ခါန် 13
လွင် အာမာနုန် ဂါယ် နာင် ထာမာ
1 ပန် တီ န့ မုး အာဘာဆာလူမ် အီ မုး ဂွန် အာဒါဝိတ် တွိုန်။ အန် မိုဝ်း ဝါ အီဘိုန့် အူ ဝီ အီ စှိတ် ကာဆဝ်။ အန် စိူဝ် နာင် ထာမာ။ အာမာနုန် အီ မုး ဂွန် အာဒါဝိတ် ပေါ ဝီ၊ အန် ဘော အိုင် ဘော ရွက့် နာင် ထာမာ တီ။
2 န့ ဘော ညှာပ် ဒီ နဝ်း အာမာနုန် တွိုန်။ အန် ကော ဘဲန် ဝီ ဒဝ့် ဆဝ် ကူပ် ဆီ ပွိုန် အန် ဝါ အန် အီ မုး နာင် ထာမာ တွိုန်၊ အီ ဟဲ့ ဘဲန် ဒီဘျာ စှိတ်။ အာမာနုန် ယီ တူ နပ် ပီ ဒီ ပါယ် ဒီ တဲး အန် ပွိုန်။
3 ပန် တီ အာမာနုန် ဝီ မိုဝ်း ဂိုက် အီ စိူဝ် အာယောနာဒပ် အီ မုး ဂွန် အာဆီမေအာတ် အီ မုး အီကတ် အာဒါဝိတ်။ အာယောနာဒပ် တွိုန် အန် လွှက့် ကာဆဝ်။ 4 အာယောနာဒပ် ဒီမွှတ် အာမာနုန် တဝ်း၊ “မဲ မုး ဂွန် ခုန်ဒီခမ်။ ဒွန် ဆီငဲ မဲ ယီ ကြဲ ဒီ ချာ။ တဲး မဲ ကာလာင် ဒီ အုဝ်၊ န့ မုး ကူပ် မာဆေ။း” အာမာနုန် ဝီ တဝ်း၊ “နဝ်း အုဝ် ဒိုက် ဒီ နာင် ထာမာ အီ မုး ဝါ အာဘာဆာလူမ်။ အာဘာဆာလူမ် ဝီ မုး ဝါ အုဝ်။”
5 အာယောနာဒပ် ဝီ တဝ်း ဒီ အန်၊ “တဲး မဲ အိတ် ဒဲင် ကာစှူင့် အိတ် မဲ၊ ညိုင်ရာင် ဆဝ်။ ပန် ဒီ တး ယွတ် ဂုန့် မဲ၊ မဲ မှာန့် ဒီ အန် တဝ်း၊ ‘မှာန့် တဲး မဲ ခ့ဝါင် ဝါ အုဝ် အီ မုး နာင် ထာမာ တး ဒွါ ပီ ဒီ ဟူမ် ဒီ အုဝ်၊ တဲး အန် တး ဒင် ပီ ဒီ ဟူမ် နာ အာတ့် အုဝ် ဒီ နီ၊ တဲး အုဝ် ပွိုန် ဒီ ယိုဝ် ပီ ပါယ် အန် ဒီ ဒင် ပီ ဒီ ဟူမ် တီ၊ တဲး န့ မုး အန် အီ ဟပ် အုဝ် ဟူမ်။’”
6 ပန် တီ အာမာနုန် တွိုန် ဘော အိတ် ဒဲင် ကာစှူင့် အိတ် အန်၊ ညိုင်ရာင် ဆဝ်။ ဒေါ တး ခုန်ဒီခမ် ယွတ် အန်၊ အာမာနုန် ဘော မှာန့် ဒီ အန် တဝ်း၊ “တဲး နာင် ထာမာ အီ မုး ဝါ အုဝ် တွိုန် တး ဘူင် ခါမုန် ခေါ အာ ဒီခ့လဲပ် ဒီ အာတ့် အုဝ်။ တဲး အန် ဟပ် အုဝ် ဟူမ်။”
