1 ဒူအီ ဖီလီထီ ဂေ တွိုန် ဘော ကာဂုဝ်း ဒီ ဂေ ဒူအီ အီဆာရေလ။ ခဲ့ ကွယ် ဒူအီ အီဆာရေလ၊ ဂေ ဘော တဝ် ဟာဝ် တ ဒူအီ ဖီလီထီ။ ဂေ ကိူန် ဟဲ့ ယမ် ဒီ နွန် ဂီလပေါ တွိုန်။ 2 ဒူအီ ဖီလီထီ ဘော ခုင်ခြး အာဆောလူ ဂေ ဂွန် အီမာယ် အန် အူယ် ဝီ တွိုန်။ ဂေ ဘော ဒိုဝ်း အာယုဝ်နာထာန်၊ အာဖီနာဒါပ်၊ ဘော အာမာလခီဆူဝါ ဘော ငဝ်း ယမ် ဂွန် အာဆောလူ ဂေ တီ။ 3 ဂေ ကာဂုဝ်း ကာဆဝ်၊ ဟဲ့ တး ချြီ့ အာဆောလူ။ ဂေ ဒူအီ ဘန့် အ၊ ဂေ ဘော တး ခြပ် အာဆောလူ၊ ဘော ဘန့် လဝ့် အန်။

4 အန် ဘော ကာလာင် ဒီ ဒူအီ အီ ဂူင့် ခြိုင် ကာဂုဝ်း အန် တဝ်း၊ “ထွတ် မာပွါ့ လာင် မဲ တီ၊ ဆတ် အုဝ်။ ဆေ မဲ တူ ဆတ်၊ ဂေ ဒူအီ အီ တူ ဆွာ့ ဝဲန် ဟုန် လခါနာ၊ ဂေ ဒီ တး ဆတ်၊ တဲး အုဝ် စှိုမ် ဆာရေ။”

အန် ဟဲ့ ဟွတ့် တဝ်း ပါယ် တီ ဒူအီ အီ ဂူင့် ခြိုင် ကာဂုဝ်း အန် ယီ တူ ယ ဘူင် မာဆေ ကူပ် ယုဝ် အန်။ ခုဝ်၊ အာဆောလူ ဘော ပီကေး ရာင် အန်၊ ဝီ ထိပ် ဒီ ကာဒဲ့ မာပွါ့ လာင် အန်။ 5 ဒူအီ အီ ဂူင့် ခြိုင် ကာဂုဝ်း တွိုန်၊ အန် ဘော ယိုဝ် အာဆောလူ ဟဲ့ ဟွတ့် ယမ်၊ အန် မိူဝ် ဝီ ပီကေး ဘော အန်၊ ဒီ ကာဒဲ့ မာပွါ့ လာင် အန်၊ တဲး ဘော အန် ယမ် ဒူပ် အာဆောလူ။ 6 ပါယ် တီ ခဲ့ ကွယ် အာဆောလူ ဂေ ဂွန် အီမာယ် အန် အူယ် ဝီ၊ ဘော ဒဲစေန့် အန် အီ ဂူင့် ခြိုင် ကာဂုဝ်း တွိုန် ဘော ခဲ့ ကွယ် ဂေ အီ ဒူပ် အန် တွိုန်၊ ဂေ ဘော ယမ် တူတ့် ဆီငဲ တီ။

7 ဒူအီ အီဆာရေလ အီ ကွယ် ဘ့လာက် နာ ဒွယ် ဒီလယ့် တွိုန်၊ ဘော ဂေ အီ ကွယ် နာ ဒွယ် ဘ့လဲင် အိုမ် ယောဒါန် တွိုန်၊ ဂေ ဘော ယိုဝ် လွင် ဒါ ဆိုက် အီဆာရေလ ဟဲ့ တဝ်၊ ဘော ယိုဝ် လွင် အာဆောလူ ဂေ ဂွန် အီမာယ် အန် ဟဲ့ ဟွတ့် ယမ်၊ ဂေ ဘောကာဂ့လျီတ် ဝီ လေး တဝ်၊ ဝေန့် ရဝ် ဂေ မိူင် ဂေ။ ဂေ ဒူအီ ဖီလီထီ ဘော ဝီ တး ကွယ် ခဲင် ရဝ် ခဲင် မိူင် ဂေ တီ။

8 ပါ ခဲညှာ၊ ဂေ ဒူအီ ဖီလီထီ ဘော တဝ်း ဒီ တး ဘုတ့် ခြိုင် ပီ တာ ဂေ အီ ဟဲ့ ယမ် တွိုန်၊ ဂေ ဘော ယိုဝ် အာဆောလူ ဘော ဂွန် အီမာယ် အန် အူယ် ဝီ တွိုန် ဟဲ့ ယမ် ဒီ နွန် ဂီလပေါ တွိုန်။ 9 ဂေ ဘော ဒဲပ် ဂိန့် အာဆောလူ၊ ဘော ဘုတ့် ခြိုင် ကာဂုဝ်း အန် တွိုန်။ ဂေ ဘော တိုယ် ဒါလာမ် ဟာဝ် ခဲင် မိူင် ဖီလီထီ ဒွန် နာ ဒွန် ပ့လုဝ့်၊ တဲး ဂေ ပွိုန် ဒီ ကာလာင် လွင် အန် တီ ခဲင် ဟုဝ် ပီ ကြိုပ် ဂေ အာရိုပ် ဘော ဒီ ဒူအီ ဘောကာဂ့လျီတ်။ 10 ခြိုင် ကာဂုဝ်း အန်၊ ဂေ ဘော ဒိုဝ်း အုန် ခဲင် ဟုဝ် ပီ ကြိုပ် ဂေ အာရိုပ် အေဆာထာရိတ်။ ဒုဝ် ယမ် အန်၊ ဂေ ဘော ဒိုဝ်း အုန် ဒီ ရဲင် မိူင် ဘေတ်ဆန်။ 11 ဒေါ အန် တီ ဒူအီ ခဲင် မိူင် ယာဘေတ်ဂီလေအာတ်၊ ဂေ ဘော ယိုဝ် လွင် ဒူအီ ဖီလီထီ ဟဲ့ ဘူင် ပါယ် တီ ဒီ အာဆောလူ၊ 12 ဂေ ဘော ဒဲ့ ခဲ့ ကွယ် ဂေ ဒူအီ အီ ယ အီ တူ ယုဝ်။ ဂေ ဘော ဟာဝ် ဒွင် ခိူန် မှိုဝ် တီ၊ တဲး ဂေ ပွိုန် ဒီ ဒိုဝ်း လေး ဒုဝ် ယမ် အာဆောလူ ဘော ဂွန် အီမာယ် အန် အူယ် ဝီ တွိုန်။ ဂေ ဘော ဒိုဝ်း လူင် ဒုဝ် အန် ဒီ ရဲင် မိူင် ဘေတ်ဆန်၊ ဝီ ဒိုဝ်း တး ဒုဝ့် ဒီ မိူင် ယာဘေတ် တွိုန်။ 13 ဂေ ဘော ဒိုဝ်း ကာအာင် ဒူအီ ယမ် ဂေ တီ၊ ဝီ တး ဒိပ် ခြိုမ် ဟေ အီ မုး ဒီ မိူင် ယာဘေတ် တွိုန်။ ဂေ ဘော ယိူန် ပီ ဒီ ဟူမ် အာဒါ ဘူ ဆီငဲ။