1 အာဒါဝိတ် ဘော ယွတ် ဆီချာ ခဲ့ ကွယ် ဒါ ဆိုက် အန်။ အန် ဘော တဲး ဂေ ကွယ် ဘဲန် ဖိုင် ဘဲန် ဖိုင်၊ ဒါင် တဲး မိုဝ်း ဒါ အီ အိုပ် အူ ဟြဲန့် ဝီ ဘော ဒါ အီ အိုပ် အူ မာယဝ်း ဝီ။ 2 အာဒါဝိတ် ဘော တဲး ဒါ ဆိုက် ဂေ တွိုန် ဟာဝ်။ အူ ဖိုင် အန် ဒွါ ဒီ အာယောဖ။ ပေါ အူ ဖိုင် အန် ဒွါ ဒီ အာဖီဆေ အီ မုး ဝါ အာယောဖ၊ အီ မုး ဂွန် နာင် စေရူယာ တွိုန်။ ပေါ အူ ဖိုင် အန် ဒွါ ဒီ အာအီထာယ အီ မုး ဒူအီ ကိတ်တီ တွိုန်။ ခုန်ဒီခမ် ကာလာင် ဒီ ဒါ ဆိုက် အန် တဝ်း၊ “အုဝ် ဒီ ဟာဝ် ဒူပ် ဘေ။”

3 ဂေ ဒါ ဆိုက် ဝီ တဝ်း၊ “မဲ အာဝ် လုဝ် ဟာဝ်။ ဆေ ယေ ပီ ဘော တဝ် တူတ့် မိူဝ်၊ ဂေ တူ မာတ် ယေ မုး မာဆေ။ ဆေ ယေ ပီ ဘော ယမ် အူ ကာတဲ မိူဝ်၊ ဂေ တူ မာတ် န့ မုး မာဆေ။ ဂေ ဒီ ဟြေတ့် မဲ အူ ကာဒင်။ ဆေ ဂေ ပွိုန် မှေတ့် မဲ၊ န့ ပီ ဂေ မှေတ့် ယေ အူ မှိုန့် ဝီ။ ကူပ် န့ ပါယ် တီ၊ ဆေ မဲ ကွယ် ခဲင် မိူင်၊ တိုယ် အီ စွယ် ဆေ ယေ လုဝ် အီ စွယ် ယေ၊ န့ ဒီ မွှိုမ် လွှိုမ် ဟာဝ် မဲ ဒူပ် ယေ။”

4 ခုန်ဒီခမ် မိူဝ် ဝီ တဝ်း၊ “ဆေ ဘေ ထာင် န့ ဒီ မွှိုမ် လွှိုမ် ဒူပ် အုဝ် ဒီ ဘေ၊ အုဝ် ဒီ ကွယ် ဒီ တီ။” ပါယ် ဒီ ခုန်ဒီခမ် ဘော ယိတ့် စွင့် ဘာင် မာလုဝ်း မိူင်၊ ယွတ် ဒူအီ ဂေ တွိုန် ဟာဝ်။ န့ ဘော မုး ဘဲန် ဖိုင် ဘဲန် ဖိုင်၊ မင် ဖိုင် အူ မာယဝ်း ဝီ၊ မင် ဖိုင် အူ ဟြဲန့် ဝီ။ 5 ခုန်ဒီခမ် မိူဝ် စ်ု အာယောဖ၊ အာဖီဆေ ဘော အာအီထာယ တဝ်း၊ “တဲး ဘေ ကာဝေ အုဝ်၊ ကွဲ့ ဘူင် ကာဆဝ် ဒီ အာဘာဆာလူမ်၊ အီ ဆီ မုး ဘာနှိုမ် တျီ့။” ဘော ဒါ ဆိုက် ဒွန် အီ ဟဲ့ ယိုဝ် ဂြုဝ်း ပီ ကာလာင် ခုန်ဒီခမ် လွင် အာဘာဆာလူမ် ဒီ ဒါ တာင် အီ ယဲတ့် ဒါ ဆိုက် ဂေ တွိုန်။

