1 ဝါယ် တီ အာဒါဝိတ် ကာဂုဝ်း ဒီ ဒူအီ ဖီလီထီ။ အန် ဘော ပဲ ဂေ။ အန် ဘော ပွိုန် မိူင် မေထေဂါမာ အီ မုး မိူင် ပီ အိုပ် ဂေ ဒူအီ ဖီလီထီ။

2 အန် မိူဝ် ဟဲ့ ကာဂုဝ်း ဒီ ဂေ ဒူအီ အာမျုဝ် မုဝ်အာပ် ဘော ပျာတ့် ဂေ။ အန် ဟဲ့ တဲး ဂေ အိတ် ဒဲင် ကာဒါယ် ဘဲန် မ့ပြဲင်။ ဟဲ့ ဟွတ့်၊ အန် ဒိုဝ်း ဝန်၊ ဝီ ဂဝ်။ ဂေ အီ ကွယ် ခဲ့ တူင့် အာ လုန် ဝန်၊ အန် ငဝ်း ယမ်။ ဂေ အီ ယီ ကွယ် ခဲ့ တူင့် ပေါ အူ လုန် ဝန်၊ အန် အုန် တဲး ဂေ အိမ်။ ပါယ် တီ ဂေ ဒူအီ အာမျုဝ် မုဝ်အာပ် ဘော ဘဲန် မှာယ် အာဒါဝိတ် အီ လုဝ် ဟပ် ရွိုန် စိုင် ဒီ အန်။

3 အာဒါဝိတ် ဘော ကာဂုဝ်း ဒီ အာဟာဒေစာ အီ မုး ဂွန် အာရေဟူပ်။ အန် မုး ခုန်ဒီခမ် အီ အိုပ် မိူင် စောဖ တွိုန်။ အန် ကာဂုဝ်း ဂေ တီ ဒေါ ဟာဝ် ခုန်ဒီခမ် အာဟာဒေစာ၊ တဲး အန် ပွိုန် ဒီ အိုပ် ဒူအီ အီ ကွယ် ခူပ် အိုမ် ဘ့လဲင် အူဖာရာတ် တွိုန်။ 4 အာဒါဝိတ် ဘော ဒိုဝ်း ဒီ အန် လက်လဝ် အူ ဟြဲန့် လှာင် ဘော ဒါ အီ ပဝ့် လက်လဝ် တီ ဘူ ဟြဲန့် ဝီ ဘော ဒါ ဆိုက် အီ ဟာဝ် ဒီ ပ့လဝ် အာ မှိုန့် ဝီ။ အန် ဘော ဒိုဝ်း အုန် မင်ပြွင့် အီ ဒိူတ် လက်လဝ် အာဒါ အူ မာယဝ်း ဒုဝ်။ အီ ကွယ် ဒဲင် တီ၊ အန် ဘော ဒဲပ် တူတ့် ဆီန ဒီ ဂဲ့ ဂေ။

5 ဂေ ဒူအီ အာရာမ် အီ ကွယ် ခဲင် မိူင် ဒါမာခူ တွိုန်၊ ဂေ ဘော တး တဝ်း ဒီ စွယ် ဒါ ဆိုက် အာဟာဒေစာ အီ မုး ခုန်ဒီခမ် အီ အိုပ် မိူင် စောဖ တွိုန်။ အာဒါဝိတ် ဘော ငဝ်း ဒူအီ အာရာမ် အာ မှိုန့် ဒီ အာ ဟြဲန့် ဝီ။ 6 အန် ဘော အုန် ဒါ ဆိုက် အန် ခဲင် မိူင် ဒါမာခူ အီ ကွယ် ခဲင် ကာဒါယ် မိူင် အာရာမ် တွိုန်။ ဒူအီ အာရာမ် ဂေ ဘော ကာဒုး ဒီ ဘဲန် မှာယ် အာဒါဝိတ်၊ ဟပ် ရွိုန် စိုင် ဒီ အန်။ အာဒါဝိတ် ဘော ဟာဝ် နာ မှဝ်၊ ဇဝ်ဖြာ မိူဝ် စွယ် အန်၊ တဲး အန် ပဲ ရန်ဆူ အန်။

7 အာဒါဝိတ် ဘော ဒိုဝ်း မင် ဂွင့် ခြိဝ် ပီ ဂူင့် ဒူအီ အာဟာဒေစာ တွိုန်၊ ဝီ ဟာဝ် ဒီ မိူင် ယေရူဆာလဲမ်။ 8 အန် ဘော ဒိုဝ်း ဘွင့် ဒေန့် ကိူန် ကာဆဝ် ခဲင် မိူင် ထေဘာ ဂါယ် မိူင် ဘေရော​ဆေ အီ မုး မိူင် ပီ အိုပ် အာဟာဒေစာ တွိုန်။

