1 ပန် တီ အာဒါဝိတ် ဘော ရဝ်း ဒူအီ အီဆာရေလ အူယ် မှိုန့် ဝီ၊ ဒဲ့ ဂေ တး ကာဇု တူတ့်။ 2 ဘော အန် ဘော ဂေ ဒူအီ အီ ဒူပ် အန်၊ ဂေ ဘော လေး ခဲင် မိူင် ဘာအာလာ အီ ကွယ် ခဲင် ကာဒါယ် မိူင် ယူဒါ တွိုန် ဘော ဟာဝ်၊ တဝ်း ဒီ ဒိုဝ်း ဇီဒိူက် ဇဝ်ဖြာ။ ဇီဒိူက် တီ၊ ဂေ တဲး အန် စိူဝ် ဒူပ် ပီ စိူဝ် ဇဝ်ဖြာ။ အန် စိူဝ် ဇဝ်ဖြာ အီ အိုပ် တူတ့် ဒွန် မျုဝ်။ ဒူင် ကွယ် အန် ဇဝ် တီ မုး ဒီ ကာတဲ ရာင် အာမူ အာမာတ် ဇဝ်ဖြာ အီ စိူဝ် ခေရုပ်၊ အီ ကွယ် ဒဲင် ဇီဒိူက် တီ။ 3 ဂေ ဘော ဒိုဝ်း ဇီဒိူက် ဇဝ်ဖြာ၊ ဒါင် ဒဲင် လက်လဝ် ကာမာယ်။ ဂေ ဒိုဝ်း လေး ခဲင် ကာင် အာဖီနာဒါပ် အီ ကွယ် နာ ကွာ။ အာအူဇာဟာ ဘော အာဟီအော ဂါယ် မုး ဂွန် အာဖီနာဒါပ် တွိုန်။ ဂါယ် ဝီ ဘဲန် အီ ဝဲတ် လက်လဝ် ကာမာယ် အီ ဒါင် ဇီဒိူက် တီ။ 4 အာဟီအော ယီ ယဲတ့် နာ အာတ့် ဇီဒိူက် ဇဝ်ဖြာ တီ။ 5 အာဒါဝိတ် ဂေ ဒူအီ အီဆာရေလ ဘောကာဂ့လျီတ် ဘော ခူယ် ကာဆဝ်။ ဂေ ဘော ဘး ဒိင် ဘဲန် မျုဝ် ဘဲန် မျုဝ်၊ က်ု ဂြိုင်၊ ဘုတ် ဝဝ်၊ စှုဝ်း စှဲန့် ဘော ဂါ ခဲ့ ပီ ပွိုန် ဂေ၊ တဲး န့ လဝ့် နဝ်း ဇဝ်ဖြာ။

6 ဒေါ ဇမ် ဂေ ဒီ အူင့် ကာင်နဝ်း အာနာခူန်၊ မာမက် ဘော ဒီပ့လာတ်။ ခုဝ်၊ အာအူဇာဟာ တွိုန် ဘော ပါ ဇီဒိူက် ဇဝ်ဖြာ တီ၊ ယုဝ် အန် စုဝ်း။ 7 ပန် တီ ဇဝ်ဖြာ ဘော ရူ ဒီ အာအူဇာဟာ။ ဇဝ်ဖြာ ဘော ဒမ် မှာပ် ဒီ အန် ကူပ် ဟဲ့ ပါ အန် ဇီဒိူက် အန်။ အန် ဘော ယမ် ခူပ် ဇီဒိူက် ဇဝ်ဖြာ အူ ဇေန့်။

8 ပါယ် တီ အာဒါဝိတ် အာဝ် ဟူ ဒါခိုယ် ကူပ် တဲး ဇဝ်ဖြာ အာအူဇာဟာ ယမ်။ ခုဝ်၊ ကော ဇမ် အာတိုဝ်၊ ဒူင် တီ ဟဲ့ စိူဝ် ဖေရေတ်အာအူဇာဟာ။^a

