ပန် တီ အာဟီဆောဖေလ ဝီ ကာလာင် ဒီ အာဘာဆာလူမ် တဝ်း၊ “ဆေ န့ မုး အုဝ်၊ တဲး အုဝ် ရဝ်း ဒူအီ အူ မှိုန့် ဒီ အာ ဟြဲန့် ဝီ၊ တဲး ဂေ ခုင်ခြး ဒူပ် အာဒါဝိတ် အူ ဇေန့် ခဲင် မှိုဝ် နီ။ 2 အုဝ် ဒီ ကာဂုဝ်း ဒီ အန် ဒေါ ဟဲ့ နုန် ဒီလှး အန်။ အုဝ် ဒီ ဘော ဘူင် တဲး အန် ကာစွာ၊ တဲး ဂေ အီ ဒူပ် အန် ကော ကာစှူတ့် တဝ် ဂေ။ အုဝ် ဒီ ဝီ ငဝ်း မီ ခုန်ဒီခမ်။ 3 ဟဲ့ ဟွတ့်၊ အုဝ် ဒီ ဝီ ဒိုဝ်း ဒူအီ အီ ဒူပ် အန်၊ တဲး ဂေ ဝီ တး ဒူင် ကွယ် မဲ၊ တဲး န့ ပီ ဒီဘျာ အီ တး ဒူင် ကွယ် အီမာယ် အန်။ ဆေ ဟီ ပွိုန် အာဒါဝိတ် အူ ဝီ၊ န့ ပီ မဲ ဟဲ့ ပွိုန် ဒူအီ ဘောကာဂ့လျီတ်။ တူ လုဝ် တဲး ဒူအီ ကိူန် စှိုမ်။” 4 ဂြုဝ်း တီ န့ ဘော လဝ့် နဝ်း အာဘာဆာလူမ် ဘော ဒူအီ အီ ဘဲန် ဒါ တာင် ကာတဲ ဒူအီ အီဆာရေလ။

5 ပန် တီ အာဘာဆာလူမ် ဝီ တဝ်း၊ “တဲး အာဟူဆေ အီ မုး ဒူအီ အာခီထာ တွိုန် တး၊ တဲး အေ ထူမ် ဘော ဂြုဝ်း အန်။” 6 အာဟူဆေ ဟဲ့ ဟွတ့် တး ဒီ အာဘာဆာလူမ်၊ အာဘာဆာလူမ် ဝီ တဝ်း ဒီ အန်၊ “အာဟီဆောဖေလ ဟဲ့ ဒွါ အာကျာမ် အာငျာန် တဝ်း ပါယ် နီ။ တဲး မဲ ကာလာင်၊ ယုဝ် န့ မွှိုမ် ထူမ် ဂြုဝ်း အန် တီ။”

