိူင် ယူဒါ တဝ်း၊ ‘န့ ပါယ် မှဝ် ဘေ ပီ ဆော ဘ်ု လှေန့် လွင် ဒီ ဝီ ဘာင် တး ဘေ ခုန်ဒီခမ် ခဲင် ဟုဝ် အန်။ ခုန်ဒီခမ် ဟဲ့ ဟွတ့် ယိုဝ် ဂြုဝ်း ပီ ကာလာင် ဒူအီ အီဆာရေလ ဒွန် ပ့လုဝ့်၊ ဟဲ့ ထူမ် ဂြုဝ်း ပီ ကာလာင် ဂေ ခဲင် ဟုဝ် ခုန်ဒီခမ်။ 12 ဘေ မုး ဘီနွင် ဝေါဝဲ အုဝ်။ န့ ပါယ် မှဝ် ဘေ ဘ်ု လှေန့် လွင် ဒီ တဲး ခုန်ဒီခမ် ဝီ တး။း’ 13 ဘာယ် ဝီ ကာလာင် ဘော ဒီ အာမာဆာ တဝ်း၊ ‘မဲ မုး ဝေါဝဲ အုဝ်။ နာ အာတ့် နီ ဟာဝ်၊ အုဝ် ဒီ တဲး မဲ ဘဲန် ဒါ အီ အိုပ် ဒါ ဆိုက် အုဝ်၊ တဲး မဲ ကာဒါင် အာယောဖ တွိုန်။ တဲး ဇဝ်ဖြာ ဒမ် ကိူန် မှာပ် ဒီ အုဝ်၊ ဆေ အုဝ် တူ ဘူင် ပါယ် တီ။’”

14 ပန် တီ အာမာဆာ ဘူင် တဲး နဝ်း ဒူအီ အာယူဒါ လာယ် ဖြူမ်၊ တဲး ဂေ ဘဲန် အူ နဝ်း။ ဂေ ဘောကာဂ့လျီတ် ဝီ ဘာင် ခုန်ဒီခမ် တဝ်း၊ “တဲး မဲ ခုန်ဒီခမ် ဘော ဂေ အီ ဒူပ် မဲ ဝီ တး တူတ့်။”

15 ပန် တီ ခုန်ဒီခမ် ဘော ဝီ ဝိဝ် ဘော ဟုဝ့် ဇမ် ဒီ ဘ့လဲင် အိုမ် ယောဒါန် တွိုန်။ ဂေ ဒူအီ အာယူဒါ ဟဲ့ ဟာဝ် ဇမ် ဒီ မိူင် ဂီလဂါ၊ ဘ်ု ဒီ ရွုး ခုန်ဒီခမ်။ ဂေ ဘော စွယ် ခုန်ဒီခမ် ကာလုဝ်း အိုမ် ဘ့လဲင် ယောဒါန် တီ။

16 န့ ယီ မုး အာဆီမီ၊ အီ မုး ဂွန် အာဂီရာ၊ အီ မုး အာမျုဝ် အာဘေန်ယာမ် တွိုန်၊ အန် တး မိူင် ဘာဟူရိမ်။ အန် ဘော ပီခြန် အန် တး ဒူပ် ဒူအီ အာယူဒါ၊ တဲး ဘော အန် ပွိုန် ဒီ ဘ်ု ဒီ ရွုး ခုန်ဒီခမ် အာဒါဝိတ် တွိုန်။

