1 ပန် တီ ခဲ့ ကွယ် ဒူအီ အီဆာရေလ၊ ဂေ ဘော ကာဖြူမ် ဒီ တး ဒူင် ကွယ် အာဒါဝိတ် ဒီ မိူင် ဟေဘြုဝ် တွိုန်။ ဂေ တဝ်း၊ “ယေ နီ မုး ဘီနွင် ဝေါဝဲ မဲ။ 2 ဒေါ ဟဲ့ ဘဲန် အာဆောလူ ခုန်ဒီခမ် အီ အိုပ် ယေ၊ မဲ ဟဲ့ ယဲတ့် ဒါ ဆိုက် ယေ ဒူအီ အီဆာရေလ ဒေါ ကာဂုဝ်း ယေ ဒီ ရန်ဆူ ယေ။ ဇဝ်ဖြာ မိူဝ် ဟဲ့ တဝ်း ဒီ မဲ၊ ‘မဲ လုဝ် ယွတ် မဲန် ဒူအီ အုဝ် အီ မုး အာမျုဝ် ဒူအီ အီဆာရေလ။ ဟဲ့ ဟွတ့်၊ မဲ ဒီ ဘဲန် ဒါ ကာညာ အီ အိုပ် ဂေ။’”

3 ပန် တီ ခဲ့ ကွယ် ဂေ ဒါ တာင် ဒူအီ အီဆာရေလ ဘောကာဂ့လျီတ် တး ဇမ် ဒူင် ကွယ် ခုန်ဒီခမ် အာဒါဝိတ် ဒီ မိူင် ဟေဘြုဝ် တွိုန်၊ အန် ဘော ကာဆဲန့် ဒီ ဂေ၊ တဲး ဘော ဇဝ်ဖြာ နပ်။ ဟဲ့ ဟွတ့် ဂေ ဘော ကာဖြူမ် ဒီ ဖဝ်း နာမန် ဒီ ဂိန့် အာဒါဝိတ်၊ တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ။

4 ဒေါ ဘဲန် အာဒါဝိတ် ခုန်ဒီခမ်၊ အာဆာက် အန် ဟဲ့ ပွိုန် အူယ် ဂိုဝ် ဆီနမ်။ အန် ဝီ အိုပ် မိူင် အာဒါ ဖွုန် ဂိုဝ် ဆီနမ်။ 5 အန် ကွယ် ဒီ မိူင် ဟေဘြုဝ် တွိုန်၊ ဝီ အိုပ် မိူင် ယူဒါ ဘူ ဆီနမ် ဒီ ဒဝ် မာဂျီန်။ အန် ဘော ကွယ် ဒီ မိူင် ယေရူဆာလဲမ်၊ အိုပ် မိူင် ယူဒါ ဘော မိူင် အီဆာရေလ ဘောကာဂ့လျီတ် အာဒါ အူယ် ဂိုဝ် ဒီ အူယ် ဆီနမ်။

6 ပန် တီ ခုန်ဒီခမ် ဘော ဒူအီ အန်၊ ဂေ ဘော ရဲန် ဆိုက်၊ ဟာဝ် ဒီ မိူင် ယေရူဆာလဲမ်၊ တဲး ဂေ ကာဂုဝ်း ဒီ ဒူအီ ယေဘူဆိတ် အီ ဟဲ့ ကွယ် ခဲင် မိူင် တီ။ ဂေ ဒူအီ ယေဘူဆိတ် တဝ်း ဒီ အာဒါဝိတ်၊ “မဲ တူ ပွိုန် လိုပ် တး နာ ခဲင် နီ။ ဂေ အီ ငါယ် အပ် ဘော ဂေ အီ ပ့လဝ် ဂဲ့၊ ဂေ ဒီ ဘော ပဲ ဒီ ရဲ မဲ။” ဂေ တဝ်း ပါယ် တီ ကူပ် ထာင် ဂေ၊ အာဒါဝိတ် တူ ပွိုန် ဒီ လိုပ် မိူင် ဂေ ဒေါ မှဝ်။ 7 ဟဲ့ ဟွတ့် ပါယ် တီ အာဒါဝိတ် ဘော ပဲ ဂေ ဒီ နွန် ဇီအူန်။ ဝါယ် အန် တီ ဂေ ဘော တဲး ဒူင် တီ စိူဝ် မိူင် အာဒါဝိတ်။

