1 ဝါယ် တီ အာဘာဆာလူမ် ဘော တဲး အီ ဘူင် လက်လဝ် မင်ပြွင့်။ အန် ဘော စ်ု အီမာယ် ဖန် ဂိုဝ် ဝီ တဲး ဂေ ကာဘ့လဲပ် ယဲတ့် နာ အာတ့် အန်။ 2 အန် ဘော ယိတ့် ဆိန့်ဝး စေဝ် စေဝ်၊ စွင့် ဒူပ် န့တေန့် ဘာင် မာလုဝ်း မိူင်။ ဆေ န့ ဘော မိုဝ်း ဒူအီ အီ တး ကာလာင် အာမူ အန် တဲး ခုန်ဒီခမ် ဆုင်ဖျာတ်၊ အာဘာဆာလူမ် ဘော ဒီမွှတ် အန် တဝ်း၊ “မဲ မုး ဒူအီ မိူင် မှဝ်။း” ပန် တီ ဒူအီ ဝီ တွိုန် ဝီ တဝ်း၊ “အုဝ် မုး ဒူအီ ခြိုဝ် အီဆာရေလ အူ မျုဝ် အူ မျုဝ်။” 3 ဟဲ့ ဟွတ့်၊ အာဘာဆာလူမ် ဝီ တဝ်း ဒီ အန်၊ “ယွတ်၊ အာမူ မဲ နီ ဟဲ့ မှာန်။ မာလဲ၊ အာဝ် မိုဝ်း အာဆေ အီ ပွိုန် ကာလာင် တဲး ခုန်ဒီခမ် ဝီ ထူမ် လွင် အာမူ မဲ နီ။” 4 ပါယ် တီ အာဘာဆာလူမ် ဘော တဝ်း၊ “ဆေ အုဝ် ဒီ ဘော ဘဲန် ဒါ တာင် အီ ဆုင်ဖျာတ် ဒါရာ ခဲင် မိူင် နီ၊ ခဲ့ ကွယ် ဂေ အီ မိုဝ်း အာမူ၊ ဂေ ဒီ ပွိုန် တး ဒီ အုဝ်။ အုဝ် ဒီ ဆုင်ဖျာတ် အာမူ ဂေ၊ တဲး န့ ဒူပ် ဒါရာ။”

5 န့ ဘော မိုဝ်း မင် အီ တး ကာတတ် အန်၊ တဝ်း ဒီ ကြိုပ် အန်။ အန် ဘော ပါ ဂေ တီ၊ ဝီ အုး ဂေ။ 6 အာဘာဆာလူမ် ဘော ဘူင် ပါယ် တီ ဒီ ဂေ ဒူအီ အီဆာရေလ အီ တး ဒီ ခုန်ဒီခမ် တွိုန်၊ တဲး ဂေ ကာပ့လု နဝ်း၊ တဲး ဂေ ဝီ ရွက့် အန်။ 7 ဝါယ် တီ၊ ဟဲ့ ဝီ ပွိုန် ဖွုန် ဆီနမ်၊ အာဘာဆာလူမ် ဘော ကာလာင် ဒီ ခုန်ဒီခမ် တဝ်း၊ “မှာန့်၊ တဲး မဲ ခ့ဝါင် အုဝ် ဟာဝ် ဒီ မိူင် ဟေဘြုဝ်၊ တဲး အုဝ် ဟာဝ် ဘူင် ခဲ့ ပီ ဒွိုမ် ဒွါ အုဝ် ကာဒိက် ဆတ်ဇာ ဒီ ဇဝ်ဖြာ။ 8 ဒေါ ကွယ် အုဝ် ဒီ မိူင် ဂေဆူရာ ခဲင် မိူင် အာရာမ် တွိုန်၊ အုဝ် ဟဲ့ ဒွိုမ် ဒွါ ကာဒိက် ဆတ်ဇာ ဒီ ဇဝ်ဖြာ။ အုဝ် ဟဲ့ တဝ်း၊ ‘ဆေ ဇဝ်ဖြာ ဘော တဲး အုဝ် ဝီ တး ဒီ မိူင် ယေရူဆာလဲမ် မိူဝ်၊ အုဝ် ဒီ လှူ ဒီ ကြိုပ် ဇဝ်ဖြာ ခဲင် မိူင် ဟေဘြုဝ်။’”

