1 န့ ဘော မိုဝ်း အူ ဇေန့် အာဒါဝိတ် ဒီမွှတ် အီ တဝ်း၊ “န့ ဆီ မိုဝ်း ဝေါဝဲ ခြိုဝ် အာဆောလူ တွိုန် အီ ဂိတ် ခေါ အူ ဝီ၊ တဲး အုဝ် ပွိုန် ဒီ ဘူင် ဝျီ့ ပဲ့ ဟဲ့ ဂေဇူ အာယုဝ်နာထာန် တွိုန် ဒီ အုဝ်။း”

2 န့ ဘော မိုဝ်း မှာယ် အာဆောလူ တွိုန် အူ ဝီ၊ အန် စိူဝ် အာဇီဘာ။ ဂေ ဘော ဒဲ့ တး အန်။ ခုန်ဒီခမ် အာဒါဝိတ် ဘော ဒီမွှတ် အန် တဝ်း၊ “မဲ မုး အာဇီဘာ။း” ဟဲ့ ဟွတ့်၊ အန် ဝီ ကာလာင် တဝ်း၊ “အိုဝ်၊ န့ ဟဲ့ မုး အုဝ်။”

3 ခုန်ဒီခမ် ဘော တဝ်း၊ “န့ ဆီ မိုဝ်း လှုက်လှာန် အာဆောလူ အူ ဝီ၊ အီ ညှမ် ယမ်။း အုဝ် ဆီ ဘူင် နာ မွှိုမ် ဒီ အန်။” အာဇီဘာ ဝီ ကာလာင် ဒီ ခုန်ဒီခမ် တဝ်း၊ “န့ မိုဝ်း ဂွန် အာယုဝ်နာထာန် အူ ဝီ အီ မိုဝ်း ပ့လဝ် ဂဲ့ ဘော အာ ဘ့လာက်။” အန် ဟဲ့ ဟွတ့် တဝ်း ပါယ် တီ၊ 4 ခုန်ဒီခမ် ဝီ ဒီမွှတ် ပွါ တဝ်း၊ “အန် ကွယ် ဒီ မှဝ်။း” အာဇီဘာ ဝီ တဝ်း၊ “အန် ကွယ် ဒီ ကာင် အာမာခီရာ အီ မုး ဂွန် အာမေလာ၊ အီ ကွယ် ဒီ မိူင် လောဒေဘာ တွိုန်။”

5 ပန် တီ အာဒါဝိတ် ဘော စ်ု အီ ဟာဝ် ဒီ ကာင် အာမာခီရာ အီ မုး ဂွန် အာမေလာ၊ အီ ကွယ် ဒီ မိူင် လောဒေဘာ တွိုန်၊ တဲး ဂေ ဒဲ့ တး အန်။

6 န့ ယီ မုး အာမေဖီဘောဆေတ် အီ မုး ဂွန် အာယုဝ်နာထာန်။ အာယုဝ်နာထာန် ဝီ မုး ဂွန် အာဆောလူ။ အာမေဖီဘောဆေတ် ဘော တး ဇမ် ဒူင် ကွယ် အာဒါဝိတ်၊ အန် ဘော ခြိုပ်ခြဝ် ကြိုပ် အာဒါဝိတ်။ အာဒါဝိတ် ဘော တဝ်း၊ “အိုယ် အာမေဖီဘောဆေတ်။” အန် ဝီ တဝ်း၊ “အုဝ် မုး မှာယ် မဲ။”

7 အာဒါဝိတ် ဝီ တဝ်း၊ “မဲ ကွဲ့ ယုဝ်။ အုဝ် ဒီ ဘူင် နာ မွှိုမ် ဒီ မဲ အာခ်ု မှာန်။ ဂုန့် မဲ အီ စိူဝ် အာယုဝ်နာထာန် ဟဲ့ ဒွိုမ် မုး ဂိုက် အုဝ်။ ခုဝ်၊ ကာဒါယ် အီ ဒွိုမ် မုး ကြုဝ် ဒါ မဲ အီ စိူဝ် အာဆောလူ တွိုန်၊ အုဝ် ဒီ ဝီ ဒွါ ဒီ မဲ။ မဲ ဒီ ဘော ပွိုန် ဒီ ဟူမ် ရိုမ် ဒူပ် အုဝ် ဒွန် ဆီငဲ။”

