1 န့ ဘော ဇမ် ဆီနမ် ကာမာယ်။ န့ မုး အာခြာဝ် ဒေါ လာယ် ကာဂုဝ်း ဂေ ခုန်ဒီခမ်။ အာဒါဝိတ် ဘော စ်ု အာယောဖ ဘော ဒါ ဆိုက် အန် ဘောကာဂ့လျီတ် အီ ကွယ် ခဲင် မိူင် အီဆာရေလ တွိုန်၊ တဲး ဂေ ကာဂုဝ်း ဒီ ဒူအီ အမ်မူန် အီ ကွယ် ရူပ် မိူင် ရာဘာ တွိုန်။ အီ မုး အာဒါဝိတ်၊ အန် ယီ ကွယ် ဒီ မိူင် ယေရူဆာလဲမ်။

2 ဒေါ အန် တီ အူ ဆီငဲ ဘာ ဒီ အပ် အာဒါဝိတ် ဘော ယိတ့် ဒဲင် ကာစှူင့် အိတ် အန်၊ ဝီ ဟုဝ့် နာ ဒဲင် ကာတု ဟုဝ် အန်၊ ဝီ ယွတ် ဟာဝ်။^a အန် ဘော ယိုဝ် အီဘိုန့် အူ ဝီ တာ အိုမ်။ အီဘိုန့် တွိုန်၊ အန် စှိတ် ကာဆဝ်။ 3 အာဒါဝိတ် ဘော စ်ု အူ ဝီ ဟာဝ် ဒီမွှတ် အာဆေ အန် မုး။ ဒူအီ တီ ဝီ တဝ်း ဒီ အန်၊ “အီဘိုန့် ဝီ နီ၊ အန် စိူဝ် နာင် ဘေတ်ဆေဘာ၊ အန် မုး ဂွန် အာအေလမ်၊ ဝီ ဘဲန် အီဘိုန့် အာအူရီယာ အီ မုး ဒူအီ ဟေထိတ်။” 4 ပန် တီ အာဒါဝိတ် ဘော စ်ု ဒါလာမ် အန်၊ တဲး ဂေ ဒဲ့ အီဘိုန့် တွိုန် တး ဒူင် ကွယ် အန်။ အီဘိုန့် တွိုန် မိူဝ် တး ညိူဝ် အန်။ ဂါယ် ဘော လာယ် လာယ်၊ အိတ် ကာဒူပ်။ အီဘိုန့် ဟဲ့ ဟွတ့် တာ အိုမ်၊ တဲး အန် ဆီငါ ဒူပ် ပီ ဒမ် ဒါရာ ဝါယ် မိုဝ်း အန် ခြိုင် ကာပ့လု။ ဟဲ့ ဟွတ့်၊ အန် ဘော ဝီ ဝေန့် ဒီ ကာင် အန်။ 5 ဒေါ အန် တီ အီဘိုန့် တွိုန် ဟဲ့ ဟွတ့် ဒဲ ဘာဒိက် ဆန်ထေ။ အန် ဘော ဝီ စ်ု အီ ဟာဝ် ကာလာင် ဒီ အာဒါဝိတ် တဝ်း၊ “အုဝ် ဟဲ့ ဟွတ့် ဒဲ ဘာဒိက် ဆန်ထေ။”

6 ပန် တီ အာဒါဝိတ် ဘော စ်ု အီ ဟာဝ် ဒူင် ကွယ် အာယောဖ၊ တဲး အန် တဝ်း၊ “မဲ တဲး အာအူရီယာ အီ မုး ဒူအီ ဟေထိတ် တွိုန် တး ဒူင် ကွယ် အုဝ်။” အာယောဖ ဘော စ်ု အာအူရီယာ ဟာဝ် ဒူင် ကွယ် အာဒါဝိတ်။

7 အာအူရီယာ ဘော တး ဇမ်၊ အာဒါဝိတ် ဘော ဝီ ဒီမွှတ် လွင် အာယောဖ ဂေ ဒူအီ အန်၊ ယုဝ် ဂေ ဟဲ့ ကွယ် ဒါခိုယ်။ အန် ဘော ဒီမွှတ် လွင် ပီ ကာဂုဝ်း ဂေ၊ ယုဝ် ဟဲ့ အွင် တူ အွင်။

8 ဟဲ့ ဟွတ့်၊ အာဒါဝိတ် မိူဝ် စ်ု အာအူရီယာ တဝ်း၊ “တဲး မဲ ဝေန့် ဒီ ကာင် မဲ၊ ဝေန့် ဘာယ် ပ့လဝ် မဲ။” အာအူရီယာ ဘော လေး ခဲင် ဟုဝ် တွိုန် ဟာဝ်။ ခုန်ဒီခမ် ဘော တိုယ် ဘော ခေါဆွင် ဒွါ ဟာဝ် ဒီ အန်။

