န့ ယီ မုး ဂွန် အာဆောလူ တွိုန်၊ ဒေါ ဝီ ယိုဝ် အန် အာဘာနာ ဟဲ့ ယမ် ဒီ မိူင် ဟေဘြုဝ်၊ နဝ်း အန် ဘော ဒီတဲတ်။ ဘော ဂေ ဒူအီ အီဆာရေလ ဂေ ဘောကာဂ့လျီတ် ဘော က့လိုဝ်။ 2 န့ ဘော မိုဝ်း ဒူအီ အီ ကွယ် ရိုမ် ဒူပ် ဂွန် အာဆောလူ တွိုန်။ ဂါယ် ဘဲန် ဒါ တာင် အိုပ် ဖိုင် ဒါ ဇူန်။ အူ ဝီ အန် စိူဝ် အာဘာအာနာ။ ပေါ အူ ဝီ အန် စိူဝ် အာရေခါပ်။ ဂါယ် တွိုန် မုး ဂွန် အာရိမ်မူန် အီ မုး ဒူအီ ဘေရောဆီ၊ အီ မုး ဒူအီ တဲင် ခြိုဝ် အာဘေန်ယာမ်။ ဒူင် ကွယ် ဂေ ဒူအီ ဘေရောဆီ တွိုန် ဟဲ့ လိုပ် ခဲင် ကာဒါယ် ခြိုဝ် အာဘေန်ယာမ်။ 3 ခုဝ်၊ ဂေ ဒူအီ ဘေရောဆီ ဟဲ့ ဒွိုမ် တဝ် ဟာဝ် ဒီ မိူင် ကိတ်ဒိမ်။ ဂေ ဘော ကွယ် ဘိုင် မိူင် တီ ကော ဇမ် အာတိုဝ် နီ။

4 အာယုဝ်နာထာန် အီ မုး ဂွန် အာဆောလူ တွိုန်၊ အန် မိုဝ်း ဂွန် အူ ဝီ။ ပ့လဝ် အန် ဂဲ့ ဘော အာ ဘ့လာက်။ ဒေါ ယမ် အာဆောလူ ဂါယ် အာယုဝ်နာထာန် တွိုန်၊ ဒေါ ဝီ ယိုဝ် ဂေ ဒူအီ ခဲင် မိူင် ယေစာရေလ လွင် အန် တီ၊ အာဆာက် အန် ဟဲ့ ပွိုန် ဖန် ဆီနမ်။ ဒေါ အန် တီ ဝီ အီ ယွတ် အီ ပုဝ် အန်၊ ဘော စုဝ့် ဒီ ဂူင့် အန်၊ တဝ်း ဒီ လေး တဝ်။ ဝီ အီ ယွတ် အန် တီ ဘော ပီစုဝ်း အန်၊ တဲး ပ့လဝ် အန် ဘော ဂဲ့။ ဂွန် ဝီ တီ၊ အန် စိူဝ် အာမေဖီဘောဆေတ်။

5 အာရေခါပ် ဘော အာဘာအာနာ အီ မုး ဂွန် အာရိမ်မူန် ခဲင် ဒူအီ အာဘေန်ရောဆီ၊ ဂါယ် ဘော ဟာဝ် ဒူင် ကွယ် အာအီဆာဘုဝ်ဆေတ်၊ ဘော ဇမ် ဒေါ ကာဟွာ့ ကာဆဝ် ကာတဲ ဆီငဲ။ ဒေါ အန် တီ အာအီဆာဘုဝ်ဆေတ် ဟဲ့ အိတ်။ 6 ဂါယ် ဘော လိုပ် ဟာဝ် ခဲင် ကာင် တွိုန်၊ ဂါယ် ညိုင်ရာင် ဒီ ဒိုဝ်း လေး ခဝ်ချုင်။ ဂါယ် ဘော ဆတ် ဝတ့် အာအီဆာဘုဝ်ဆေတ်။ ဟဲ့ ဟွတ့်၊ အာရေခါပ် ဂါယ် ဝါ အန် အီ စိူဝ် အာဘာအာနာ တွိုန်၊ ဂါယ် ဘော ဝီ တဝ် လေး အူ ဇေန့်။

