1 ဝါယ် တီ ဇဝ်ဖြာ ဘော စ်ု အာနာထာန် အီ မုး ဒူအီ ဘျာန် ဂြုဝ်း ဇဝ်ဖြာ၊ တဲး အန် ဟာဝ် ဒူင် ကွယ် အာဒါဝိတ် ဘော ကာလာင် ဒီ အန် တဝ်း၊ “ခဲင် မိူင် အူ မိူင် န့ မိုဝ်း ဒါ ဆာထေ အူ ဝီ ဘော ဒူအီ ဂိန် အူ ဝီ။ 2 ဒါ ဆာထေ တွိုန် တူ အေတ့် မာဆေ။ အန် မိုဝ်း ဇေ့ဇုင် တူတ့် ဒွန် မျုဝ်။ ဖိုင် မာဘူ ဂေ မာမက် အန် ကိူန် ကာဆဝ်။ 3 အီ မုး ဒူအီ ဂိန် တွိုန် အန် ယီ တူ မိုဝ်း မာဆေ။ အန် မိုဝ်း ဒီ စိုဝ်း မာဘူ ဒီတဲတ် အူ ဒုဝ်။ ဒဲင် တီ၊ အန် ယီ တူ မိုဝ်း မာဆေ။ မာဘူ ဒီတဲတ် တီ ဘဲန် ဂိုက် အန်၊ ကွယ် ဒူပ် ဒါ ကာညာ အန် ဘော ဂွန် ဒါ ကာညာ အန်။ အန် ဘော ကြဲ ဒီ တာင် ဘော ဟူမ် ဒူင် ဟူမ် ဒါ ကာညာ အန်။ အန် ဘော ဒျီင် ကွက့် ပီ ဒျီင် ဒါ ကာညာ အန်၊ ဘော အိတ် ဒူင် အိတ် ဒါ ကာညာ အန်။ အန် ဘော ပီ ဂွန် အီဘိုန့် ဒါ ကာညာ အန်။

4 ဒါ ဆာထေ တွိုန် ဘော မိုဝ်း ခဲတ့် အူ ဝီ တး ဇမ် ဒီ ကာင် အန်။ အန် ယီ တူ ဒိုဝ်း မာဘူ အန်၊ ဟျီင် ခဲတ့် အန် တွိုန်။ အန် ဝီ ဒိုဝ်း မာဘူ ဒူအီ ဂိန် တွိုန်၊ ငဝ်း ဟျီင် ခဲတ့် အီ တး ဇမ် ဒူင် ကွယ် အန် တွိုန်။”

5 အာနာထာန် ဟဲ့ ဟွတ့် ကာလာင် လွင် အန် တီ၊ အာဒါဝိတ် ဘော ရူ ကာဆဝ် ဒီ ဒါ ဆာထေ တွိုန်။ အန် ကာလာင် ဒီ အာနာထာန် တဝ်း၊ “ဟဲ့ မှာန် အာခါခ်ု၊ န့ ကာအာပ် ငဝ်း ဝဲန် ဒူအီ အီ ဘူင် ပါယ် တီ။ 6 ကူပ် တူ မိုဝ်း အန် နဝ်း ကာဝေ အီ၊ ကူပ် ဘူင် အန် ပါယ် တီ အန် လုဝ် ဝီ ဒွါ ဝိဝ် ဖွုန် ဘုန်။”

