1 အာယောဖ အီ မုး ဂွန် နာင် စေရူယာ တွိုန်၊ အန် ဝီ နပ် လွင် ခုန်ဒီခမ် ဟဲ့ နမ်လှုဝ်း ဒီကေန် ဂွန် အီမာယ် အန် အီ စိူဝ် အာဘာဆာလူမ် တွိုန်။ 2 အာယောဖ ဘော စ်ု အီ ဟာဝ် ဒီ မိူင် ဒေကော၊ တဲး ဂေ ဒဲ့ တး အီဘိုန့် အီ လွှက့် အီ မိုဝ်း အာငျာန်၊ တဲး အန် တး။ ဟဲ့ ဟွတ့်၊ အန် ကာလာင် ဒီ အီဘိုန့် တီ တဝ်း၊ “မဲ ညိုင်ရာင် မိုဝ်း နဝ်း တူ ဒါခိုယ်၊ ဘော ညိုင်ရာင် က့လိုဝ်၊ ဘော တာ ခြိုင် ပီ ဒူအီ ဂိန်။ မဲ မိူဝ် တူ လုဝ် ဖဝ်း နာမန်။ မဲ ဘူင် ပီ အီဘိုန့် အီ ဟဲ့ က့လိုဝ် လှေန့်၊ ကူပ် ဟဲ့ မိုဝ်း ဒူအီ ယမ်။ 3 မဲ ဟာဝ် ဒူင် ကွယ် ခုန်ဒီခမ်၊ ကာလာင် ပီ တဝ်း အုဝ် နီ ဒီ အန်။” ဟဲ့ ဟွတ့်၊ အာယောဖ ဝီ ခဲ ဂြုဝ်း ပီ ဒီ လုဝ် ကာလာင် ဒီ အီဘိုန့် တွိုန်။

4 ပန် တီ အီဘိုန့် အီ တး မိူင် ဒေကော တွိုန်၊ အန် ဘော ဟာဝ် ဒူင် ကွယ် ခုန်ဒီခမ်။ အန် ဘော မုတ် ဂိုပ် ဒဲင် ကာဒါယ်၊ ကြိုပ် ခုန်ဒီခမ် ဘော တဝ်း၊ “မဲ ခုန်ဒီခမ် တာင်၊ မှာန့် မဲ ကာဝေ စွယ် အုဝ်။” 5 ခုန်ဒီခမ် ဝီ ဒီမွှတ် တဝ်း၊ “မဲ မိုဝ်း ပီ လုဝ် မာဆေ။း” အန် ဝီ ကာလာင် တဝ်း၊ “အုဝ် ဒဲစေန့် မဲ နီ၊ အုဝ် ဟဲ့ ဘဲန် ယာ ဆီပြး။ အီမာယ် အုဝ် ဟဲ့ ယမ်။ 6 အုဝ် မိုဝ်း ဂွန် အာ ဝီ၊ ဂါယ် ဟဲ့ လာယ် ကာလုတ့်။ အာဝ် မိုဝ်း အာဆေ အီ ခြဲ ဂါယ်။ အူ ဝီ ဟဲ့ ဘူင် တဲး ပေါ အူ ဝီ ကော ယမ်။ 7 ဒေါ တီ နီ၊ ဘီနွင် ဝေါဝဲ အုဝ်၊ ဂေ ဝီ တဝ်း ဒီ အုဝ်၊ ‘မဲ လုဝ် ဒိုဝ်း တး ဝီ အီ ဟဲ့ ငဝ်း အီကတ် အန် တွိုန်၊ အာပ် ဒွါ ဒီ ယေ၊ တဲး ယေ ငဝ်း ဘော အန်၊ ကွဲ့ ဟူ တဲး န့ မိုဝ်း အီ ပ့လု အီမာယ် မဲ။’ ဆေ အုဝ် ဟီ ဘူင် ပါယ် တီ အုဝ် အာဝ် ဟူ မိုဝ်း အာဆေ။ န့ ပီ ဂေ ဘျတ် တူတ့် ငဝ် အီ ဆီ ကွယ် ဒီ ကာဝှါင် အုဝ်။ အီမာယ် အုဝ် တီ မိူဝ်၊ အာဝ် ဟူ မိုဝ်း စိူဝ်။ ဒဲင် ကာဒါယ် နီ ဘော လှုက်လှာန် အန် အာဝ် ဟူ မိုဝ်း အီ လှုဝ်း ဂေ။” အန် ဟဲ့ ဟွတ့် တဝ်း ပါယ် တီ၊ 8 ခုန်ဒီခမ် ဝီ တဝ်း ဒီ အီဘိုန့် တွိုန်၊ “တဲး မဲ ဝီ ဝေန့် ဒီ ကာင် မဲ၊ အုဝ် ဒီ ဘ်ု ကွဲ့ တဲး အီ ဘူင် အီ တူ မွှိုမ် ဒီ ဂွန် မဲ တီ။”