7 အာဟူဆေ ဝီ ကာလာင် ဒီ အာဘာဆာလူမ် တဝ်း၊ “အာကျာမ် အာငျာန် ပီ ဒွါ အာဟီဆောဖေလ ခါ နီ အာဝ် မွှိုမ်။ 8 မဲ ဟဲ့ နပ် ဂုန့် မဲ။ ဘော အန် ဘော ဒူအီ အန် ဟဲ့ မှုဝ် ဒီ ကာဂုဝ်း။ ဂေ မိုဝ်း နဝ်း ဟာယ် ကာဆဝ်၊ ပီ မာဂြေး ခဲင် ပြဲ ဒေါ ဖာတ် အီ ဒိုဝ်း ဂွန် အန်။ ဒဲင် တီ၊ ဂုန့် မဲ ဟဲ့ မုး ဒါ ဆိုက် အီ ဟဲ့ ကာဂုဝ်း ဆေဆေ၊ ဘော ခဲင် မှိုဝ် နီ၊ အုဝ် ဘော နပ်၊ အန် တူ အိတ် ကာဒူပ် ဒီ ဒါ ဆိုက် အီ ဟဝ်။ 9 အန် ဟဲ့ ဟွတ့် ချြီင် အန် ခဲင် ကာဒဝ် ကာဒါယ် အူ ပ့လုဝ့် အူ ပ့လုဝ့်။ ဆေ အာဝ် ပါယ် တီ မိူဝ်၊ အန် ဟဲ့ ချြီင် နာ တေတ့် နာ တ။ ဆေ အန် ဟီ ငဝ်း ယမ် ဒူအီ မဲ ဒီ အာတ့်၊ အီ ဟီ ယိုဝ် လွင် အာတီ၊ ဂေ ဒီ တဝ်း၊ ‘ဂေ ဟဲ့ ကာဂုဝ်း ဒါ ဆိုက် အာဘာဆာလူမ်၊ ဟဲ့ ဟွတ့် ယမ်၊ ဟဲ့ ဟွတ့် စှိုမ်။’ 10 ပန် တီ ဝီ အီ မိုဝ်း နဝ်း ယ နဝ်း အီ ပီ မာခြင်ဆီ တွိုန်၊ ဂေ ဒီ ဝီ ဘဲန် နဝ်း ဒီတဲတ်။ ခဲ့ ကွယ် ဒူအီ အီဆာရေလ ဘောကာဂ့လျီတ်၊ ဂေ ဒီ ဘော နပ်၊ ဂုန့် မဲ မုး ဒါ ပ့လူမ် တာင်။ ဂေ နပ်၊ ဘော ဂေ အီ ဒူပ် အန် တွိုန် မုး တူတ့် ဒူအီ အီ ကျ အီ ယ။ 11 ကူပ် န့ ပါယ် တီ အုဝ် တဲး အာကျာမ် အာငျာန် ဒီ မဲ၊ မှာန့် မဲ၊ တဲး မဲ ဒဲ့ ဂေ ဒူအီ အီဆာရေလ ဘောကာဂ့လျီတ်၊ စုး ဒီ မိူင် ဒါန် ကော ဇမ် ဒီ မိူင် ဘီရာဆေဘာ၊ တဲး ဂေ တး ကာဇု။ ဆေ ဟီ တိး၊ တဲး ကော ပီ ကာဟာတ့် အီ ကွယ် ခူပ် အိုမ် နမ်မုက်ဆာရာ။ ဂေ ဟီ တး ကာဇု ဒီ မဲ၊ မဲ ဒီ ဘဲန် ဒါ အီ ယဲတ့် ဂေ၊ တဲး ဘေ ဘောကာဂ့လျီတ် ဟာဝ် ကာဂုဝ်း။ 12 အေ ဟီ ယိုဝ် ဒူင် ကွယ် အန် တွိုန်၊ အေ ဒီ ကာဖြူမ် ဒီ ကာဂုဝ်း အူ ဇေန့်၊ တဲး န့ ပီ အိုမ် ဒီငါန် အီ စုဝ်း ဒဲင် ကာဒါယ် နီ။ ပါယ် တီ ဘော အန် ဘော ဂေ အီ ဒူပ် အန် အီ ကွယ် ဒွန် နာ ဒွန် ပ့လုဝ့် အာဝ် ဟူ ဂိတ် ခေါ အူ ဝီ။ 13 ဒဲင် တီ၊ ဆေ အန် ဘော တဝ် ဟာဝ် ခဲင် မိူင် အူ မိူင်၊ ဒူအီ အီဆာရေလ ဂေ ဒီ ဒိုဝ်း တး ဝန်၊ တဲး ဂေ ဒိူတ် ကာပျာတ့် တူတ့် ပီ ဆမ် ဂေ၊ တဲး မိူင် ဘော စုဝ်း တူတ့် ခဲင် ဒီလယ့် ဘ့လဲင် အိုမ်။ မာဝ် အူ ဘူင့် မိူဝ်၊ ကွဲ့ တဲး န့ ဆီ မိုဝ်း။” ခဲ့ တီ အာဟူဆေ ဒွါ အာကျာမ် အာငျာန်။