7 အာနာထာန် တဝ်း ဒီ အာဒါဝိတ်၊ “အိုဝ်၊ ဒူအီ ဝီ တီ ဟဲ့ မုး မဲ။ ဇဝ်ဖြာ အီ အိုပ် ဒူအီ အီဆာရေလ၊ အန် တဝ်း ဒီ မဲ၊ ‘အုဝ် ဟဲ့ ဖဝ်း နာမန် ဒီ ဂိန့် မဲ၊ တဲး မဲ ဘဲန် ခုန်ဒီခမ် အီ အိုပ် ဒူအီ အီဆာရေလ။ အုဝ် ဟဲ့ တဲး မဲ လွတ် ဒီ အာဆောလူ။ 8 ခဲ့ မိုဝ်း ဒါ ကာညာ မဲ တွိုန် အီ စိူဝ် အာဆောလူ၊ အုဝ် ဟဲ့ ဒွါ တူတ့် ဒီ မဲ။ ဘော အီဘိုန့် အန် အုဝ် ဟဲ့ အာပ် ဒီ မဲ။ အုဝ် ဟဲ့ တဲး မဲ အိုပ် အာမျုဝ် အီဆာရေလ ဘော ဒူအီ အာယူဒါ။ ဆေ မျုဝ် တီ ယီ ဆီ ပြေတ့်၊ အုဝ် ဆီ မိုဝ်း ဘဲန် မျုဝ် ဘဲန် မျုဝ် ပီ ဒီ ဒွါ ဒီ မဲ။ 9 ကူပ် န့ ပါယ် မှဝ်၊ မဲ ဟဲ့ ဝဲန် ဂြုဝ်း ဇဝ်ဖြာ၊ ဘူင် အီ တူ မွှိုမ် ပီ တူ အိုင် ဇဝ်ဖြာ။း မဲ ဟဲ့ ငဝ်း အာအူရီယာ အီ မုး ဒူအီ ဟေထိတ် တွိုန်၊ တဲး အန် ယမ် ဒီ ဘ့လာ အ။ မဲ ဘော ဝီ ဒိုဝ်း အီဘိုန့် အန်၊ တဲး အန် ဘဲန် အီဘိုန့် မဲ။ မဲ ဟဲ့ ဘူင် တဲး ဂေ ဒူအီ အမ်မူန် ငဝ်း အန်။ 10 ဒေါ တီ နီ၊ ကူပ် ဟဲ့ ဝဲန် မဲ ဂြုဝ်း အုဝ်၊ ကူပ် ဟဲ့ ဒိုဝ်း မဲ အီဘိုန့် အာအူရီယာ အီ မုး ဒူအီ ဟေထိတ် တွိုန်၊ တဲး အန် ဝီ ဘဲန် အီဘိုန့် မဲ၊ အုဝ် ဒီ ဒမ် မှာပ် ဒီ မဲ။ ခဲင် န့ဟူမ် မဲ၊ န့ ဒီ မိုဝ်း ဒူအီ အီ လာယ် ကာဂုဝ်း လာယ် ကာငဝ်း ဆေဆေ။’

11 ဇဝ်ဖြာ တဝ်း ဒီ မဲ၊ ‘ခဲင် န့ဟူမ် မဲ န့ ဒီ မိုဝ်း ဒူအီ အီ ဒီ ဘူင် နာ တူ မွှိုမ် ဒီ မဲ။ အုဝ် ဒီ ဝီ ဒိုဝ်း အီဘိုန့် မဲ ဂေ တွိုန်၊ ဝီ အာပ် ဒွါ ဒီ ဂိုက် မဲ အီ ကာလဝ့် ဒီ မဲ။ ဝီ တီ၊ အန် ဒီ ဝီ အိတ် ဒူပ် အီဘိုန့် မဲ ဒေါ ကာတဲ ဆီငဲ။’ 12 ဒေါ ဘူင် မဲ မှာပ် တီ၊ မဲ ချြီင် ဒီ ဘူင်၊ ကွဲ့ တဲး အီ နပ်။ အုဝ် ယီ ဒီ ဝီ ဘူင် ဇိုဝ် တီ ဒေါ ကာတဲ ဆီငဲ၊ တဲး ဒူအီ အီဆာရေလ ဒွန် အီ ကော နပ်။”

13 ပန် တီ အာဒါဝိတ် ဝီ တဝ်း ဒီ အာနာထာန်၊ “အုဝ် ဟဲ့ ဟွတ့် လုတ့် ဇဝ်ဖြာ။”

အာနာထာန် ဝီ ကာလာင် ဒီ အာဒါဝိတ် တဝ်း၊ “ဇဝ်ဖြာ ဟဲ့ ဟွတ့် ဂဝ်း ဝဲန် မှာပ် မဲ။ မဲ တူ လုဝ် ယမ်။ 14 မဲ ဟဲ့ ဘူင် ဇိုဝ် တီ၊ တဲး ရန်ဆူ ဇဝ်ဖြာ တူ ယုဝ် အန်။ ခုဝ်၊ ဂွန် မဲ အီ ဟဲ့ ဂွိုတ် ကာမာယ် တီ၊ အန် ဒီ ယမ်။”