9 အီဘိုန့် အီ တး ခဲင် မိူင် ဒေကော တွိုန်၊ အန် ဝီ ကာလာင် ဒီ ခုန်ဒီခမ် တဝ်း၊ “မဲ ဒါ ကာညာ အုဝ်၊ မဲ ခုန်ဒီခမ် တာင်၊ မှာပ် တီ ဆီ မုး မှာပ် အုဝ် အီ မုး ဒဲစေန့် မဲ နီ။ ကွဲ့ တဲး အီ ဟဝ် တဝ်း၊ ခုန်ဒီခမ် ဘော န့ဟူမ် အန် မိုဝ်း မှာပ်။” 10 ခုန်ဒီခမ် ဝီ တဝ်း ဒီ အန်၊ “ဝီ အီ ဒမ် မှာပ် ဒီ မဲ တီ၊ မဲ ဒဲ့ တး အန် ဒူင် ကွယ် အုဝ်။ ဝါယ် နီ၊ အန် ဟူ ပွိုန် ဒီ ဘူင် ဒီ မဲ ပေါ န့ ပွါ။”

11 အီဘိုန့် တွိုန် ဝီ တဝ်း၊ “အုဝ် ယုဝ် ဂေ ငဝ်း ဂွန် အုဝ်။ မှဝ် ဒီ ပါယ်၊ ကွဲ့ တဲး ဂေ ဘူင် နာ တူ မွှိုမ် ဒီ ဂွန် အုဝ်။း မဲ ခုန်ဒီခမ်၊ မှာန့် မဲ ဒိူင် တဲး ဘော ဇဝ်ဖြာ ထူမ်။ အန် မုး ဇဝ်ဖြာ ပီ ကြိုပ် မဲ။” ဟဲ့ ဟွတ့်၊ ခုန်ဒီခမ် ဝီ တဝ်း၊ “ဇဝ်ဖြာ နပ်၊ ဂြုဝ်း အုဝ် ဟဲ့ မှာန်၊ ဟဲ့ မုး။ ဂွန် မဲ တီ၊ အန် တူ လုဝ် ယမ်။ န့ ပီ ဟိုက် ဂိန့် အန် အူ ညွင့် မိူဝ် တူ စုဝ်း ဒဲင် ကာဒါယ်။”

12 ဟဲ့ ဟွတ့်၊ အီဘိုန့် တွိုန် ဝီ ကြိုပ် ကာလာင် တဝ်း၊ “မှာန့်၊ မဲ ခ့ဝါင် အုဝ် ဒဲစေန့် မဲ နီ၊ တဲး အုဝ် ဝီ ကာလာင် ဒီ မဲ ခုန်ဒီခမ် ခေါ အူ ဒဲ။” ဟဲ့ ဟွတ့်၊ ခုန်ဒီခမ် ဝီ တဝ်း ဒီ အန်၊ “တဲး မဲ ကာလာင်။”