14 ပန် တီ အာဘာဆာလူမ် ဘော ဒူအီ အီဆာရေလ ဘော တဝ်း၊ “အာကျာမ် အာငျာန် ပီ ဒွါ အာဟူဆေ အီ မုး ဒူအီ အာခီထာ တီ၊ န့ မွှိုမ် လွှိုမ် ပီ ဒွါ အာဟီဆောဖေလ တွိုန်။” ဂေ ထာင် ပါယ် တီ ခုဝ်၊ ဇဝ်ဖြာ ဟဲ့ တဝ်း ဒီ ဝဲန် အာကျာမ် အာငျာန် မွှိုမ် ပီ ဒွါ အာဟီဆောဖေလ တွိုန်၊ တဲး အာဘာဆာလူမ် ဝီ စှိုမ်၊ ဝီ ခမ် မှာပ် အန်။

15 ပန် တီ အာဟူဆေ ကာလာင် ဒီ ဒူအီ အီ လှူ ဒီ ဇဝ်ဖြာ အီ စိူဝ် အာဇာဒူက် ဂါယ် အာဘာထာ တွိုန် တဝ်း၊ “အာဟီဆောဖေလ တွိုန် ဟဲ့ ဒွါ အာကျာမ် အာငျာန် ပါယ် နီ ပါယ် နီ ဒီ အာဘာဆာလူမ် ဘော ဒီ ဂေ ဒါ တာင် ဒူအီ အီဆာရေလ တွိုန်။ အုဝ် မိူဝ် ဟဲ့ ဟွတ့် ဒွါ အာကျာမ် အာငျာန် ပါယ် နီ ပါယ် နီ။ 16 ကူပ် န့ ပါယ် တီ တဲး မဲ စ်ု ဒူအီ ဟာဝ် ခြန် ခြန် ဒူင် ကွယ် အာဒါဝိတ် တဝ်း၊ ‘မှိုဝ် အာတိုဝ် နီ၊ ကွဲ့ ကွယ် ဒီ ဘာင် ကာလုဝ်း အီ ကွယ် ခဲင် ပြဲ တွိုန်။ တဲး မဲ ကာလုဝ်း ဟာဝ် ပွုန် ခြန် ခြန်။ ယုဝ် မဲ ခုန်ဒီခမ် ဘော ဒူအီ အီ ဒူပ် မဲ ဒီ စှိုမ် ဘောကာဂ့လျီတ်။’”

17 အာယုဝ်နာထာန် ဂါယ် အာဟီမာတ် တွိုန် ဂါယ် ယုဝ် အီ ယိုဝ်၊ တူ ယ လိုပ် ဟာဝ် ခဲင် မိူင်။ ခုဝ်၊ ဂါယ် ဟဲ့ ကွယ် ဘ်ု ဒူင် စိူဝ် အေရုဝ်ကေ တွိုန်။ န့ ဘော မိုဝ်း မှာယ် အီဘိုန့် အူ ဝီ၊ အန် ဘော ဟာဝ် ကာလာင် ဒီ ဂါယ်။ ဂါယ် ဘော ဝီ ကာလာင် ဒီ ခုန်ဒီခမ် အာဒါဝိတ်၊ 18 မာလဲ၊ န့ ယီ ဝီ မိုဝ်း ဒူအီ အူ ဝီ၊ အန် ဟဲ့ ယိုဝ် ဒေါ ဟာဝ် ဂါယ်၊ ဘော ဝီ ဟာဝ် ကာလာင် ဒီ အာဘာဆာလူမ်။ ဂါယ် တွိုန် မိူဝ် ဟာဝ် ပီခြန် ပီဟဲ ဂါယ်၊ ဘော ဟာဝ် လိုပ် ခဲင် ကာင် ဒါ အူ ဝီ၊ အီ ကွယ် ခဲင် မိူင် ဘာဟူရိမ် တွိုန်၊ အန် မိုဝ်း အိုမ် ခိုမ် ခဲင် ဝဲင် အန်။ ဂါယ် ဘော လိုပ် ချြီင် ခဲင် အိုမ် ခိုမ် တီ။ 19 အီ မုး ယာ ကာညာ ကာင် တွိုန်၊ အန် ဘော ဒိုဝ်း ဆီဘ့လိုက် အိုမ် ခိုမ် တီ၊ ဆီဘ့လိုက် ဂါယ်၊ ဘော ဝီ ဒိုဝ်း ငှုဝ် ရာယ် နာ ဒဲင်၊ ကွဲ့ တဲး န့ မိုဝ်း အာဆေ နပ် လွင် အန် တီ။

