1 အာဒါဝိတ် ဘော ကာလုဝ်း ဟာဝ် ပွုန် အီ စဲက် ဒဲင် နွန် တွိုန်၊ အာဇီဘာ အီ မုး မှာယ် အာမေဖီဘောဆေတ် တွိုန် ဘော ဘ်ု ဒီ ရွုး အာဒါဝိတ်။ အန် ဟဲ့ ဒိုဝ်း မာလုဝ် အာ ဒုဝ် စှိုပ် ဘော ကွပ် အန်။ အန် ဟဲ့ ဒိုဝ်း ဘော ခါမုန် အာ မာယဝ်း ဘူင့်၊ ဘ့လေ မာငုန် ကာဟဝ်း အူ မာယဝ်း ဒီခ့လဲပ်၊ ဘ့လေ ဒီပူ အူ မာယဝ်း ဒီ ခ့လဲပ် ဘော ကာပဝ် အိုမ် မာငုန် အူ ကာပဝ်။ အန် ဟဲ့ ဒါင် တူတ့် ဒဲင် ကာတု မာလုဝ် တွိုန် ဟာဝ် ဘ်ု ဒူပ် န့တေန့်။

2 ခုန်ဒီခမ် ဝီ ဒီမွှတ် အာဇီဘာ တွိုန် တဝ်း၊ “မဲ ဂူင့် ကြုဝ် နီ၊ လုဝ် မာဆေ။း” အာဇီဘာ ဝီ တဝ်း၊ “မာလုဝ် နီ၊ တဲး ဒူအီ ခဲင် န့ဟူမ် မဲ ပဝ့်။ ခါမုန် ဂေ ဘ့လေ နီ၊ တဲး ဂေ ဒူအီ အီ ဒူပ် မဲ ဟူမ်။ အိုမ် မာငုန် နီ၊ တဲး ဂေ အီ တး ခဲင် ပြဲ ကာဟဝ်း၊ အီ ဟဲ့ နုန် ကာဆဝ် ဒျီင်။”

3 ခုန်ဒီခမ် ဝီ တဝ်း၊ “ဂွန် အီမာယ် ဒါ ကာညာ မဲ တွိုန်၊ အန် ကွယ် ဒီ မှဝ်။း” အာဇီဘာ ဝီ တဝ်း ဒီ ခုန်ဒီခမ်၊ “အန် ကွယ် ဒီ မိူင် ယေရူဆာလဲမ်။ ခုဝ်၊ အန် ထာင်၊ အာတိုဝ် နီ ဂေ ဒူအီ အီဆာရေလ ဒီ ဝီ အာပ် ဝိဝ် မာန် မိူင် ပီ ဒွိုမ် အိုပ် ဂုန့် အန်၊ တဲး အန် ဝီ ဘဲန် ခုန်ဒီခမ်။”

4 ခုန်ဒီခမ် ဝီ တဝ်း ဒီ အာဇီဘာ၊ “ခဲ့ မိုဝ်း ကြုဝ်ကြာမ် ဒီ အာမေဖီဘောဆေတ် တွိုန်၊ န့ ဒီ ဝီ ဘဲန် တူတ့် ကြုဝ်ကြာမ် မဲ ဒေါ တီ နီ။” အာဇီဘာ ဝီ တဝ်း၊ “မဲ ခုန်ဒီခမ်၊ မှာန့်၊ တဲး မဲ ကာဝေ အုဝ် ဆေဆေ ပါယ် တီ။”

