1 ဝါယ် အန် တီ ခုန်ဒီခမ် ဝီ ကွယ် ဒါခိုယ် ခဲင် ဟုဝ် အန်။ ဇဝ်ဖြာ ဟဲ့ တဲး အန် ကွယ် ဂတ် ယေန်၊ အာဝ် ဟူ လုဝ် ကာဂုဝ်း ဒီ ရန်ဆူ အီ ကွယ် အာရာပ် အန်။ 2 ဒေါ အန် တီ ခုန်ဒီခမ် ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန် တဝ်း၊ “မဲ ယွတ်၊ အုဝ် ပွိုန် ဒီ ကွယ် ခဲင် ဟုဝ် အီ မုး ဘဲန် ဟေ အာရိတ်။ အီ မုး ဇီဒိူက် ဇဝ်ဖြာ ယီ ကွယ် ခဲင် ထိုပ် ဘိက်။”

3 အာနာထာန် ဝီ ကာလာင် ဒီ ခုန်ဒီခမ် တဝ်း၊ “ဟာဝ် ဘူင် ခဲ့ ပီ အိုင် နဝ်း မဲ။ ဇဝ်ဖြာ ဒီ အိုင်။”

4 ခဲင် မှိုဝ် တွိုန်၊ ဇဝ်ဖြာ ဘော ကာလာင် ဂြုဝ်း ဒီ အာနာထာန်။ အန် စ်ု အာနာထာန် 5 ဟာဝ် ကာလာင် ဂြုဝ်း ဒီ အာဒါဝိတ် အီ မုး ဒဲစေန့် အန်။ အာနာထာန် လုဝ် တဝ်း၊ “ဇဝ်ဖြာ ဟဲ့ နပ်၊ မဲ ဆီ ဘူင် ကာင် အန်။ အန် တဝ်း ဒီ မဲ၊ 6 ‘ဆိန့် ဒေါ တိုယ် အုဝ် ဂေ ဒူအီ အီဆာရေလ၊ တဲး ဂေ လေး ခဲင် မိူင် အဲဂိုပ် တွိုန် ကော ဇမ် အာတိုဝ် နီ၊ အုဝ် တူ ကွယ် ခဲင် ကာင်။ အုဝ် ယဲတ့် ဘေ ဟာဝ် ဒွန် နာ ဒွန် ပ့လုဝ့် ဒေါ ကွယ် အုဝ် ခဲင် ထိုပ် ဘိက် တွိုန်။ 7 အုဝ် ဘော ဟာဝ် ရိုမ် ဒူပ် ဘေ။ ဘေ ဘော ဇမ် ဒီ မှဝ်၊ အုဝ် တူ ဒွိုမ် စ်ု ဘေ ဘူင် ကာင် အာဒါ အုဝ်။ အုဝ် တူ ဒွိုမ် ကာလာင် ဒီ ဒါ တာင် အီ အိုပ် ဘေ၊ အီ ပီ စ်ု အုဝ် တဲး ဂေ လိုမ်လာ ဒူအီ အုဝ် အီ မုး အာမျုဝ် အီဆာရေလ ဂေ တွိုန်။ အုဝ် တူ ဒွိုမ် တဝ်း၊ ဘေ လုဝ် ဒိုဝ်း ဟေ အာရိတ် ဘူင် ကာင် အာဒါ အုဝ်။

