1 ပန် တီ န့ ဝီ မိုဝ်း ဒူအီ အီ ကွယ် ခဲင် မိူင် စီဖ။ ဂေ ဝီ တး ဒူင် ကွယ် အာဆောလူ ဒီ မိူင် ဂီဘီယာ တွိုန် တဝ်း၊ “အာဒါဝိတ် ဝီ ချြီင် အန် ဒီ နွန် ဟာခီလ အီ ကွယ် နာ အာတ့် ဒူင် စိူဝ် ယေဆီမူန် တွိုန်။”

2 အာဆောလူ ဘော ရဝ်း ဒူအီ အီဆာရေလ အူယ် ဟြဲန့် ဝီ တဲး ဂေ ဒူပ် အန် ဟာဝ် ခဲင် ပြဲ စီဖ တွိုန်၊ တဲး ဂေ ဟြေတ့် အာဒါဝိတ် ဒီ တီ။ 3 အာဆောလူ ဘော ချ ဒီ နွန် ဟာခီလ အီ ကွယ် နာ အာတ့် ယေဆီမူန် ဒီ ခူပ် န့တေန့် တွိုန်။ အာဒါဝိတ် မိူဝ် ကွယ် ခဲင် ပြဲ တီ။ အာဒါဝိတ် ဘော နပ်၊ အာဆောလူ ဟဲ့ တး ဟြေတ့် အန်။ 4 အန် ဘော စ်ု ဒူအီ ဟာဝ် ချွင် ဒီ ယွတ်၊ တဲး ဂေ ကော နပ်၊ အာဆောလူ ဟဲ့ တး ဇမ် အာခ်ု မှာန်။

5 အာဒါဝိတ် ဘော ယိတ့် ဟာဝ် ဇမ် ဒူင် ချ အာဆောလူ။ အန် ဘော ယွတ် ဒူင် အိတ် အာဆောလူ ဂါယ် ဒါ ဘုဝ် အီ အိုပ် ဒါ ဆိုက် အန်။ ဒါ ဘုဝ် တီ အန် စိူဝ် အာဘာနာ။ အန် မုး ဂွန် အာနေရ။ အာဆောလူ ယီ အိတ် ဒူင် ချ ဂေ တီ။ ဂေ ဒါ ဆိုက် အန် ဘော ကွယ် အိတ် ကော ရူပ် အန်။

6 အာဒါဝိတ် ဘော ဒီမွှတ် အာဟီမာလေက် အီ မုး ဒူအီ အာမျုဝ် ဟေထိတ်။ အန် ဒီမွှတ် ဘော အာဖီဆေ အီ မုး ဝါ အာယောဖ၊ အီ မုး ဂွန် နာင် စေရူယာ။ အန် တဝ်း၊ “အာဆေ ဒီ ဒူပ် အုဝ် လူင် ဒူင် ကွယ် အာဆောလူ တွိုန်။း”

အာဖီဆေ ဝီ တဝ်း၊ “အုဝ် အီ ဒီ ဒူပ် မဲ။”

7 အာဒါဝိတ် ဂါယ် အာဖီဆေ ဘော ဟာဝ် ဒူင် ကွယ် အာဆောလူ ခဲင် မှိုဝ် တီ။ ဂါယ် ဘော ယိုဝ် အာဆောလူ အိတ် ဒူင် ချ အန်။ ဘ့လာ လျီး အန်၊ အန် ဆိ ကာစွင့် ဒီ ကာဒါယ် ခူပ် ဂိန့် အန်။ အာဘာနာ ဘော ဒူအီ ဂေ တွိုန် အိတ် ရူပ် အန်။

8 အာဖီဆေ တဝ်း ဒီ အာဒါဝိတ်၊ “အာတိုဝ် နီ ဇဝ်ဖြာ ဒီ တဲး မဲ ပဲ ရန်ဆူ မဲ။ ခုဝ်၊ တဲး မဲ တဲး အုဝ် ဒိုဝ်း ဘ့လာ လျီး အုဝ်၊ ဆတ် အူ ဇေန့်၊ တဲး အန် ကာလှုး ဇမ် ကာဒါယ်။ အာဝ် လုဝ် ဝီ ဆတ် ပေါ အူ ဇေန့်။”