9 ဆီငဲ တွိုန် အာဒါဝိတ် ဘော ယုဝ် ဇဝ်ဖြာ။ အန် ဘော တဝ်း၊ “ဆေ န့ ပါယ် တီ၊ မှဝ် န့ ဒီ ပါယ် ဇီဒိူက် ဇဝ်ဖြာ ဒီ ဇမ် ဒူင် ကွယ် အုဝ်။း” 10 ခုဝ်၊ အန် ညှမ် ဒိုဝ်း တး ဇီဒိူက် ဇဝ်ဖြာ တီ ဒူင် ကွယ် အန် ခဲင် မိူင် အာဒါဝိတ် တွိုန်။ ဂေ ဝီ ဂွတ် ဟာဝ် ဒီ ကာင် အာအုဝ်ဘေန်အေဒူမ် အီ မုး ခြိုဝ် ဒူအီ တွိုန်။ 11 ဝါယ် အန် တီ ဇီဒိူက် ဇဝ်ဖြာ ဘော ကွယ် ခဲင် ကာင် အာအုဝ်ဘေန်အေဒူမ် တဲး န့ ကော နုဝ့် အူယ် မာဂျီန်။ ဇဝ်ဖြာ ဘော မွင့်ကာရာ ဒွါ ဒီ အာအုဝ်ဘေန်အေဒူမ် ဘော ဒီ ဂေ ဒူအီ ခဲင် န့ဟူမ် အန် ဘောကာဂ့လျီတ်။

12 အီ ဘော ဝီ ကာလာင် ဒီ အာဒါဝိတ် တဝ်း၊ “ဇဝ်ဖြာ ဟဲ့ မွင့်ကာရာ တဲး ဒီ အာအုဝ်ဘေန်အေဒူမ် ဘော ဂေ ဒူအီ ခဲင် န့ဟူမ် အန် ဒွန် အီ ကူပ် ဟဲ့ ကွယ် ဇီဒိူက် ဇဝ်ဖြာ ခဲင် ကာင် အန်။” ဟဲ့ ဟွတ့်၊ အာဒါဝိတ် ဘော ဟာဝ် ဒိုဝ်း ဇီဒိူက် ဇဝ်ဖြာ ဒီ ကာင် အာအုဝ်ဘေန်အေဒူမ် တွိုန်၊ ဝီ ဒိုဝ်း တး ဒီ မိူင် ဒူင် ကွယ် အန်။ နဝ်း အန် ဘော ဇွန်ဇူမ် ဘော ခူယ်။

13 ဂေ အီ ဂွတ် ဇီဒိူက် ဇဝ်ဖြာ တွိုန်၊ ဂေ ဘော ဟာဝ် ဒဝ် န့ဇာပ်၊ အာဒါဝိတ် ဘော ဒိုဝ်း မက် ဒုဝ် အီ ဂ့လန့် ဆီချာ အူ ဒုဝ်၊ လှူ ဒီ ဇဝ်ဖြာ။ 14 အန် ဘော စှိုပ် ဆီတုဝ် အေဖူတ် ပီ ဒဝ့် တာ ကာတမ် လုယ် ဘော ဂါ ခဲ့ ပီ ပွိုန် ဂါ အန်၊ တဲး န့ လဝ့် နဝ်း ဇဝ်ဖြာ။ 15 ပန် တီ အာဒါဝိတ် ဘော ဒူအီ အီဆာရေလ ဘောကာဂ့လျီတ်၊ ဂေ ဘော ကာဖြူမ် ဒီ ခူယ် ဆီနန် ဆီနိူင်၊ ဘုတ် ဝဝ် ဘော ဘး ဒိင်၊ တး ဒူပ် ဇီဒိူက် ဇဝ်ဖြာ။

16 ဒေါ တး ဇမ် ဇီဒိူက် ဇဝ်ဖြာ ခဲင် မိူင် အာဒါဝိတ် တွိုန်၊ နာင် မီခါလ အီ မုး ဂွန် အာဆောလူ တွိုန် ကွယ် ဘာင် ကာဒဝ် မာလုဝ်း ယွတ်၊ ဘော ယိုဝ် အာဒါဝိတ် ဟဲ့ ဂါ၊ ဟဲ့ လမ် နာ အာတ့် ဇဝ်ဖြာ။ ခဲင် နဝ်း အန်၊ အန် တူ ရုဝ်ဆေ အာဒါဝိတ်၊ ထာင် အာဝ် ကာအာပ် အန် ဘူင် ဇိုဝ် တီ။