13 အီဘိုန့် ဝီ တဝ်း၊ “ဆေ န့ ပါယ် တီ၊ ပီ ဆီ ဘူင် မဲ ဒီ ဒူအီ အီဆာရေလ ဘော ပီ ဆီ ဘူင် မဲ ဒီ ဂေ ဝေါဝဲ အုဝ် ဟဲ့ မုး အူ မျုဝ်။ မှဝ် န့ ပါယ် မဲ တူ ဆီ ဘူင် ဇိုဝ် တီ ဒီ ဒွန် အီ။း မဲ ဟဲ့ ဟုဝ် လေး ဂွန် မဲ၊ တူ ဝီ တဲး အန် တး။ ဂြုဝ်း ပီ ကာလာင် မဲ ဒီ အုဝ် ဟဲ့ ဘဲန် ဂြုဝ်း အီ ဒမ် မှာပ် ဒီ မဲ။ 14 ဒူအီ အေ နီ လုဝ် ယမ် ဒွန် အီ။ အေ ပီ အိုမ် အီ ဟုး ဒဲင် ကာဒါယ်၊ အာဝ် ပွိုန် ဝီ ဂိတ် ဝိဝ်။ ဇဝ်ဖြာ ယီ တူ ဆီ တဲး ဒူအီ ယမ်။ ဆေ န့ မိုဝ်း ဒူအီ အီ ဟဲ့ ခမ် တဲး အီ ဟုဝ် လေး အန်၊ အန် တူ လုဝ် ကွယ် ကာတူင့် ဆေဆေ။ ဇဝ်ဖြာ ဆီ တဲး အန် ဝီ တး။ 15 ကူပ် န့ ပါယ် တီ အုဝ် ဒဲစေန့် မဲ ဟဲ့ တး ကာလာင် လွင် အာမူ အုဝ် ဒီ မဲ ခုန်ဒီခမ် တာင်။ ဒူအီ ဟဝ် ဟဲ့ ကာဘျုဝ် တဲး အုဝ် ယုဝ်။ အုဝ် ဒဲစေန့် မဲ မိူဝ် တဝ်း၊ ‘အုဝ် ဒီ ကာလာင် ဒီ ခုန်ဒီခမ်။ ခုန်ဒီခမ် မုး အီ နပ် ဒီ ခြဲ ဂေ။ အန် ဒီ ဘော နပ် ဒီ ဘူင် ဒူပ် ခဲ့ ပီ မှာန့် အုဝ်။ 16 ခုန်ဒီခမ် ဒီ ထူမ် ဒီ ချွတ် အုဝ်၊ ကွဲ့ တဲး အီ ငဝ်း ဂွန် အုဝ်။ အန် ဒီ တဲး ဂွန် အုဝ် ကွယ် ဒီ ခါဂုန် ပီ ဒွါ ဇဝ်ဖြာ ဒီ အေ ခဲင် မိူင် နီ။’

17 အုဝ် ဒဲစေန့် မဲ ဟဲ့ ထာင်၊ ဆေ ခုန်ဒီခမ် ဒွါ ကာဒိက် ဆတ်ဇာ ဒီ အုဝ်၊ အုဝ် အာဝ် ဟူ လုဝ် မာဆေ။ မဲ ခုန်ဒီခမ် ဟဲ့ နပ် ဒီ ကာယဝ်း အီ မွှိုမ် ဘော အီ တူ မွှိုမ်။ အန် ပီ အာမူ အာမာတ် ဇဝ်ဖြာ။ တဲး ဇဝ်ဖြာ အီ မုး ဇဝ်ဖြာ ပီ ကြိုပ် မဲ ဘော ကွယ် ရိုမ် ဒူပ် မဲ ဆေဆေ။”

18 အန် ဟဲ့ ဟွတ့် ကာလာင် ဂြုဝ်း တီ၊ ခုန်ဒီခမ် ဝီ ဒီမွှတ် အီဘိုန့် တွိုန် တဝ်း၊ “မဲ ကွဲ့ ချြီင် မာဆေ လွင် ပီ ဒီ ဒီမွှတ် အုဝ် ဒီ မဲ။” အီဘိုန့် တွိုန် ဝီ တဝ်း၊ “တဲး မဲ ဒါ ကာညာ အုဝ် ဒီမွှတ်။ အာဝ် လိူက်။”

