1 ပန် တီ အာဒါဝိတ် ဝီ ကာဖာ ခဲင် နဝ်း အန် တဝ်း၊ “အုဝ် ယုဝ် အူ ဆီငဲ အာဆောလူ ဘော ပွိုန် ဒီ ငဝ်း အုဝ်။ ဆေ အုဝ် တဝ် ဟာဝ် ခဲင် မိူင် ဖီလီထီ၊ န့ ဒီ မုး န့ ဒီ မွှိုမ်။ ဆေ အုဝ် တဝ် ဟာဝ် ဒီ တီ၊ အာဆောလူ မိူဝ် ဒီ စူ ဟြေတ့် အုဝ် ခဲင် ကာဒါယ် ဒူအီ အီဆာရေလ နီ။ အုဝ် မိူဝ် ဒီ ပွိုန် ဘ့လေး နဝ်း၊ ဘ့လေး ဖွိုမ် အုဝ်။ အုဝ် ဒီ ဘော လွတ် တ အန်။”

2 ခုဝ်၊ အာဒါဝိတ် ဘော ဒူအီ အန် ဒဝ် မာယဝ်း ဝီ တွိုန် ဘော ဝီ ဟာဝ် ဒူင် ကွယ် ခုန်ဒီခမ် အာခိတ် အီ မုး ဂွန် အာမာအောခ၊ အီ အိုပ် မိူင် ဂါထ တွိုန်။ 3 အာဒါဝိတ် ဂေ ဒူအီ အန် ဂေ ဒွန် အီ ဘော ယူင့် အီဘိုန့် အန် ဂေ ဂွန် အန် ဟာဝ် ကွယ် ဒူင် ကွယ် ခုန်ဒီခမ် အာခိတ် ခဲင် မိူင် ဂါထ တွိုန်။ ဘော အီဘိုန့် အာဒါဝိတ် အာ ဝီ တွိုန် အီ စိူဝ် နာင် အေဟီနွင်၊ အီ မုး ဒူအီ မိူင် ယေစာရေလ ဘော နာင် အေဖီဂေလာ အီ မုး ဒူအီ မိူင် ဂါမေလ၊ အီ မုး အီဘိုန့် အာနာဘာလ တွိုန်၊ ဂါယ် မိူဝ် ဟဲ့ ကွယ် ဒူပ် အန်။ 4 အီ ဟဝ် ဘော ကာလာင် ဒီ အာဆောလူ လွင် အာဒါဝိတ် ဟဲ့ တဝ် ဟာဝ် ဒီ မိူင် ဂါထ။ ဝါယ် တီ အာဆောလူ အာဝ် ဟူ ဒူပ် ဒီ ဟြေတ့် အန်။

5 အာဒါဝိတ် ကာလာင် ဒီ ခုန်ဒီခမ် အာခိတ် တွိုန် တဝ်း၊ “ဆေ န့ လဝ့် နဝ်း မဲ၊ မှာန့် တဲး မဲ ဒွါ ကာဒါယ် ဒူင် ဒီ ကွယ် ခဲင် မိူင် အူ မိူင်၊ တဲး အုဝ် ပွိုန် ဒီ ကွယ်။ အာဝ် ကာအာပ် အုဝ် ကွယ် ဒီ ရိုမ် ဒူပ် မဲ ခဲင် မိူင် မဲ ခုန်ဒီခမ် နီ။”

6 ခုဝ်၊ ဆီငဲ တီ ခုန်ဒီခမ် အာခိတ် ဘော ဒွါ မိူင် ဇီကာလာတ် ဒီ အန်။ ဆိန့် ဒေါ အန် တီ မိူင် ဇီကာလာတ် ဟဲ့ ဘဲန် မိူင် ပီ အိုပ် ခုန်ဒီခမ် အီ အိုပ် မိူင် ယူဒါ ကော ဇမ် အာတိုဝ်။ 7 အာဒါဝိတ် ဘော ကွယ် ခဲင် မိူင် ဂေ ဒူအီ ဖီလီထီ အာဒါ အူ ဆီနမ် ဒီ ဖွုန် မာဂျီန်။

8 အူ ဇေန့် အာဒါဝိတ် ဂေ ဒူအီ အန် တွိုန် ဘော ဟာဝ် ဇူန် ဒူအီ ဂေဆူရာ၊ ဒူအီ ကေန်ရာစီ ဘော ဂေ ဒူအီ အာမာလေက်။ ဆိန့် အာတ့် တီ ဒူအီ အာမျုဝ် ဂေ တီ၊ ဂေ မုး ဒူအီ အီ ကွယ် ခဲင် မိူင် တီ၊ ဂေ ကွယ် စုး ဒီ န့တေန့် အီ ဟာဝ် ဒီ မိူင် ဆူရာ ကော ဇမ် မိူင် အဲဂိုပ်။ 9 အာဒါဝိတ် ဘော ကာဂုဝ်း ပျာတ့် အူ ပ့လုဝ့်၊ ဘော အီဘိုန့် ဘော အီမာယ် အန် အာဝ် ဟူ တဲး လွတ် ခေါ အူ ဝီ။ အန် ဘော ဒိုဝ်း မာဘူ၊ မာမက်၊ မာလုဝ်၊ မင်ပြွင့် ကာဟာတ့် ဘော ခြိုင် ဂေ၊ ဝီ ဝေန့် ဒူင် ကွယ် ခုန်ဒီခမ် အာခိတ် တွိုန်။

10 ဆေ ခုန်ဒီခမ် အာခိတ် ဘော ဒီမွှတ် အာဒါဝိတ် တဝ်း၊ “အာတိုဝ် နီ မဲ ဟဲ့ တး ကာဂုဝ်း ဒီ မှဝ်။း” အာဒါဝိတ် ဝီ တဝ်း၊ “အုဝ် ဟဲ့ ဟာဝ် ကာဂုဝ်း နာ တေတ့် မိူင် ယူဒါ။” ဆေ အာဝ် ပါယ် တီ၊ အန် ဘော တဝ်း၊ “နာ တေတ့် မိူင် ယေရာမေအေမ်၊” ဘော “နာ တေတ့် မိူင် ဂေ ဒူအီ အာကီနီ။” 11 အာဒါဝိတ် တူ တဲး န့ ဆီ မိုဝ်း အီဘိုန့် အီမာယ် ခေါ အူ ဝီ အီ ပွိုန် ဒီ ဒိုဝ်း တး ဒီ မိူင် ဂါထ တွိုန်။ ခုဝ်၊ အန် တဝ်း၊ “ယုဝ် ဂေ ကာလာင် လွင် ပဲ့ ဟဲ့ ဘူင် အုဝ် နီ ဘော တဝ်း၊ ‘အာဒါဝိတ် ဟဲ့ ဘူင် ပါယ် နီ ပါယ် နီ။’” ဒေါ ကွယ် အန် ခဲင် မိူင် ဖီလီထီ တွိုန်၊ အာဒါဝိတ် နပ် ဒီ ဘူင် ပါယ် တီ။ 12 ခုန်ဒီခမ် အာခိတ် ဘော ညှိုမ် ဂြုဝ်း အာဒါဝိတ်။ အန် တဝ်း၊ “အန် ဟဲ့ ဘူင် ကော ဇမ် ဘ့လဝ့် ဒူအီ အီဆာရေလ၊ တဲး ဂေ ကော ကာအိး အန်။ ကူပ် အန် ပါယ် နီ၊ အန် လုဝ် ခမ် ဒီ ဘဲန် မှာယ် အုဝ် ဘော စုဝ် အန်။”