1 န့ ဘော ပွိုန် အူယ် ဆီငဲ၊ အာဒါဝိတ် ဂေ ဒူအီ အီ ဒူပ် အန်၊ ဂေ ဘော ဝီ တး ဇမ် ဒီ မိူင် ဇီကာလာတ်။ ဒေါ တူ ကွယ် ဂေ၊ ဂေ ဒူအီ အာမာလေက် ဟဲ့ တး ကာဂုဝ်း ဒီ မိူင် အီ ကွယ် နာ တေတ့် တွိုန်။ ဘော မိူင် ဇီကာလာတ် တွိုန်၊ ဂေ ဟဲ့ ပျာတ့်၊ ဟဲ့ ဒိုဝ်း ငဝ် ဒုဝ့် ကာဆိုမ် တူတ့် မိူင် တီ။ 2 ဂေ ဟဲ့ မှေတ့် ဟာဝ် ဘော အီဘိုန့် ဂေ ခဲင် မိူင် တွိုန်၊ ဘော အီ တျီ့ အီ တာင်။ ဂေ ယီ တူ ငဝ်း။ ဂေ မှေတ့် ဟာဝ် ပါယ် တီ။

3 အာဒါဝိတ် ဂေ ဒူအီ အီ ဒူပ် အန်၊ ဒေါ တး ဇမ် ဂေ ဒီ မိူင် ဇီကာလာတ် တွိုန်၊ ဂေ ဘော ယိုဝ် အီ ဟဲ့ ဒုဝ့် မိူင် ဂေ၊ ဟဲ့ မှေတ့် ဟာဝ် ဂွန် အီမာယ်၊ ဂွန် အီဘိုန့် ဘော အီဘိုန့် ဂေ။

4 အာဒါဝိတ် ဘော ဒူအီ အီ ဒူပ် အန်၊ ဂေ ဘော ယာမ် တာင် တာင်။ ဂေ ဘော ယာမ် ကော ဟူ မိုဝ်း ဟဲန့် ဒီ ယာမ်။

5 အီဘိုန့် အာဒါဝိတ် အာ ဝီ တွိုန် မိူဝ် ဟဲ့ ဟွတ့် ဒိုဝ်း ဟာဝ်။ အီ မုး နာင် အေဟီနွင် အီ မုး ဒူအီ မိူင် ယေစာရေလ တွိုန်၊ ဘော နာင် အေဖီဂေလာ အီ မုး ဒူအီ ဂါမေလ တွိုန်၊ အီ ဒွိုမ် မုး အီဘိုန့် အာနာဘာလ တွိုန်။

6 အာဒါဝိတ် ဟဲ့ ညှာပ် ကာဆဝ် ဒီ နဝ်း အန် ကူပ် ခြာမ် ဂေ ဒူအီ အီ ဒူပ် အန် ဒိုဝ်း မာဝ် ဝိုန့် ဒီ အန်။ ဘော ဂေ ဟဲ့ က့လိုဝ်၊ ကူပ် အီ ဟဝ် ဟဲ့ မှေတ့် ဟာဝ် ဂွန် အီဘိုန့် ဘော ဂွန် အီမာယ် ဂေ။ မာလဲ၊ အာဒါဝိတ် ဝီ လှုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် အန်၊ တဲး န့ ဝီ ဘဲန် ဟဲန့် ဒီ နဝ်း အန်။

7 အာဒါဝိတ် ဘော ကာလာင် ဒီ အာဘာထာ အီ မုး ဂွန် အာဟီမာလေက် တွိုန်။ အန် တဝ်း၊ “မှာန့် ဆီတုဝ် အေဖူတ် မဲ တွိုန်၊ ဒိုဝ်း တး ဒီ အုဝ်။”

8 အာဒါဝိတ် ဘော ဒီမွှတ် ဒီ ဇဝ်ဖြာ တဝ်း၊ “အုဝ် ဒီ ပွိုန် ခုင်ခြး ဒူပ် ဖိုင် ဂေ တွိုန်။း အုဝ် ဒီ ခြပ် ဂေ။း” ဇဝ်ဖြာ မိူဝ် ဝီ တဝ်း၊ “ဟာဝ် ဒူပ်၊ မဲ ဒီ ခြပ် ဂေ အာခ်ု မှာန်။ မဲ ဒီ ဝီ ပွိုန် တူတ့် ဒွန် မျုဝ်။