19 ခုန်ဒီခမ် ဝီ ဒီမွှတ် အန် တဝ်း၊ “န့ မုး အာယောဖ အီ စ်ု မဲ တး ဒီ အုဝ်။း” ဟဲ့ ဟွတ့်၊ အီဘိုန့် တွိုန် ဝီ တဝ်း၊ “မဲ ခုန်ဒီခမ်၊ ဟဲ့ မှာန် အာခါခ်ု၊ ဆေ မဲ ဟဲ့ ကာလာင် ဂြုဝ်း၊ ဒွန် အီ လုဝ် ဒူပ် ဆိူဝ်။ အာဝ် မိုဝ်း အာဆေ အီ ပွိုန် ဝး နာ ဂ နာ အး။ ဟဲ့ မုး ဒဲစေန့် မဲ အီ စိူဝ် အာယောဖ တွိုန်၊ အန် ဟဲ့ ကာလာင် ဒီ အုဝ် လွင် အန် တီ ဒွန် မျုဝ်။ အန် ဟဲ့ စ်ု အုဝ်။ 20 အန် တဲး အုဝ် ညိုင်ရာင် ဘူင် ပါယ် နီ။ မဲ ဇဝ် မိူဝ် ဟဲ့ မိုဝ်း အာငျာန် ပီ အာမူ အာမာတ် ဇဝ်ဖြာ။ မဲ နပ် တူတ့် အီ ကွယ် ဒဲင် ကာဒါယ် နီ။”

21 ပန် တီ ခုန်ဒီခမ် ဝီ ကာလာင် ဒီ အာယောဖ တဝ်း၊ “အုဝ် ဟဲ့ ဟွတ့် ဆုင်ဖျာတ်၊ တဲး မဲ ဟာဝ် ဒဲ့ အာဘာဆာလူမ် အီ ဟဲ့ တဝ် အာတ့် နီ၊ တဲး အန် ဝီ တး။”

22 အာယောဖ ဘော မုတ် ဂိုပ် ဒီ ကာဒါယ် တဝ်း၊ “မဲ ခုန်ဒီခမ် အီ အိုပ် အုဝ်၊ ဆီငဲ အာတိုဝ် နီ အုဝ် ဟဲ့ နပ်၊ မဲ ဟဲ့ အိုင် အုဝ်။ ခုဝ်၊ မဲ ဟဲ့ ဘူင် ဒူပ် ခဲ့ ပီ မှာန့် အုဝ်။”

23 ဝါယ် တီ၊ အာယောဖ ဘော ဟာဝ် ဒီ မိူင် ဂေဆူရာ တွိုန်၊ ဝီ ဒိုဝ်း တး အာဘာဆာလူမ် ဒီ မိူင် ယေရူဆာလဲမ်။ 24 ခုန်ဒီခမ် ဝီ တဝ်း၊ “တဲး အန် ဝး ဟာဝ် ဒီ ကာင် အန်၊ ကွဲ့ တဲး အန် ယိုဝ် အုဝ်။” ခုဝ်၊ အာဘာဆာလူမ် ဘော ဝး ဟာဝ် ဒီ ကာင် အန်။ အန် မိူဝ် အာဝ် ဟူ ယိုဝ် ခုန်ဒီခမ်။

25 ကာတဲ ဂေ ဒူအီ အီဆာရေလ ဘောကာဂ့လျီတ် အာဝ် မိုဝ်း အီ စှိတ် ပီ အာဘာဆာလူမ်။ ဂေ ဒွန် အီ အိူပ် အာရိုပ် အန်။ စုး အူ ဒီ ကာဘာ ပ့လဝ် ကော ဇမ် ဂိန့်၊ အာဝ် မိုဝ်း ဒူင် ဒီ နဲ မာဆေ။

26 ဒေါ ကပ် အန် ဟိုက် ဂိန့် အန်၊ အန် ဘော ဆ ဟိုက် ဂိန့် အန် တာ ဘ့လေ ဆ ခုန်ဒီခမ်။ န့ စန် အာ မာယဝ်း ဆေခေန်၊ အီ မုး အူ ဆ ဒီ အူယ် ခန် လူယ်။ ဆေ ဟိုက် ဂိန့် အန် ဟီ စန် ကာဆဝ်၊ အန် ဘော လုဝ် ကပ် မင် ဇေန့်။