15 ဝါယ် အန် တီ အာနာထာန် ဘော ဝီ လေး ဝေန့် ဒီ ကာင် အန်။ အူ ဇေန့် ဇဝ်ဖြာ ဘော ဘူင် တဲး ဂွန် အာဒါဝိတ် မိုဝ်း ဆဝ်။ အန် မုး ဂွန် အာဒါဝိတ် ဂါယ် အီဘိုန့် အာအူရီယာ တွိုန်။ 16 အာဒါဝိတ် ဘော မှာန့် ဒီ ဇဝ်ဖြာ အာဒါ ဂွန် အန် တွိုန်။ အန် ဘော ယိူန် ပီ ဒီ ဟူမ်၊ ဘော ဟာဝ် အိတ် ဒဲင် ကာဒါယ် ဒွင် ခိူန်။ 17 ဂေ ဒါ တာင် အီ ကွယ် ခဲင် ဟုဝ် အန်၊ ဂေ ဘော တး ထေဝ် ဒီ ညဝ်၊ တဲး အန် ယိတ့်၊ တဲး အန် ဘော ဟူမ် ပီ ဒီ ဟူမ်။ အန် ယီ ဘး ဝဲန် ဂေ၊ တူ ယိတ့်၊ တူ ဟူမ်၊ တူ ဒျီင် မာဆေ။

18 န့ ဘော ပွိုန် ဘူ ဆီငဲ၊ ဂွန် အန် မိူဝ် ယမ်။ ဒဲစေန့် အာဒါဝိတ် ယီ တူ ယ ဟာဝ် ကာလာင် ဒီ အန် လွင် ဂွန် ဟဲ့ ဟွတ့် ယမ်။ ဂေ ဝီ ထာင်၊ “ဒေါ ဆီ အိမ် ဂွန် အန် တွိုန်၊ အန် တူ ထူမ် ဂြုဝ်း ပီ ကာလာင် အေ ဒီ အန်။ ဆေ အေ ဒီ ကာလာင် လွင် ဂွန် အန် ဟဲ့ ဟွတ့် ယမ်၊ ယုဝ် အန် ဒီ ဝဲ ဘူင် ဒီ ဒုဝ် ဘြိမ် အန်၊ တဲး န့ ဒုက် ကာဆဝ် ဒီ အန်။”

19 ပန် တီ အာဒါဝိတ် ဘော ယိုဝ် လွင် ဒဲစေန့် အန် လာယ် ဂြုဝ်း ဖူဖာပ်။ အန် ဘော နပ်၊ ဂွန် အန် ဟဲ့ ဟွတ့် ယမ်။ အန် ဘော ဒီမွှတ် ဒဲစေန့် အန် တဝ်း၊ “ဂွန် တွိုန် ဟဲ့ ဟွတ့် ယမ်။း” ဂေ မိူဝ် ဝီ တဝ်း၊ “ဟဲ့ ဟွတ့် ယမ်။”

20 ပန် တီ အာဒါဝိတ် ဘော ယိတ့် ဒဲင် ကာဒါယ် တွိုန်၊ တာ အိုမ် ဘော ဖဝ်း နာမန် ဒီ အန်၊ ကာပ့လု ခြိုင် ပီ တာ အန် တွိုန်။ ဟဲ့ ဟွတ့်၊ အန် ဘော ဟာဝ် ကြိုပ် ဒီ ဟုဝ် ဇဝ်ဖြာ။ ဝါယ် တီ၊ အန် ဘော ဝီ တး ဒီ ဟုဝ် အန်၊ မှာန့် ပီ ဒီ ဟူမ် ဒီ ဂေ။ ဂေ ဘော ဒိုဝ်း တး၊ ဘ့လေး တဲး အန် ဟူမ်။

21 ဒဲစေန့် အန် ဝီ တဝ်း ဒီ အန်၊ “န့ ပါယ် မှဝ် ပီ ဘူင် မဲ ဇိုဝ် တီ။း ဒေါ ညှမ် ယမ် ဂွန် မဲ၊ မဲ ဟဲ့ ယိူန် ပီ ဒီ ဟူမ် ဘော ယာမ်။ ဒေါ တီ နီ၊ ဂွန် မဲ ဟဲ့ ဟွတ့် ယမ်၊ မဲ ယီ ဝီ ယိတ့်၊ ဟူမ် ပီ ဒီ ဟူမ်။”

22 အာဒါဝိတ် ဝီ ကာလာင် တဝ်း၊ “ဒေါ ညှမ် ယမ် ဂွန် တွိုန်၊ အုဝ် ယိူန် ပီ ဒီ ဟူမ် ဘော ယာမ်။ ခုဝ်၊ အုဝ် ကာဖာ တဝ်း၊ ‘ညှမ် နပ်၊ ယုဝ် ဇဝ်ဖြာ ဆော ကာဝေ အုဝ် ဘော တဲး ဂွန် တီ ဝီ ကဲန်။’ 23 ဒေါ တီ နီ၊ ဂွန် တီ ဟဲ့ ဟွတ့် ယမ်။ အာဝ် ဟူ ခုဝ် ယိူန် ပီ ဒီ ဟူမ်။ အာဝ် ဟူ ပွိုန် ဝီ တဲး အန် အိမ်။ အုဝ် ပီ ဘော လုဝ် ဟာဝ် ဒူင် ကွယ် ဂွန် တီ မိူဝ်၊ အန် တူ ပွိုန် ဝီ တး ဒူင် ကွယ် အုဝ် ဒေါ မှဝ်။”