17 အန် ဒဲ့ ဒူအီ အာဘေန်ယာမ် အူ ဟြဲန့် ဝီ၊ ဘော အာဇီဘာ အီ ဒွိုမ် ဘဲန် ဒဲစေန့် အာဆောလူ၊ ဘော ဂွန် အီမာယ် အန် ဂိုဝ် ဒီ ဖန် ဝီ ဘော မှာယ် အန် အာ ဂိုဝ် ဝီ။ ဂေ ဘောကာဂ့လျီတ် ဟဲ့ တး ဒူင် ကွယ် ခုန်ဒီခမ်။ 18 ဂေ ကာလုဝ်း အိုမ် ဒီ ဘာင် ကာလုဝ်း တွိုန် ဘော စွယ် ဒိုဝ်း ကာလုဝ်း ဒူအီ ခဲင် န့ဟူမ် ခုန်ဒီခမ် ဘော ဘူင် တဲး န့ လဝ့် နဝ်း ခုန်ဒီခမ်။ အာဆီမီ အီ မုး ဂွန် အာဂီရာ တွိုန်၊ အန် ဘော တး ခြိုပ်ခြဝ် ဒီ အာတ့် ခုန်ဒီခမ်။ 19 အန် ဘော ကာလာင် ဒီ ခုန်ဒီခမ် တဝ်း၊ “အိုယ် မဲ ဇဝ်၊ မှာန့် မဲ ဇဝ်၊ ကွဲ့ ဒမ် မှာပ် ဒီ အုဝ်။ မှာန့် မဲ ဂဝ်း ဝဲန် မှာပ် ပဲ့ ဟဲ့ ဘူင် လုတ့် အုဝ် ဒေါ မုး ဆီငဲ ဒေါ လေး မဲ ခုန်ဒီခမ် ခဲင် မိူင် ယေရူဆာလဲမ် တွိုန်။ မှာန့်၊ မဲ ကွဲ့ အုန် ခဲင် နဝ်း မဲ။ 20 အုဝ် ဟဲ့ နပ်၊ အုဝ် ဟဲ့ ဘူင် နာ တူ မွှိုမ် ဒီ မဲ။ အုဝ် ယီ တး ဒီ အာတ့် ဒွန် အီ အီ မုး ခဲင် ခြိုဝ် အာယုဝ် ဂေ တွိုန်၊ တဲး အုဝ် ပွိုန် ဒီ ဘ်ု ဒီ ရွုး မဲ အီ မုး ခုန်ဒီခမ် အီ အိုပ် အုဝ်။”

21 အာဖီဆေ အီ မုး ဂွန် နာင် စေရူယာ တွိုန် ဘော တဝ်း၊ “အာဆီမီ နီ လုဝ် ယမ်။ ကူပ် ဟဲ့ ဒိူင် ဟဲ့ အေး အန် ဒူအီ ပီ ဖဝ်း ဇဝ်ဖြာ နာမန် ဒီ ဂိန့် အန်။”

22 အာဒါဝိတ် ဝီ တဝ်း၊ “အိုယ် ဘေ ဂွန် နာင် စေရူယာ၊ ဘေ ဆော ဘဲန် ရန်ဆူ အုဝ် အာတိုဝ် နီ။ အာတိုဝ် နီ အာဝ် မိုဝ်း အာဆေ အီ လုဝ် ယမ် ခဲင် မိူင် အီဆာရေလ နီ။ ဒွန် အီ လုဝ် ခူယ်။ ခုဝ်၊ အုဝ် ဟဲ့ ဝီ ဘဲန် ခုန်ဒီခမ် ဒူအီ အီဆာရေလ။” 23 ပန် တီ ခုန်ဒီခမ် ဝီ တဝ်း ဒီ အာဆီမီ၊ “မဲ တူ လုဝ် ယမ်။” ဟဲ့ ဟွတ့်၊ ခုန်ဒီခမ် ဝီ ဒွါ ကာဒိက် ဆတ်ဇာ ဒီ အန်။