6 ပန် တီ ဂေ ဘောကာဂ့လျီတ် ဘော လေး ဟာဝ် ဒူင် ဂ့လင်၊ တဲး ဂေ ပွိုန် ဒီ ကာဂုဝ်း ဒီ ဒူအီ အီဆာရေလ။ ဂေ ယီ လာယ် ကာဂုဝ်း ခဲင် နင် ဟေ နင် ပြဲ အီ စိူဝ် အာအေဖာရိမ် တွိုန်။ 7 ဂေ ဒူအီ အီဆာရေလ ဘော စှိုမ် ဒီ ဒူအီ အာဒါဝိတ်။ ဆီငဲ တီ ဂေ ဘော လာယ် ကာဂုဝ်း ယမ် ကိူန် ကာဆဝ်။ န့ ဘော မိုဝ်း အာ မှိုန့် ဝီ အီ ဟဲ့ ယမ်။ 8 ဆီငဲ တီ ဒူင် ကာဂုဝ်း ဂေ တီ၊ န့ ဘော ကာဝဝ်း ဒွန် နာ ဒွန် ဘ့လာက်။ ဂေ အီ ယမ် ခဲင် နင် ဟေ၊ ဂေ မိူဝ် ဟဲ့ ကိူန် လွှိုမ် ဂေ အီ ယမ် ဒီ ဘ့လာ ပွါ့ လာင်။

9 အာဘာဆာလူမ် ဘော တာ ကာတုန့် ဒူအီ အာဒါဝိတ် ဂေ တွိုန်။ အာဘာဆာလူမ် ဘော ပဝ့် မာလုဝ် အန်။ မာလုဝ် တီ ဘော လိုပ် ဟာဝ် ခြိုမ် ရာ ဟေ ထေရေပ် တာင် အီ မိုဝ်း ရာ ကိူန်။ ဂိန့် အန် ဘော ဟဝ့် ဒီ ရာ ဟေ တီ။ အန် ဘော ဟွယ် ဒုဝ် အန် ခဲင် ဒီဝူင့် ပါယ် တီ။ မာလုဝ် ပီ ပဝ့် အန် တွိုန် ဘော ကာလုဝ်း ဟာဝ်။

10 ဒူအီ အူ ဝီ ဘော ယိုဝ် အန်၊ ဘော ဝီ ဟာဝ် ကာလာင် ဒီ အာယောဖ တဝ်း၊ “အုဝ် ဟဲ့ ဟွတ့် ယိုဝ် အာဘာဆာလူမ် ဟဲ့ ဟွယ် ဒီ ရာ ဟေ ထေရေပ်။”

11 အာယောဖ ဝီ တဝ်း၊ “မဲ တဝ်း၊ မဲ ဟဲ့ ဟွတ့် တး ယိုဝ် အန်။ မဲ ယီ တူ ဒဲပ် တဲး အန် စုဝ်း ယမ် ဒဲင် ကာဒါယ်။ ဆေ မဲ ယီ ဘူင် ပါယ် တီ အုဝ် ဒီ ဘော ဒွါ ရွိုန် ဇဲတ် ဂိုဝ် ကျာပ် ဘော ဆဲ့ ဒါ ဆိုက် ဒီ မဲ။”

12 ဒူအီ တွိုန် ဝီ တဝ်း ဒီ အာယောဖ၊ “ဆေ အုဝ် ပီ ဘော ဟဲ့ ပွိုန် ရွိုန် အူ ဟြဲန့် ကျာပ် မိူဝ်၊ အုဝ် တူ ခမ် ဒီ ဘူင် ဒီ ဂွန် ခုန်ဒီခမ် ပါယ် တီ။ ခုဝ်၊ အုဝ် ဟဲ့ ယိုဝ် ခုန်ဒီခမ် ဟဲ့ ကာလာင် ဒီ မဲ ဘော ဒီ အာဖီဆေ ဘော ဒီ အာအီထာယ တဝ်း၊ ‘တဲး ဘေ ကာဝေ အုဝ်၊ ကွဲ့ တဲး အာဘာဆာလူမ် ဇမ် ဒုက် ကာဆဝ်။’ 13 ဆေ အုဝ် ဟီ ဘူင် ပီ တဝ်း မဲ၊ ခုန်ဒီခမ် ဒီ ဘော ငဝ်း ယမ် အုဝ်။ ခုဝ်၊ အာဝ် မိုဝ်း အီ ပွိုန် ချြီင် ခေါ အူ မျုဝ် ဒီ ခုန်ဒီခမ်၊ ကွဲ့ တဲး အန် နပ်။ ဆေ န့ ပါယ် တီ ဘော မဲ တူ ဝီ စွယ် အုဝ်။”