7 အန် ဟဲ့ ဟွတ့် ကာလာင် ဂြုဝ်း တီ၊ အာဒါဝိတ် ဘော စ်ု ဂေ ဟာဝ် ဒီ ကာင် နာင် ထာမာ တွိုန်၊ ဘော ကာလာင် ဒီ အန် တဝ်း၊ “တဲး မဲ ဟာဝ် ဒီ ကာင် အီကတ် မဲ အီ စိူဝ် အာမာနုန်၊ တဲး မဲ ဇွိုမ် ပီ ဒီ ဟူမ် ဒွါ ဒီ အန်။” 8 နာင် ထာမာ တွိုန် ဘော ဟာဝ် ဒီ ကာင် အီကတ် အန် အီ စိူဝ် အာမာနုန် တီ။ အာမာနုန် ဟဲ့ အိတ် ဒဲင် ကာစှူင့် အိတ် အန်။ နာင် ထာမာ ဘော ဒိုဝ်း ကာပဲ့ ခါမုန်၊ ကာဝ်ု။ ဟဲ့ ဟွတ့်၊ အန် ဘော ဘူင် တဲး န့ ဘဲန် ဒီခ့လဲပ်၊ တဲး အာမာနုန် ယိုဝ်။ အန် ဘော ဂိုမ် တဲး န့ ဆိန်။ 9 ဟဲ့ ဟွတ့်၊ အန် ဘော ဒိုဝ်း ဟပ် ခဲင် ဆီလယ့် ဘ့လေး နာ အာတ့် အီကတ် အန်။ အန် ယီ တူ ဟူမ်။ အန် တဝ်း၊ “တဲး ဒွန် အီ လေး ဒီ နီ။” ခဲ့ ကွယ် ဒူအီ ဂေ တွိုန်၊ ဂေ ဘော လေး။
10 အာမာနုန် ဘော ကာလာင် ဒီ နာင် ထာမာ တဝ်း၊ “ဒိုဝ်း ပီ ဒီ ဟူမ် တီ၊ တိုယ် ခဲင် အိတ် နီ၊ တဲး မဲ ဟပ် အုဝ် ဟူမ်။” နာင် ထာမာ တွိုန် ဘော ဒိုဝ်း ခါမုန် ဒီခ့လဲပ် ပီ ဘူင် အန် တွိုန်၊ လိုပ် ဟာဝ် ခဲင် အိတ် ဒူင် ကွယ် အီကတ် အန် အီ စိူဝ် အာမာနုန် တွိုန်၊ တဝ်း ဒီ တဲး အန် ဟူမ်။ 11 ဒေါ အန် တီ အာမာနုန် တွိုန် ဘော ဝီ ဒိူတ် အန်၊ ဝီ ကာလာင် ဒီ အန် တဝ်း၊ “အိုယ် ဝါ၊ တး အိတ် ဒူပ် အုဝ် ဒီ နီ။”
12 နာင် ထာမာ မိူဝ် ဝီ တဝ်း၊ “အိုယ် မဲ အီကတ် အုဝ်၊ မဲ ကွဲ့ ဘူင် ပါယ် တီ။ မဲ ကွဲ့ တဲး အုဝ် စှိုမ် ဆာရေ။ အာဝ် မွှိုမ် ဆေ မဲ ဘူင် ဇိုဝ် တီ။ ကာတဲ ဒူအီ အီဆာရေလ အာဝ် ပွိုန် ဘူင် နာ မွှိုမ် ကာအိး ပါယ် နီ။
13 တဲး မဲ လှုဝ်း အုဝ်၊ အုဝ် ဒီ ဘော လုဝ် ဆာယ် ဆေဆေ ဝါယ် နီ။ ဂေ ဒူအီ အီဆာရေလ၊ ဂေ ဒီ ဘော ခဲ လွင် တူ ဘွတ် တူ မွှိုမ် မဲ။ တဲး မဲ ကာလာင် ဒီ ခုန်ဒီခမ် ဒီ အာတ့်။ အန် ဒီ တဲး အာယ် ခတ် လာယ် ဒိုဝ်း။” 14 အန် ပီ ဘော တဝ်း ပါယ် တီ မိူဝ်၊ အာမာနုန် တူ ထူမ် ဂြုဝ်း နာင်။ ကူပ် မိုဝ်း အန် ပ့လူမ် လွှိုမ် နာင်၊ အန် ဘော မှေတ့် လာယ် အိတ် ဒူပ် နာင် ထာမာ တွိုန်။