9 အာဒါဝိတ် ဘော ဒူအီ အီ ဒူပ် အန် ဒဝ် မာယဝ်း ဝီ တွိုန်၊ ဂေ ဘော ဟာဝ် ဇမ် ဒီ ရူင် အိုမ် ဘေဆဝ်။ မင် အီ ဘော ဂိူတ် ကွယ် ဒီ တီ။

10 ဂေ အာဒါ အာ မာယဝ်း ဝီ၊ ဂေ ဟဲ့ နုန် ကာဆဝ်၊ အာဝ် ဟူ စာဝ် ကာလုဝ်း ရူင် အိုမ် ဘေဆဝ် တွိုန်။ ခုဝ်၊ ဂေ ဘော ဂိူတ် ကွယ် ဒီ တီ။ အာဒါဝိတ် ဂေ ဒူအီ ဖွုန် မာယဝ်း ဝီ၊ ဂေ ဘော ဒူပ် ခုင်ခြး မ့ပွါ။

11 ဂေ ဘော ကာတုန့် ဒူအီ အဲဂိုပ် အူ ဝီ၊ အီ ကွယ် ဒူင် ဂ့လင်။ ဂေ ဘော ဒိုဝ်း တး အန် ဒူင် ကွယ် အာဒါဝိတ်။ ဂေ ဘော ဒွါ ခါမုန် ဒီ အန်။ အန် ဘော ဟူမ်။ ဂေ ဘော ဒွါ ဘော အိုမ်၊ တဲး အန် ဒျီင်။

12 ဒီခ့လဲပ် ဘ့လေ ဒီပူ အူ ဘ့လာက်၊ ဘော ဘ့လေ မာငုန် ကာဟဝ်း အာ ဒီခ့လဲပ်၊ ဂေ ဘော ဒွါ ဒီ အန်။ အန် ဟဲ့ ဟွတ့် ဟူမ်၊ အန် ဘော ဝီ မိုဝ်း ဟဲန့်။ အာတ့် တီ၊ ဟဲ့ ပွိုန် အူယ် မှိုဝ် ဒီ အူယ် ဆီငဲ၊ အန် တူ ပွိုန် ဒီ ဟူမ် ဒီ ဒျီင် မာဆေ။

13 အာဒါဝိတ် ဘော ဒီမွှတ် အန် တဝ်း၊ “မဲ ဒူပ် အာဆေ။း မဲ တး နာ မှဝ်။း” အန် ဝီ တဝ်း၊ “အုဝ် နီ၊ အုဝ် မုး ဒူအီ အဲဂိုပ် အီ ဟဲ့ ကာဒုး ဒီ ဘဲန် မှာယ် ဒူအီ အာမာလေက် တွိုန်။ ဒါ ကာညာ အုဝ် ဟဲ့ ဘ့လေး ဝဲန် အုဝ်။ ခုဝ်၊ အာတ့် တီ အူယ် ဆီငဲ အုဝ် မိုဝ်း ဆဝ်။

14 ယေ ဟဲ့ ကာဂုဝ်း နာ တေတ့် မိူင် ခေရေဆီ၊ အီ ကွယ် ကာတတ် နမ်မုက်ဆာရာ ဒီ ကာတဲ မိူင် ယူဒါ၊ ဘော နာ တေတ့် ခဲင် ကာဒါယ် မိူင် ဂါလိပ် တွိုန်။ ယေ ဟဲ့ ဒုဝ့် ဝဲန် ဘော မိူင် ဇီကာလာတ် တွိုန်။”

15 အာဒါဝိတ် ဝီ ဒီမွှတ် အန် တဝ်း၊ “မဲ ဒီ ယဲတ့် အုဝ် လူင် ဒူင် ကွယ် ဖိုင် ဂေ တီ။း” အန် ဝီ တဝ်း၊ “တဲး မဲ ဒိူင် ဒီ ဇဝ်ဖြာ၊ ကွဲ့ တဲး မဲ ငဝ်း ယမ် အုဝ်၊ ကွဲ့ တဲး မဲ ဝီ အာပ် ဝိဝ် အုဝ် ဒီ ဒါ ကာညာ အုဝ်။ ဆေ န့ ပါယ် တီ အုဝ် ဒီ ယဲတ့် မဲ လူင် ဒူင် ကွယ် ဖိုင် ဂေ တီ။”

