1 ဒူအီ ဖီလီထီ ဘော ဒဲ့ ခဲ့ ကွယ် ဒါ ဆိုက် ဂေ တး ကာဇု ဒီ မိူင် အေဖဲက်။ ဒူအီ အီဆာရေလ မိူဝ် ချ ခူပ် တုဝ်း အိုမ် ဒီ မိူင် ယေစာရေလ တွိုန်။ 2 ဂေ ဒါ ဘုဝ် အီ အိုပ် ဒါ ဆိုက် ဖီလီထီ၊ ဂေ ဘော ဟာဝ် ဘဲန် ဖိုင် အူ မာယဝ်း ဘော အူ ဟြဲန့်။ အာဒါဝိတ် ဂေ ဒူအီ အန် ဘော ဒူပ် ဒါ တာင် အီ စိူဝ် အာခိတ်၊ အီ ဟာဝ် ဒီ ပန် ဆိူတ် တွိုန်။ 3 ပန် တီ ဂေ ဒါ ဘုဝ် အီ အိုပ် ဒါ ဆိုက် ဒူအီ ဖီလီထီ ဘော ဒီမွှတ် တဝ်း၊ “ဒူအီ ဟဲဘြဲ ဂေ နီ၊ ဂေ ဒီ ဘူင် မာဆေ။း”

ဒါ တာင် အာခိတ် တွိုန် ဘော တဝ်း၊ “န့ နှဲန် အန် မုး အာဒါဝိတ်၊ အီ ဒွိုမ် ဒူပ် အာဆောလူ အီ မုး ခုန်ဒီခမ် ဒူအီ အီဆာရေလ တွိုန်။ အန် ဟဲ့ ကွယ် ဒူပ် အုဝ် အူ ဆီနမ် လူယ်။ ဆိန့် ဆီငဲ လေး အန် ဒူင် ကွယ် အာဆောလူ တွိုန်၊ ကော ဝီ ဇမ် ဆီငဲ အာတိုဝ် နီ၊ အုဝ် တူ ယိုဝ် နာ တူ မွှိုမ် ဒီ အန်။”

4 ဂေ ဒါ တာင် ဒူအီ ဖီလီထီ ယီ ရူ ဒီ အန် တဝ်း၊ “တဲး ဒူအီ ဝီ တီ ဝီ ဝေန့်။ တဲး အန် ဝီ ဟာဝ် ဒူင် ချ ဂေ တွိုန်၊ ဒူင် ဟဲ့ တဲး မဲ ဂေ ကွယ်။ ကွဲ့ တဲး အန် ဟာဝ် ဒူပ် အေ ဒေါ လာယ် ကာဂုဝ်း အေ နီ။ ယုဝ် အန် ဝီ ဟာဝ် ကွယ် ဘ့လာက် ရန်ဆူ အေ၊ ဒီ ဝီ ငဝ်း ယမ် အေ။ အာဝ် မိုဝ်း ပီ ဒီ ဘူင် အန် ဒဲင် တီ၊ အီ တဲး ခုန်ဒီခမ် ဝီ အိုင် အန်။ 5 ဝီ နီ၊ မုး အာဒါဝိတ်၊ ပီ ဒွိုမ် ကာဖြူမ် ဂေ ဒူအီ အီဆာရေလ ဒီ ဂါ တဝ်း မှုဝ် တွိုန်၊ ‘အာဆောလူ ငဝ်း ယမ် ဘဲန် ဟြဲန့် ဘဲန် ဟြဲန့်။ အာဒါဝိတ် ယီ ငဝ်း ယမ် ဘဲန် မှိုန့် ဘဲန် မှိုန့်။’”

6 ဂေ ဟဲ့ ဟွတ့် တဝ်း ပါယ် တီ ဒါ တာင် အာခိတ် ဘော ဒဲ့ အာဒါဝိတ် တဝ်း ဒီ အန်၊ “အုဝ် ဟဲ့ နပ် ဆီချာ၊ မဲ ဟဲ့ ဘူင် ဆိူဝ် ဆိူဝ် အာခ်ု မှာန်။ ဆေ မဲ တး ကာဂုဝ်း ဒူပ် အုဝ် နီ၊ န့ ဒီ လဝ့် နဝ်း အုဝ်။ ဆိန့် တး ဇမ် မဲ ဒူင် ကွယ် အုဝ်၊ အုဝ် မိူဝ် တူ ယိုဝ် အီ တူ မွှိုမ် ဒီ မဲ။ န့ ယီ မိုဝ်း မီ ဂေ ဒါ တာင် အီ အိုပ် အီ ဟဝ်၊ ဂေ တူ အိုင် မဲ။ 7 ကူပ် န့ ပါယ် တီ၊ မှာန့် တဲး မဲ ဝီ ဝေန့် ဒါခိုယ်။ ကွဲ့ ဘူင် တဲး ဒါ တာင် ဒူအီ ဖီလီထီ ဂေ နီ ရူ။”

8 အာဒါဝိတ် ဝီ ဒီမွှတ် ဒါ တာင် အာခိတ် တဝ်း၊ “ဆိန့် တး ကွယ် အုဝ် ဒူပ် မဲ န့ ကော ဇမ် အာတိုဝ် နီ၊ အုဝ် ဟဲ့ ဘူင် မာဆေ။း မဲ ဟဲ့ ယိုဝ် အီ တူ မွှိုမ် မာဆေ။း မှဝ် န့ ပါယ် ပီ တူ ခ့ဝါင် ဘေ ဒီ အုဝ်၊ တဲး အုဝ် ပွိုန် ဒီ ကာဂုဝ်း ဒီ ရန်ဆူ ခုန်ဒီခမ်၊ အီ မုး ခုန်ဒီခမ် အီ အိုပ် အုဝ်။း”

9 ဒါ တာင် အာခိတ် ဝီ ကာလာင် ဒီ အာဒါဝိတ် တဝ်း၊ “အုဝ် ဟဲ့ နပ်၊ အုဝ် ဟဲ့ ယွတ် ပီ ဘူင် မဲ။ န့ ဘော လဝ့် နဝ်း အုဝ်၊ န့ ဟဲ့ ပီ ပီ ဘူင် အာမူ အာမာတ် ဇဝ်ဖြာ။ မာလဲ၊ ဒါ တာင် ဒူအီ ဖီလီထီ ဂေ တွိုန်၊ ဂေ ဟဲ့ ဆုင်ဖျာတ် တဝ်း၊ ‘အာဝ် ပွိုန် ဟာဝ် ကာဂုဝ်း ဒူပ် အေ။’ 10 ကူပ် န့ ပါယ် တီ ခဲညှာ ဆိန့်ဝး စေဝ်၊ ပြဲ ဟီ ဘ့လာင်၊ ဘော မဲ ဘော ဒူအီ အီ ဒူပ် မဲ၊ တဲး ဘေ ဝီ ဝေန့် အူ ဇေန့်။”

11 ပန် တီ အာဒါဝိတ် ဂေ ဒူအီ အန် ဘော ကာဖြူမ် ဒီ ယိတ့် ဟာဝ် ဆိန့်ဝး စေဝ်။ ဒူအီ ဖီလီထီ ဂေ တွိုန် ဘော တဲး ဒါ ဆိုက် ဂေ ဟာဝ် ဒီ မိူင် ယေစာရေလ တွိုန်။