17 ဂေ ဘော ဒိုဝ်း ဇီဒိူက် ဇဝ်ဖြာ တွိုန်၊ ဘ့လေး အုန် ဆီချာ ခဲင် ထိုပ် ဘိက် ပဲ့ ဟဲ့ ဘူင် အာဒါဝိတ် အာဒါ ဇီဒိူက် တီ။ အာဒါဝိတ် ဘော လှူ အီ ဒုဝ့် ဒီ ငဝ် ဘော လှူ ပီ လှူ အီ ကွယ် ကာဇု ဟူမ် ရိုမ်။ 18 အာဒါဝိတ် ဟဲ့ ဟွတ့် လှူ ပီ လှူ ဒွန် မျုဝ်၊ အန် ဘော မှာန့် ဇဝ်ဖြာ အီ အိုပ် တူတ့် ဒွန် မျုဝ် တဲး အန် မွင့်ကာရာ တဲး ဒီ ဂေ ဒူအီ ဘောကာဂ့လျီတ်။ 19 အန် ဘော မိုဝ်း ပီ ကာဆာင် ဒီ ဒူအီ ဂေ တွိုန် ဒွန် အီ။ ခဲင် ဖိုင် ဒူအီ အီဆာရေလ ဘော အီဘိုန့် အီမာယ်၊ အန် ဘော ကာဆာင် ခါမုန် အူ ဝီ အူ ဒီခ့လဲပ်၊ ယင် အူ ဝီ အူ ဒီက့လွုန် ဘော ဘ့လေ မာငုန် ကာဟဝ်း အူ ဝီ အူ ဒီခ့လဲပ်။ ဟဲ့ ဟွတ့်၊ ဒွန် အီ ဘော ဝီ ဝေန့် ဒီ ကာင် အန်။

20 ဝါယ် တီ အာဒါဝိတ် ဘော ဟာဝ် ဒီ ကာင် အန်၊ တဝ်း ဒီ မွင့်ကာရာ တဲး ဒီ ဂေ ခဲင် န့ဟူမ် အန်။ ဒေါ အန် တီ နာင် မီခါလ အီ မုး ဂွန် အာဆောလူ တွိုန်၊ အန် ဘော လေး ဘ်ု ဒီ ရွုး အန်။ အန် တဝ်း၊ “အာတိုဝ် နီ ခုန်ဒီခမ် ဒူအီ အီဆာရေလ ဟဲ့ တဲး အီ ယိုဝ် အာဖုင် ဒင်ခုဝ် အန်၊ ဟဲ့ ဘုတ့် ဝဲန် ခြိုင် ပီ တာ အန် နာ အာတ့် ဂေ အီ မုး မှာယ် အန်၊ ဘော အီဘိုန့် ဘော အီမာယ် ဂေ ဟဲ့ ယိုဝ်။ အန် ဟဲ့ နှဲန် ဒူအီ အီ တူ မိုဝ်း ဆာရေ။”

21 အာဒါဝိတ် ဝီ ကာလာင် ဒီ နာင် မီခါလ တဝ်း၊ “အုဝ် ဟဲ့ ဂါ နာ အာတ့် ဇဝ်ဖြာ အီ ဟဲ့ ရဝ်း အုဝ်၊ တဲး အုဝ် ကာဒါင် ဂုန့် မဲ ဘော ဘီနွင် ဝေါဝဲ ဂုန့် မဲ။ အန် ဇဝ် ဟဲ့ တဲး အုဝ် ဘဲန် ခုန်ဒီခမ် အီ အိုပ် ဒူအီ အာမျုဝ် အန် အီ မုး အာမျုဝ် ဒူအီ အီဆာရေလ။ ခုဝ်၊ အုဝ် ဂါ နာ အာတ့် ဇဝ်ဖြာ။ 22 အာဝ် ဝန် ခဲ့ တီ။ အုဝ် ဒီ ပီတျီမ် အုဝ် ဒဲင် တီ။ နာ အာတ့် မှာယ် အီဘိုန့် ပီ ကာလာင် မဲ တီ၊ အုဝ် ယီ ဝီ မိုဝ်း ဆာရေ။” 23 ပန် တီ နာင် မီခါလ တွိုန် အီ မုး ဂွန် အာဆောလူ တွိုန် တူ မိုဝ်း ဂွန် ကော ဇမ် ကတ် ယမ် အန်။