1 ဝါယ် တီ ခုန်ဒီခမ် အီ အိုပ် ဒူအီ အမ်မူန် ဘော ယမ်။ ဂွန် အီမာယ် အန် အီ စိူဝ် အာဟာနုန် ဘော ဝီ ပ့လု အန်။

2 အာဒါဝိတ် ဝီ ကာဖာ၊ “အုဝ် ဒီ ဘူင် နာ မွှိုမ် ဒီ အာဟာနုန် အီ မုး ဂွန် အာနာဟာဆာ ကူပ် ဟဲ့ ဒွိုမ် ဘူင် ဂုန့် အန် နာ မွှိုမ် ဒီ အုဝ်။” အာဒါဝိတ် ဘော စ်ု ဒါ တာင် မင် အီ ဟာဝ် ကာလာင် လွင် နဝ်း က့လိုဝ် အန် ကူပ် ဂုန့် အာဟာနုန် ဟဲ့ ယမ်။

ဒူအီ အာဒါဝိတ် ဘော ဇမ် ခဲင် မိူင် အမ်မူန်၊ 3 ဂေ အာမူ အာမာတ် ခဲင် မိူင် အမ်မူန် ဘော ကာလာင် ဒီ ခုန်ဒီခမ် အာဟာနုန် တဝ်း၊ “လွင် ပီ တိုယ် အာဒါဝိတ် ဂေ တွိုန် တး၊ မဲ ဇဝ် ထာင်၊ န့ မုး ကူပ် ရုဝ်ဆေ အန် ဂုန့် မဲ တွိုန်။း အာဒါဝိတ် စ်ု ဂေ တး ဒီ မဲ၊ တဲး ဂေ ပွိုန် ဒီ ချွင် ခဲင် မိူင် မဲ၊ တဲး ဂေ ပွိုန် ဒီ ပျာတ့် ဝဲန် မိူင် မဲ နီ။” 4 ဟဲ့ ဟွတ့်၊ အာဟာနုန် တွိုန် ဘော မှေတ့် ဒူအီ အာဒါဝိတ်။ အန် ဘော ဂါ့ ဝဲန် ဒီမုဝ်း ဒီ ကုင်ကာပ် ဂေ အူ ကာတဲ၊ ဘော ကာဆွာ့ ဘော ခြိုင် ပီ တာ ဂေ တဲး န့ ဇမ် ဒီ ဆီပူင့် ဂေ။ ဟဲ့ ဟွတ့်၊ အန် ဝီ ဘ့လေး ဂေ တဲး ဂေ ဟာဝ်။

5 ဒေါ ဝီ ကာလာင် အီ လွင် အာတီ ဒီ အာဒါဝိတ်၊ အန် ဘော စ်ု တဲး ဂေ ဟာဝ် ဘ်ု ဒီ ရွုး ဂေ ဒူပ် န့တေန့်။ ကူပ် ဟဲ့ မွှိုမ် ဆာယ် ကာဆဝ် ဂေ၊ အန် ကာလာင် ဒီ ဂေ တဝ်း၊ “တဲး ဘေ ဂိူတ် ကွယ် ဒီ မိူင် ယေရီခုဝ်၊ တဲး ဒီမုဝ်း ဒီ ကုင်ကာပ် ဘေ ဝီ ဒီ တူင့်။ ဝါယ် နီ ဘေ ဘော ဝီ တး။”

6 ဂေ ဒူအီ အာမျုဝ် အမ်မူန် တွိုန် ဘော ဝီ နပ် လွင် ဟဲ့ ဘဲန် ဂေ ဒူအီ ပီ ဇွင့် အာဒါဝိတ်။ ဂေ ဘော ဇာင် ဒါ ဆိုက် အာမျုဝ် အာရာမ် အာ မှိုန့် ဝီ အီ ကွယ် ဒီ မိူင် ဘေတ်ရေဟူပ် ဘော မိူင် စောဖ။ ဂေ ဘော စ်ု အာမာခါ ဘော ဒူအီ အန် အူ ဟြဲန့် ဝီ စွယ် ဂေ။ ဘော ဒူအီ ခဲင် မိူင် တောဖ အူ မှိုန့် ဒီ အာ ဟြဲန့် ဝီ ဒူပ် ဂေ။

7 အာဒါဝိတ် ဘော ယိုဝ် လွင် အန် တီ၊ အန် ဘော စ်ု အာယောဖ ဘော ဒါ ဆိုက် အန် ဘောကာဂ့လျီတ် တဲး ဂေ ဟာဝ်။ 8 ဒူအီ အမ်မူန် ဂေ ဘော လေး တ မိူင်၊ ဘ်ု ဒီ ကာဂုဝ်း ဘာင် မာလုဝ်း မိူင် ဂေ။ ဒူအီ အာရာမ် အီ တး ဒီ မိူင် စောဖ ဂါယ် မိူင် ရေဟူပ် ဘော ဒူအီ အီ တး မိူင် တောဖ ဘော ဒူအီ ခုန်ဒီခမ် အာမာခါ၊ ဂေ ယီ ဆီ ကွယ် ရာင် ဂေ ဒူင် ဂ့လင် နာ ရေတ့် မိူင်။