16 ပန် တီ ဒူအီ တွိုန် ဘော ယဲတ့် လူင် အန်။ ဂေ ဘော ဇမ် ဒီ တွိုန်၊ ဂေ ဒူအီ တွိုန် ဟဲ့ ငျာ ဟူမ် ပီ ဒီ ဟူမ်။ ဂေ ဘော ဂါ ဒူပ်။ ဂေ ဟဲ့ ကွယ် ကာလတ့် ဒွန် နာ ဒွန် ပ့လုဝ့် ဒဲင် ကာဒါယ် ဒီ တွိုန်။ ခုဝ်၊ ဒုဝ် ဆတ်ဒါဝါ၊ ကြုဝ်ကြာမ် ပဲ့ ဟဲ့ ပွိုန် ဂေ မိူဝ်၊ ဟဲ့ ကိူန် ကာဆဝ်။ ဂေ ဟဲ့ ဖာတ် တး ကြုဝ် တီ ခဲင် မိူင် ဒူအီ ဖီလီထီ ဘော ခဲင် မိူင် ယူဒါ။

17 အာဒါဝိတ် ဘော ကာဂုဝ်း ဒီ ဂေ။ ဆိန့် ဘာ ဒီ အပ် တီ၊ ကော ဝီ ဇမ် ဘာ ဒီ အပ် ခဲညှာ၊ ဒူအီ ဂေ တွိုန် အာဝ် ဟူ လွတ် ခေါ အူ ဝီ။ န့ ယီ မိုဝ်း ဖွုန် မာယဝ်း ဝီ၊ ဂေ အီ မုး ဂွန် ဒီရွယ် အီ ပဝ့် မင်ပြွင့် ကာဟာတ့်။ မီ ဂေ ဟဲ့ ဟာဝ် တဝ်၊ ဟဲ့ လွတ်။

18 အာဒါဝိတ် ဘော ဝီ ပွိုန် ဝိဝ် တူတ့် ဒွန် မျုဝ် ပဲ့ ဟဲ့ ဒိုဝ်း ဟာဝ် ဂေ တွိုန်။ အီဘိုန့် အန် အာ ဝီ တွိုန် မိူဝ်၊ အန် ဟဲ့ ဝီ ပွိုန် တး။

19 ဒူအီ ဒီ တာင်၊ ဂွန် ဒီရွယ်၊ ဂွန် အီဘိုန့်၊ ဂွန် အီမာယ် ဘော ကြုဝ်ကြာမ် ပဲ့ ဟဲ့ ဖာတ် ဟာဝ် ဂေ တွိုန်၊ အာဝ် ဟူ မိုဝ်း မာဆေ ပီ တူ ပွိုန် ဂေ။ အာဒါဝိတ် ဟဲ့ ဟွတ့် ဝီ ပွိုန် တူတ့် ဒွန် မျုဝ်။

20 အာဒါဝိတ် ဘော ဝဲတ် ဘော ဖိုင် မာဘူ၊ ဖိုင် မာမက် ဒူအီ အာမာလေက် ဂေ တွိုန်၊ တဲး ဂေ ယဲတ့် နာ အာတ့် ဖိုင် မာဘူ ဘော ဖိုင် မာမက် ဂေ။ အာဒါဝိတ် တဝ်း၊ “အာနီ မုး ကြုဝ်ကြာမ် ပီ ဖာတ် ပွိုန် အုဝ် ဒီ ဂေ။”

21 အာဒါဝိတ် ဟဲ့ ဝီ တး ဇမ် ဒူင် ကွယ် ဂေ ဒူအီ အာဒါ အာ မာယဝ်း ဝီ၊ အီ ဟဲ့ နုန် အာဝ် ဟူ စာဝ် ဟာဝ်၊ အီ ဟဲ့ ဂိူတ် ကွယ် ဒီ ရူင် ဘေဆဝ် တွိုန်။ ဂေ အီ ဂိူတ် တွိုန် ဘော ကာဖြူမ် ဒီ ဟာဝ် ရွုး အာဒါဝိတ် ဂေ ဒူအီ အီ ဟဲ့ ဒူပ် ဟာဝ် အန် တွိုန်။ ဒေါ တး ဇမ် ကာတတ် အာဒါဝိတ် ဒီ ဂေ၊ အန် ဘော ကာလာင် ဂြုဝ်း ဒါခိုယ် ဒီ ဂေ။