8 ခုဝ်၊ ဒေါ တီ နီ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဟဲ့ ရဝ်း မဲ အာဒါဝိတ်။ အုဝ် ဟဲ့ တဲး မဲ လေး ခဲင် ကာပိုမ် မာဘူ၊ ကွဲ့ ဟူ တဲး မဲ ဟျီင် မာဘူ တွိုန်။ အုဝ် ဟဲ့ တဲး မဲ ဘဲန် ဒါ ကာညာ အီ အိုပ် ဒူအီ အီဆာရေလ အီ မုး ဒူအီ ပီ အိုပ် အုဝ်။ 9 မဲ ဘော ဟာဝ် နာ မှဝ်၊ အုဝ် ဟဲ့ ဟာဝ် ရိုမ် ဒူပ် မဲ။ အုဝ် ဟဲ့ ဟာဝ် ဒီ အာတ့် မဲ၊ ဒိုဝ်း ဝဲန် ရန်ဆူ မဲ။ အုဝ် ဒီ ဘော ဒွါ အာဖုင် ဒီ မဲ၊ တဲး မဲ ကာရမ် ဂေ အီ မုး ဒါ တာင် ဆိူတ် ဒဲင် ကာဒါယ်။ 10 ဒဲင် တီ၊ ဂေ ဒူအီ အုဝ် အီ မုး ဒူအီ အီဆာရေလ၊ အုဝ် ဒီ တဲး ဂေ ပွိုန် ဒီ ကွယ် ဆီချာ၊ ကွဲ့ တဲး ဂေ ကာဒုး ဒီ ကာထုဝ့် ဝါယ် နီ၊ တဲး ဂေ ကွယ် ဒူင် ကွယ် ဂေ တီ။ ဂေ အီ တူ မွှိုမ် တွိုန် အာဝ် ဟူ ပွိုန် ဒီ ပျာတ့် ဘေ ပီ ခါ အာတ့်။ 11 ဆိန့် ဒေါ တဲး အုဝ် န့ မိုဝ်း ဒါ တာင် အီ အိုပ် ဒူအီ အီဆာရေလ၊ ဂေ ဟဲ့ ဘူင် နာ တူ မွှိုမ်။ အုဝ် ယီ ဒီ တဲး ရန်ဆူ မဲ ဟြာယ် တူတ့် ဒွန် မျုဝ်။ ဒဲင် တီ၊ အုဝ် ဇဝ်ဖြာ ဒီ တဲး ခြိုဝ် မဲ ကွယ် ဆီချာ ဆေဆေ။

12 ဆေ အာဆာက် မဲ ဟီ နုဝ့်၊ မဲ ဟီ ယမ် ပီ ဒါ ဒါ မဲ ဂေ တွိုန်၊ န့ ဒီ မိုဝ်း လှုက်လှာန် အာရာင် မဲ အူ ဝီ၊ အုဝ် ဒီ ဝီ တဲး အန် ဘဲန် ပီ မဲ၊ တဲး ဘော မိူင် ပီ အိုပ် အန် ဝီ ကွယ် ဆေဆေ။ 13 လှုက်လှာန် မဲ တီ၊ အန် ဒီ ဘူင် တဲး အီ ကိူန် ကာဆဝ် ဝီ အိူပ် အုဝ်၊ တဲး န့ ပီ အန် ဆမ် ကာင် အာဒါ အုဝ်။ ဘော ခြိုဝ် အန် ဒီ မိုဝ်း ပ့လူမ် ဂေ ဟဲန့် ဆေဆေ။ အုဝ် မိူဝ် ဒီ တဲး အန် အိုပ် မိူင် အန် ဆေဆေ။ 14 အုဝ် ဒီ ဘဲန် ဂုန့် အန်။ အန် ဒီ ဘော ဘဲန် ဂွန် အုဝ်။ ဆေ အန် ဟီ ဘူင် နာ တူ မွှိုမ်၊ အုဝ် တဲး အီ ဟဝ် ဘူင် နာ စီစိဝ် ဒီ အန်၊ တဲး န့ ပီ ဂုန့် ဒိုဝ်း မ့ဖျီ့ ဆီဘျြီ့ ဂွန် အန်။ 15 မာလဲ၊ အုဝ် ဒီ ရွက့် အန် ဆေဆေ။ အုဝ် တူ ဘူင် ပီ ပီ ဘူင် အုဝ် ဒီ အာဆောလူ အီ ပဲ့ ဟဲ့ ဝဲန် အုဝ် ဒီ အာတ့် မဲ တွိုန်။ 16 န့ကြိုဝ်း မဲ အုဝ် ဒီ တဲး ဂေ ကွယ် ဆီချာ ဆေဆေ၊ တဲး ဂေ လှုဝ်း အုဝ် ဆေဆေ။ ဂေ ဒီ ဘော အိုပ် မာန် မိူင် ပီ အိုပ် မဲ ဆေဆေ။’” ခဲ့ တီ ဇဝ်ဖြာ ဟဲ့ စ်ု အာနာထာန် ကာလာင် ဒီ အာဒါဝိတ်။ 17 ပန် တီ အာနာထာန် ဘော ကာလာင် တူတ့် ခဲ့ ပီ ယိုဝ် အန် ဂြုဝ်း ဇဝ်ဖြာ ဒီ အာဒါဝိတ်။