9 ခုန်ဒီခမ် မိူဝ် ဝီ တဝ်း၊ “တဲး မဲ ဟာဝ် ဒါခိုယ် ဟာဝ် ဆီချာ။” ပန် တီ အာဘာဆာလူမ် ဘော ဟာဝ် ဒီ မိူင် ဟေဘြုဝ်။

10 မာလဲ၊ အာဘာဆာလူမ် ဝီ စ်ု ဒါလာမ်၊ တဲး ဂေ ပြာ ဒီ ဟာဝ် ကာလာင် ဒီ ဒူအီ ခဲင် မိူင် အီဆာရေလ ဒွန် နာ ဒွန် ပ့လုဝ့်။ အန် တဝ်း၊ “ဆေ ဘေ ဟီ ယိုဝ် ဟမ် ဘုတ် နိုင် ပဲ၊ တဲး ဘေ တဝ်း၊ ‘အာဘာဆာလူမ် ဟဲ့ ဘဲန် ခုန်ဒီခမ် ဒီ မိူင် ဟေဘြုဝ်။’” 11 န့ ယီ မိုဝ်း အီမာယ် အာ မာယဝ်း ဝီ အီ မုး ဒူအီ ပဲ့ ဟဲ့ ဘာင် အာဘာဆာလူမ်၊ ဂေ ဘော လေး ခဲင် မိူင် ယေရူဆာလဲမ် ဟာဝ် ဒူပ် အန်။ ဂေ မိုဝ်း နဝ်း ဒါခိုယ်၊ တူ နပ် လွင် ပဲ့ ဟဲ့ ခြာမ် အန်။ 12 ဒေါ ဘ့လေး အာဘာဆာလူမ် ပီ ဒီ လှူ အန် တွိုန်၊ အန် စ်ု ဂေ ဟာဝ် ဒဲ့ ဘော အာဟီဆောဖေလ အီ မုး ဒူအီ ခဲင် မိူင် ကီလုဝ်၊ အီ မုး အာမာတ် အာဒါဝိတ်၊ တဲး ဘော အန် ဟာဝ် ဒီ ဒူင် ကွယ် အာဘာဆာလူမ်။ ပါယ် တီ ဒူအီ ဂေ အီ ဒူပ် အာဘာဆာလူမ် ဟဲ့ ကြဲ ဒီ ဘြဲ ကိူန်၊ တဲး ပီ ဆီ ဘူင် အန် ကြဲ ဒီ အွင်။

13 န့ ယီ မိုဝ်း ဒူအီ အူ ဝီ အီ တး ကာလာင် ဒီ အာဒါဝိတ် တဝ်း၊ “နဝ်း ဒူအီ အီဆာရေလ ဘောကာဂ့လျီတ် ဟဲ့ ဟွတ့် ဟာဝ် တူတ့် ဒူပ် အာဘာဆာလူမ်။”

14 အာဒါဝိတ် မိူဝ် ဝီ ကာလာင် ဒီ အာမူ အာမာတ် အန် အီ ကွယ် ဒူပ် အန် ခဲင် မိူင် ယေရူဆာလဲမ် တဝ်း၊ “အေ လုဝ် တဝ်။ ဆေ အေ တူ တဝ်၊ အေ တူ လွတ် ယမ် ဒီ အာဘာဆာလူမ်။ အေ လုဝ် တဝ် အူ ဇေန့်၊ ယုဝ် အန် ဒန် တး ခြပ် အေ။ အန် ဒီ ဘူင် တဲး အေ စှိုမ်။ အန် ဒီ ဘော ကာဂုဝ်း ဒီ မိူင် အေ၊ တဲး ဒွန် အီ ဇမ် ဒုက်။”

15 ဂေ အာမူ အာမာတ် ဝီ တဝ်း၊ “အိုဝ်၊ ယေ ဘူင် ဒူပ် တူတ့် ဒွန် မျုဝ် ပီ ဆုင်ဖျာတ် မဲ ခုန်ဒီခမ်။”