9 အာယောဖ ဘော ယိုဝ် လွင် ဆိုက် ဂေ တွိုန် ဟဲ့ တး ကွယ် အာ ဘ့လာက်၊ ဘော နာ အာတ့် ဘော နာ ပန်။ အန် ဘော ရဝ်း ဒူအီ အီ ပ့လူမ် အီ ခြန် ခဲင် ဒူအီ အီဆာရေလ၊ တဲး ဂေ ဘဲန် အီ ဘ်ု အီ ရဲ ဒူအီ အာရာမ် ဂေ တွိုန်။ 10 ဂေ အီ ဆီ ဂိတ် တွိုန်၊ အန် ဘော တဲး ဝါ အန် အီ စိူဝ် အာဖီဆေ ယဲတ့် ဂေ၊ တဲး ဂေ ဘ်ု ဒူအီ အမ်မူန် ဂေ တွိုန်။ 11 အန် တဝ်း၊ “ဆေ ဒူအီ အာရာမ် ဘော ပဲ အုဝ်၊ မဲ လုဝ် တး စွယ် အုဝ်။ ဆေ ဒူအီ အမ်မူန် ဘော ပဲ မဲ၊ အုဝ် ဒီ တး စွယ် မဲ။ 12 တဲး အေ မိုဝ်း နဝ်း ပ့လူမ်၊ တဲး အေ ယ ကာဂုဝ်း အာဒါ ဒူအီ အေ ဘော အာဒါ မာန် မိူင် ပီ အိုပ် ဇဝ်ဖြာ အေ။ ဇဝ်ဖြာ ဒီ ဘူင် တဲး န့ ဘဲန် ပီ အိုင် အန်။”

13 ပန် တီ အာယောဖ ဘော ဒူအီ အီ ဒူပ် အန်၊ ဂေ ဘော ဟာဝ် ကာတတ် ဒူအီ အာရာမ်၊ တဲး ဂေ ပွိုန် ဒီ ကာဂုဝ်း ဒီ ဂေ။ ဂေ ဒူအီ အာရာမ် ယီ တဝ် ဟာဝ် နာ အာတ့် ဂေ။ 14 ဂေ ဒူအီ အမ်မူန် ဘော ဝီ ယိုဝ် ဒူအီ အာရာမ် ဟဲ့ တဝ်၊ ဂေ မိူဝ် ဝီ ကာဖြူမ် ဒီ တဝ် နာ အာတ့် အာဖီဆေ တွိုန်၊ ဝီ လိုပ် ဟာဝ် ခဲင် မိူင် ဂေ။ အာယောဖ ဘော လေး ဒူင် ကွယ် ဂေ၊ ဝီ ဝေန့် ခဲင် မိူင် ယေရူဆာလဲမ်။

15 ဒူအီ အာရာမ်၊ ဂေ ဘော နပ်၊ ဂေ ဟဲ့ စှိုမ် ဒီ ဒူအီ အီဆာရေလ၊ ဂေ ဘော ဝီ တး ကာဇု ပေါ အူ ဇေန့်။ 16 ခုန်ဒီခမ် အာဟာဒေစာ အီ အိုပ် မိူင် စောဖ ဘော စ်ု အီ ဟာဝ် ဒဲ့ ဒူအီ အာရာမ် အီ ကွယ် ဘ့လာက် နာ တ ဘ့လဲင် အိုမ် တွိုန်။ ဟဲ့ ဟွတ့်၊ ဂေ ဘော ဝီ တး ဒီ မိူင် ဟေလမ်။ အာဟာဒေစာ ဟဲ့ စ်ု အာဆောဘာက်၊ တဲး အန် အိုပ် ဒါ ဆိုက် ဂေ တီ၊ တဲး အန် ယဲတ့် ဂေ။

17 အာဒါဝိတ် ဘော ယိုဝ် လွင် အန် တီ၊ အန် ဘော တဲး ဒူအီ အီဆာရေလ တး ကာဇု၊ တဲး ဂေ ကာလုဝ်း ဘ့လဲင် အိုမ် ယောဒါန် တွိုန်၊ ဝီ ဟာဝ် ဇမ် ဒီ မိူင် ဟေလမ်။ ဒူအီ အာရာမ် ဘော ရဲန် ဆိုက်၊ ဝီ ကာဂုဝ်း ဒီ အာဒါဝိတ်။ 18 ပန် တီ ဂေ ဘော တဝ် ဒီ အာတ့် ဒူအီ အီဆာရေလ။ အာဒါဝိတ် ဘော ငဝ်း ဒါ ဆိုက် အီ ပဝ့် လက်လဝ် ဂေ ဒူအီ အာရာမ် ဘူ မာယဝ်း ဝီ။ အန် ဘော ငဝ်း ဒါ ဆိုက် အီ ပဝ့် မင်ပြွင့် ဖွုန် မှိုန့် ဝီ၊ တဲး ဂေ ယမ်။ ဘော အာဆောဘာက် အီ မုး ဒါ အီ အိုပ် ဒါ ဆိုက် တွိုန် ဘော ယမ် ဒီ တီ။ 19 ဂေ ခုန်ဒီခမ် ပီ အိုပ် အာဟာဒေစာ တွိုန်၊ ဂေ ဘော ယိုဝ် လွင် ဟဲ့ စှိုမ် ဂေ ဒီ ဒူအီ အီဆာရေလ၊ ဂေ ဘော ကာဖြူမ် ဒီ ဘဲန် အူ ဂိုက် ဒီ ဒူအီ အီဆာရေလ၊ ဝီ ခမ် ဒီ ဘဲန် မှာယ် ဂေ။ ဝါယ် တီ ဒူအီ အာရာမ် ဂေ အာဝ် ဟူ ယ စွယ် ဒူအီ အမ်မူန် ကာဂုဝ်း ဒီ အီ။