24 ဘော အာမေဖီဘောဆေတ် အီ မုး လှာန် အာဆောလူ တွိုန်၊ အန် ဘော တး တဲး အန် ပွိုန် ဒီ ဘ်ု ဒီ ရွုး ခုန်ဒီခမ်။ ဆိန့် ဆီငဲ လေး ဟာဝ် ခုန်ဒီခမ် တွိုန်၊ ကော ဝီ ဇမ် ဆီငဲ ဝီ တး ခုန်ဒီခမ်၊ အန် တူ ဘာယ် ပ့လဝ် အန်၊ တူ ဂါတ် ဝဲန် ဒီမုဝ်း ဒီ ကုင်ကာပ် အန်၊ တူ လး ခြိုင် အန်။ 25 ဒေါ တး အန် မိူင် ယေရူဆာလဲမ်၊ တး ဘ်ု ဒီ ရွုး ခုန်ဒီခမ်၊ ခုန်ဒီခမ် ဘော ဒီမွှတ် အန် တဝ်း၊ “အိုယ် အာမေဖီဘောဆေတ်၊ မှဝ် န့ ပါယ် ပီ တူ ဟာဝ် မဲ ဒူပ် အုဝ်။း”

26 အန် ဝီ တဝ်း၊ “အိုယ် မဲ ခုန်ဒီခမ်၊ ကူပ် ဒဲစေန့် မဲ အာဝ် ပွိုန် ဟာဝ် ဒီ ပ့လဝ်၊ အုဝ် ဟဲ့ စ်ု အီ တဝ်း၊ ‘ရဲန် ကွပ် မာလာ အုဝ် ဒီ ပဝ့် ဟာဝ် ဒူင် ကွယ် ခုန်ဒီခမ်။’ 27 န့ ယီ မုး ဒဲစေန့် အုဝ် အီ စိူဝ် အာဇီဘာ၊ အန် ဝီ ကာယွင့် အုဝ် ဒီ မဲ ခုန်ဒီခမ်။ မာလဲ၊ မဲ ဒါ ကာညာ၊ မဲ ဟဲ့ ပီ အာမူ အာမာတ် ဇဝ်ဖြာ။ မှာန့်၊ တဲး မဲ ဘူင် ဒီ အုဝ် ခဲ့ ပီ အိုင် မဲ။ 28 ခဲ့ ကွယ် ခြိုဝ် ဂုန့် အုဝ် ဟဲ့ ကာအာပ် မဲ ငဝ်း ယမ် ဒွန် အီ။ ယီ မုး အုဝ်၊ မဲ ခုန်ဒီခမ် ဟဲ့ တဲး အုဝ် ကွယ် ဒူင် အွိုပ်။ ဟဲ့ တဲး အုဝ် ပွိုန် ဒီ ဟူမ် ရိုမ် ဒူပ် မဲ။ ကူပ် န့ ပါယ် တီ အာဝ် ဟူ ကာအာပ် အုဝ် မှာန့် ဒီ မဲ ခုန်ဒီခမ် ပေါ န့ ပွါ။”

29 ခုန်ဒီခမ် ဝီ တဝ်း ဒီ အန်၊ “မှဝ် န့ ပါယ် ပီ ဆီ ကာလာင် မဲ ပေါ န့ ပွါ လွင် ကြုဝ် မဲ ဒီ အုဝ်။း အုဝ် ဟဲ့ ဟွတ့် ဆုင်ဖျာတ် တဲး ဘော မဲ ဘော အာဇီဘာ လာယ် ကာဆာင် ကာဒါယ် တွိုန်။” 30 အာမေဖီဘောဆေတ် ဝီ တဝ်း၊ “ဒေါ တီ နီ၊ မဲ ခုန်ဒီခမ် ဟဲ့ ဝီ ဇမ် ဆီချာ ခဲင် ဟုဝ် မဲ။ ခုဝ်၊ တဲး အာဇီဘာ ဒိုဝ်း တူတ့် ဒွန် မျုဝ် ဒီ အန်။”