16 အန် ဘော ယဲတ့် ဒွန် အီ အီ ကွယ် ခဲင် ဟုဝ် အန်၊ လေး ဟာဝ်။ အန် ယီ အုန် အီဘိုန့် တျီ့ အန် ဂိုဝ် ဝီ၊ တဲး ဂေ ဘ်ု ဟုဝ် တွိုန်။ 17 ပန် တီ ခုန်ဒီခမ် ဘော ဒူအီ ဂေ အီ ဒူပ် အန်၊ ဂေ ဘော လေး ဟာဝ် ဒီ ပ့လဝ်၊ ဝီ ချ ဘာင် ဂေ ဒူင် အီ ဟဲ့ ရာမ် ကာတူင့်။ 18 ခဲ့ ကွယ် ဒူအီ အီ ဒူပ် အန် ဘော ကာလုဝ်း ဟာဝ် တဲး ဂေ ဟာဝ် ဒီ အာတ့် အန်။ န့ မုး ဒူအီ ကထ ဒဝ် မာယဝ်း ဝီ အီ ဟဲ့ ဒူပ် အာဒါဝိတ် တး မိူင် ဂါထ တွိုန် ဘော ဂေ အီ ဘ်ု အာဆာက် ခုန်ဒီခမ်။

19 ခုန်ဒီခမ် ဝီ ကာလာင် ဒီ အာအီထာယ အီ မုး ဒူအီ အီ ယဲတ့် ဂေ ဒူအီ ကိတ်တီ တဝ်း၊ “မှဝ် န့ ပါယ် ပီ ဟာဝ် မဲ ဒူပ် အုဝ်။း တဲး မဲ ဝီ ဝေန့် ကွယ် ဒူပ် ခုန်ဒီခမ် မဲ အီ စိူဝ် အာဘာဆာလူမ်။ မဲ မုး ဒူအီ အာမျုဝ် ဟဝ် အီ ဟဲ့ တဝ် တ မိူင် မဲ၊ တး ဘဲန် ခဲတ့် မိူင် ယေ။ 20 ကူပ် ဆွ့ တး မဲ အာမှိုဝ်၊ အာတိုဝ် မဲ တူ လုဝ် ဝီ လဲ ဝိဝ် လဲ ဝေန့် ဒူပ် အုဝ်။ အုဝ် မိူဝ် တူ နပ် ယုဝ် အုဝ် ဒီ ဟာဝ် နာ မှဝ်။ တဲး မဲ ဝီ ဒဲ့ ဒါ ဆိုက် အာမျုဝ် မဲ၊ တဲး ဘေ ဝီ ဝေန့်၊ တဲး ဘေ မိုဝ်း နဝ်း ရွက့် နဝ်း ဆိူဝ် ဆေဆေ။”

21 အာအီထာယ တွိုန် ဝီ တဝ်း ဒီ ခုန်ဒီခမ်၊ “ဇဝ်ဖြာ ဟဲ့ နပ် အုဝ် တူ ကာလုဝ်။ တဲး ဘော မဲ ခုန်ဒီခမ် နပ်၊ ဂြုဝ်း အုဝ် ဟဲ့ မှာန် ဟဲ့ မုး။ မဲ ဘော ကွယ် ဒီ မှဝ်၊ ဆေ အုဝ် ဘော ပွိုန် ဒီ ကွယ် ဒါခိုယ် ဒူပ် မဲ၊ ဆေ အုဝ် ဒီ ဘော ယမ် ဒူပ် မဲ၊ အာဝ် လိူက်။ အုဝ် ယီ တူ ကာဂဝ်း ဒီ မဲ ဒေါ မှဝ်။”

22 အာဒါဝိတ် ဝီ ကာလာင် ဒီ အာအီထာယ တွိုန် တဝ်း၊ “မဲ ကာလုဝ်း ဟာဝ် ဒီ အာတ့် အုဝ်။” ပန် တီ အာအီထာယ အီ မုး ဒူအီ ကိတ်တီ တွိုန် ဘော ဂေ ဒူအီ အာမျုဝ် အန် ဘော န့ဟူမ် ဂေ၊ ဂေ ဘောကာဂ့လျီတ် ဘော ဟာဝ် ရိုမ် ဒူပ် အာဒါဝိတ်။

23 ဒူအီ ရဝ် ဒူအီ ကာင် ဂေ ဘောကာဂ့လျီတ် ဘော ယာမ် တာင်။ ဒူအီ ဂေ တွိုန် ဘော ကာလုဝ်း ဟာဝ်။ ဟဲ့ ဟွတ့်၊ ဘော ခုန်ဒီခမ် ဘော ကာလုဝ်း အိုမ် ဘ့လဲင် ခီဒါရူန် တွိုန်။ ခဲ့ ကွယ် ဒူအီ ဂေ တွိုန်၊ ဂေ ဘော ဝီ ဟာဝ် ဒူပ် န့တေန့် နာ ခဲင် ပြဲ ကာဟဝ်း။