9 အာဒါဝိတ် ဝီ ကာလာင် ဒီ အာဖီဆေ တဝ်း၊ “ကွဲ့ ငဝ်း ဝဲန် အန်။ အန် မုး ဒူအီ ပီ ဖဝ်း ဇဝ်ဖြာ နာမန် ဒီ ဂိန့် အန်။ အာဆေ ငဝ်း အန်၊ န့ ဒီ ဘော ဘဲန် မှာပ် ဒီ အန်။” 10 ပန် တီ အာဒါဝိတ် ဝီ ကာလာင် တဝ်း၊ “အုဝ် တဝ်း အာခ်ု မှာန် ဒီ မဲ။ ဇဝ်ဖြာ အီ ဒီ ငဝ်း အန်။ ဆေ အာဝ် ကူပ် မုး အန် ယမ် ဒါခိုယ်၊ အန် ဒီ ယမ် ဒေါ ကာဂုဝ်း အန်။ 11 န့ ယီ မုး အုဝ်၊ ကူပ် ဟဲ့ တဲး ဇဝ်ဖြာ အီ ဖဝ်း နာမန် ဒီ ဂိန့် အန်၊ အုဝ် တူ ဘူင် နာ တူ မွှိုမ် ဒီ အန် ဒေါ မှဝ်။ ခုဝ်၊ ဒေါ တီ နီ တဲး မဲ ဒိုဝ်း ဘ့လာ လျီး ဘော ကာပဝ် အိုမ် အီ ကွယ် ခူပ် ဂိန့် အန်။ ဟဲ့ ဟွတ့်၊ တဲး အာယ် ဟာဝ် ဝေန့်။”

12 ပန် တီ အာဒါဝိတ် ဘော ဒိုဝ်း ဟာဝ် ဘ့လာ လျီး ဘော ကာပဝ် အိုမ် အီ ကွယ် ခူပ် ဂိန့် အာဆောလူ တွိုန်။ အာဝ် မိုဝ်း ခေါ အူ ဝီ အီ နပ် လွင် အန် တီ။ အာဝ် မိုဝ်း အီ န့ဆိုဝ်း ခေါ အူ ဝီ။ ခုဝ်၊ ဇဝ်ဖြာ ဟဲ့ တဲး ဂေ အိတ် တာင်၊ အိတ် လိုက် ဒွန် ဝီ။

13 အန် ဟဲ့ ဟွတ့် ဟာဝ်၊ အာဒါဝိတ် ဘော ကာလုဝ်း ဟာဝ် နာ ဒွယ် ဒီလယ့် တွိုန်။ အန် ဘော ဟာဝ် ကွယ် ဒီ နွန် အီ ရာမ် ကာတူင့်။ နာ ကာတဲ ဂေ တီ၊ န့ ဆီ ကာဝဝ်း။ 14 အာဒါဝိတ် ဘော ဒဲ့ ဒူအီ ဂေ တွိုန်။ အန် ဘော ဒီမွှတ် အာဘာနာ အီ မုး ဂွန် အာနေရ။ အန် တဝ်း၊ “အိုယ် အာဘာနာ၊ မဲ တူ အိုဝ် ဂြုဝ်း အုဝ်။း”

အာဘာနာ ဝီ တဝ်း၊ “အာဆေ အီ တး ဒဲ့ ခုန်ဒီခမ်။း”

15 အာဒါဝိတ် ဝီ တဝ်း ဒီ အာဘာနာ၊ “အုဝ် ထာင်၊ မဲ မုး အီမာယ်။ ခဲင် ဒူအီ အီဆာရေလ အာဝ် မိုဝ်း အာဆေ အီ ဟဲ့ ပီ မဲ။ ကူပ် န့ ပါယ် မှဝ်၊ မဲ တူ ဘ်ု ဆီချာ ခုန်ဒီခမ် အီ အိုပ် မဲ။း ဒူအီ အူ ဝီ ဟဲ့ တး တဝ်း ဒီ ငဝ်း ယမ် ခုန်ဒီခမ် မဲ။ 16 ပဲ့ ဟဲ့ ဘူင် မဲ နီ အာဝ် မွှိုမ်။ ဟဲ့ မှာန် အာခါခ်ု၊ ဘော မဲ ဘော ဒါ ဆိုက် မဲ ဟဲ့ ကာအာပ် ယမ် ကူပ် တူ ဘ်ု ဆီချာ မဲ ဒါ ကာညာ မဲ အီ မုး ဒူအီ ပဲ့ ဟဲ့ ဖဝ်း ဇဝ်ဖြာ နာမန် ဒီ ဂိန့် အန်။ ဒေါ တီ နီ၊ မဲ ယွတ်၊ ဘ့လာ လျီး ဂါယ် ကာပဝ် အိုမ် ပီ တာ ခုန်ဒီခမ်၊ အီ ကွယ် ခူပ် ဂိန့် အန် တွိုန်၊ န့ ဆီ မိုဝ်း၊ အာဝ် မိုဝ်း။း”