27 အာဘာဆာလူမ် မိုဝ်း ဂွန် အီမာယ် အူယ် ဝီ ဘော ဂွန် အီဘိုန့် အီ စိူဝ် ထာမာ အူ ဝီ။ ဘော ဂွန် အီဘိုန့် တီ ဟဲ့ စှိတ် ကာဆဝ်။

28 အာဘာဆာလူမ် ယီ ကွယ် ခဲင် မိူင် ယေရူဆာလဲမ် ကော နုဝ့် အာ ဆီနမ်၊ တူ ပွိုန် ယိုဝ် ခုန်ဒီခမ်။ 29 အန် ဘော ဒဲ့ အာယောဖ တဝ်း ဒီ စ်ု အန် ဟာဝ် ဒူင် ကွယ် ခုန်ဒီခမ်၊ အာယောဖ ယီ တူ တး။ ဝီ ဒဲ့ ပေါ အူ ဇေန့် မိူဝ်၊ အန် တူ တး။ 30 ကူပ် န့ ပါယ် တီ အန် ဘော ကာလာင် ဒီ မှာယ် အန် တဝ်း၊ “ဘေ ယွတ်၊ ဒူင် နာ အာယောဖ န့ ကွယ် ကာတတ် ဒူင် နာ အုဝ်။ ဟဲ့ မိုဝ်း ဘော ခဝ်ချုင်။ တဲး ဘေ ဒိုဝ်း ငဝ် ဒုဝ့်။” မှာယ် အာဘာဆာလူမ် ဘော ဒိုဝ်း ငဝ် ဒုဝ့်။

31 ပန် တီ အာယောဖ ဘော တး ဒီ ကာင် အာဘာဆာလူမ်။ အန် ဘော ဒီမွှတ် တဝ်း၊ “ကူပ် မာဆေ မှာယ် မဲ ဟဲ့ ဒိုဝ်း ငဝ် ဒုဝ့် ဒူင် နာ အုဝ် နီ။း”

32 အာဘာဆာလူမ် ဝီ ကာလာင် ဒီ အာယောဖ တဝ်း၊ “မဲ ယွတ်၊ အုဝ် ဟဲ့ စ်ု ဂေ ဒဲ့ မဲ တး ဒီ နီ၊ တဲး အုဝ် ပွိုန် ဒီ စ်ု မဲ ဟာဝ် ဒူင် ကွယ် ခုန်ဒီခမ်၊ တဲး မဲ ဝီ ကာလာင် ဒီ အန် လွင် ဟဲ့ လေး အုဝ် ခဲင် မိူင် ဂေဆူရာ တး ဇမ် ဒီ နီ၊ ယီ တူ မိုဝ်း ဒီခုဝ်။ အုဝ် အာဝ် လုဝ် ကွယ် ဒီ မိူင် တီ တဲး ကော ဇမ် အာတိုဝ် နီ။ ဒေါ တီ နီ၊ တဲး မဲ ကာလာင် ဒီ ခုန်ဒီခမ်၊ အုဝ် ဆီ ယိုဝ် အန်။ ဆေ အန် ယီ ဆီ ထာင် အုဝ် မိုဝ်း မှာပ်၊ တဲး အန် ငဝ်း ယမ် အုဝ်။”

33 ပန် တီ အာယောဖ ဘော ဟာဝ် ဒူင် ကွယ် ခုန်ဒီခမ် အန် ဘော ကာလာင် ခဲ့ ပီ တဝ်း အာဘာဆာလူမ် ဒီ အန်။ ခုန်ဒီခမ် မိူဝ် ဘော ဝီ ဒဲ့ အာဘာဆာလူမ်။ အာဘာဆာလူမ် ဘော တး မုတ် ဂိုပ် ဒီ အာတ့် ခုန်ဒီခမ်။ ခုန်ဒီခမ် ဘော အုး အုး အန်။