15 ဘော ကွယ် ဝါယ် တီ၊ အာမာနုန် ဘော ဝီ ဇွင့် နာင် တွိုန်။ နဝ်း ဇွင့် အန် ဟဲ့ ဝီ လွှိုမ် နဝ်း ဒွိုမ် ရွက့် အန် ခါ အာတ့်။ အန် ဝီ ကာလာင် ဒီ နာင် တဝ်း၊ “တဲး မဲ ယိတ့် လေး ဟာဝ်။”
16 နာင် ထာမာ ဝီ တဝ်း၊ “အာဝ် ပွိုန် ဆုတ့် အုဝ် လေး ဟာဝ်။ မှာပ် တီ ဒီ ဝီ တာင် လွှိုမ် မှာပ် ပဲ့ ဟဲ့ ဟွတ့် ဘူင် မဲ ဒီ အုဝ်။” အန် ယီ တူ ထူမ် ဂြုဝ်း နာင် တွိုန်။
17 အန် ဘော ဒဲ့ မှာယ် အီ လိုမ်လာ အန် ဘော တဝ်း၊ “ဟုဝ် ဝဲန် အီဘိုန့် ဝီ နီ၊ ဝီ ကာဘိတ် ဆဲ မာလုဝ်း ဝါယ် လေး အန်။” 18 မှာယ် ပီ စ်ု အာမာနုန် တွိုန် ဘော ဟုဝ် တဲး နာင် ထာမာ လေး ဘော ကာဘိတ် ဆဲ မာလုဝ်း ဝါယ် လေး ဟာဝ် အန်။ ဒေါ အန် တီ နာင် ထာမာ ဟဲ့ စှိုပ် ခြိုင် ကာဒိုက် အီ တုန် အီ မုး ခြိုင် စှိတ်၊ ခြိုင် ပီ တာ ဂွန် ခုန်ဒီခမ် အီ မုး ဒီဘျာ တွိုန်။ 19 ဝါယ် လေး အန် ဒီ အီကတ် အန်၊ အန် ဘော ဒိုဝ်း ကာဝှါင် ဟပ် ဒဲင် ဂိန့် အန်၊ ဘော ကာယာတ့် ခြိုင် စှိတ် တွိုန်၊ ဝီ ဒါင် ဒဲ အန် ဒဲင် ဂိန့် အန်။ အန် ဘော ယာမ် တာင် ဒေါ ဝီ ဟာဝ် အန် ဒူပ် န့တေန့် အန်။
20 အီကတ် အာရာင် အန်၊ အီ စိူဝ် အာဘာဆာလူမ်၊ အန် ဘော ဒီမွှတ် ဝါ အန် တဝ်း၊ “ဟဲ့ မုး၊ အီကတ် မဲ အီ စိူဝ် အာမာနုန် ဟဲ့ ကွယ် ရိုမ် ဒူပ် မဲ။း မာလဲ၊ မဲ ဝါ အုဝ်၊ တဲး မဲ ကွယ် ယေန် ယေန်၊ ကွဲ့ တဲး မဲ ဘဲန် နဝ်း က့လိုဝ် လွင် အန် တီ။ ဘော အန် မုး အီကတ် မဲ။” ဝါယ် အန် တီ နာင် ထာမာ ဘော ကွယ် ဒီ ကာင် အီကတ် အန် အီ စိူဝ် အာဘာဆာလူမ် တွိုန်၊ အာဝ် ဟူ မိုဝ်း အီ မွုန် အန်။
21 ဟဲ့ ဟွတ့်၊ ခုန်ဒီခမ် အာဒါဝိတ် ဘော ယိုဝ် လွင် အန် တီ၊ အန် ဘော ရူ ကာဆဝ်။ 22 အာဘာဆာလူမ် တွိုန် ယီ တူ ကာလာင် ဂြုဝ်း အီ မွှိုမ် တူ မွှိုမ် ဒီ အီကတ် အန် အီ စိူဝ် အာမာနုန် တွိုန်။ မာလဲ၊ အန် ဟဲ့ ဇွင့် အာမာနုန် ကူပ် ဟဲ့ ဘူင် အာမာနုန် တဲး ဝါ အန် အီ စိူဝ် နာင် ထာမာ စှိုမ် ဆာရေ။