9 မာလဲ၊ အာအူရီယာ တူ ဟာဝ် ဒီ ကာင် အန်။ အန် ဝီ တမ် ဒူပ် ဒဲစေန့် ဒါ ကာညာ အန် တွိုန် အီ ကွယ် ခူပ် မာလုဝ်း ဟုဝ် ခုန်ဒီခမ်။ 10 ဘော မိုဝ်း အီ ဟဝ် ဝီ ကာလာင် ဒီ အာဒါဝိတ် လွင် အာအူရီယာ တူ ဝေန့် ဒီ ကာင် အန်။ အာဒါဝိတ် ဘော ဝီ ဒီမွှတ် အာအူရီယာ တဝ်း၊ “မဲ ဟဲ့ ဟွတ့် တး ဒူပ် န့တေန့် တူင့်။ န့ ပါယ် မှဝ်၊ မဲ ပီ တူ ဝေန့် ဒီ ကာင် မဲ။”

11 အာအူရီယာ ဝီ တဝ်း ဒီ အာဒါဝိတ်၊ “ဇီဒိူက် ဇဝ်ဖြာ ဘော ဒူအီ အီဆာရေလ ဘော ဒူအီ အာယူဒါ ဂေ ဆီ ကွယ် ခဲင် ထိုပ်။ အာယောဖ အီ မုး ဒါ ကာညာ အုဝ် ဘော ဒဲစေန့် အန်၊ ဂေ ဟဲ့ ကွယ် နာ ရေတ့်။ ခုဝ်၊ ဘော အုဝ် အာဝ် ပွိုန် ဝေန့် ဒီ ကာင် အုဝ်။ အာဝ် ပွိုန် ကွယ် ဟူမ် ဒါခိုယ်၊ ကွယ် ဒူပ် အီဘိုန့် အုဝ်။ အုဝ် တဝ်း အာခ်ု ဒီ မဲ၊ အုဝ် တူ ပွိုန် ဘူင် ပါယ် တီ ဒေါ မှဝ်။”

12 ဟဲ့ ဟွတ့်၊ အာဒါဝိတ် ဝီ ကာလာင် ဒီ အာအူရီယာ တဝ်း၊ “ဘော မှိုဝ် အာတိုဝ် နီ၊ တဲး မဲ ကွယ် ဒီ နီ။ ခဲညှာ အုဝ် ဒီ တဲး မဲ ဟာဝ်။” ဆီငဲ တီ ဘော ပါ ခဲညှာ၊ အာအူရီယာ ဘော ကွယ် ဒီ မိူင် ယေရူဆာလဲမ်။ 13 အာဒါဝိတ် မိူဝ် ဒဲ့ အန်၊ တဲး အန် ပွိုန် ဒီ ဟူမ် ရိုမ် ဒျီင် ပဝ်း၊ တဲး အန် ကော ယိုတ့်။ ဘာ ဒီ အပ် တွိုန်၊ အန် ယီ တူ လူင် ဒီ ကာင် အန်။ အန် ဝီ လေး ဟာဝ် တမ် ဒူင် တမ် ဒဲစေန့် ဒါ ကာညာ အန် တွိုန်။

14 ဆိန့်ဝး အာဒါဝိတ် ဘော ဝီ ဒဲမ် ပဲ့၊ ဒွါ ဒီ အာအူရီယာ၊ တဲး အန် တိုယ် ဒီ အာယောဖ။ 15 ခဲင် ပဲ့ ပီ ဒဲမ် အန် တီ န့ တဝ်း၊ “တဲး မဲ တဲး အာအူရီယာ ကွယ် ဒီ အာတ့် ဆိူတ်၊ တဲး အန် ကာဂုဝ်း ဒီ ဒါ ဆိုက် အီ ဟာယ်၊ အီ လွှက့် ကာဆဝ်၊ တဲး အန် ကော ယမ်။ ကွဲ့ စွယ် အန်။”

16 ပန် တီ အာယောဖ တွိုန် ဟဲ့ ဟွတ့် တဲး ဒါ ဆိုက် အန် ရူပ် မိူင် တွိုန်။ အန် ဘော စ်ု အာအူရီယာ တဲး အန် ကွယ် နာ ဘ့လာက် ရန်ဆူ အီ မိုဝ်း ပ့လူမ် လွှိုမ် အီ။ 17 ဒေါ လေး ဒူအီ ခဲင် မိူင် တွိုန် ဘော ကာဂုဝ်း ဒီ ဒူအီ အာယောဖ၊ န့ မုး ဒါ ဆိုက် အာဒါဝိတ် မင် အီ၊ ဂေ ဘော ယမ်။ ဘော အာအူရီယာ အီ မုး ဒူအီ ဟေထိတ် တွိုန် ဟဲ့ ယမ်။