22 ဒေါ အန် တီ ကာတဲ ဂေ ဒူအီ အီ ဒူပ် ဟာဝ် အာဒါဝိတ် တွိုန်၊ ဂေ အီ မုး ဒူအီ ဟာယ်၊ ဒူအီ အီ ဝီ ဒီ ဖာတ် ကြုဝ် အီ တွိုန်၊ ဂေ ကာလာင် တဝ်း၊ “ဂေ အီ တူ ဟာဝ် ဒူပ် အေ၊ ဂေ တူ ပွိုန် ကြုဝ်ကြာမ် ပီ ဒိုဝ်း တး အေ။ တဲး ဂေ ဒိုဝ်း လေး ဟာဝ် မီ အီဘိုန့်၊ ဂွန် ဝါ ဂေ။”

23 အာဒါဝိတ် ဘော ဆုင်ဖျာတ် တဝ်း၊ “အိုယ် ဘေ ဘီနွင် ဒွန် အီ၊ ဘေ တူ ပွိုန် ဘူင် ပါယ် တီ။ ကြုဝ်ကြာမ် ပဲ့ ဟဲ့ စွယ် ဇဝ်ဖြာ တဲး အေ ဝီ ဒိုဝ်း ဝိဝ်၊ ဘေ တူ ပွိုန် ဒိုဝ်း မီ ဒီ ဘေ။ ဇဝ်ဖြာ ဟဲ့ ရွက့် ကာဝေ အေ၊ ဝီ တဲး အေ ပဲ ဒူအီ အီ ဟဲ့ ကာဂုဝ်း ဒီ အေ။

24 ကွဲ့ တဲး အာဆေ ထူမ် ဂြုဝ်း တီ။ ဘော ဘေ အီ ဟဲ့ ကာဂုဝ်း ဘော ဖိုင် ဂေ အီ ဘ်ု ကြုဝ်ကြာမ် အေ ဒီ ပွိုန် ကာရမ် ဒွန် အီ။”

25 ဆိန့် ဆီငဲ တီ၊ ကော ဇမ် အာတိုဝ် နီ၊ ဂေ ဒူအီ အီဆာရေလ ဒူပ် ထုင်ဂျာမ် ဂေ တီ။

26 အာဒါဝိတ် ဟဲ့ ဝီ ဇမ် မိူင် ဇီကာလာတ်၊ အန် ဘော ဒိုဝ်း ကြုဝ်ကြာမ် ပဲ့ ဟဲ့ ဖာတ် တး ဂေ တွိုန် မင် မျုဝ်၊ ဒွါ ဟာဝ် ဒီ ဒူအီ အီ ဘဲန် ဒါ တာင် ခဲင် မိူင် ယူဒါ အီ မုး ဂိုက် အန်။ အန် ဘော တဝ်း၊ “ဘေ ယွတ်၊ ခေါဆွင် အာဒါ ဘေ နီ၊ န့ မုး ကြုဝ် ပီ ဖာတ် တး အုဝ် ဒီ ရန်ဆူ ဇဝ်ဖြာ။”

27 အန် ဒွါ ခေါဆွင် တီ ဒီ ဂေ အီ ကွယ် ခဲင် မိူင် ဘေဒါအေန် ဘော ခဲင် မိူင် ရာမူတ် နာ တေတ့် တွိုန်၊ 28 မိူင် ယာတီရာ၊ မိူင် အာရော၊ မိူင် ဆီဖာမုတ်၊ မိူင် အေဆာတာမော၊ 29 မိူင် ရာခါလ၊ မိူင် အီ ကွယ် ကာတဲ ယေရာမဲအေန် ဘော မိူင် ဒူင် ကွယ် ဒူအီ အာကီနီ၊ 30 မိူင် ဟောမ၊ မိူင် ဘာအာဆာန်၊ မိူင် အာထက်၊ 31 မိူင် ဟေဘြုဝ် ဘော ဒူင် မုး မိူင် ဂေ ရဝ် အီ မုး ဒူင် ဟဲ့ ဒွိုမ် ချြီင် အာဒါဝိတ် ဘော ဂေ ဒူအီ အီ ဒူပ် အန်။ ဂေ ဒါ တာင် ခဲင် မိူင် ဂေ တီ၊ ဂေ ဘောကာဂ့လျီတ် ဟဲ့ ပွိုန် ခေါဆွင် ပီ တိုယ် အာဒါဝိတ်။