1 ဒေါ အန် တီ ဒူအီ ဖီလီထီ ဘော ဒဲ့ ခဲ့ ကွယ် ဒါ ဆိုက် ဂေ တး ကာဇု၊ တဝ်း ဒီ ကာဂုဝ်း ဒီ ဒူအီ အီဆာရေလ။ ခုန်ဒီခမ် အာခိတ် ဘော ကာလာင် ဒီ အာဒါဝိတ် တဝ်း၊ “တဲး မဲ နပ်၊ ဘော မဲ ဘော ဒူအီ မဲ၊ ဘေ လုဝ် ဟာဝ် ကာဂုဝ်း ဒူပ် အုဝ်။”

2 အာဒါဝိတ် ဝီ တဝ်း ဒီ ခုန်ဒီခမ် အာခိတ်၊ “ခါ နီ၊ မဲ ဒီ နပ် အာခ်ု မှာန် ပီ ဒီ ပါယ် အုဝ် ဒီ ဘူင်။” ဟဲ့ ဟွတ့်၊ ခုန်ဒီခမ် အာခိတ် ဝီ တဝ်း၊ “ဆေ န့ ပါယ် တီ အုဝ် ဒီ တဲး မဲ ဘဲန် ဒါ အီ အီ ဘ်ု အာဆာက် အုဝ် ဆေဆေ။”

3 ဒေါ အန် တီ အာဆာမူအေန် ဟဲ့ ဟွတ့် ယမ်။ ဒူအီ အီဆာရေလ ဘော ယာမ် က့လိုဝ်။ ဂေ ဘော ဒိုဝ်း ဒုဝ် အာဆာမူအေန်၊ ဒိပ် အန် ခဲင် မိူင် ရာမာ အီ မုး မိူင် ဒူင် ကွယ် ဘြိမ် အန်။ အာဆောလူ ဟဲ့ ဒွိုမ် ညွန် ဝဲန် ယာ ပြေ ဘော ဂေ ဒူအီ အီ ဒဲ့ ကာနမ် လူင် ခဲင် မိူင် ဘော မိူင်၊ တဲး ဂေ လေး ဟာဝ် တ မိူင်။

4 ပန် တီ ဒါ ဆိုက် ဒူအီ ဖီလီထီ ဘော တး ချ ဒီ မိူင် ဆူနိမ်။ အာဆောလူ ဘော ဒဲ့ ခဲ့ ကွယ် ဒူအီ အီဆာရေလ ဘောကာဂ့လျီတ် တး ကာဇု။ ဂေ ဘော ချ ဒဲင် နွန် ဂီလပေါ တွိုန်။ 5 အာဆောလူ ဘော ယိုဝ် ဖိုင် ဒူအီ ဖီလီထီ ဂေ တွိုန်၊ အန် ဘော မိုဝ်း နဝ်း ယုဝ် နဝ်း ဒီယေန့်။ 6 အန် ဒီမွှတ် ဒီ ဇဝ်ဖြာ။ ဇဝ်ဖြာ ယီ တူ အိုဝ် ဂြုဝ်း အန်။ အန် တူ တဲး ဂေ အိတ် မ့ဘာဝ်။ ဘော မာဝ် အူရိမ် တူ တဲး ဂေ နပ်။ ဘော ဒူအီ ဘျာန် ဂြုဝ်း ဇဝ်ဖြာ တူ နပ် ဒီ ကာလာင် မာဆေ။ 7 ပန် တီ အာဆောလူ ကာလာင် ဒီ မှာယ် အန် တဝ်း၊ “တဲး ဘေ ဟြေတ့် ယာ ကာနမ် လူင် ဒိုဝ်း တး ဒူင် ကွယ် အုဝ်။ တဲး အုဝ် ဒီမွှတ် အန်။”

မှာယ် အန် ဝီ တဝ်း၊ “ခဲင် မိူင် အိန်တောလ န့ မိုဝ်း ယာ ကာနမ် လူင် အူ ဝီ။”

8 ပန် တီ အာဆောလူ ဘော ကာပ့လု ခြိုင် အန်၊ တဲး အာရိုပ် အန် ဘ့လိူင်။ အန် ဘော ယူင့် ဒူအီ အာ ဝီ ဟာဝ် ဒူပ် အန်။ ပြဲ မိူဝ် ဟဲ့ အပ်၊ ဂေ ဘော ဟာဝ် ဇမ် ဒူင် ကွယ် ယာ ကာနမ် လူင် တွိုန်။ အာဆောလူ ဘော ဒီမွှတ် တဝ်း၊ “မှာန့် ဒီ ဘိုင် ကာနမ် အီ ကွယ် ရိုမ် ဒူပ် မဲ တီ။ မှာန့်၊ ဝီ ပီ ဒီ ကာလာင် အုဝ် ဒီ မဲ၊ တဲး မဲ ဒဲ့ အန် တး။”