20 ပန် တီ ဒဲစေန့် အာဘာဆာလူမ် ဂေ ဘော တး ဇမ် ကာင် တွိုန်၊ ဘော ဒီမွှတ် တဝ်း၊ “အာဟီမာတ် ဂါယ် အာယုဝ်နာထာန် ကွယ် ဒီ မှဝ်။း” အီဘိုန့် တွိုန် ဝီ တဝ်း၊ “ဂါယ် ဟဲ့ ဟွတ့် ကာလုဝ်း ဘ့လဲင် အိုမ် ဟာဝ်။” ဂေ တွိုန် ဘော ဟြေတ့် မိူဝ်၊ ဂေ အာဝ် ဟူ ယိုဝ်။ ဟဲ့ ဟွတ့်၊ ဂေ ဘော ဝီ ဝေန့် ခဲင် မိူင် ယေရူဆာလဲမ်။

21 ဝါယ် ဟဲ့ ဟွတ့် ဟာဝ် ဂေ တွိုန်၊ ဂါယ် အာ ဝီ ဘော ဝီ လေး ခဲင် အိုမ် ခိုမ် တွိုန်၊ ဘော ဝီ ဟာဝ် ကာလာင် ဒီ ခုန်ဒီခမ် အာဒါဝိတ် တဝ်း၊ “တဲး မဲ ကာလုဝ်း ဘ့လဲင် အိုမ် နီ ခြန် ခြန်။ အာဟီဆောဖေလ တွိုန် ဟဲ့ တဝ်း ပါယ် နီ ပါယ် နီ၊ တဲး မဲ စှိုမ်။” 22 ဟဲ့ ဟွတ့်၊ အာဒါဝိတ် ဘော ဒူအီ အီ ဒူပ် အန်၊ ဂေ ဘော ကာလုဝ်း ဘ့လဲင် အိုမ် ယောဒါန် တွိုန်။ ပြဲ ဘော ဝး၊ အာဝ် ဟူ ဂိတ် ခေါ အူ ဝီ၊ အီ တူ ကာလုဝ်း။

23 အာဟီဆောဖေလ တွိုန် ဘော နပ်၊ ဂေ အာဝ် ဟူ ဒူပ် အာကျာမ် အာငျာန် ပီ တဝ်း အန်၊ အန် ဘော စှိုပ် ကွပ် မာလာ အန်၊ ဝီ ဝိဝ် ဒီ ကာင် အန် ခဲင် မိူင် ဘြိမ် အန်။ အန် ဘော ဝီ မ့ပြာယ် တူတ့် ဘဲန် မျုဝ် ဘဲန် မျုဝ် ခဲင် ကာင် အန်။ ဟဲ့ ဟွတ့်၊ အန် ဝီ ဒိုဝ်း ဝန် ပက် ဟွယ် မဲင် အန်၊ တဲး အန် ယမ်။ ဂေ ဘော ဘ့လေး ဒုဝ် အန် ခဲင် ဘာရေဝ် ဂုန့် အန်။