24 ပန် တီ အာဒါဝိတ် ဘော လှဝ် နဝ်း နာင် ဘေတ်ဆေဘာ တွိုန် ဘော ဟာဝ် ကွယ် ရိုမ် ဒူပ် အန်။ နာင် တွိုန် ဘော ဝီ မိုဝ်း ဂွန် ပေါ အူ ဝီ။ ဂုန့် အန် ဘော တဲး အန် စိူဝ် အာဆာလုဝ်မုဝ်။ 25 ဇဝ်ဖြာ မိူဝ် ရွက့် ဂွန် တီ။ ခုဝ်၊ အန် စ်ု ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန် ဟာဝ် ဒူင် ကွယ် ဂွန် တွိုန်၊ တဲး အန် ဒွါ စိူဝ် ကာမာယ် ဒီ ဂွန် တီ၊ တဲး အန် စိူဝ် အာယီတီတီ။

26 ဒေါ အန် တီ အာယောဖ ဘော ကာဂုဝ်း မိူင် ရာဘာ အီ မုး မိူင် ဒူအီ အမ်မူန်၊ တဲး န့ ဝီ ဘဲန် မိူင် အန်။ 27 အန် ဘော စ်ု ဒါလာမ် အန် ဟာဝ် ဒူင် ကွယ် အာဒါဝိတ်၊ တဝ်း ဒီ အန်၊ “အုဝ် ဟဲ့ ကာဂုဝ်း မိူင် ရာဘာ၊ ဟဲ့ ပွိုန် ဘော ဒူင် မိုဝ်း အိုမ် ခဲင် မိူင် တီ။

28 ဒေါ တီ နီ တဲး မဲ ဒဲ့ တး ကာဇု တူတ့် ဒါ ဆိုက် အီ ဆီ ဂိတ်၊ တဲး ဂေ တး ကွယ် ရူပ် မိူင် တီ၊ တဲး မဲ ကော ပဲ။ ဆေ မဲ တူ ဘူင် ပါယ် တီ၊ အုဝ် ဒီ ဝီ တဲး အန် စိူဝ် ပီ စိူဝ် အုဝ်။” 29 ပန် တီ အာဒါဝိတ် ဘော ဒဲ့ ခဲ့ ကွယ် ဒူအီ အန်၊ တဲး ဂေ တး ကာဇု။ အန် ဘော ဟာဝ် ဒီ မိူင် ရာဘာ၊ ကာဂုဝ်း မိူင် တီ၊ တဲး အန် ကော ပဲ။ 30 အန် ဘော ဘုတ့် မင်ဂိုမ် ဒီ ဂိန့် ခုန်ဒီခမ် အီ အိုပ် မိူင် တွိုန်။ မင်ဂိုမ် တီ၊ န့ မုး ခြိဝ် အီ စန် အူ ထာလေန်။ န့ မိုဝ်း ဘော ဆဲန့် ဘွတ်။ ဂေ ဘော ဝီ စှိုပ် မင်ဂိုမ် တီ ဒီ ဂိန့် အာဒါဝိတ်။ ကြုဝ်ကြာမ် ပီ ဖာတ် ဒိုဝ်း ဂေ ခဲင် မိူင် တွိုန် မိူဝ်၊ ဟဲ့ ကိူန် ကာဆဝ်။ 31 ဒူအီ အီ ကွယ် ခဲင် မိူင် တွိုန်၊ အန် ဘော တဲး ဂေ ရန့် ဂါန်၊ တာ ခြိုင် ဟိန်၊ လေက်လိုဝ်၊ ဘ့လာ န့ထဲ ဘော တာ မိုယ်။ အန် ဘူင် ဒီ ဂေ ပါယ် တီ၊ ခါနှာပ် တဲး ဂေ ဒုဝ့် မာအုတ်။ အန် တဲး ဂေ ဒူအီ အီ ကွယ် ဒီ မိူင် အမ်မူန် ဒွန် မိူင် ဘူင် ပါယ် တီ။ ဟဲ့ ဟွတ့်၊ အာဒါဝိတ် ဘော ဒါ ဆိုက် အန် ဘောကာဂ့လျီတ် ဘော ဝီ တး ဇမ် ဒီ မိူင် ယေရူဆာလဲမ်။