8 ဒေါ အန် တီ အာဒါဝိတ် တဝ်း၊ “အာဆေ ဒီ ကာဂုဝ်း ငဝ်း ဝဲန် ဒူအီ ယေဘူဆိတ် ဂေ တွိုန် အီ မုး ဒူအီ ပ့လဝ် ဂဲ့ ဘော ငါယ် အပ် ပီ ဇွင့် အုဝ်၊ အန် လုဝ် ဟာဝ် လိုပ် လူင် ခဲင် ကာဒဝ် အိုမ် ဒူပ် ရူင် အိုမ် အီ လိုပ် ခဲင် မိူင်။ ပါယ် တီ ဘေ ဒီ ဘော ပဲ ရန်ဆူ အေ တီ။” ခုဝ် အန် တီ၊ ဂေ တဝ်း ဂြုဝ်း မာကာထ၊ “ဂေ အီ ငါယ် အပ် ပ့လဝ် ဂဲ့ တူ လိုပ် ခဲင် ဟုဝ် ခုန်ဒီခမ်။”

9 ဝါယ် တီ၊ အာဒါဝိတ် ဘော ကွယ် ခဲင် မိူင် ယေရူဆာလဲမ်။ အန် ဘော တဲး ဒူင် တီ စိူဝ် မိူင် အာဒါဝိတ်။ အန် ဘော ဘူင် ဘော ဝီ မ့ပြာယ် ဒီ ခူပ် ဒူင် ကွယ် အန် တွိုန်၊ တဲး န့ မိုဝ်း ရဲင် တာင်။ အန် ဘော မ့ပြာယ် တူတ့် ဒွန် မျုဝ်၊ စုး ဒီ ရဲင် ဒီ ဒင် နွန် ကော ဟုဝ့် ဇမ် ဒီ ဟုဝ် အန်။ 10 ပွုန် အန် ဘော ကြဲ ဒီ ကိူန်၊ ကြဲ ဒီ တာင်။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် မိူဝ် ဟဲ့ ကွယ် ရိုမ် ဒူပ် အန်။

11 ဘော အာဟီရမ် အီ မုး ခုန်ဒီခမ် အီ အိုပ် ဒူအီ ခဲင် မိူင် ထူရုဝ် တွိုန်၊ အန် ဘော စ်ု ဒါလာမ် အန် ဟာဝ် ဒူင် ကွယ် အာဒါဝိတ်။ အန် တဲး ဂေ ဒိုဝ်း ဘော ဟေ အာရိတ် တး။ ဘော လက်ဆာမာ ဂေ အီ နပ် ဒီ ဂုဝ် မာအုတ်၊ ဘူင် တိုက်၊ အန် တဲး ဂေ ဒူပ်၊ တဲး ဂေ ဆမ် ဟုဝ် ဒီ အာဒါဝိတ်။ 12 အာဒါဝိတ် ဘော နပ်၊ န့ မုး ဇဝ်ဖြာ အီ ဟဲ့ တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ။ န့ ဘော မုး ဇဝ်ဖြာ အီ ဟဲ့ တဲး မိူင် အန် ဘဲန် မိူင် တာင်၊ တဲး န့ ဘဲန် အာဂျိုဝ် ဒီ ဒူအီ အီဆာရေလ။

13 ဝါယ် လေး အာဒါဝိတ် ခဲင် မိူင် ဟေဘြုဝ်၊ ဝီ ကာထုဝ့် ဟာဝ် မိူင် ယေရူဆာလဲမ်၊ အန် ဘော ဒိုဝ်း အီဘိုန့် တျီ့ အီဘိုန့် တာင်၊ ဘော ဝီ မိုဝ်း ဂွန် အီဘိုန့် ဂွန် အီမာယ်။ 14 ဂွန် အာဒါဝိတ် အီ ဂွိုတ် ဒီ မိူင် ယေရူဆာလဲမ် တွိုန်၊ ဂေ စိူဝ် အာဆာမူအာ၊ အာဆောဘာပ်၊ အာနာထာန်၊ အာဆာလုဝ်မုဝ်၊ 15 အာအီဘာရာ၊ အာအေလီဆူအာ၊ အာနေဖေက်၊ အာယာဖာ၊ 16 အာအေလီဆာမာ၊ အာလေတ ဘော အာအေလီဖေလေတ်။