23 ဝါယ် တီ န့ ဘော နုဝ့် အာ ဆီနမ်၊ ဒေါ ကပ် ဂေ ဒူအီ အာဘာဆာလူမ် ဟိုက် မာဘူ၊ ကွယ် ကာတတ် ရဝ် ဘာလာဟာစော အီ ကွယ် ဒီ ခူပ် မိူင် အာအေဖာရိမ်၊ အာဘာဆာလူမ် ဘော ဘာင် တူတ့် ခဲ့ ကွယ် ဂွန် ခုန်ဒီခမ် ဘောကာဂ့လျီတ်၊ တဲး ဂေ တး ဘူင် ဘ့လွယ်။ 24 အန် ဘော ဟာဝ် ဒူင် ကွယ် ခုန်ဒီခမ် ဘော တဝ်း၊ “အုဝ် အီ မုး ဒဲစေန့် မဲ၊ အုဝ် ဟဲ့ ဘူင် ဘ့လွယ် ကပ် ဟိုက် မာဘူ။ မှာန့်၊ တဲး ဘော မဲ တဲး ဘော အာမူ အာမာတ် မဲ ကာဒူပ် ဟာဝ် ယွတ်။”
25 ခုန်ဒီခမ် ဘော ကာလာင် ဒီ အာဘာဆာလူမ် တဝ်း၊ “အိုယ် မဲ ဂွန် အုဝ်၊ အာဝ် မွှိုမ် တဲး ယေ ဟာဝ် ကိူန်။ အာဝ် လုဝ် တဲး ယေ ဟာဝ် ဘောကာဂ့လျီတ်။ အုဝ် ယုဝ် န့ ညှာပ် ဒီ မဲ။” အန် ဘော ဒဲ့ ခုန်ဒီခမ် ခဲ့ မှဝ်၊ ခုန်ဒီခမ် မိူဝ် တူ ဟာဝ်။ အန် ယီ မွင့်ကာရာ တဲး ပီ ဘူင် ဂွန် အန်၊ တဲး န့ အွင်။
26 အာဘာဆာလူမ် ဝီ ကာလာင် န့ ပွါ တဝ်း၊ “ဆေ မဲ တူ ဟာဝ်၊ မှာန့် တဲး မဲ ခ့ဝါင် အီကတ် အုဝ် အီ စိူဝ် အာမာနုန် တွိုန်၊ တဲး အန် ဟာဝ်။” ပန် တီ ခုန်ဒီခမ် ဝီ တဝ်း၊ “န့ ပါယ် မှဝ် ကော လုဝ် တဲး အန် ဟာဝ် ဒူပ် မဲ။း” 27 အာဘာဆာလူမ် ဘော မှာန့် ကာဆဝ်၊ တဲး ခုန်ဒီခမ် ခ့ဝါင် ဂွန် အန် အီ စိူဝ် အာမာနုန် ဟာဝ်၊ တဲး ဘော ဂွန် အီမာယ် အန် ဒွန် ဝီ ပွိုန် ဒီ ဟာဝ်။
28 အာဘာဆာလူမ် ဘော ကာလာင် ဒီ ဒူအီ အန် တဝ်း၊ “တဲး ဘေ ဘ်ု အာမာနုန် ဟဲ့ ဒျီင် အိုမ် မာငုန်၊ ဟီ ဘျုဝ် ဒါခိုယ်။ ဆေ အုဝ် စ်ု ဘေ ဆတ် အန်၊ တဲး ဘေ ဆတ် အန် ကော ယမ်။ ဘေ ကွဲ့ ယုဝ်။ န့ မုး အုဝ် အီ ဟဲ့ စ်ု ဘေ ဘူင်။ တဲး ဘေ မိုဝ်း ပ့လူမ် ဘော မိုဝ်း နဝ်း ယ။” 29 ဒူအီ အာဘာဆာလူမ် ဘော ဘူင် ဒီ အာမာနုန်၊ တဲး န့ ဒူပ် ဂြုဝ်း ပီ ကာလာင် အာဘာဆာလူမ် တွိုန်။ ပန် တီ ခဲ့ ကွယ် ဂွန် ခုန်ဒီခမ် ဂေ တွိုန်၊ ဂေ ဒွန် အီ ဝီ ပဝ့် မာလုဝ် ဂေ၊ လေး တဝ်။