31 န့ မိုဝ်း ဘော အာဘာစီ အီ ကွယ် မိူင် ဂီလေအာတ်၊ အန် ဘော လေး ခဲင် မိူင် လောကေလိမ်၊ တး ကာလုဝ်း အိုမ် ဘ့လဲင် ယောဒါန်၊ တဲး အန် ပွိုန် ဒီ တိုယ် ခုန်ဒီခမ် ဇမ် နာ တ ဘ့လဲင် အိုမ်။ 32 အာဘာစီ ဟဲ့ ကတ် ကာဆဝ်။ အာဆာက် အန် ဟဲ့ ပွိုန် ဒါ ဂိုဝ် ဆီနမ်။ အန် မုး ဒူအီ ခြမ် တာင်။ ခုဝ်၊ အန် ဟဲ့ ဒွိုမ် ဟျီင် ခုန်ဒီခမ် ဒေါ ကွယ် ခုန်ဒီခမ် ဒီ မိူင် မာဟာနာအိမ် တွိုန်။ 33 ခုန်ဒီခမ် ဝီ တဝ်း ဒီ အာဘာစီ၊ “တဲး မဲ ဟာဝ် ကာလုဝ်း အိုမ် ဒူပ် အုဝ်။ တဲး မဲ ဟာဝ် ဒူပ် အုဝ် ဒီ မိူင် ယေရူဆာလဲမ်။ အုဝ် ဒီ ဝီ ဟျီင် မဲ။” 34 အာဘာစီ ဝီ တဝ်း၊ “အာဆာက် အုဝ် အာဝ် ဟူ တူင့်။ အာဝ် ဟူ ခုဝ် ဒူပ် မဲ ခုန်ဒီခမ် ဟာဝ် ဒီ မိူင် ယေရူဆာလဲမ်။ 35 ဒေါ တီ နီ၊ အာဆာက် အုဝ် ဘော ဟဲ့ ဟွတ့် နုဝ့် ဒါ ဂိုဝ် ဆီနမ်။ အုဝ် ဟူ နပ် ဒီ ကာယဝ်း အီ မွှိုမ် တူ မွှိုမ်။ အုဝ် ဟူ နပ် ပီ ဒီ ဟူမ် မျုဝ် မှဝ် ဆီငဲး။ အုဝ် ဟူ နပ် ဒီ ထူမ် အီဘိုန့် အီမာယ် တဝ်း မှုဝ်။ ကူပ် န့ ပါယ် တီ န့ ဒီ ဝဲ ညှာပ် ကိူန် ဒီ မဲ ခုန်ဒီခမ်။ 36 အုဝ် ဒီ ဟာဝ် ဒူပ် မဲ ခုန်ဒီခမ် တဲး န့ ဇမ် နာ ဒွယ် ဘ့လဲင် အိုမ် ယောဒါန် ခေါ အီ စဲက်။ ခုဝ် အန် တီ၊ မဲ ခုန်ဒီခမ် တူ လုဝ် ဒွါ နာ မွှိုမ် ကိူန် ဒီ အုဝ်။ 37 မှာန့် အာခ့ဝါင် မဲ၊ တဲး မဲ တဲး အုဝ် ဝီ ဝေန့် ခဲင် မိူင် ဒူင် ကွယ် အုဝ်၊ အီ မုး ဒူင် ကွယ် ဘာရေဝ် ဂုန့် မာ အုဝ် တွိုန်။ ယီ မုး အာခီမ တွိုန်၊ မှာန့် တဲး အန် ဟာဝ် ဒူပ် မဲ ခုန်ဒီခမ်။ တဲး မဲ ဘူင် ခဲ့ ပီ ထာင် မဲ အီ ဘွတ် အီ မွှိုမ် ဒီ အန်။” 38 ခုန်ဒီခမ် ဝီ တဝ်း၊ “အာခီမ ပွိုန် ကာလုဝ်း ဟာဝ် ဒူပ် အုဝ်။ အုဝ် ဒီ ဘူင် ဒီ အန် ခဲ့ လဝ့် နဝ်း မဲ။ ခဲ့ ပီ မှာန့် မဲ ဒီ အုဝ် တီ မိူဝ်၊ အုဝ် ဒီ ဘူင် ဒွါ ဒီ မဲ။”