9 အီဘိုန့် တွိုန် ဝီ တဝ်း၊ “မဲ ဟဲ့ နပ် ပီ ဘူင် အာဆောလူ။ အန် ဟဲ့ ဟုဝ် ယာ ပြေ ဘော ဒူအီ အီ ဒဲ့ ကာနမ်၊ တဲး ဂေ လေး ခဲင် မိူင် ဘော မိူင်။ မှဝ် န့ ပါယ် ပီ ဝီ ခြာမ် မဲ ဒီ ဒိန့် ယွတ့်၊ တဲး ဘော အုဝ် ယမ်။း”

10 အာဆောလူ ဘော ဒိူင်၊ တဲး ဘော ဇဝ်ဖြာ ထူမ်၊ တဝ်း ဒီ အန်၊ “အုဝ် တဝ်း အာခ်ု ဒီ မဲ။ ဆေ မဲ ဘူင် ပီ တဝ်း အုဝ် တီ၊ အာဝ် ဘဲန် မှာပ် ဒီ မဲ၊ အာဝ် လုဝ် ခမ် မှာပ်။”

11 အီဘိုန့် တွိုန် ပီ ဝီ ဒီမွှတ် တဝ်း၊ “မဲ ဆီ တဲး အာဆေ တး ဇမ် ဒီ နီ။း”

အာဆောလူ ဝီ တဝ်း၊ “တဲး အာဆာမူအေန် တး။”

12 အီဘိုန့် တွိုန် ဘော ယိုဝ် အာဆာမူအေန်၊ အန် ပီ ဝီ ဒတ် တာင် တဝ်း ဒီ အာဆောလူ၊ “ကူပ် န့ ပါယ် မှဝ်၊ မဲ ကာလုဝ် အုဝ်။း မဲ နီ ဟဲ့ မုး အာဆောလူ။”

13 ခုန်ဒီခမ် ဝီ ကာလာင် ဒီ အန် တဝ်း၊ “မဲ ကွဲ့ ယုဝ်၊ တဲး အုဝ် နပ် ပီ ယိုဝ် မဲ တီ။”

အီဘိုန့် တွိုန် ဝီ တဝ်း ဒီ အာဆောလူ၊ “အုဝ် ဟဲ့ ယိုဝ် ကာပြဝ် အီ ဟဲ့ လေး ဒဲင် ကာဒါယ်၊ တး ဒီ အုဝ်။”

14 ခုန်ဒီခမ် ပီ ဝီ ဒီမွှတ် တဝ်း၊ “အာရိုပ် အန်၊ န့ ပါယ် မှဝ်။း” အီဘိုန့် တွိုန် ဝီ တဝ်း၊ “န့ မုး ဒူအီ ကတ် အီ တး။ အန် စှိုပ် ဘော ဆီတုဝ် တာင်။”

ပန် တီ အာဆောလူ ဘော နပ်၊ ဟဲ့ မုး အာဆာမူအေန်။ အန် ဘော မုတ် ဂိုပ် ဒီ ကာဒါယ် အူ ဇေန့်။

15 အာဆာမူအေန် ဘော ဒီမွှတ် အာဆောလူ တဝ်း၊ “မှဝ် န့ ပါယ် ပီ ဘျိတ့် မဲ ဒီ အုဝ်၊ တဲး အုဝ် တး ဒီ နီ။း”

ဟဲ့ ဟွတ့်၊ အာဆောလူ ဝီ တဝ်း၊ “အုဝ် ဟဲ့ ဇမ် ဒုက် တာင်၊ ဟဲ့ ညှာပ် ကာဆဝ်။ ဒူအီ ဖီလီထီ ဂေ ဟဲ့ ကာဂုဝ်း ဒီ အုဝ်။ ဇဝ်ဖြာ မိူဝ် ဟဲ့ ဝဲန် အုဝ်။ ဆေ အုဝ် ဒီမွှတ် အန်၊ အန် တူ အိုဝ် ဂြုဝ်း အုဝ်။ အန် တူ တဲး ဒူအီ ဘျာန် ဂြုဝ်း ဇဝ်ဖြာ၊ ကာလာင် ဒီ အုဝ်။ မ့ဘာဝ် မိူဝ် အာဝ် ဟူ တဲး။ ကူပ် န့ ပါယ် တီ အုဝ် ဘာင် မဲ ဆာရာ တး၊ တဲး မဲ ကာလာင် နှဲ ပီ ဒီ လုဝ် ဘူင် အုဝ်။”