30 ဒေါ ဆီ ဟာဝ် ဂေ ဒူပ် န့တေန့် တွိုန်၊ န့ ဝီ မိုဝ်း မင် အီ ဝီ တး ကာလာင် ဒီ အာဒါဝိတ် တဝ်း၊ “အာဘာဆာလူမ် ဟဲ့ ငဝ်း ယမ် တူတ့် ခဲ့ ကွယ် ဂွန် မဲ ခုန်ဒီခမ်။ အာဝ် ဟူ ဂိူတ် ခေါ အူ ဝီ။” 31 ပန် တီ ခုန်ဒီခမ် ဘော ယိတ့် ကာယာတ့် ဆီတုဝ် ပီ တာ အန် ဘော အိတ် ဒဲင် ကာဒါယ်။ ဒူအီ အန် မိူဝ် ဘော ကာယာတ့် ခြိုင် ပီ တာ ဂေ၊ ကွယ် ခူပ် အန်။
32 အာယောနာဒပ် အီ မုး ဂွန် အီကတ် အာဒါဝိတ် အီ စိူဝ် အာဆီမေအာတ် တွိုန်၊ အန် ဘော တး တဝ်း၊ “ကွဲ့ ညှိုမ် ပီ တဝ်း ဂေ လွင် ဂွန် မဲ ဟဲ့ ယမ် တူတ့်။ အာမာနုန် အူ ဝီ အီ ယမ်။ ဆိန့် ဆီငဲ ဒေါ ဘူင် တဲး အန် နာင် ထာမာ စှိုမ် ဆာရေ တွိုန်၊ အာဘာဆာလူမ် ဟဲ့ ခြာမ် ဒီ ဘူင် ပါယ် တီ။ 33 ခုဝ်၊ မဲ ခုန်ဒီခမ်၊ မဲ ကွဲ့ ထာင်၊ ဂွန် မဲ ဘောကာဂ့လျီတ် ဟဲ့ ဟွတ့် ယမ်။ အာဝ် မုး ပါယ် တီ။ အာမာနုန် အူ ဝီ အီ ဟဲ့ ယမ်။”
34 ဒေါ အန် တီ အာဘာဆာလူမ် မိူဝ် ဘော ဝီ တဝ် လေး ဟာဝ်။
ပန် တီ ဒူအီ အီ ဘ်ု ဟုဝ် တွိုန်၊ အန် ဘော ငွိုပ် ဘော ယိုဝ် ဒူအီ ကိူန် တး ဒူပ် န့တေန့် အီ ဟာဝ် ဒီ ဘြေတ့် နွန် အီ ကွယ် ဒီ ပန် အန်။ ဒူအီ ဘ်ု တွိုန် ဝီ ဟာဝ် ကာလာင် ဒီ ခုန်ဒီခမ် တဝ်း၊ “အုဝ် ဟဲ့ ယိုဝ် ဒူအီ ကိူန် တး ဒူပ် န့တေန့် အီ ဟာဝ် မိူင် ဟုဝ်ရာနိမ်၊ အီ ကွယ် ဒီ ဘြေတ့် နွန်။”
35 အာယောနာဒပ် ဝီ ကာလာင် ဒီ ခုန်ဒီခမ် တဝ်း၊ “မဲ ယွတ်၊ ဂွန် မဲ၊ ဂေ ဟဲ့ ဝီ တး။ ဂြုဝ်း ပီ ကာလာင် အုဝ် ဟဲ့ မှာန်။”
36 အန် ဟဲ့ ဟွတ့် ကာလာင် ပါယ် တီ ဂွန် ခုန်ဒီခမ် ဟဲ့ လိုပ် ဒူင် ကွယ် အန်၊ ဝီ ကာဖြူမ် ဒီ ယာမ် တာင်။ ဘော ခုန်ဒီခမ် ဂေ ဒူအီ အန် ဘောကာဂ့လျီတ် ဝီ ကာဖြူမ် ဒီ ယာမ်။
37 အာဘာဆာလူမ် ဘော တဝ် ဟာဝ် ဒူင် ကွယ် အာတာလာမ် အီ မုး ဂွန် အာမီဟုတ် အီ အိုပ် မိူင် ဂေဆူရာ တွိုန်။ အာဒါဝိတ် ယီ ယာမ် ဘော က့လိုဝ် ဒွင် ဝန် ဒွင် ခိူန် ကူပ် ယမ် ဂွန် အန်။