7 ဒေါ လိုပ် ဟာဝ် ဂါယ် ခဲင် ကာင် တွိုန် အာအီဆာဘုဝ်ဆေတ် ဟဲ့ အိတ် ဒဲင် ကာစှူင့် အိတ် အီ ကွယ် ခဲင် ဟူင် အိတ် အန်။ ဂါယ် ဟဲ့ ဆတ် အန် တဲး အန် ယမ်၊ ဂါယ် ဘော ဒဲပ် ဒိုဝ်း ဟာဝ် ဂိန့် အန်၊ တဝ် ဟာဝ် ဒူပ် န့တေန့် ခဲင် ဂ့လင် အာရာဖ ဒွင် ခိူန်။ 8 ဂါယ် ဘော ဒိုဝ်း ဂိန့် အာအီဆာဘုဝ်ဆေတ် တွိုန်၊ ဝီ တး ဇမ် ဒူင် ကွယ် အာဒါဝိတ် ဒီ မိူင် ဟေဘြုဝ် တွိုန်။ ဂါယ် ဘော ကာလာင် ဒီ ခုန်ဒီခမ် တဝ်း၊ “မဲ ယွတ်၊ အာအီဆာဘုဝ်ဆေတ် အီ မုး ဂွန် အာဆောလူ အီ မုး ရန်ဆူ မဲ၊ အီ ဟြေတ့် ဒီ ငဝ်း အာဆာက် မဲ ဇဝ် တွိုန်၊ ယာယ် ဟဲ့ ဒိုဝ်း တး ဂိန့် အန် တိုယ် ဒီ မဲ။ အာတိုဝ် နီ ဇဝ်ဖြာ ဟဲ့ ဝီ ဘူင် ဝျီ့ ဒီ အာဆောလူ ခဲ့ ပီ ဒွိုမ် ဘူင် အာဆောလူ ဒီ မဲ။

9 အာဒါဝိတ် ဝီ ကာလာင် ဒီ အာရေခါပ် ဂါယ် ဝါ အန် အီ စိူဝ် အာဘာအာနာ အီ မုး ဂွန် အာရိမ်မူန်၊ အီ မုး ဒူအီ အာမျုဝ် အာဘြေအဆီ တွိုန်။ အန် တဝ်း၊ “ဟဲ့ မုး ဟဲ့ မှာန်၊ ဇဝ်ဖြာ ဟဲ့ စွယ်၊ တဲး အုဝ် လွတ် တ ဒုက် ဘဲန် မျုဝ် ဘဲန် မျုဝ်။ 10 အုဝ် ယီ တဝ်း ဒီ မဲ၊ ဒေါ ယမ် အာဆောလူ တွိုန်၊ န့ မိုဝ်း ဒူအီ အူ ဝီ။ ဒေါ တး အန် ကာလာင် လွင် အန် တီ ဒီ အုဝ်၊ အန် ထာင် နဝ်း အုဝ် ဒီ ဒါခိုယ်။ အုဝ် ယီ ဝီ ငဝ်း အန် ဒီ မိူင် ဇီကာလာတ်၊ တဲး န့ ဘဲန် ရုး ဂြုဝ်း ပီ ကာလာင် အန် တွိုန်။ 11 န့ မုး ဘာယ်၊ ဘာယ် ဟဲ့ ဟာယ် ကာဆဝ် လွှိုမ် ဒူအီ ဝီ တီ။ ဘာယ် ဟဲ့ ဟာဝ် ခဲင် ကာင် ဒူအီ အီ တူ မိုဝ်း မှာပ်။ ဘာယ် ဟဲ့ ငဝ်း အာဆာက် အန် ဒေါ အိတ် အန် ဒဲင် ကာစှူင့် အိတ် အန်။ ခုဝ်၊ အုဝ် ဒီ ဘော တဲး ဘာယ် ခမ် မှာပ် တာင် ဇိုဝ် တီ၊ ကွဲ့ ဟူ တဲး ဘာယ် ကွယ် ဒဲင် ကာဒါယ် နီ။”

12 အာဒါဝိတ် ဟဲ့ ဟွတ့် ကာလာင် ဂြုဝ်း တီ၊ အန် ဘော စ်ု ဒူအီ အန်၊ တဲး ဂေ ဟာဝ် ငဝ်း ယမ် ဂါယ်။ ဟဲ့ ဟွတ့်၊ ဂေ ဝီ ဒဲပ် ပ့လဝ် ဒဲပ် ဒဲ ဂါယ်၊ ဝီ ဟွယ် အုန် ဒုဝ် ဂါယ် ခူပ် အိုမ် ဒိုင် ခဲင် မိူင် ဟေဘြုဝ် တွိုန်။ အီ မုး ဂိန့် အာအီဆာဘုဝ်ဆေတ် တွိုန်၊ ဂေ ဘော ဒိုဝ်း ဘ့လေး ခဲင် ဘာရေဝ် အာဘာနာ အီ ကွယ် ဒီ မိူင် ဟေဘြုဝ် တွိုန်။