17 အာဆောလူ ဘော နပ်၊ န့ ဟဲ့ မုး ဂြုဝ်း အာဒါဝိတ်။ အန် ဝီ တဝ်း၊ “အိုယ် ဂွန် အုဝ် အာဒါဝိတ်၊ ဟဲ့ မုး ဂြုဝ်း မဲ။း” အာဒါဝိတ် ပီ ဝီ တဝ်း၊ “ဟဲ့ မုး ဂြုဝ်း အုဝ်၊ မဲ ခုန်ဒီခမ် အီ အိုပ် အုဝ်။ 18 ကူပ် န့ ပါယ် မှဝ်၊ မဲ ဒါ ကာညာ အုဝ် ဟြေတ့် အုဝ်။း မာဆေ ပီ ဘူင် အုဝ်။း မှာပ် မာဆေ ပီ ဘူင် အုဝ်။း 19 ဒေါ တီ နီ မဲ ခုန်ဒီခမ်၊ တဲး မဲ ထူမ် ဂြုဝ်း အုဝ်။ ဆေ ဇဝ်ဖြာ ဟဲ့ တဲး မဲ ကာခဲန့် ဒီ အုဝ်၊ မှာန့် တဲး ဇဝ်ဖြာ ဒိုဝ်း ပီလှူ အုဝ်။ ဆေ န့ ယီ မုး ဒူအီ အီ တဲး မဲ ကာခဲန့် ဒီ အုဝ်၊ တဲး ဇဝ်ဖြာ ဒိူင် ဂေ။ ဂေ ဟဲ့ ဟုဝ် လေး အုဝ်၊ ကွဲ့ တဲး အုဝ် ကွယ် ဒဲင် ကာဒါယ် ပီ ဒွါ ဇဝ်ဖြာ ဒီ ဂုန့် အုဝ်။ ဂေ ဘော တဝ်း၊ ‘လေး ဟာဝ်၊ ဝီ ကြိုပ် ဇဝ် ပီ ကြိုပ် အီ ဟဝ်။’ 20 ခုဝ်၊ ဒေါ တီ နီ အုဝ် မှာန့်၊ ကွဲ့ တဲး အုဝ် ယမ် ကာတူင့် ဒူင် ကွယ် ဇဝ်ဖြာ။ မဲ ခုန်ဒီခမ် အီဆာရေလ၊ မဲ ဟဲ့ လေး ဟြေတ့် အုဝ်။ န့ ပီ မဲ ဟြေတ့် မာဆီဒျီန်။ ဘေ ဘော ဟြေတ့် အုဝ် ပီ ဘေ ဒူပ် ဒီ မှေတ့် မာဒီကုတ်။”

21 အာဆောလူ ဝီ တဝ်း၊ “အုဝ် ဟဲ့ ဟွတ့် လုတ့်။ အိုယ် မဲ ဂွန် အုဝ် အာဒါဝိတ်၊ တဲး မဲ ဝီ တး။ ကူပ် ဟဲ့ ကာဝေ မဲ ဒီ အုဝ် အာတိုဝ် နီ၊ အုဝ် မိူဝ် ဟူ ဘူင် နာ တူ မွှိုမ် ဒီ မဲ ဝါယ် နီ။ အုဝ် ဟဲ့ ဘူင် နာ မိူက်၊ ဟဲ့ လုတ့် ကာဆဝ်။”

22 အာဒါဝိတ် ဝီ တဝ်း၊ “အိုယ် မဲ ခုန်ဒီခမ်၊ မဲ ယွတ်၊ ဘ့လာ လျီး မဲ အီ ကွယ် ဒီ ဒဲ အုဝ် နီ၊ တဲး မဲ စ်ု ဂွန် ဒီရွယ် အူ ဝီ တး ဒိုဝ်း ဒီ အုဝ်။ 23 ဇဝ်ဖြာ ဒီ ဒွါ အာဂျိုဝ် ဒွန် အီ အီ မိုဝ်း နဝ်း ဆိူဝ် နဝ်း မှာန်။ ဇဝ်ဖြာ ဟဲ့ အာပ် မဲ ဒီ အုဝ် အာတိုဝ် နီ။ အုဝ် ယီ တူ ဘူင် မာဆေ ဒီ မဲ အီ မုး ဒူအီ ပဲ့ ဟဲ့ ဖဝ်း ဇဝ်ဖြာ နာမန် ဒီ ဂိန့် အန်။ 24 မဲ ယွတ်၊ အုဝ် ဟဲ့ ကာဝေ အာဆာက် မဲ အာတိုဝ် နီ။ အုဝ် ဝီ မှာန့်၊ တဲး ဇဝ်ဖြာ ဘော ကာဝေ အာဆာက် အုဝ်၊ ကွဲ့ တဲး အုဝ် ကာဒုး ဒုက် ဒွန် မျုဝ်။”

25 အာဆောလူ ဝီ တဝ်း ဒီ အာဒါဝိတ်၊ “အိုယ် မဲ ဂွန် အုဝ် အီ စိူဝ် အာဒါဝိတ်၊ မဲ ဒီ ဘူင် အီ ခိုက်ခမ် ခမ် ဘဲန် မျုဝ် ဘဲန် မျုဝ်။ ပီ ဒီ ဘူင် မဲ ဒွန် မျုဝ်၊ န့ ဒီ အွင်။”

ဟဲ့ ဟွတ့် ပန် တီ အာဒါဝိတ် ဘော လေး ဟာဝ်။ အာဆောလူ မိူဝ် ဘော ဝီ ဝေန့် ဒီ ကာင် အန်။