17 ဒေါ ယိုဝ် ဂေ ဒူအီ ဖီလီထီ လွင် အာဒါဝိတ် ဟဲ့ ဘဲန် ခုန်ဒီခမ် အီ အိုပ် ဒူအီ အီဆာရေလ၊ ဂေ ဘော ကာဖြူမ် ဒီ ရဲန် ဆိုက်၊ တး ဟြေတ့် အာဒါဝိတ်။ အာဒါဝိတ် ဘော ယိုဝ် လွင် အန် တီ၊ အန် ဘော လူင် ဒူင် ဒွိုမ် ချြီင် အန်။

18 ဒူအီ ဖီလီထီ ဟဲ့ တး ကွယ် ဒွန် နာ ဒွန် ပ့လုဝ့် ဒီ ဒီလယ့် အီ စိူဝ် ရေဖိမ် တွိုန်။ 19 အာဒါဝိတ် ဘော ဒီမွှတ် ဇဝ်ဖြာ တဝ်း၊ “န့ ပွိုန် ဟာဝ် ကာဂုဝ်း ဒီ ဒူအီ ဖီလီထီ ဂေ တွိုန်။း မဲ ဇဝ် ဒီ အာပ် ဒွါ ဂေ ဒီ အုဝ်။း” ဟဲ့ ဟွတ့်၊ ဇဝ်ဖြာ ဝီ တဝ်း ဒီ အာဒါဝိတ်၊ “တဲး မဲ ဟာဝ်။ အုဝ် ဒီ တဲး မဲ ပဲ ဂေ။”

20 အာဒါဝိတ် ဘော ဟာဝ် ဒီ မိူင် ဘာလဘေရာဆိမ်။ အန် ဘော ကာဂုဝ်း ဘော ပဲ ဂေ။ အန် တဝ်း၊ “ဇဝ်ဖြာ ဟဲ့ ယဲတ့် ဒီ အာတ့် အုဝ်၊ ဟဲ့ ပျာတ့် ရန်ဆူ အုဝ်၊ တဲး န့ ပီ အိုမ် တာင် ဟဲ့ တး ဘူင် တဲး န့ဂုဝ် ဆီဂ့လုး။” ဂေ ဘော တဲး ဒူင် တွိုန် စိူဝ် ဘာလဘေရာဆိမ်။ 21 ဒူအီ ဖီလီထီ ဘော ဝဲန် အာရိုပ် ပီ ကြိုပ် ဂေ။ အာဒါဝိတ် ဂေ ဒူအီ အန် ဘော ဒိုဝ်း ဟာဝ်။

22 ပန် တီ ဒူအီ ဖီလီထီ ပီ ဝီ တး ပေါ အူ ဇေန့်၊ ဝီ တး ကွယ် နုဝ့် ဒူပ် ဒီလယ့် ရေဖိမ် တွိုန်။ 23 အာဒါဝိတ် ဘော ဝီ ဒီမွှတ် ဇဝ်ဖြာ။ ဇဝ်ဖြာ ဝီ တဝ်း ဒီ အန်၊ “ကွဲ့ ဟာဝ် ဆိူဝ် ဒူင် ချ ဂေ။ မဲ လုဝ် လဲပ် တး နာ ပန် ဂေ။ မဲ လုဝ် တး နာ ကွယ် ဟေ ကာပျြီး တွိုန်၊ တး ညိူဝ် ဂေ။ 24 မဲ ဟီ ယိုဝ် ဂြန့် ဒါ ဆိုက် ဒီ ကာဒဲ့ ဟေ ကာပျြီး တီ၊ တဲး မဲ ပီခြန် မဲ။ ခုဝ်၊ ဒေါ အန် တီ ဇဝ်ဖြာ ဒီ ယဲတ့် ဒီ အာတ့် မဲ၊ တဲး မဲ ပွိုန် ဒီ ကာဂုဝ်း ဒီ ဒူအီ ဖီလီထီ၊ တဲး မဲ ပဲ ဂေ။” 25 အာဒါဝိတ် ဘော ဘူင် ဒူပ် ခဲ့ ပီ တဝ်း ဇဝ်ဖြာ ဒီ အန်။ အန် ဘော ကာဂုဝ်း ဘော ပျာတ့် ဒူအီ ဖီလီထီ စုး ဒီ မိူင် ကီပွင် ကော ဇမ် မိူင် ကေစာ။