18 ဟဲ့ ဟွတ့်၊ ခုန်ဒီခမ် အာဒါဝိတ် ဘော လိုပ် ဟာဝ် အီ ခဲင်၊ တဲး အန် ပွိုန် ဒီ ကာလာင် ဂြုဝ်း ဒီ ဇဝ်ဖြာ။ အန် ဘော ဆာခိုဝ် တဝ်း၊ “အိုယ် မဲ ဇဝ် အီ မုး ဇဝ်ဖြာ ဘွတ်၊ ဘော အုဝ် ဘော န့ကြိုဝ်း အုဝ် အာဝ် မုး အာမျုဝ် ဒါ တာင်။ မဲ ဇဝ် ယီ မျုက် အုဝ် တဲး အုဝ် ကော တာင် ခဲ့ နီ။ 19 မာလဲ၊ မဲ ဇဝ် ဟဲ့ ဂေဇူ အုဝ် ကိူန် ခဲ့ တီ။ န့ ယီ ဆီ မုး အီ စဲက် ဒီ မဲ ဇဝ်။ ဒဲင် နီ၊ မဲ ဇဝ် ဟဲ့ ကာလာင် တဲး အုဝ် နပ်၊ နာ အာတ့် န့ ဒီ ပါယ် မှဝ် ဒီ န့ကြိုဝ်း အုဝ်။ အိုယ် မဲ ဇဝ် အီ မုး ဇဝ်ဖြာ ဘွတ်၊ မဲ နပ် ဒီ ဘူင် ပါယ် နီ ဒီ ယေ အာမျုဝ် ဒူအီ။ 20 အုဝ် အာဒါဝိတ် အာဝ် ဟူ နပ် ဒီ ကာလာင် ပေါ န့ ပွါ။ မဲ ဇဝ်ဖြာ၊ မဲ ဟဲ့ နပ် အုဝ်။ 21 ပဲ့ ဟဲ့ ဘူင် မဲ ဒီ အုဝ် ဘော ပဲ့ ဟဲ့ ကာလာင် မဲ ဒီ အုဝ် ဒေါ တီ နီ၊ န့ ဒူပ် ဂြုဝ်း ပဲ့ ဟဲ့ ဒွိုမ် ကာလာင် မဲ။ န့ ဘော ဒူပ် ပီ အိုင် မဲ။