24 အာဘာထာ ဘော အာဇာဒူက် ဘော ဂေ ဒူအီ အာလေဝီ ဟဲ့ ဒူပ် အန်။ ဂေ ဟဲ့ ဂွတ် တး ဇီဒိူက် ဇဝ်ဖြာ ဘော ဘ့လေး အုန် ဇီဒိူက် ဒီ ခူပ် ဘ့လဲင် အိုမ် တွိုန်။ အာဘာထာ ဘော လှူ ပီ ဒီ လှူ တဲး န့ ကော ဇမ် ပန် ဒီ လေး ဒူအီ ဘောကာဂ့လျီတ် ခဲင် မိူင် ယေရူဆာလဲမ်။

25 ခုန်ဒီခမ် ဝီ ကာလာင် ဒီ အာဇာဒူက် တွိုန် တဝ်း၊ “မဲ ဝီ ဒိုဝ်း ဇီဒိူက် ဇဝ်ဖြာ ဝီ ဝေန့် အုန် ခဲင် မိူင်။ ဆေ ဇဝ်ဖြာ ဘော ဂေဇူ အုဝ်၊ အန် ဒီ တဲး အုဝ် ဝီ တး။ အန် ဒီ တဲး အုဝ် ဝီ ယိုဝ် ဒူင် ကွယ် ဇီဒိူက် ဇဝ်ဖြာ တီ။ 26 ဆေ ဇဝ်ဖြာ ယီ တူ ကာဝေ အုဝ်၊ တူ အိုင် အုဝ်၊ တဲး အန် ဇဝ် ဘူင် ပီ ဆီ ဘူင် အန် ဒီ အုဝ်။” 27 ခုန်ဒီခမ် ဝီ ကာလာင် ဒီ ဒူအီ လှူ ဒီ ဇဝ်ဖြာ အီ စိူဝ် အာဇာဒူက် တွိုန် တဝ်း၊ “အုဝ် ထာင် မဲ မုး ဒူအီ နပ် ဒီ ဘျာန် ဂြုဝ်း ဇဝ်ဖြာ။ တဲး မဲ ဒိုဝ်း ဂွန် မဲ အီ စိူဝ် အာဟီမာတ် ဘော အာယုဝ်နာထာန် အီ မုး ဂွန် အာဘာထာ တွိုန်၊ တဲး ဘော မဲ ဘော အာဘာထာ ဒဲ့ ဂွန် ဘာယ် အာ ဝီ၊ တဲး ဘေ ဝီ ဝေန့် ခဲင် မိူင်။ 28 အုဝ် ယီ ကွယ် ဘ်ု ဒီ ဘာင် ကာလုဝ်း အိုမ် ဘ့လဲင် ယောဒါန် အီ ဟာဝ် ခဲင် ပြဲ ကာဟဝ်း တွိုန်၊ တဲး ဒူအီ ပီ တိုယ် မဲ ကော တး ဇမ် ဒီ အုဝ်၊ တဲး အန် ကာလာင် လွင် ပီ ဒီ ဘူင် အာဘာဆာလူမ် ဒီ အုဝ်။” 29 အာဒါဝိတ် ဟဲ့ ဟွတ့် ကာလာင် ဂြုဝ်း တီ၊ အာဇာဒူက် ဘော အာဘာထာ ဘော ဒိုဝ်း ဇီဒိူက် ဇဝ်ဖြာ၊ ဝီ ဝေန့် တိုယ် ဒီ မိူင် ယေရူဆာလဲမ်၊ တဲး ဂေ ဘော ကွယ် ဒီ တီ။