9 န့ ယီ မုး အာဒေါအိတ်၊ အန် မုး ခုန်ဒီခမ် အီ အိုပ် မိူင် ဟာမာတ် တွိုန်။ အန် ဘော ယိုဝ် လွင် အာဒါဝိတ် ဟဲ့ ကာဂုဝ်း ဒီ ဖိုင် အာဟာဒေစာ တွိုန်၊ 10 အန် ဘော စ်ု ဂွန် အီမာယ် အန် အီ စိူဝ် အာယုဝ်ရမ်၊ တဲး အန် ဟာဝ် ဒူင် ကွယ် ခုန်ဒီခမ် အာဒါဝိတ်၊ တဲး အန် ကာလာင် ဂြုဝ်း ဒါခိုယ် ဒီ အန်၊ အိူပ် အန် ကူပ် ဟဲ့ ကာဂုဝ်း ပဲ အန် အာဟာဒေစာ တွိုန်။ အန် ဘူင် ပါယ် တီ ခုဝ်၊ ဘော အန် ဟဲ့ ဒွိုမ် လာယ် ကာဂုဝ်း ဒီ အာဟာဒေစာ တွိုန်။ အာယုဝ်ရမ် ဘော ဒိုဝ်း ဒီ ဂူင့် ဆီလယ့် ဘဲန် မျုဝ် ဘဲန် မျုဝ် အီ မုး ရွိုန် ဂေ ခြိဝ် ဂေ ဘွင့် ဒေန့်၊ ဝီ ဒွါ ဒီ အာဒါဝိတ်။

11 အာဒါဝိတ် ဘော ဒိုဝ်း လှူ တူတ့် ဒီ ဇဝ်ဖြာ။ ပါယ် တီ အန် ဘော လှူ ဘော ရွိုန် ဂေ ခြိဝ် ပဲ့ ဟဲ့ ဖာတ် ပွိုန် အန် ဒီ မိူင် ပဲ့ ဟဲ့ ကာဂုဝ်း ပဲ အန် တွိုန်။ 12 အန် ပွိုန် တး ဒီ မိူင် အာရာမ်၊ မိူင် မုဝ်အာပ်၊ မိူင် ဒူင် ကွယ် ဂေ ဒူအီ အမ်မူန်၊ မိူင် ဖီလီထီ ဘော မိူင် အာမာလေက် ဂေ တွိုန်။ ဘော ပဲ့ ဟဲ့ ဖာတ် ဒိုဝ်း အန် ဒီ အာဟာဒေစာ အီ မုး ဂွန် အာရေဟူပ်၊ အီ မုး ခုန်ဒီခမ် ခဲင် မိူင် အာစောဖ တွိုန်၊ အန် ဒိုဝ်း လှူ တူတ့် ဒီ ဇဝ်ဖြာ။

13 အာဒါဝိတ် မိူဝ် ဟဲ့ ကာဂုဝ်း ဒီ ဒူအီ အာရာမ်၊ ဟဲ့ ငဝ်း ဒူအီ အူ မှိုန့် ဒီ ဒါ ဟြဲန့် ဝီ ဒေါ ကာဂုဝ်း အန် ဒီ ဂ့လင် အီ စိူဝ် ဒီဂ့လယ့်ဆယ့် တွိုန်။ ဒေါ ဝီ တး အန် ဒီ တီ၊ ဂေ ဘော အိူပ် အန် ဒွန် နာ ဒွန် ပ့လုဝ့်။ 14 အန် ဘော အုန် ဒါ ဆိုက် အန် ခဲင် မိူင် အေဒူမ် ဒွန် နာ ဒွန် ပ့လုဝ့်။ ခဲ့ ကွယ် ဒူအီ အေဒူမ်၊ ဂေ ကာဒုး ဒီ ဘဲန် မှာယ် အာဒါဝိတ်။ အာဒါဝိတ် ဘော ဟာဝ် နာ မှဝ်၊ ဇဝ်ဖြာ ဘော စွယ် အန် ဒွန် နာ ဒွန် ပ့လုဝ့်။

15 ပန် တီ အာဒါဝိတ် ဘော အိုပ် ဘိုင် မိူင် အီဆာရေလ ဘော မိူင်။ အန် ဘော ဆုင်ဖျာတ် ဒါရာ အီ မုး အီ မှာန် ဒီ ဒူအီ ပီ အိုပ် အန်။ 16 အာယောဖ အီ မုး ဂွန် နာင် စေရူယာ တွိုန် အန် ဟဲ့ ဝီ ဘဲန် ဒါ ဘုဝ် အီ အိုပ် ဒါ ဆိုက်။ အာယောဆာဖာတ် အီ မုး ဂွန် အာဟီလုတ် တွိုန် ဘော ဘဲန် ဒါ စာရေ။ 17 အာဇာဒူက် အီ မုး ဂွန် အာဟီတူပ်၊ ဘော အာဟီမာလေက် အီ မုး ဂွန် အာဘာထာ၊ ဂါယ် ဘော ဘဲန် ဒါ အီ လှူ ဒီ ဇဝ်ဖြာ။ အာဆေရာယာ ဘော ဘဲန် ဒါ အီ စွယ် ဒါ စာရေ ဒဲမ် ပဲ့။ 18 အာဘီနာယာ အီ မုး ဂွန် အာယေဟောယာဒါ အန် ပွိုန် ဒီ အိုပ် ဒူအီ ခေရေဆီ ဘော ဒူအီ ဘေလဆီ ဘောကာဂ့လျီတ်။ ဂေ ဂွန် အာဒါဝိတ် မိူဝ် ဟဲ့ ဘဲန် ဒါ အီ လှူ ဒီ ဇဝ်ဖြာ။