22 မဲ ဇဝ်ဖြာ ဟဲ့ တာင်၊ ဟဲ့ ဘွတ် လွှိုမ် တူတ့် ဒွန် မျုဝ်။ အာဝ် မိုဝ်း ဇဝ်ဖြာ ပေါ အူ ကာဒင်။ န့ မိုဝ်း မီ မဲ ဇဝ်ဖြာ နီ။ န့ ပီ ပဲ့ ဟဲ့ ဒွိုမ် ခဲ အီ ဒီ ယေ၊ ပဲ့ ဟဲ့ ယိုဝ် ယေ။ 23 ဒဲင် ကာဒါယ် နီ န့ တူ မိုဝ်း ဒူအီ ပေါ အူ မျုဝ် အီ ပီ ဒူအီ အီဆာရေလ။ မဲ ဇဝ် ဟဲ့ ကာဒုး ဒီ ထုတ် လေး ဂေ ခဲင် မိူင် အဲဂိုပ်၊ တဲး ဂေ ဘဲန် ဒူအီ ပီ အိုပ် မဲ၊ တဲး အီ ဟဝ် ယိုဝ် ခဲ့ တာင် ပွုန် မဲ။ မဲ ဟဲ့ ဘူင် နာ မွှိုမ် အာမ် ကာဆဝ် ဘော နာ မွှိုမ် ယုဝ် ဒေါ ဆုတ့် မဲ အာမျုဝ် ဒူအီ ဟဝ် ဘော အာရိုပ် ပီ ကြိုပ် ဂေ၊ တဲး ဂေ လေး ခဲင် မိူင် ဂေ အာတ့် တး ဇမ် ဂေ ဒူအီ အီဆာရေလ။ ပါယ် တီ မဲ ဇဝ် ဟဲ့ ထုတ် လေး ဂေ ခဲင် မိူင် အဲဂိုပ် တွိုန်။ 24 မဲ ဇဝ် ဟဲ့ တဲး ဒူအီ အီဆာရေလ ဘဲန် ဒူအီ အာမျုဝ် မဲ ဆေဆေ။ မဲ မိူဝ် ဘဲန် ဇဝ်ဖြာ ပီ ကြိုပ် ဂေ ဆေဆေ။

25 ဒေါ တီ နီ မဲ ဇဝ်ဖြာ ဟဲ့ ဒွါ ကာဒိက် ဆတ်ဇာ ဒီ အုဝ် ဘော ဒီ ဒူအီ အုဝ်။ တဲး မဲ ဇဝ် ဘူင် ဒူပ် ပီ ဒွါ မဲ ကာဒိက် ဆတ်ဇာ တီ။ 26 တဲး အီ အိူပ် မဲ ဇဝ်ဖြာ ဆေဆေ။ တဲး ဂေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ်၊ အန် ဘော အိုပ် ဒူအီ အီဆာရေလ။’ ပါယ် တီ ဘော ဒူအီ အုဝ် အာဒါဝိတ် နီ၊ အီ မုး ဒဲစေန့် မဲ၊ ဂေ ဒီ ကွယ် ဆေဆေ ဘော ဒူပ် မဲ ဇဝ်ဖြာ ဆေဆေ။

27 မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ မုး ဇဝ်ဖြာ ဒူအီ အီဆာရေလ။ မဲ ဇဝ် ဟဲ့ ဒွါ ကာဒိက် ဆတ်ဇာ ဒီ အုဝ် တဝ်း၊ ‘အုဝ် ဒီ တဲး ဒူအီ မဲ ကွယ် ဆီချာ ဆေဆေ။’ ခုဝ် န့ ပါယ် တီ အုဝ် ယ ဆာခိုဝ် မှာန့် ဒီ မဲ ဇဝ်ဖြာ။ 28 မဲ ဇဝ်၊ မဲ မုး ဇဝ်ဖြာ။ ဂြုဝ်း မဲ ဇဝ် မိူဝ် မုး ဂြုဝ်း မုး ဂြုဝ်း မှာန်။ ကာဒိက် ဆတ်ဇာ တီ မဲ ဇဝ် မိူဝ် ဟဲ့ ဒွါ ဒီ အုဝ်။ 29 ကူပ် န့ ပါယ် တီ အုဝ် မှာန့်၊ တဲး န့ လဝ့် နဝ်း မဲ ဇဝ်၊ မှာန့် တဲး မဲ မွင့်ကာရာ တဲး ဒီ ဒူအီ အုဝ်၊ တဲး ဂေ ကွယ် ဆေဆေ ဒူပ် မဲ ဇဝ်။ မဲ ဇဝ်ဖြာ အီ အိုပ် တူတ့်၊ ခဲ့ ပီ ကာလာင် မဲ၊ ခဲ့ ပီ မွင့်ကာရာ တဲး မဲ၊ န့ ဒီ တဲး ခြိုဝ် အုဝ် ဂျာမ်ဆာ ဆေဆေ။” ခဲ့ တီ ပီ ဆာခိုဝ် အာဒါဝိတ် ဒီ ဇဝ်ဖြာ။