14 အာယောဖ ဝီ တဝ်း၊ “အုဝ် တူ ဒန် ကွယ် လှေန့် ထူမ် ဂြုဝ်း မဲ။” ဟဲ့ ဟွတ့်၊ အန် ဘော ဒိုဝ်း ဒီ ဂူင့် ဘ့လာ လျီး ဒီတျီမ် အူယ် ဘ့လ။ အန် ဘော ဟာဝ် ဆတ် လှုး ဘင်နဝ်း အာဘာဆာလူမ် အာတ့် ယမ် အန်၊ ဒေါ ဟွယ် အန် ဒီ ဟေ ထေရေပ် တွိုန်။ 15 န့ ယီ မိုဝ်း ဆိုက် ဒီရွယ် ဂေ ဂိုဝ် ဝီ၊ အီ ဂူင့် ခြိုင် ကာဂုဝ်း အာယောဖ တွိုန်၊ ဂေ ဘော ဝဲင် ရူပ် အာဘာဆာလူမ်၊ ငဝ်း တဲး အန် ယမ်။

16 ပန် တီ အာယောဖ ဘော ဘုတ် ဝဝ်။ ဂေ ဒါ ဆိုက် အန် ဘော ဝီ စူ ခုင်ခြး ဒူအီ အီဆာရေလ ကူပ် ဟဲ့ ခြဲ အာယောဖ ဒီ ဂေ။ 17 ဂေ ဘော ဒိုဝ်း အာဘာဆာလူမ်၊ ဘ့လေး ဒုဝ် အန် ခဲင် ကာဒဝ် ကာဒါယ် အီ လိုက် ခဲင် နင် ဟေ တွိုန်၊ ဘော ဝီ ဒိုဝ်း မာဝ် ဘ့လေး နာ ဒဲင်၊ တဲး ကော မ့ပိုမ် စာ။ ဒူအီ အီဆာရေလ၊ ဂေ ဒွန် အီ ဘော တဝ် ဝေန့် ဒီ ကာင် ဂေ။

18 ဒေါ ညှမ် ယမ် အာဘာဆာလူမ် တွိုန်၊ အန် ဟဲ့ ဒွိုမ် ဆမ် ရွင့် လွှက့် ဒူပ် ဒီလယ့် ခုန်ဒီခမ် တွိုန်၊ တဲး အီ လှုဝ်း အန် ဆေဆေ။ အန် ဘူင် ပါယ် တီ ခုဝ် အန် တဝ်း၊ “အုဝ် တူ မိုဝ်း ဂွန် အီမာယ် အီ ဒီ ပ့လု အုဝ်၊ အီ ဒီ တဲး အီ နမ်လှုဝ်း အုဝ် ဆေဆေ။” ရွင့် တီ၊ အန် တဲး န့ စိူဝ် ‘ရွင့် အာဘာဆာလူမ်။’ ကော ဇမ် အာတိုဝ် နီ ဂေ တဝ်း ပါယ် တီ။

19 ပန် တီ အာဟီမာတ် အီ မုး ဂွန် အာဇာဒူက် တွိုန်၊ မှာန့် တဝ်း၊ “တဲး အုဝ် ကာဘ့လဲပ် ဟာဝ် ကာလာင် လွင် အန် တီ ဒီ ခုန်ဒီခမ်၊ တဲး အန် နပ် လွင် ဇဝ်ဖြာ ဟဲ့ စွယ် အန်၊ ဟဲ့ တဲး အန် လွတ် ရန်ဆူ အန်။”

20 အာယောဖ ဝီ တဝ်း၊ “အာတိုဝ် နီ၊ အာဝ် ပွိုန် တဲး မဲ ဟာဝ် ကာလာင်။ မဲ ပွိုန် ကာလာင် လွင် အန် တီ ပေါ အူ ဆီငဲ။ အာတိုဝ် နီ မဲ ယီ တူ ပွိုန် ကာလာင်။ ခုဝ်၊ ဂွန် ခုန်ဒီခမ် ဟဲ့ ယမ်။”