24 အာဒါဝိတ် ဘော ဟာဝ် ဇမ် ခဲင် မိူင် မာဟာနာအိမ်။ အာဘာဆာလူမ် ဘော ဒူအီ အီဆာရေလ အီ ဒူပ် အန်၊ ဂေ ဘော ကာလုဝ်း အိုမ် ဘ့လဲင် ယောဒါန် တွိုန်။ 25 အာဘာဆာလူမ် ဘော တဲး အာမာဆ ဘဲန် ဒါ ဘုဝ် အီ အိုပ် ဒါ ဆိုက်၊ တဲး အန် ကာဒါင် အာယောဖ တွိုန်။ အာမာဆ တွိုန် မုး ဂွန် အာယေဆာ၊ အီ မုး ဒူအီ အီဆာရေလ။ အီဘိုန့် အန် စိူဝ် နာင် အေဖီဂေလာ အီ မုး ဂွန် အီဘိုန့် အာနာဟာဆာ။ အန် ဘော မုး ဝါ နာင် စေရူယာ အီ မုး မာ အာယောဖ တွိုန်။ 26 အာဘာဆာလူမ် ဘော ဂေ ဒူအီ အီဆာရေလ ဂေ ချ ဒီ မိူင် ဂီလေအာတ်။

27 အာဒါဝိတ် ဘော တး ဇမ် ဒီ မိူင် မာဟာနာအိမ် တွိုန်၊ န့ မုး အာဆောဖီ၊ အီ မုး ဂွန် အာနာဟာဆာ။ အန် တး မိူင် ရာဘာ အီ မုး ဒူင် ကွယ် ဒူအီ အမ်မူန်။ န့ မုး ဘော အာမာခီလာ အီ မုး ဂွန် အာမေလာ၊ အီ ကွယ် ခဲင် မိူင် လောဒေဘာ ဘော အာဘာစီ အီ တး မိူင် ရောကေလိမ်၊ အီ မုး ဒူင် ကွယ် ဂေ ဒူအီ အာမျုဝ် ဂီလေအာတ် တွိုန်။ 28 ဂေ အူယ် ဝီ တီ ဟဲ့ ဒိုဝ်း တး မ့ဘေ၀် ဂေ ဟိုပ် ဘော ဆီလယ့် ဂေ ကာလုဝ့် ဘဲန် မျုဝ် ဘဲန် မျုဝ်၊ ဒွါ ဒီ အာဒါဝိတ်။ ဂေ ဘော ဒိုဝ်း ဒီဂါဝ် ခဝ်ချုင်၊ ဒီဂါဝ် ဆီဂူင့်ရာ ဘော ကာပဲ့ ဘော မာတုး အာဟြိုက်၊ ဘော ဘ့လေ လူမ်၊ ဘ့လေ လူမ် ပြဲ ဘော ဘ့လေ လူမ် ရေန့်၊ 29 ဘော ငါမ် မာဖျီန်၊ ဘျြီင် အိုမ် ပူ မက်၊ ဒုဝ် ဆတ်ဒါဝါ ဘော အိုမ် ပူ မက် အီ ပြာင် ပ့လူမ်။ ဂေ ဒိုဝ်း ဇိုဝ် တီ ဒွါ ဒီ အာဒါဝိတ် ဘော ဒီ ဒူအီ အီ ဒူပ် အန်၊ တဲး ဂေ ပွိုန် ဒီ ဟူမ်။ ဂေ ဟဲ့ ဒိုဝ်း ဒွါ တူတ့် ဇိုဝ် တီ ကူပ် တဝ်း ဂေ၊ “ဒူအီ အာဒါဝိတ် ဟဲ့ နုန်၊ ဟဲ့ ဒီလှး ကာဆဝ်၊ ဟဲ့ အေတ့် ပီ ဒီ ဟူမ်။ ဂေ ဟဲ့ ကာပြာန့် ကူပ် ကွယ် ဂေ ခဲင် ပြဲ ကာဟဝ်း တွိုန်။”