39 ဟဲ့ ဟွတ့်၊ ခဲ့ ကွယ် ဒူအီ၊ ဂေ ဘော ကာလုဝ်း ဘ့လဲင် အိုမ် ယောဒါန် တွိုန်။ ပန် တီ ဘော ခုန်ဒီခမ် ကာလုဝ်း။ ခုန်ဒီခမ် ဘော အုး အာဘာစီ ဘော မွင့်ကာရာ ဒွါ ဒီ အန်။ ဟဲ့ ဟွတ့်၊ အာဘာစီ ဘော ဝီ ဝေန့် ဒူင် ကွယ် အန်။

40 ခုန်ဒီခမ် ဟဲ့ ဟွတ့် ကာလုဝ်း အိုမ်၊ အန် ဘော ဟာဝ် ဒီ မိူင် ဂီလဂါ။ အာခီမ မိူဝ် ဒူပ်။ ခဲ့ ကွယ် ဒူအီ အာယူဒါ ဘော ဒူအီ အီဆာရေလ အူ ကာတဲ၊ ဂေ ဟဲ့ တး ဒူပ် ခုန်ဒီခမ်။

41 ပန် တီ ဒူအီ အီဆာရေလ ဘောကာဂ့လျီတ် ဘော ကာဖြူမ် ဒီ တး ဒူင် ကွယ် ခုန်ဒီခမ် တဝ်း ဒီ အန်၊ “ကူပ် န့ ပါယ် မှဝ်၊ ဘီနွင် မဲ အီ မုး ဒူအီ အာမျုဝ် ယူဒါ ဂေ ပီ ဆော ပြာ ဒီ ရွုး မဲ ခုန်ဒီခမ် ဘော အာမူ အာမာတ် မဲ၊ ဘော ဒူအီ ခဲင် ဟုဝ် ဂေ တွိုန်၊ တဲး ဘေ ကာလုဝ်း ဘ့လဲင် အိုမ် ယောဒါန်။း”

42 ဒူအီ အာယူဒါ ဂေ ဝီ တဝ်း ဒီ ဒူအီ အီဆာရေလ၊ “ယေ ဘူင် ပါယ် တီ ခုဝ်၊ ခုန်ဒီခမ် ဟဲ့ မုး ဘီနွင် ကာချြီ့ ဒီ ယေ။ မှဝ် န့ ပါယ် ပီ ရူ ဘေ ဒီ ယေ။း ယေ တူ ဟူမ် ပီ ဒွါ ခုန်ဒီခမ်။ ခုန်ဒီခမ် တူ မိုဝ်း ဒီ ဒွါ မာဆေ ဒီ ယေ။”

43 ဒူအီ အီဆာရေလ ဝီ ဝျီ့ ဂြုဝ်း ဂေ တီ တဝ်း၊ “ခဲင် မိူင် ပီ အိုပ် အာဒါဝိတ်၊ ယေ ဒူအီ အီဆာရေလ ဟဲ့ ကိူန်။ ယေ မုး ဂိုဝ် ဘုန်။ ခုဝ်၊ န့ ကာအာပ် ယေ ကွယ် ချြီ့ ခုန်ဒီခမ် လွှိုမ် ဘေ။ ခုဝ်၊ မှဝ် န့ ပါယ် ပီ တူ ရုဝ်ဆေ ဘေ ဒီ ယေ။း ယေ ဟဲ့ တဝ်း ဒီ ဝီ ဒဲ့ ခုန်ဒီခမ် ဒီ အာတ့် ဘေ။” ဂြုဝ်း ပီ ဝီ ဝျီ့ ဂေ ဒူအီ အာယူဒါ၊ န့ ယီ ဟာယ် လွှိုမ် ဂြုဝ်း ဂေ ဒူအီ အီဆာရေလ တွိုန်။