16 အာဆာမူအေန် ဝီ တဝ်း၊ “ဆေ ဇဝ်ဖြာ ဟဲ့ ဝဲန် မဲ၊ ဟဲ့ ဝီ ဘဲန် ရန်ဆူ ဒီ မဲ၊ မှဝ် မ့ပါယ် ပီ လုဝ် မဲ ဝီ ဒီမွှတ် အုဝ်။း 17 ဇဝ်ဖြာ ဟဲ့ ဘူင် ဒူပ် ပီ ကာလာင် အုန် အန် ဒီ အုဝ် တွိုန်။ ဇဝ်ဖြာ ဒီ ဒိုဝ်း လေး မာန် မိူင် ဒီ မဲ၊ ဝီ ဒွါ ဒီ ဒူအီ အီ ကွယ် ကာတတ် မဲ အီ မုး အာဒါဝိတ် တွိုန်။ 18 မဲ တူ ဘူင် ပီ စ်ု ဇဝ်ဖြာ မဲ ဘူင် ဒေါ ရူ ကာဆဝ် အန် ဒီ ဒူအီ အာမာလေက် တွိုန်။ ကူပ် တူ ထူမ် မဲ ဂြုဝ်း ဇဝ်ဖြာ တီ၊ အာတိုဝ် နီ မဲ ကာဒုး ဒီ ခမ် ဒုက် ဇိုဝ် နီ။ 19 ဒဲင် တီ၊ ဇဝ်ဖြာ ဒီ ဒိုဝ်း ဘော မဲ၊ ဘော ဒူအီ အီဆာရေလ၊ ဝီ ဒွါ ဘေ ဒီ ဒူအီ ဖီလီထီ တဲး ဂေ ပဲ ဘေ။ ခဲညှာ ဘော မဲ၊ ဘော ဂွန် အီမာယ် မဲ၊ ဘေ ဒီ တး ဇမ် ဒူင် ကွယ် အုဝ်။ ဇဝ်ဖြာ ဒီ ဘော ဒိုဝ်း တဲး ဒူအီ ဖီလီထီ ပွိုန် ဒီ အိုပ် ဘော ဒါ ဆိုက် ဘေ။”

20 အာဆာမူအေန် ဟဲ့ ဟွတ့် ကာလာင် ဂြုဝ်း တီ၊ အာဆောလူ ဘော ကေး၊ အိတ် ကာနှဲပ် ဒီ ကာဒါယ်။ အန် ဘော ယုဝ် ကာဆဝ် ကူပ် ဂြုဝ်း ပီ ကာလာင် အာဆာမူအေန် တွိုန်။ ကူပ် တူ ဟူမ် အန် မာဆေ အူ မှိုဝ် ဒီ အူ ဆီငဲ၊ အန် ဟူ မိုဝ်း ဟဲန့် မာဆေ။

21 ယာ ကာနမ် လူင် တွိုန် ဝီ တး ဒူင် ကွယ် အာဆောလူ။ အန် ဘော ယိုဝ် ဟဲ့ ဒုက် ဟဲ့ ညှာပ် ကာဆဝ် ဒီ နဝ်း အာဆောလူ၊ အန် ဘော တဝ်း၊ “မဲ ယွတ်၊ အုဝ် ဟဲ့ ထူမ် ဂြုဝ်း မဲ ဒါ ကာညာ။ အုဝ် မိူဝ် တူ ယုဝ် ဒီ ယမ်။ အုဝ် မိူဝ် ထူမ် ဒူပ် ပီ ကာလာင် မဲ ဒီ အုဝ်။ 22 ခုဝ်၊ ဒေါ တီ နီ၊ မှာန့် တဲး မဲ ဝီ ထူမ် ဂြုဝ်း အုဝ်။ တဲး အုဝ် ပွိုန် ဒီ ဒိုဝ်း ပီ ဒီ ဟူမ် အီ စဲက်၊ ဘ့လေး တဲး မဲ ဟူမ်။ တဲး မဲ ဝီ မိုဝ်း ဟဲန့်၊ ဝီ ပွိုန် ဒီ ဟာဝ်။”

23 ဟဲ့ ဟွတ့်၊ အန် ဝီ တဝ်း၊ “အုဝ် တူ ဟူမ်။” အီ မုး မှာယ် အန် ဂေ ဒူအီ အန် ဘော အီဘိုန့် တွိုန်၊ ဂေ ဘော လှဝ် နဝ်း အန်။ ဟဲ့ ဟွတ့်၊ အန် ဘော ထူမ် ဂြုဝ်း ဂေ။ အန် ဘော ယိတ့် ဒီ ကာဒါယ် တွိုန်၊ ဝီ ဟာဝ် တုတ့် ဒဲင် ကာစှူင့်။

24 အီဘိုန့် တွိုန် ယီ မိုဝ်း ဒီ ဟျီင် မာမက် အီ ဂ့လန့်၊ အီ စှိတ် အူ ဒုဝ်။ အန် ဘော ပီခြန် အန် ဟာဝ် ငဝ်း မာမက် တီ။ အန် ဘော ဒိုဝ်း ကာပဲ့ ခါမုန်၊ ဘော ကာဝ်ု၊ တူ ဟပ် ဆီနမ် ဘြး။ အန် ဘော တာတ် ဒီ ငဝ်။ 25 ဟဲ့ ဟွတ့် အန် ဘော ဒိုဝ်း တး ဘ့လေး နာ အာတ့် အာဆောလူ ဂေ ဒူအီ အန်၊ တဲး ဂေ ဟူမ်။ ဂေ ဟဲ့ ဟွတ့် ဟူမ်၊ ဂေ ဘော ဝီ ဝေန့် ခဲင် မှိုဝ် တီ။