18 ဝါယ် တီ၊ အာယောဖ ဘော စ်ု ဒါလာမ် ဟာဝ် ကာလာင် တူတ့် ဒွန် မျုဝ် ဒီ ခုန်ဒီခမ် အာဒါဝိတ် လွင် ပဲ့ ဟဲ့ ကာဂုဝ်း ဂေ တွိုန်။ 19 အန် တဝ်း ဒီ ဒါလာမ် တွိုန်၊ “မဲ ကာလာင် ဒီ ခုန်ဒီခမ် လွင် ဟဲ့ ကာဂုဝ်း တွိုန်၊ တဲး ကော ဟွတ့် တူတ့်။ 20 ဆေ ခုန်ဒီခမ် ဘော ရူ၊ ဆေ အန် ဘော ဒီမွှတ် တဝ်း၊ ‘ဒေါ ကာဂုဝ်း ဘေ တီ မှဝ် န့ ပါယ် ပီ ကာဂုဝ်း ချြီ့ ရိုဝ် ဘေ မိူင် တီ။း ဘေ ဘော နပ် ဆီချာ၊ ဂေ ဒီ ဘန့် ဘ့လာ ဒီ ရဲင် မိူင် တီ။ 21 ဘေ တူ လှုဝ်း၊ အာဆေ ဟဲ့ ငဝ်း အာဘီမေန် တွိုန် အီ မုး ဂွန် အာယေရူဘေဆိတ် တွိုန်။း န့ မုး အီဘိုန့် အူ ဝီ။ အန် ဟဲ့ ဒိုဝ်း မာဝ် ကြိတ် ငှုဝ် အူ ဘူင့်၊ ဘျွာ လူင် ဒီ ရဲင် မိူင် တီ၊ ဘော ဒိုဝ် အန်။ အန် ဘော ယမ် ဒီ မိူင် ဆေဘိတ် တွိုန်။ ကူပ် မာဆေ ဘေ လုဝ် တး ကွယ် ချြီ့ ရိုဝ် ရဲင် မိူင် တီ။း’ ဆေ အန် ဘော တဝ်း ပါယ် တီ မဲ ဝီ ကာလာင် တဝ်း၊ ‘ဒဲစေန့် မဲ၊ အီ စိူဝ် အာအူရီယာ အီ မုး ဒူအီ ဟေထိတ် တွိုန်၊ အန် မိူဝ် ဟဲ့ ဟွတ့် ယမ်။’”

22 ဒါလာမ် တွိုန် ဘော ဟာဝ် ဇမ် ဒူင် ကွယ် အာဒါဝိတ် ဘော ခဲ တူတ့် ခဲ့ ပီ စ်ု အာယောဖ အန် ကာလာင်။ 23 အန် တဝ်း၊ “ရန်ဆူ ဂေ တွိုန် ဟဲ့ အွင် ဒဲစေန့် မဲ ဇဝ်။ ဂေ ဟဲ့ လေး ခဲင် မိူင်၊ ဇမ် ဒူင် ဂ့လင်။ ယေ ပီ ဝီ ကာဂုဝ်း ဒီ ဂေ၊ တဲး ဂေ ကော ဝီ ဝေန့်၊ ဇမ် ဘာင် မာလုဝ်း မိူင်။ 24 ဂေ ဒါ ကာညာ အ တွိုန် မိူဝ် ဘော ကွယ် ဒဲင် ရဲင် မိူင် ဝီ ဘန့် ယေ။ ယေ မိူဝ် ဘော ယမ် မင် အီ။ ဒဲစေန့် မဲ အီ စိူဝ် အာအူရီယာ အီ မုး ဒူအီ ဟေထိတ် တွိုန်၊ ဘော အန် ဟဲ့ ယမ် ဒီ တီ။”

25 အာဒါဝိတ် ဝီ ကာလာင် ဒီ အန် တဝ်း၊ “မဲ ကာလာင် ဒီ အာယောဖ တဝ်း၊ ‘ကွဲ့ တဲး နဝ်း မဲ လိုဝ် လွင် အန် တီ။ ခုဝ်၊ ဘ့လာ ပွါ့ တူ ရဝ်း ဒူင် လဝ့် အန်။ တဲး မဲ ဝီ ကာဂုဝ်း မိူင် တီ၊ တဲး အေ ကော ပွိုန်။’ မဲ ကာလာင် ဂြုဝ်း တီ၊ တဲး န့ ဘဲန် ပ့လူမ် ဘဲန် ဟဲန့် ဒီ နဝ်း အန်။”

26 န့ ယီ မုး အီဘိုန့် အာအူရီယာ တွိုန်၊ ဒေါ ယိုဝ် အန် လွင် အီမာယ် အန် အီ စိူဝ် အာအူရီယာ ဟဲ့ ဟွတ့် ယမ်၊ အန် ဘော ယာမ် ဘော က့လိုဝ် ကူပ် ယမ် အီမာယ် အန်။ 27 အာခြာဝ် လုဝ် က့လိုဝ် အန် ဟီ ဟွတ့်၊ အာဒါဝိတ် ဘော ဒဲ့ အန် တး ဒီ ဟုဝ် အန်၊ တဲး အန် ဝီ ဘဲန် အီဘိုန့် အန်။ အန် ဘော မိုဝ်း ဂွန် အူ ဝီ။ မာလဲ၊ လွင် ပီ ဘူင် အာဒါဝိတ် တီ၊ အာဝ် လဝ့် နဝ်း ဇဝ်ဖြာ။