5 အာဒါဝိတ် ဘော ဝီ တး ဇမ် ဒီ မိူင် ဘာဟူရိမ်၊ န့ ဝီ မိုဝ်း ဒါ အူ ဝီ၊ အန် စိူဝ် အာဆီမီ။ အန် မုး ဂွန် အာဂီရာ အီ မုး ဝေါဝဲ အာဆောလူ တွိုန်။ အန် ဘော တး ဘော ဒိူင် ဘော အေး အာဒါဝိတ် ဒေါ ဟာဝ် အန် ဒူပ် န့တေန့်။ 6 အန် ယိုဝ် ဂေ ဒါ ဆိုက် အာဒါဝိတ် ဘော ဂေ အီ ဘ်ု အန်၊ ဂေ ဘောကာဂ့လျီတ် ကွယ် ရိုမ် ဒူပ် အာဒါဝိတ်။ အန် ယီ တူ ယုဝ် ဂေ၊ အန် ယ ဒိုဝ်း မာဝ် ဝိုန့် အာဒါဝိတ် ဂေ အာမူ အာမာတ် အန်။ 7 အာဆီမီ ဘော ဒိူင် တဝ်း၊ “ဟာဝ်၊ ဟာဝ်၊ ဘေ အီ ဟာယ်၊ ဘေ အီ ဆီမာ ငဝ်း အီ။ 8 ဘေ ဟဲ့ ငဝ်း ကိူန် ဒူအီ အာဆောလူ။ ဒေါ တီ နီ၊ ဇဝ်ဖြာ ဒီ ဝီ ဝျီ့ ဒီ ဘေ ပါယ် တီ။ မဲ ဟဲ့ ကာဒါင် ဒုဝ် အန်၊ ဟဲ့ ဘိုင် မာန် မိူင် အန်။ ဇဝ်ဖြာ ဟဲ့ ဝီ ဒိုဝ်း မာန် မိူင် မဲ၊ ဒီ ဝီ အာပ် ဒွါ ဒီ ဂွန် မဲ အီ မုး အာဘာဆာလူမ်။ ကူပ် ဟဲ့ ဒွိုမ် ငဝ်း မဲ ဒူအီ ကိူန်၊ မဲ လုဝ် ခမ် ဇိုဝ် တီ။” 9 အာဖီဆေ အီ မုး ဂွန် နာင် စေရူယာ၊ အန် ဘော ဝီ ကာလာင် ဒီ ခုန်ဒီခမ် တဝ်း၊ “ဒူအီ နီ ပီ မာဆုဝ် ယမ်။ ကူပ် န့ ပါယ် မှဝ်၊ မဲ တဲး အန် ပွိုန် ဒီ ဒိူင် မဲ ခုန်ဒီခမ် ပါယ် တီ။း တဲး အုဝ် ဟာဝ် ဒဲပ် ဝဲန် ဂိန့် အန်။” 10 ခုန်ဒီခမ် ဝီ တဝ်း၊ “အိုယ် ဂွန် နာင် စေရူယာ၊ အာဝ် ဘာ့ မဲ။ တဲး အန် ဒိူင်၊ အာဝ် လိူက်။ ဆေ ဇဝ်ဖြာ ဟဲ့ ကာလာင် ဒီ အန် တဝ်း၊ ‘တဲး မဲ အေး ဒိူင် အာဒါဝိတ်။’ အာဝ် မိုဝ်း အာဆေ အီ ပွိုန် တဝ်း၊ ‘ကူပ် မာဆေ မဲ ဘူင် ပါယ် နီ။’”

11 ဟဲ့ ဟွတ့်၊ အာဒါဝိတ် ပီ ဝီ ကာလာင် ဒီ အာဖီဆေ ဘော ဒီ ဂေ အာမူ အာမာတ် အန် တဝ်း၊ “ဘေ ယွတ် ဂွန် အာရာင် အုဝ်၊ အန် ဟဲ့ ဂွိုတ် တး ဒီ အုဝ်၊ ယီ ဘော ဝီ ဟြေတ့် ဒီ ငဝ်း အာဆာက် အုဝ်။ ဒူအီ အာမျုဝ် အာဘေန်ယာမ် တွိုန်၊ အန် ဒီ ဘော ဝဲ ဆီ ဘူင်။ အာဝ် လိူက်၊ တဲး အန် ဒိူင်။ ဇဝ်ဖြာ ဟဲ့ ခ့ဝါင် အန် ဘူင် ဇိုဝ် တီ။ 12 ဇဝ်ဖြာ အီ ဒီ ယွတ် လွင် အီ ဒုက် ဒီ အုဝ်။ အန် ဘော ယိုဝ် လွင် ဒူအီ ဝီ တီ ဒိူင် အုဝ် အာတိုဝ် နီ။ တဲး ဘေ ယွတ်၊ ယုဝ် ဇဝ်ဖြာ ဒီ ဝီ ဘူင် ဝျီ့ အီ ဘွတ် အီ မွှိုမ် ဒီ အုဝ်။”

13 ပန် တီ အာဒါဝိတ် ဘော ဒူအီ အန်၊ ဂေ ဝီ ဟာဝ် ဒူပ် န့တေန့် ဂေ။ အာဆီမီ ဝီ ဟာဝ် ဒူပ် န့တေန့် ဒီ နွန် ပေါ အူ ဘ့လာက် ဘော ဒိူင် ဘော အေး ဒေါ ဟာဝ် အန်။ အန် ဘော ဒိုဝ်း မာဝ် ဝိုန့်၊ ဒိုဝ်း ဘော ကာပုး ဘြတ် ဒီ ဂေ။ 14 ခုန်ဒီခမ် ဘော ဂေ အီ ဒူပ် အန် ဟဲ့ နုန် ကာဆဝ်။ ဂေ ဘော တး ဇမ် ခူပ် ဘ့လဲင် ယောဒါန်၊ ဂေ ဘော ဒီလှဝ် နုန် ဂေ။