8 အန် ဘော ဝီ ဂိုပ် ဝီ တဝ်း၊ “အုဝ် တူ နပ်၊ မှဝ် န့ ပါယ် ပီ တဝ်း မဲ ဂြုဝ်း တီ ဒီ အုဝ်။ အုဝ် ဟဲ့ ပီ မာဆုဝ် ယမ်။ မဲ ယီ တဝ်း ဒီ ဘူင် နာ မွှိုမ် ကာဆဝ် ဒီ အုဝ်။”

9 ဟဲ့ ဟွတ့်၊ ခုန်ဒီခမ် ဘော ဝီ ဒဲ့ အာဇီဘာ အီ မုး မှာယ် အာဆောလူ တွိုန်၊ တဝ်း ဒီ အန်၊ “အုဝ် ဟဲ့ ဒိုဝ်း တူတ့် ကြုဝ်ကြာမ် အီ ဒွိုမ် မုး ကြုဝ် အာဆောလူ ဘော ဝေါဝဲ အန်၊ ဝီ အာပ် ဒွါ ဒီ လှာန် ဒါ ကာညာ မဲ နီ။ 10 ဘော မဲ ဘော ဂွန် အီမာယ် မဲ၊ ဘော မှာယ် မဲ ဘောကာဂ့လျီတ်၊ ဘေ လုဝ် ရန့် ဂါန် အာဒါ အန်။ ဘေ ဟီ ပွိုန် ဘ့လေ အန်၊ ဘေ လုဝ် ဒွါ ဒီ လှာန် ဒါ ကာညာ မဲ တီ၊ တဲး အန် မိုဝ်း ခဲ့ ပီ လုဝ် အန်။ မာလဲ၊ အာမေဖီဘောဆေတ် နီ အီ မုး လှာန် ဒါ ကာညာ မဲ၊ အန် ဒီ ပွိုန် ဟူမ် ပီ ဒီ ဟူမ် ရိုမ် ဒူပ် အုဝ် ဆေဆေ။” အာဇီဘာ တွိုန် ယီ မိုဝ်း ဂွန် အီမာယ် ဂိုဝ် ဒီ ဖန် ဝီ ဘော မှာယ် အန် အာ ဂိုဝ် ဝီ။

11 အာဇီဘာ ဝီ ကာလာင် ဒီ ခုန်ဒီခမ် တဝ်း၊ “ခဲ့ ပီ တဝ်း မဲ ခုန်ဒီခမ် တာင် ဒီ အုဝ် နီ၊ အုဝ် မိူဝ် ဒီ ဘူင် တူတ့် ဒွန် မျုဝ်။” အာမေဖီဘောဆေတ် တွိုန် ဘော ပွိုန် ဒီ ဟူမ် ရိုမ် ဒူပ် အာဒါဝိတ်၊ တဲး အန် ပီ ဂွန် အာရာင် ခုန်ဒီခမ်။

12 အာမေဖီဘောဆေတ် ယီ မိုဝ်း ဂွန် အီမာယ် အူ ဝီ၊ အီ စိူဝ် အာမီဂါ။ ဒူအီ အီ ကွယ် ခဲင် ကာင် အာဇီဘာ တွိုန် ဘော ဘဲန် တူတ့် မှာယ် အာမေဖီဘောဆေတ် တွိုန်။ 13 ပန် တီ ကူပ် ပွိုန် အန် ဒီ ဟူမ် ရိုမ် ဒူပ် ခုန်ဒီခမ် ဒွန် ဆီငဲ၊ အာမေဖီဘောဆေတ် ဘော ကွယ် ခဲင် မိူင် ယေရူဆာလဲမ် ဆေဆေ။ အန် မိူဝ် မိုဝ်း ပ့လဝ် ဂဲ့ ဘော အာ ဘ့လာက်။