30 အာဒါဝိတ် ဘော ဝီ ဟုဝ့် ဒီ နွန် အီ မိုဝ်း ဟေ နာမန်။ အန် ဘော ယာမ် ဟာဝ် ဒူပ် န့တေန့်၊ ဘော ကာမှုဝ့် ဂိန့် အန်။ ခူဒိန့် မိူဝ် အန် တူ စှိုပ်။ ဒူအီ အီ ဒူပ် အန် ဂေ ဘောကာဂ့လျီတ် မိူဝ် ကာမှုဝ့် ဂိန့် ဂေ၊ ယာမ် ဒေါ ဟုဝ့် ဒူပ် န့တေန့် တွိုန်။ 31 န့ ဘော မိုဝ်း အူ ဝီ ကာလာင် ဒီ အာဒါဝိတ် လွင် အာဟီဆောဖေလ ဟဲ့ ဝီ ဟာဝ် ဒူပ် အာဘာဆာလူမ်။ ပန် တီ အာဒါဝိတ် ဝီ ဆာခိုဝ် ဒီ ဇဝ်ဖြာ တဝ်း၊ “မှာန့် အာကျာမ် အာငျာန် အာဟီဆောဖေလ တီ ပီ ဒီ ဒွါ အန် ဒီ အာဘာဆာလူမ်၊ တဲး န့ ဘဲန် အီ တူ မွှိုမ်။”

32 အာဒါဝိတ် ဘော တး ဇမ် ဒဲင် ကာဒဲ့ နွန်။ ဒေါ တး အန် ဒူင် ကြိုပ် ဆာခိုဝ် အီ ဒီ ဇဝ်ဖြာ၊ အာဟူဆေ အီ မုး ဒူအီ အာခီထာ တွိုန် ဟဲ့ တး ဇမ် ဒူင် ကွယ် အန်။ အန် ဟဲ့ ကာယာတ့် ဆီတုဝ် တာင် အန်၊ ဘော ဒိုဝ်း ကာပုး ဟပ် ဒဲင် ဂိန့် အန်၊ ဘော ဘ်ု ဒီ ရွုး အာဒါဝိတ်။ 33 အာဒါဝိတ် ဝီ တဝ်း ဒီ အန်၊ “ဆေ မဲ ဘော ဟာဝ် ဒူပ် အုဝ်၊ မဲ ဒီ တဲး န့ ညှာပ် ကာဆဝ် ဒီ အုဝ်။ 34 တဲး ဘော မဲ ဝီ ဝေန့် ခဲင် မိူင်၊ ကာလာင် ဒီ အာဘာဆာလူမ် တဝ်း၊ ‘အိုယ် မဲ ခုန်ဒီခမ်၊ ဒေါ တီ နီ အုဝ် ဒီ ခမ် ဒီ ဘဲန် မှာယ် မဲ၊ တဲး န့ ပီ ဒေါ ဘဲန် အုဝ် မှာယ် ဂုန့် မဲ အာတ့် နီ တွိုန်၊ ဒေါ ဒွါ အုဝ် အာကျာမ် အာငျာန် ဒီ အန်။’ ဆေ မဲ ဘူင် ပါယ် တီ မဲ ဝီ ပွိုန် ဒီ စွယ် အုဝ်။ မဲ ပွိုန် ဒီ ဝဲန် အာကျာမ် အာငျာန် အာဟီဆောဖေလ တွိုန်။ 35 န့ ဘော မိုဝ်း ဒူအီ လှူ ဒီ ဇဝ်ဖြာ အီ စိူဝ် အာဇာဒူက် ဂါယ် အာဘာထာ၊ ဂါယ် ဒီ ကွယ် ဒူပ် မဲ။ ခဲ့ ပီ ယိုဝ် မဲ ခဲင် ဟုဝ်၊ မဲ လုဝ် ဝီ ကာလာင် တူတ့် ဒီ အာဇာဒူက် ဂါယ် အာဘာထာ တွိုန်။ 36 န့ မိုဝ်း ဂွန် ဂါယ် အာ ဝီ၊ ဂါယ် စိူဝ် အာဟီမာတ် ဂါယ် အာယုဝ်နာထာန်၊ ဂါယ် အီ ဒီ ဝီ တး ကာလာင် တူတ့် ဒီ အုဝ်။”

37 ပန် တီ အာဟူဆေ အီ မုး ဂိုက် အာဒါဝိတ်၊ အန် ဘော ဝေန့် ဒီ မိူင် ယေရူဆာလဲမ်။ အန် ဟဲ့ ဟွတ့် ဇမ်၊ ဘော အာဘာဆာလူမ် ဟဲ့ ဝီ လိုပ် ဟာဝ် ခဲင် မိူင် ယေရူဆာလဲမ်။