15 န့ ယီ မုး အာဘာဆာလူမ် တွိုန်၊ ဘော အန် ဘော ဒူအီ အီဆာရေလ၊ ဂေ ဟဲ့ ဝီ တး ဇမ် ဒီ မိူင် ယေရူဆာလဲမ်၊ ကွယ် ခဲင် ဟုဝ်။ ဘော အာဟီဆောဖေလ ဟဲ့ တး ဒူပ် အန်။

16 ပန် တီ အာဟူဆေ အီ မုး ဒူအီ အာခီထာ၊ အီ မုး ဂိုက် အာဒါဝိတ် တွိုန်၊ အန် မိူဝ် ဟဲ့ တး ဇမ် ဒူင် ကွယ် အာဘာဆာလူမ် တွိုန်။ အန် တဝ်း ဒီ အာဘာဆာလူမ်၊ “တဲး မဲ ခုန်ဒီခမ် ကွယ် ဒါခိုယ် ဆေဆေ။ တဲး ဘော အာဆာက် မဲ ခုန်ဒီခမ် တူင့်။”

17 အာဘာဆာလူမ် ဝီ ဒီမွှတ် အာဟူဆေ တဝ်း၊ “အုဝ် ထာင်၊ မဲ ရွက့် ဂိုက် မဲ။ န့ ပါယ် မှဝ် ပီ တူ ကွယ် မဲ ဒူပ် အန်။း” 18 အာဟူဆေ ဝီ တဝ်း၊ “မဲ ကွဲ့ တဝ်း ပါယ် တီ။ အုဝ် ခမ် ဒီ ဘဲန် မှာယ် အီ မုး ဝီ ပီ ရဝ်း ဇဝ်ဖြာ၊ ဘော ပီ ရဝ်း ဒူအီ အီဆာရေလ ဘောကာဂ့လျီတ်။ အုဝ် ဒီ ဒူပ် ဝီ တီ။ 19 ဒဲင် နီ န့ ကာအာပ် အုဝ် ဘဲန် မှာယ် ဂွန် အီ ပ့လု ဂုန့် အန်။ အုဝ် ဟဲ့ ဒွိုမ် ခမ် ဒီ ဘဲန် မှာယ် ဂုန့် မဲ တွိုန်။ ဒေါ တီ နီ၊ အုဝ် ဒီ ခမ် ဒီ ဘဲန် ဘော မှာယ် မဲ ပါယ် တီ။”

20 ပန် တီ အာဘာဆာလူမ် တဝ်း ဒီ အာဟီဆောဖေလ၊ “တဲး မဲ ကာလာင် အာကျာမ် အာငျာန် မှဝ် ဒီ ပါယ် ဒီ ဘူင်။”

21 အာဟီဆောဖေလ ဝီ တဝ်း၊ “တဲး မဲ ဝီ ဟာဝ် ဒူင် ကွယ် ဇိူင် နာင် ပီ အုန် ဂုန့် မဲ တဲး န့ ဘ်ု ဟုဝ် အန် တွိုန်၊ တဲး မဲ လာယ် ဂေ။ ပန် တီ ဂေ ဒူအီ အီဆာရေလ ဘောကာဂ့လျီတ် ဟီ ယိုဝ်၊ ကော နပ် လွင် ဂုန့် မဲ ဟဲ့ ရူ ဒီ မဲ၊ ဟဲ့ ဝဲန် ကာဒတ် မဲ။ ဟဲ့ ဟွတ့်၊ ဂေ ဒီ ဝီ ဒူပ် မီ မဲ၊ တဲး မဲ ဝီ မိုဝ်း ဟဲန့် ကိူန်။” 22 ဂေ ဘော ဒိုဝ်း ထိုပ် ဘိက်၊ ဘ့လေး နာ ဒဲင် ကာတု ဟုဝ် ဘော တဲး အာဘာဆာလူမ် ဟုဝ့် ကွယ် နာ ဒဲင်၊ ဝီ လုတ့် ဇိူင် နာင် ဂုန့် အန် တွိုန်၊ တဲး ဒူအီ အီဆာရေလ ယိုဝ်။

23 ဒေါ အန် တီ အာကျာမ် အာငျာန် ပီ ဒွါ အာဟီဆောဖေလ၊ န့ ပီ ဂြုဝ်း ပီ ကာလာင် ဇဝ်ဖြာ ဆေ အီ ဒီမွှတ် အန်။ ပါယ် တီ အာဒါဝိတ် ဂါယ် အာဘာဆာလူမ် ညှိုမ် အာကျာမ် အာငျာန် ပီ ဒွါ အာဟီဆောဖေလ။