21 ဝါယ် အန် တီ အာယောဖ ဝီ ကာလာင် ဒီ ဒူအီ အူ ဝီ အီ မုး အာမျုဝ် ကူဆာ။ အန် တဝ်း၊ “မဲ ဟာဝ် ကာလာင် ဒီ ခုန်ဒီခမ် ခဲ့ ပီ ယိုဝ် မဲ ဒီ နီ။” အန် ဘော တး ဂိုပ် ဒီ အာတ့် အာယောဖ။ ဟဲ့ ဟွတ့်၊ အန် ဘော ဟာဝ်။

22 ပန် တီ အာဟီမာတ် အီ မုး ဂွန် အာဇာဒူက် တွိုန် ပီ ဝီ မှာန့် ဒီ အာယောဖ န့ ပွါ တဝ်း၊ “ဘော မုး ဇိုဝ် မှဝ်၊ တဲး အုဝ် ကာဘ့လဲပ် ဟာဝ် ဒူပ် ဒီ ပန် ဒူအီ ကူဆာ တွိုန်။” အာယောဖ ဘော တဝ်း၊ “အိုယ် မဲ ဂွန်၊ မှဝ် န့ ပါယ် ပီ ဆီ ဟာဝ် ကာဆဝ် မဲ။ အာဝ် မုး နာ မွှိုမ် ပီ ဒီ ကာလာင် မဲ။”

23 အန် ပီ ဝီ မှာန့် န့ ပွါ တဝ်း၊ “ဘော ပါယ် မှဝ် မိူဝ်၊ တဲး အုဝ် ဟာဝ်။” ဟဲ့ ဟွတ့်၊ အာယောဖ ဘော တဝ်း၊ “တဲး မဲ ကာဘ့လဲပ် ဟာဝ်။” ပန် တီ အာဟီမာတ် တွိုန် ဘော ကာဘ့လဲပ် ဟာဝ် ဒူပ် န့တေန့် ဂ့လင် ဘော ကာလုဝ်း ပွုန် ဒူအီ ကူဆာ တွိုန်။

24 ဒေါ အန် တီ အာဒါဝိတ် ကွယ် ဒီ မာလုဝ်း မိူင်။ အန် ကွယ် ဒီ ကာတဲ မာလုဝ်း ရေတ့် ဂါယ် မာလုဝ်း ခဲင်။ ဒူအီ ဘ်ု မိူင် အူ ဝီ၊ အန် ဘော ဟုဝ့် နာ ဒဲင် မာလုဝ်း၊ ဘ်ု ဒီ ယွတ် ဒီ ခူပ် ရဲင် မိူင် တွိုန်။ အန် ဘော ယိုဝ် ဒူအီ အူ ဝီ ကာဘ့လဲပ် တး။ 25 ဒူအီ ဘ်ု တွိုန် ဘော ဒဲ့ ဒီ ကာလာင် ဒီ ခုန်ဒီခမ်။ ခုန်ဒီခမ် မိူဝ် ဝီ တဝ်း ဒီ အန်၊ “ဆေ န့ မုး အူ ဝီ တး၊ အန် ဒီ တး ကာလာင် နာ မွှိုမ်။” ဒူအီ အီ ကာဘ့လဲပ် တွိုန် ဘော ကြဲ ဒီ တး ချြီ့။

26 ဒူအီ ဘ်ု တွိုန် ပီ ဝီ ယိုဝ် ပေါ အူ ဝီ အီ ကာဘ့လဲပ် တး။ အန် ဘော ဒဲ့ ဂေ အီ ကွယ် ဘ်ု ဘာင် မာလုဝ်း တွိုန် တဝ်း၊ “တဲး မဲ ယွတ်၊ ဒူအီ ပေါ အူ ဝီ ပဲ့ ဟဲ့ ဝီ ကာဘ့လဲပ် တး။” ခုန်ဒီခမ် မိူဝ် ဝီ တဝ်း၊ “ဝီ တီ မိူဝ် တး ကာလာင် နာ မွှိုမ်။”

27 ဒူအီ ဘ်ု မိူင် တွိုန် ဝီ တဝ်း၊ “အုဝ် ထာင် ဝီ အီ ကာဘ့လဲပ် တး ဒီ အာတ့် တွိုန် ပီ ပါယ် အန် ဒီ ကာဘ့လဲပ် န့ နှဲန် အာဟီမာတ် အီ မုး ဂွန် အာဇာဒူက် တွိုန်။” ပန် တီ ခုန်ဒီခမ် မိူဝ် ဝီ တဝ်း၊ “ဒူအီ ဝီ တီ၊ အန် မုး ဒူအီ ဘွတ်။ အန် ဒီ ဘော တး ကာလာင် နာ မွှိုမ်။”

28 ပန် တီ အာဟီမာတ် ဘော ဒဲ့ ဒီ ကာလာင် ဒီ ခုန်ဒီခမ် တဝ်း၊ “ဟဲ့ ဒါခိုယ် ဂျာမ်ဆာ ဒွန် မျုဝ်။” အန် ဘော မုတ် ဂိုပ် ဒီ အာတ့် ခုန်ဒီခမ် ဘော တဝ်း၊ “တဲး မဲ အိူပ် ဇဝ်ဖြာ၊ အီ မုး ဇဝ်ဖြာ ပီ ကြိုပ် မဲ။ အန် ဟဲ့ တဲး ဂေ အီ ဆီ ကာဂုဝ်း ဒီ မဲ စှိုမ် တူတ့်။”

29 ခုန်ဒီခမ် ဘော ဒီမွှတ် တဝ်း၊ “အာဘာဆာလူမ် အီ မုး ဘာနှိုမ် တျီ့ တွိုန် ဟဲ့ ဒါခိုယ်။း” ဟဲ့ ဟွတ့်၊ အာဟီမာတ် ဝီ တဝ်း၊ “ဒေါ စ်ု အာယောဖ အုဝ် တး၊ အုဝ် ယိုဝ် ဂေ ဒူအီ လာယ် ကာဝ်ု ကိူန်၊ အုဝ် မိူဝ် တူ ဘော နပ် ဆီချာ၊ လွင် မာဆေ န့ မုး။”

30 ခုန်ဒီခမ် ဝီ တဝ်း၊ “ကာထုဝ့် ဟာဝ် ကွယ် ဒီ နီ။” အန် တွိုန် ဘော ကာထုဝ့်။

31 ပန် တီ ဒူအီ ကူဆာ တွိုန် ဘော ဝီ တး ဇမ် ဘော ကာလာင် တဝ်း၊ “အိုယ် မဲ ခုန်ဒီခမ် တာင်၊ တဲး မဲ ထူမ် နာ မွှိုမ် ပီ ဒီ ကာလာင် အုဝ် ဒီ မဲ။ အာတိုဝ် ဇဝ်ဖြာ ဟဲ့ တဲး ရန်ဆူ အီ ကာဂုဝ်း ဒီ မဲ စှိုမ် တူတ့်။”

32 ခုန်ဒီခမ် ဝီ ဒီမွှတ် ဒူအီ ကူဆာ တွိုန် တဝ်း၊ “အာဘာဆာလူမ် အီ မုး ဘာနှိုမ် တျီ့ တွိုန် ဟဲ့ ဒါခိုယ်။း” ဒူအီ ကူဆာ ဝီ တဝ်း၊ “ဘော ရန်ဆူ မဲ ဘော ဂေ အီ တဝ်း ဒီ ဘူင် နာ စာဝ် ဒီ မဲ၊ တဲး ဂေ ဘောကာဂ့လျီတ် ပီ ဂွန် မဲ တီ။”

33 ပန် တီ ခုန်ဒီခမ် ဘော က့လိုဝ် ကာဆဝ်။ အန် ဘော ဝီ ဟုဝ့် ဒူင် ကွယ် ဟူင် နာ ဒဲင် မာလုဝ်း ရဲင် မိူင် တွိုန်၊ ဘော ဝီ ယာမ်။ ဒေါ ဟုဝ့် အန် တွိုန် အန် တဝ်း၊ “အိုယ် ဂွန် အုဝ် အာဘာဆာလူမ်။ အိုယ် ဂွန် အီမာယ် အုဝ်၊ အိုယ် အာဘာဆာလူမ်။ အုဝ် ဟဲ့ မိုဝ်း နဝ်း ဆီ ယမ် ကာဒါင် ဒုဝ် မဲ။ အိုယ် အာဘာဆာလူမ် ဂွန် အုဝ်၊ အိုယ်။”